ಕೆಲವರು ಕೋಪ ಬಂದಾಗ ಒಮ್ಮೆಲೇ ತಾಳ್ಮೆ ಕಳೆದುಕೊಂಡುಬಿಡುತ್ತಾರೆ. ತಾವೆಲ್ಲಿದ್ದೇವೆ, ತಾವೇನು ಮಾಡುತ್ತಿದ್ದೇವೆ, ಮಾತಾಡುತ್ತಿದ್ದೇವೆ ಎಂಬುದನ್ನೆಲ್ಲ ಮರೆತೇ ಬಿಡುತ್ತಾರೆ. ಇಲ್ನೋಡಿ, ಈ ಮಹಿಳೆ ತನಗೆ ವಿಮಾನ ತಪ್ಪಿಹೋಯಿತು ಎಂಬ ಕಾರಣಕ್ಕೆ ಏರ್ಪೋರ್ಟ್ನಲ್ಲಿದ್ದ ಎಮಿರೇಟ್ಸ್ ಏರ್ಲೈನ್ಸ್ ಸಂಸ್ಥೆಯ ಚೆಕ್-ಇನ್ (ತಪಾಸಣೆ ಮಾಡುವವರು) ಸಿಬ್ಬಂದಿಗೆ ಹೊಡೆದಿದ್ದಾಳೆ. ಆ ವಿಡಿಯೊ ವೈರಲ್ ಆಗಿದೆ.
ಮೆಕ್ಸಿಕೊ ಸಿಟಿ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದಲ್ಲಿ ಹೀಗೊಂದು ಘಟನೆ ನಡೆದಿದೆ. ತಾನು ಸರಿಯಾದ ಸಮಯಕ್ಕೆ ಏರ್ಪೋರ್ಟ್ಗೆ ಬಾರದೆ, ವಿಮಾನ ತಪ್ಪಿಸಿಕೊಂಡ ಮಹಿಳೆ ಮಿತಿಮೀರಿ ವರ್ತನೆ ಮಾಡಿದ್ದಾರೆ. ಏರ್ಪೋರ್ಟ್ನಲ್ಲಿ ಎಮಿರೇಟ್ಸ್ ಏರ್ಲೈನ್ಸ್ನ ಚೆಕ್-ಇನ್ ಸಿಬ್ಬಂದಿ ಕುಳಿತಿದ್ದ ಕೌಂಟರ್ಗೆ ಹೋಗಿ ಅಲ್ಲಿನ ಕುರ್ಚಿಯನ್ನು ಎತ್ತಿ ಬಿಸಾಕಿದ್ದಾರೆ. ಅಲ್ಲಿ ಕುಳಿತಿದ್ದ ಯುವತಿಯರಿಗೆ ಹಿಗ್ಗಾಮುಗ್ಗಾ ಬೈದು, ಥಳಿಸಿದ್ದಾರೆ. ತನ್ನ ಲಗೇಜ್ಗಳನ್ನೆಲ್ಲ ಅವರತ್ತ ಎತ್ತಿ ಬಿಸಾಕಿದ್ದಾರೆ. ತಾನೇ ಮಾಡಿಕೊಂಡ ತಪ್ಪಿಗೆ ಆ ಸಿಬ್ಬಂದಿಗೆ ಶಿಕ್ಷೆ ಕೊಟ್ಟಿದ್ದಾರೆ. ಮಹಿಳೆಯ ವಿಲಕ್ಷಣ ವರ್ತನೆಗೆ ನೆಟ್ಟಿಗರೂ ಕಿಡಿ ಕಾರಿದ್ದಾರೆ.