ಬೆಂಗಳೂರು: ಬೆಕ್ಕು ಯಾರಿಗೆ ತಾನೆ ಇಷ್ಟ ಇಲ್ಲ ಹೇಳಿ? ಅತ್ಯಂತ ಹೆಚ್ಚು ಜನರು ಇಷ್ಟಪಡುವ ಸಾಕು ಪ್ರಾಣಿಗಳ ಪೈಕಿ ಬೆಕ್ಕು ಕೂಡ ಒಂದು. ಬೆಕ್ಕಿನ ಕುರಿತಾದ ಸಾಕಷ್ಟು ವಿಡಿಯೊಗಳು ಇಂಟರ್‌ನೆಟ್‌ನಲ್ಲಿ ಕಾಣ ಸಿಗುತ್ತವೆ. ಏನಾದರೊಂದು ತರ್ಲೆ ಮಾಡಲು ಹೋಗಿ ಸಿಕ್ಕಿ ಬೀಳುವ ಮಾರ್ಜಾಲದ ಆಟಕ್ಕೆ ಮನ ಸೋಲದವರಿಲ್ಲ. ಇದೀಗ ವೈರಲ್‌ ಆಗಿರುವ ಈ ವಿಡಿಯೊ (Viral Video) ಕೂಡ ಹಲವರ ಗಮನ ಸೆಳೆದಿದೆ. ತನ್ನ ಗೆಳೆಯ ಶ್ವಾನವನ್ನು ತಾನು ಬಿಟ್ಟು ಇತರರು ಸ್ಪರ್ಶಿಸಬಾರದು ಎನ್ನುವ ಈ ವಿಡಿಯೊ ಈ ಬೆಕ್ಕಿನಷ್ಟೇ ಮುದ್ದಾಗಿದೆ.
ವಿಡಿಯೊದಲ್ಲೇನಿದೆ?
ಒಂದು ಮುದ್ದಾದ ನಾಯಿಯೊಂದು ತನ್ನ ಕಾಲುಗಳನ್ನು ಚಾಚಿ ಮಲಗಿದೆ. ಅದರ ಕಾಲಿನ ಮೇಲೆ ಬಿಳಿ ಬೆಕ್ಕು ವಿಶ್ರಾಂತಿ ಪಡೆಯುತ್ತಿದೆ. ಆಗ ವ್ಯಕ್ತಿಯೊಬ್ಬರು ನಾಯಿಯ ಕಾಲನ್ನು ಸ್ಪರ್ಶಿಸುತ್ತಾರೆ. ಇದು ಬೆಕ್ಕಿಗೆ ಕೋಪ ತರಿಸುತ್ತದೆ. ತನ್ನ ಗೆಳೆಯನನ್ನು ಇತರರು ಸ್ಪರ್ಶಿಸುವುದು ಅದಕ್ಕೆ ಇಷ್ಟವಾಗುವುದಿಲ್ಲ. ಹೀಗಾಗಿ ಕೈ ಮೇಲೆ ಎತ್ತಿ ವಿರೋಧ ವ್ಯಕ್ತಪಡಿಸುತ್ತದೆ. ಆ ವ್ಯಕ್ತಿ ಮತ್ತೆ ಶ್ವಾನ ಮುಟ್ಟಲು ಪ್ರಯತ್ನಿಸಿದಾಗಲೂ ಬೆಕ್ಕು ಕೆರಳಿ ಬಿಡುತ್ತದೆ. ಇತ್ತ ಬೇರೆಡೆ ನೋಡುತ್ತಿದ್ದ ಶ್ವಾನ ಕೂಡ ಬೆಕ್ಕು ವಿಚಲಿತವಾದಾಗ ಏನಾಯ್ತು ಎನ್ನುವಂತೆ ಗಾಬರಿಯಿಂದ ಬೀರುವ ನೋಟವೂ ಹೃದಯಸ್ಪರ್ಶಿಯಾಗಿದೆ. ತಾಯಿಯೊಬ್ಬಳು ಪುಟ್ಟ ಮಗುವಿಗೆ ಏನಾಯ್ತು ಎಂದು ಕಾಳಜಿಯಿಂದ ಗಮನ ಹರಿಸುವ ಸಂದರ್ಭವನ್ನು ಇದು ನೆನಪಿಸುತ್ತದೆ. ಸದ್ಯ ಈ ವಿಡಿಯೊವನ್ನು ಅನೇಕರು ಮೆಚ್ಚಿದ್ದಾರೆ. ಶ್ವಾನ-ಬೆಕ್ಕಿನ ಗೆಳೆತನಕ್ಕೆ ಹಲವರು ಫಿದಾ ಆಗಿದ್ದಾರೆ. ಎಕ್ಸ್‌ನಲ್ಲಿ ಹಂಚಿಕೊಳ್ಳಲಾದ ಈ ವಿಡಿಯೊವನ್ನು ಈಗಾಗಲೇ 5 ಲಕ್ಷಕ್ಕಿತಂತ ಅಧಿಕ ಮಂದಿ ವೀಕ್ಷಿಸಿದ್ದಾರೆ.
Do not touch..🐈🐾🐕😂😂 pic.twitter.com/Y0cKK9OM3g
— 𝕐o̴g̴ (@Yoda4ever) October 21, 2023
ನೆಟ್ಟಿಗರ ಪ್ರತಿಕ್ರಿಯೆ
ಬೆಕ್ಕಿನ ನಡೆಯನ್ನು ಹಲವರು ಮುದ್ದಾಗಿದೆ ಎಂದು ಬಣ್ಣಿಸಿದ್ದಾರೆ. ಕೆಲವರು ಬೆಕ್ಕಿನಲ್ಲಿ ಪೊಸೆಸಿವ್‌ನೆಸ್‌ ಗುಣ ಇದೆ ಎಂದರೆ ಇನ್ನು ಕೆಲವರು ತನ್ನ ಹೆಳೆಯನ್ನು ಇತರರಿಂದ ರಕ್ಷಿಸಲು ಮುಂದಾಗಿದೆ ಎಂದಿದ್ದಾರೆ. “ಅವನು ನನ್ನವನು. ಎಲ್ಲವೂ ನನ್ನದು. ಅವನು ಕೂಡ ನನ್ನನ್ನು ಪ್ರೀತಿಸುತ್ತಾನೆʼʼ ಎಂದು ಬೆಕ್ಕು ಹೇಳುವಂತಿದೆ ಎಂದು ಒಬ್ಬರು ಕಮೆಂಟ್‌ ಮಾಡಿದ್ದಾರೆ. “ಬೆಕ್ಕು ಮತ್ತು ಶ್ವಾನದ ಸುಂದರ ಸ್ನೇಹ ಸಂಬಂಧʼʼ ಎಂದು ಇನ್ನೊಬ್ಬರು ಈ ದೃಶ್ಯವನ್ನು ವರ್ಣಿಸಿದ್ದಾರೆ. ಗೆಳೆತನ ಎಂದರೆ ಹೀಗಿರಬೇಕು ಎಂದು ಹಲವರು ಉದ್ಘರಿಸಿದ್ದಾರೆ.
This is what jealousy looks like.. 😅 pic.twitter.com/yFRk7mmzfv
— Buitengebieden (@buitengebieden) October 21, 2023
ಪೊಸೆಸಿವ್‌ನೆಸ್‌ ಗುಣದ ಇನ್ನೊಂದು ಬೆಕ್ಕು ನೋಡಿ
ಅಸೂಯೆಗೆ ಇನ್ನೊಂದು ಹೆಸರೇ ಬೆಕ್ಕು ಎನ್ನುವುದರಲ್ಲಿ ಸಂಶಯವಿಲ್ಲ. ಅದನ್ನು ಸಮರ್ಥಿಸುವಂತೆ ಇನ್ನೊಂದು ವಿಡಿಯೊ ಕೂಡ ವೈರಲ್‌ ಆಗಿದೆ. ಸೋಫಾದಲ್ಲಿ ವ್ಯಕ್ತಿಯೊಬ್ಬರು ಕುಳಿತಿದ್ದಾರೆ. ಅವರು ತೊಡೆಯ ಮೇಲೆ ಬೆಕ್ಕೊಂದನ್ನು ಕೂರಿಸಿ ಅದರ ತಲೆಯನ್ನು ಮೃದುವಾಗಿ ಸವರುತ್ತಿದ್ದಾರೆ. ಇತ್ತ ಸೋಫಾದ ಅಂಚಿನಲ್ಲಿ ಕುಳಿತ ಇನ್ನೊಂದು ಬೆಕ್ಕು ಈ ದೃಶ್ಯವನ್ನು ಅಸೂಯೆಭರಿತ ಕಣ್ಣಿನಿಂದ ನೋಡುತ್ತದೆ. ಈ ಚಿಕ್ಕ ವಿಡಿಯೊ ಕೂಡ ನೆಟ್ಟಿಗರ ಗಮನ ಸೆಳೆಯುತ್ತಿದೆ. ಈಗಾಗಲೇ ಈ ವಿಡಿಯೊವನ್ನು 7 ಲಕ್ಷಕ್ಕಿಂತ ಅಧಿಕ ಮಂದಿ ವೀಕ್ಷಿಸಿದ್ದಾರೆ. ಬೆಕ್ಕಿನ ಎಕ್ಸ್‌ಪ್ರೆಶನ್‌ ಹಲವರ ಗಮನ ಸೆಳೆದಿದೆ.
ಇದನ್ನೂ ಓದಿ: Viral Video: ಗೂಳಿ ಜತೆ ಜಗಳಕ್ಕೆ ನಿಂತ ಕುಡುಕನ ಪಾಡು ಏನಾಯ್ತು?; ರಿಯಲ್‌ ‘ಬಾಹುಬಲಿ’ ದೃಶ್ಯ ಇಲ್ಲಿದೆ