18ವರ್ಷದ ಹಿಂದೆ ಡ್ರೈವಿಂಗ್ ಲೈಸೆನ್ಸ್ ಪಡೆದ ಮಹಿಳೆಯೊಬ್ಬಳ ಕಥೆ ಈಗ ಮತ್ತೊಮ್ಮೆ ಮುನ್ನೆಲೆಗೆ ಬಂದಿದೆ. ಚಾಲನಾ ಪರವಾನಗಿಯನ್ನು ಹೇಗೆ ಪಡೆಯಬೇಕು ಎಂದು ಗೊತ್ತಿದೆ. ನಾವು ಆರ್ಟಿಒ ಕಚೇರಿಗೆ ಹೋಗಿ, ಡ್ರೈವಿಂಗ್ ಟೆಸ್ಟ್ನಲ್ಲಿ ಪಾಸಾಗಲೇಬೇಕು. ಅವರು ಹಾಕಿಕೊಟ್ಟ ಮಾರ್ಗದಲ್ಲಿ ನಮ್ಮ ಬೈಕ್/ಕಾರ್ ಅಥವಾ ಯಾವುದೇ ವಾಹನವನ್ನು ಡ್ರೈವ್ ಮಾಡಿ ತೋರಿಸಬೇಕು. ಲಿಖಿತ ಪರೀಕ್ಷೆಯನ್ನೂ ಬರೆಯಬೇಕು. ಇದರಲ್ಲೇನಾದರೂ ಎಡವಟ್ಟು ಮಾಡಿದರೆ ಅಥವಾ ನಮ್ಮ ಡ್ರೈವಿಂಗ್ ಪರಿಪೂರ್ಣವಾಗಿಲ್ಲ ಎಂದು ಆರ್ಟಿಒ ಅಧಿಕಾರಿಗಳಿಗೆ ಅನ್ನಿಸಿದರೆ ನಮಗೆ ಲೈಸೆನ್ಸ್ ಸಿಗೋದಿಲ್ಲ. ಮತ್ತೆ ಬನ್ನಿ ಎನ್ನುತ್ತಾರೆ. ಕೆಲವರು ಮೂರ್ಲಾಲ್ಕು, 10 ಪ್ರಯತ್ನಗಳಲ್ಲಿ ಪಾಸಾಗುವುದೂ ಉಂಟು. ಆದರೆ ಈ ಮಹಿಳೆ ಹಾಗಲ್ಲ, ಬರೋಬ್ಬರಿ 960 ಪ್ರಯತ್ನಗಳ ನಂತರ ಡ್ರೈವಿಂಗ್ ಲೈಸೆನ್ಸ್ ಪಡೆದಿದ್ದಾರೆ.
ದಕ್ಷಿಣ ಕೊರಿಯಾದ ಈ ಮಹಿಳೆಯ ಹೆಸರು ಚಾ ಸಾ ಸೂನ್. 2005ರಲ್ಲಿ ಈಕೆ ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಸುದ್ದಿಯಾಗಿದ್ದರು. ಅದೆಷ್ಟು ಸಲ ವಿಫಲಗೊಂಡರೂ, ಹಠ ಬಿಡದೆ ಕೊನೆಗೂ ಲೈಸೆನ್ಸ್ ಪಡೆದ ಅವರ ಕತೆ ಈಗ ರೆಡ್ಡಿಟ್ ಸಾಮಾಜಿಕ ಮಾಧ್ಯಮದಲ್ಲಿ ವೈರಲ್ ಆಗುತ್ತಿದೆ. ಚಾ ಸಾ ಸೂನ್ ಅವರು ಮೊಟ್ಟಮೊದಲು ಕಾರು ಲೈಸೆನ್ಸ್ಗಾಗಿ ಡ್ರೈವಿಂಗ್ ಟೆಸ್ಟ್ ಕೊಟ್ಟಿದ್ದು 2005ರಲ್ಲಿ. ಆದರೆ ಮೊದಲ ಪ್ರಯತ್ನದಲ್ಲಿ ವಿಫಲರಾದರು.
ಹೀಗೆ ದಿನಬಿಟ್ಟು ದಿನ ಚಾಲನಾ ಪರೀಕ್ಷೆಗೆ ಹಾಜರಾದರು. ವಾರದಲ್ಲಿ ಐದು ದಿನ ಇದನ್ನೇ ಮಾಡಿದ್ದರು. ಬರುಬರುತ್ತ ವಾರದಲ್ಲಿ ಎರಡು ದಿನ ಟೆಸ್ಟ್ಗೆ ಹಾಜರಾಗಲು ಶುರು ಮಾಡಿದರು. ಮೂರು ವರ್ಷ ಹೀಗೇ ಮಾಡಿದರು. ಅವರು ಚಾಲನಾ ಟೆಸ್ಟ್ ಮತ್ತು ಲಿಖಿತ ಪರೀಕ್ಷೆ ಎರಡರಲ್ಲೂ ವಿಫಲರಾಗುತ್ತಿದ್ದರು. ಅಥವಾ ಒಂದರಲ್ಲಿ ಪಾಸ್ ಆದರೆ ಇನ್ನೊಂದರಲ್ಲಿ ಅನುತ್ತೀರ್ಣರಾಗುತ್ತಿದ್ದರು. ಕೊನೆಗೂ 2010ರಲ್ಲಿ ಅವರು ಡ್ರೈವಿಂಗ್ ಟೆಸ್ಟ್ನಲ್ಲಿ ಪಾಸ್ ಆದರು. ಈ 960 ಟೆಸ್ಟ್ನಲ್ಲಿ ಅವರು ಲಿಖಿತ ಪರೀಕ್ಷೆ ಬರೆದಿದ್ದು 860 ಬಾರಿ ಎನ್ನಲಾಗಿದೆ. ಇಷ್ಟೆಲ್ಲ ಆಗಿ ಚಾ ಸಾ ಸೂನ್ ಅವರು ಚಾಲನಾ ಪರವಾನಗಿ ಪಡೆದಾಗ ಅವರ ವಯಸ್ಸು 69.
2010ರಲ್ಲಿ ಚಾ ಸಾ ಸೂನ್ ಲೈಸೆನ್ಸ್ ಪಡೆದಾಗ, ಆಕೆಯ ಚಾಲನಾ ಮಾರ್ಗದರ್ಶಕ ಕೂಡ ಪ್ರತಿಕ್ರಿಯೆ ನೀಡಿದ್ದರು. ಚಾ ಸಾ ಸೂನ್ ಪರವಾನಗಿ ಪಡೆಯುತ್ತಿದ್ದಂತೆ ನಮಗೆಲ್ಲ ಸಿಕ್ಕಾಪಟೆ ಖುಷಿಯಾಗಿತ್ತು. ಓಡಿಹೋಗಿ ಅವರನ್ನು ತಬ್ಬಿಕೊಂಡೆವು. ಪದೇಪದೆ ಡ್ರೈವಿಂಗ್ ಟೆಸ್ಟ್ನಲ್ಲಿ ವಿಫಲರಾಗುತ್ತಿದ್ದರೂ, ಹಠ ಬಿಡದೆ ಪ್ರಯತ್ನಿಸಿದರು. ಪ್ರಯತ್ನವನ್ನೇ ಬಿಡಿ ಎಂದು ಅವರಿಗೆ ಹೇಳುವ ಧೈರ್ಯ ನಮಗೆ ಇರಲಿಲ್ಲ. ಕೊನೆಗೂ ಪ್ರಯತ್ನ ಫಲಿಸಿತು ಎಂದು ಅವರು ಹೇಳಿದ್ದರು. ದಕ್ಷಿಣ ಕೊರಿಯಾದಲ್ಲಂತೂ ಚಾ ಸಾ ಸೂನ್ ಸೆಲೆಬ್ರಿಟಿ ಆಗಿಹೋಗಿದ್ದರು. ದಕ್ಷಿಣ ಕೊರಿಯಾದ ಕಾರು ಉತ್ಪಾದಕ ಕಂಪನಿ ಹುಂಡಾಯಿ, ಚಾ ಸಾ ಸೂನ್ರಿಗೆ ಒಂದು ಕಾರನ್ನು ಕೂಡ ಉಡುಗೊರೆಯನ್ನಾಗಿ ಕೊಟ್ಟಿತ್ತು. ಇದೀಗ ರೆಡ್ಡಿಟ್ನಲ್ಲಿ ವೈರಲ್ ಆದ ಸ್ಟೋರಿ ನೋಡಿ, ನೆಟ್ಟಿಗರು ಕಮೆಂಟ್ ಮಾಡುತ್ತಿದ್ದಾರೆ. ಮಹಿಳೆಯ ನಿಷ್ಠೆ ಬಗ್ಗೆ ಖುಷಿಯಿದೆ ಎಂದಿದ್ದಾರೆ.
ವೈರಲ್ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ.