ಬೆಂಗಳೂರು: ಮಳೆಗಾಲ ಆರಂಭವಾಗಿದೆ. ಸಂಜೆ ಹೊತ್ತಿಗೆ ಏನಾದರೂ ಸ್ನ್ಯಾಕ್ಸ್‌ ತಿನ್ನಬೇಕು ಎಂದೆನಿಸಿದ ತಕ್ಷಣ ನೆನಪಾಗುವುದು ಜೊಮೆಟೋ. ಆರ್ಡರ್‌ ಹಾಕಿದ ಒಂದಿಷ್ಟು ಸಮಯದಲ್ಲಿ ತಿನಿಸು ಬಂದು ನಮ್ಮ ಕೈ ಸೇರಿರುತ್ತದೆ. ಅದಕ್ಕೆ ಕಾರಣವಾಗುವವರು ಡೆಲಿವರಿ ಬಾಯ್‌ಗಳು. ನಿಗದಿತ ಸಮಯಕ್ಕೆ ಆರ್ಡರ್‌ ತಲುಪಿಸಿ ದಂಡ ಹಾಕಿಸಿಕೊಳ್ಳುವುದರಿಂದ ತಪ್ಪಿಸಿಕೊಳ್ಳಬೇಕು ಎನ್ನುವುದು ಅವರ ಗುರಿಯಾಗಿರುತ್ತದೆ. ಆದರೆ ಒಂದು ವೇಳೆ ಅವರು ಅದನ್ನು ಪಾಲಿಸದೆ ತಮ್ಮ ಬದುಕನ್ನು ಎಂಜಾಯ್‌ ಮಾಡಲು (Viral News) ಆರಂಭಿಸಿಬಿಟ್ಟರೆ?
ಜೋರು ಮಳೆ ಬರುತ್ತಿದೆ. ಜೊಮೆಟೋ ಡೆಲಿವರಿ ಬಾಯ್‌ ಒಬ್ಬ ಆರ್ಡರ್‌ ಅನ್ನು ತೆಗೆದುಕೊಂಡು ಹೋಗುವುದನ್ನು ಬಿಟ್ಟು ಮಳೆಯಲ್ಲಿ ಡ್ಯಾನ್ಸ್ ಮಾಡಲು ಆರಂಭಿಸಿಬಿಡುತ್ತಾನೆ. ಸಿನಿಮಾಗಳಲ್ಲಿ ಹೀರೋಯಿನ್‌ಗಳು ಮಳೆಯಲ್ಲಿ ಮೈ ಚಳಿ ಬಿಟ್ಟು ಕುಣಿಯುತ್ತಾರಲ್ಲಾ ಅದೇ ರೀತಿಯಲ್ಲಿ ಡೆಲಿವರಿ ಬಾಯ್‌ ಕೂಡ ಕುಣಿಯಲಾರಂಭಿಸಿಬಿಡುತ್ತಾನೆ. ಅಂತಹ ಫೋಟೋಗಳು ಇದೀಗ ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡಿದ್ದು, ಭಾರೀ ಸದ್ದಾಗುತ್ತಿದೆ.
ಇದನ್ನೂ ಓದಿ: Viral Video: ಇನ್ನೇನು ಆನೆ ತುಳಿದೇ ಬಿಟ್ಟಿತು ಎನ್ನುವಷ್ಟರಲ್ಲಿ ನಡೆಯಿತು ಪವಾಡ!
ಅಂದ ಹಾಗೆ ಈ ರೀತಿ ವೈರಲ್‌ ಆಗಿರುವುದು ನಿಜವಾದ ಫೋಟೋಗಳಲ್ಲ. ಆರ್ಟಿಫಿಶಿಯಲ್‌ ಇಂಟೆಲಿಜೆನ್ಸಿ ಬಳಸಿಕೊಂಡು ಮಾಡಿರುವಂತಹ ಫೋಟೋಗಳಿವೆ. ಸೌರವ್‌ ಧಭಾಯಿ ಹೆಸರಿನ ವ್ಯಕ್ತಿಯ ಕಲ್ಪನೆಯಂತೆ ಈ ಫೋಟೋಗಳು ಮೂಡಿಬಂದಿವೆ. ಫೋಟೋಗಳೊಂದಿಗೆ ಜೊಮೆಟೋ ಪಾಪ್‌ ಅಪ್‌ ಸಂದೇಶವನ್ನೂ ಕೊಡಲಾಗಿದೆ. “ಊಪ್ಸ್‌! ನಮ್ಮ ಡೆಲಿವರಿ ಬಾಯ್‌ ಸ್ವಲ್ಪ ತಡವಾಗಲಿದ್ದಾರೆ. ಅವರು ಮುಂಬೈನ ಮಳೆಯಲ್ಲಿ ನೃತ್ಯ ಮಾಡುತ್ತಿದ್ದಾರೆ. ಮಳೆಯಿಂದ ತುಂಬಿರುವ ಈ ಡಿಲೀಶಿಯಸ್‌ ಡಿಲೇಗೆ ಕ್ಷಮೆಯಿರಲಿ” ಎಂದು ಆ ನೋಟಿಫಿಕೇಶನ್‌ನಲ್ಲಿ ಬರೆಯಲಾಗಿದೆ.
Share https://t.co/0beXS52HsH
— Mandara Sagar (@MandaraSagar) July 3, 2023
ಈ ಫೋಟೋಗಳನ್ನು ಸೌರವ್‌ ಅವರು ಲಿಂಕಡ್‌ಇನ್‌ ಪ್ರೊಫೈಲ್‌ನಲ್ಲಿ ಹಂಚಿಕೊಂಡಿದ್ದಾರೆ. “ಜೊಮೆಟೊ, ʼಸಾರಿ, ಆರ್ಡರ್‌ ಲೇಟ್‌ ಆಗುತ್ತದೆ. ಸ್ವಲ್ಪ ಜೀವನವನ್ನು ಅನುಭವಿಸುತ್ತಿದೆʼ ಎಂದು ನೋಟಿಫಿಕೇಶನ್‌ ಕಳುಹಿಸಿ. ನಾವು ಹೃದಯದಿಂದ ಖುಷಿಯಾಗುತ್ತೇವೆ” ಎಂದು ಬರೆದಿದ್ದಾರೆ.
ಸೌರವ್‌ ಅವರ ಈ ಪೋಸ್ಟ್‌ ಲಿಂಕಡ್‌ಇನ್‌ನಲ್ಲಿ ಭಾರೀ ವೈರಲ್‌ ಆಗಿದೆ. ಹಲವಾರು ಜನರು ಈ ಪೋಸ್ಟ್‌ ಅನ್ನು ಲೈಕ್‌ ಮಾಡಿದ್ದಾರೆ. ನೂರಾರು ಮಂದಿ ಪೋಸ್ಟ್‌ಗೆ ತಮ್ಮ ಅಭಿಪ್ರಾಯಗಳನ್ನು ಕಾಮೆಂಟ್‌ ಮೂಲಕ ತಿಳಿಸಿದ್ದಾರೆ. “ಈ ರೀತಿಯ ಎಐ ಫೋಟೋಗಳನ್ನು ನೋಡುವುದೇ ಚಂದ”, “ನಿಜಕ್ಕೂ ಡೆಲಿವರಿ ಬಾಯ್‌ಗಳಿಗೆ ಇಂತದ್ದೊಂದು ಬದುಕು ಬೇಕು” ಎನ್ನುವಂತಹ ಹಲವಾರು ಕಾಮೆಂಟ್‌ಗಳನ್ನು ನಾವಿಲ್ಲಿ ಕಾಣಬಹುದಾಗಿದೆ.