ಲಕ್ನೋ: ಈ ಸರ್ಕಾರಿ ಕಚೇರಿಯಲ್ಲಿ ಆಫೀಸರ್‌ ಒಬ್ಬರಿದ್ದಾರೆ. ಅವರು ಕೆಲಸದ ವಿಷಯದಲ್ಲಿ ತುಂಬಾ ಶಿಸ್ತು. ಕಡತಗಳನ್ನೆಲ್ಲ ಬೇಗ ಬೇಗ ಪರಿಶೀಲಿಸುತ್ತಾರೆ. ಲಂಚ ಕೊಟ್ಟರೆ ಮುಟ್ಟುವುದು ಬಿಡಿ, ಕಣ್ಣೆತ್ತಿಯೂ ನೋಡುವುದಿಲ್ಲ. ಅದರಲ್ಲೂ ಕೆಲಸದ ಮಧ್ಯೆ ಒಡ್ಡುವ ಆಮಿಷ ಯಾವುದೂ ಅವರ ಗಮನಕ್ಕೇ ಬರುವುದಿಲ್ಲ. ಅರೇ! ಇದ್ಯಾರು ಇಂತಹ ಮಾದರಿ ಅಧಿಕಾರಿ? ಅವರು ಇರೋದು ಎಲ್ಲಿ? ಎಂದು ಆಲೋಚಿಸುತ್ತಿದ್ದೀರಾ? ಈ ಕಹಾನಿಗೊಂದು ಟ್ವಿಸ್ಟ್‌ ಇದೆ. ಈ ಆಫೀಸರ್‌ ಒಂದು ಮಂಗ! ಸದ್ಯ ಮಂಗವೊಂದು ಸರ್ಕಾರಿ ಕಚೇರಿಯ ಟೇಬಲ್‌ ಮೇಲೆ ಕುಳಿತು ಕಡತಗಳನ್ನು ಬಿಡಿಸಿ ನೋಡುತ್ತಿರುವ ವಿಡಿಯೊ ವೈರಲ್‌ (Viral Video) ಆಗಿದೆ.
ಮೂಗಿನ ಮೇಲೆ ಬೆರಳಿಟ್ಟ ನೆಟ್ಟಿಗರು
ಎಕ್ಸ್‌ನಲ್ಲಿ ಹಂಚಿಕೊಳ್ಳಲಾದ ಈ ವಿಡಿಯೊ ಇದೀಗ ಎಲ್ಲೆಡೆ ಹರಿದಾಡುತ್ತಿದೆ. ʼಮಂಗನಿಂದ ಮಾನವʼ ಎನ್ನುವ ಮಾತಿದೆ. ಅದನ್ನು ಸಾಬೀತುಪಡಿಸುವಂತಿದೆ ಈ ಘಟನೆ. ಯಾಕೆಂದರೆ ನಾವು ಹೇಗೆ ವರ್ತಿಸುತ್ತೇವೆ ಅದೇ ರೀತಿ ಈ ಮಂಗನ ವರ್ತನೆಯೂ ಇದೆ. ಉತ್ತರ ಪ್ರದೇಶದ ಸಹರಾನ್ಪುರದ ಸರ್ಕಾರಿ ಕಚೇರಿಯೊಂದರಲ್ಲಿ ಈ ಘಟನೆ ನಡೆದಿದೆ. ಕಚೇರಿ ಒಳಗೆ ಬಂದ ಮಂಗ ಕುತೂಹಲ ಜತೆಗೆ ಅಷ್ಟೇ ತನ್ಮಯತೆಯಿಂದ ಫೈಲ್‌ ಒಳಗಿರುವ ಪೇಪರ್‌ಗಳನ್ನು ಪರಿಶೀಲಿಸುತ್ತದೆ. ಒಂದಾದ ಬಳಿಕ ಇನ್ನೊಂದು ತೆಗೆದು ನಾಜೂಕಾಗಿ ಪುಟ ತಿರುಗಿಸುತ್ತದೆ. ಸುತ್ತಲೂ ಇರುವ ಜನರು ಅಚ್ಚರಿಯಿಂದ ಇದನ್ನೇ ಗಮನಿಸುತ್ತಾರೆ. ಈ ಮಧ್ಯೆ ವ್ಯಕ್ತಿಯೊಬ್ಬ ಬಾಳೆಹಣ್ಣನ್ನು ಆ ಕೋತಿಯ ಎದುರು ಇಡುತ್ತಾನೆ. ಆದರೆ ಕರ್ತವ್ಯವೇ ಮುಖ್ಯ ಎಂದು ಭಾವಿಸಿದ ಆ ಮಂಗ ಅದರತ್ತ ಕಣ್ಣೆತ್ತಿಯೂ ನೋಡದೆ ಕಡತ ಗಮನಿಸುವುದರಲ್ಲಿ ನಿರತವಾಗುತ್ತದೆ. ಹಲವರು ಈ ದೃಶ್ಯವನ್ನು ಮೊಬೈಲ್‌ನಲ್ಲಿ ಚಿತ್ರೀಕರಿಸುವುದು ಕೂಡ ವಿಡಿಯೊದಲ್ಲಿ ಸೆರೆಯಾಗಿದೆ.
A monkey went into a government office and started looking at papers pic.twitter.com/FwKfnrb3CA
— Harsh Tyagii (@tyagiih5) October 14, 2023
ಸಹರಾನ್ಪುರದ ಹೆಚ್ಚುವರಿ ಜಿಲ್ಲಾ ಮ್ಯಾಜಿಸ್ಟ್ರೇಟ್(ADM) ದೀಪಕ್ ಕುಮಾರ್ ಈ ವಿಡಿಯೊ ಕುರಿತು ಸ್ಪಷ್ಟನೆ ನೀಡಿ, “ಕೋತಿ ಬೆಹತ್ ತಹಸಿಲ್ ಪ್ರದೇಶದ ವಕೀಲರ ಕೊಠಡಿಗೆ ಪ್ರವೇಶಿಸಿ ಮೇಜಿನ ಮೇಲೆ ಕುಳಿತಿತ್ತು” ಎಂದು ಹೇಳಿದ್ದಾರೆ. ʼʼಈ ಪ್ರದೇಶದಲ್ಲಿ ಕೋತಿಗಳು ಆಗಾಗ್ಗೆ ಕಂಡುಬರುವುದು ಸಾಮಾನ್ಯ ಎಂಬಂತಾಗಿದೆ. ಈ ಕೋತಿ ಕಚೇರಿಗೆ ಪ್ರವೇಶಿಸಿದ ಕೂಡಲೇ ಅರಣ್ಯ ಇಲಾಖೆ ಮತ್ತು ಪೊಲೀಸ್ ಅಧಿಕಾರಿಗಳಿಗೆ ಅಧಿಕೃತರು ಮಾಹಿತಿ ನೀಡಿದ್ದಾರೆʼʼ ಎಂದೂ ದೀಪಕ್ ಕುಮಾರ್ ತಿಳಿಸಿದ್ದಾರೆ.
ನೆಟ್ಟಿಗರಿಂದ ಫನ್ನಿ ಕಮೆಂಟ್‌
ಸದ್ಯ ಈ ವಿಡಿಯೊ ನೆಟ್ಟಿಗರ ಗಮನ ಸೆಳೆದಿದೆ. ʼʼಯಾರಿಗೆ ಗೊತ್ತು ಈ ಕೋತಿ ಪದವಿ ಓದಿರಬಹುದುʼʼ ಎಂದು ಒಬ್ಬರು ಹೇಳಿದ್ದಾರೆ. ಇನ್ನೊಬ್ಬರು, ʼʼಬಾಳೆಹಣ್ಣು ಕೂಡ ಕೋತಿಯನ್ನು ಆಕರ್ಷಿಸಲಿಲ್ಲʼʼ ಎಂದಿದ್ದಾರೆ. ಒಟ್ಟಿನಲ್ಲಿ ಕೋತಿಯ ಈ ವಿಡಿಯೊ ಹಲವರ ಗಮನ ಸೆಳೆದಿರುವುದಂತು ಸತ್ಯ.
ಹಿಂದೆಯೂ ನಡೆದಿತ್ತು
ಇತ್ತೀಚೆಗೆ ಪಶ್ಚಿಮ ಬಂಗಾಳದ ಬೋಲ್ಪುರದ ರೈಲ್ವೆ ನಿಲ್ದಾಣದ ವಿಚಾರಣಾ ಕಚೇರಿಯಲ್ಲಿ ಬೂದು ಬಣ್ಣದ ಲಂಗೂರ್ ಕಂಪ್ಯೂಟರ್‌ ಮುಂದೆ ಕುಳಿತ ವಿಡಿಯೋ ವೈರಲ್‌ ಆಗಿತ್ತು. ಅದು ಕಂಪ್ಯೂಟರ್‌ನಲ್ಲಿ ಏನನ್ನೋ ಟೈಪ್‌ ಮಾಡುತ್ತಿರುವಂತೆ ವರ್ತಿಸುತ್ತಿದ್ದುದು ವಿಡಿಯೊದಲ್ಲಿ ಸೆರೆಯಾಗಿತ್ತು.
ಇದನ್ನೂ ಓದಿ: Viral Video: ಸೈಕಲ್‌ನಲ್ಲೇ ಗರ್ಬಾ ನೃತ್ಯ ಪ್ರದರ್ಶನ ನೀಡಿದ ಕಲಾವಿದರು; ಕೆಂಡವಾದ ನೆಟ್ಟಿಗರು!