ಬೆಂಗಳೂರು: ಭಾರತ ತಂಡ ಸ್ಟಾರ್ ಬ್ಯಾಟರ್ ವಿರಾಟ್ ಕೊಹ್ಲಿ (Virat Kohli) ಹಾಗೂ ಪತ್ನಿ ಅನುಷ್ಕಾ ಶರ್ಮಾ (Anushka Sharma) ಎರಡನೇ ಮಗುವನ್ನು ಸ್ವಾಗತಿಸಿದ್ದಾರೆ. ಫೆಬ್ರವರಿ 15 ರಂದು ಗಂಡು ಮಗುವನ್ನು ಜನಿಸಿರುವುದಾಗಿ ದಂಪತಿಗಳು ಘೋಷಿಸಿದ್ದಾರೆ. ಅನುಷ್ಕಾ ಶರ್ಮಾ ತಮ್ಮ ಇನ್ಸ್ಟಾಗ್ರಾಮ್ ಖಾತೆ ಮೂಲಕ ಮಗುವಿಗೆ ಅಕಾಯ್ ಎಂದು ಹೆಸರಿಟ್ಟಿದ್ದೇವೆ ಎಂದು ಬಹಿರಂಗಪಡಿಸಿದ್ದಾರೆ. ದಂಪತಿಗೆ ವಾಮಿಕಾ ಎಂಬ ಮಗಳಿದ್ದಾಳೆ.
ಈ ಹಿಂದೆ ನಟಿ ಅನುಷ್ಕಾ ಕೆಲವೇ ದಿನಗಳಲ್ಲಿ ಲಂಡನ್ನಲ್ಲಿ ಮಗುವಿಗೆ ಜನ್ಮ ನೀಡಲಿದ್ದಾರೆ ಎಂಬ ವದಂತಿಗಳು ಹಬ್ಬಿದ್ದವು. ಕೈಗಾರಿಕೋದ್ಯಮಿ ಹರ್ಷ್ ಗೋಯೆಂಕಾ ಇತ್ತೀಚೆಗೆ ತಮ್ಮ ಎಕ್ಸ್ ಹ್ಯಾಂಡಲ್ ನಲ್ಲಿ ಕೆಲವೇ ದಿನಗಳಲ್ಲಿ ಮಗು ಜನಿಸಲಿದೆ ಎಂದು ಹೇಳಿಕೊಂಡಿದ್ದರು. ವಿರಾಟ್ ಅಥವಾ ಅನುಷ್ಕಾ ಹೆಸರನ್ನು ಉಲ್ಲೇಖಿಸದೆ ಬರೆದುಕೊಂಡಿದ್ದರು. “ಮುಂದಿನ ಕೆಲವು ದಿನಗಳಲ್ಲಿ ಮಗುವೊಂದು ಜನಿಸಲಿದೆ. ಶ್ರೇಷ್ಠ ಕ್ರಿಕೆಟರ್ ಅಪ್ಪನಂತೆ ಮಗು ಭಾರತವನ್ನು ದೊಡ್ಡ ಎತ್ತರಕ್ಕೆ ಕೊಂಡೊಯ್ಯುತ್ತದೆ ಎಂದು ಭಾವಿಸುತ್ತೇನೆ. ಅಲ್ಲದಿದ್ದರೆ ತಾಯಿಯನ್ನು ಅನುಸರಿಸಿ ಚಲನಚಿತ್ರ ತಾರೆಯಾಗಬಹುದೇ? ಎಂದು ಬರೆದುಕೊಂಡಿದ್ದರು. ಮುಂದುವರಿದ ಅವರು ‘ಮೇಡ್ ಇನ್ ಇಂಡಿಯಾ’ ಮತ್ತು ‘ಟು ಬಿ ಬಾರ್ನ್ ಇನ್ ಲಂಡನ್’ ಹ್ಯಾಶ್ ಟ್ಯಾಗ್ ಗಳನ್ನು ಸಹ ಬಳಸಿದ್ದರು. ಗೋಯೆಂಕಾ ಅವರು, ಅನುಷ್ಕಾ ಮತ್ತು ವಿರಾಟ್ ಬಗ್ಗೆ ಮಾತನಾಡುತ್ತಿದ್ದಾರೆ ಎಂದು ಇದು ಎಲ್ಲರಿಗೂ ಅನಿಸಿತ್ತು. ಆ ಸುದ್ದಿ ಈಗ ಖಾತರಿಯಾಗಿದೆ.
ಇದನ್ನೂ ಓದಿ : Sarfaraz Khan : ಕೆಕೆಆರ್ ತಂಡ ಸೇರಲಿದ್ದಾರಾ ಸರ್ಫರಾಜ್ ಖಾನ್?
2023 ರ ಅಕ್ಟೋಬರ್ನಲ್ಲಿ ಅನುಷ್ಕಾ ಶರ್ಮಾ ಎರಡನೇ ಗರ್ಭಧರಿಸಿರುವ ವರದಿಗಳು ಮೊದಲ ಬಾರಿಗೆ ಬಹಿರಂಗೊಂಡಿದ್ದವು. ನಟಿ ಪತಿ ವಿರಾಟ್ ಕೊಹ್ಲಿಯೊಂದಿಗೆ ಎರಡನೇ ಮಗುವನ್ನು ನಿರೀಕ್ಷಿಸುತ್ತಿದ್ದಾರೆ ಎಂದು ಹಿಂದೂಸ್ತಾನ್ ಟೈಮ್ಸ್ ವರದಿ ಮಾಡಿತ್ತು. ಅನುಷ್ಕಾ ಎರಡನೇ ಮಗುವಿನ ನಿರೀಕ್ಷೆಯಲ್ಲಿದ್ದಾರೆ. ಕಳೆದ ಬಾರಿಯಂತೆ, ಅವರು ನಂತರದ ಹಂತದಲ್ಲಿ ಔಪಚಾರಿಕವಾಗಿ ಸುದ್ದಿಯನ್ನು ಪ್ರಪಂಚದೊಂದಿಗೆ ಹಂಚಿಕೊಳ್ಳುತ್ತಾರೆ” ಎಂದು ಹೇಳಲಾಗಿತ್ತು.
ಸುದ್ದಿ ತಿಳಿಸಿದ್ದ ಎಬಿಡಿ ವಿಲಿಯರ್ಸ್
ಜನವರಿ 2024 ರಲ್ಲಿ, ದಕ್ಷಿಣ ಆಫ್ರಿಕಾದ ಮಾಜಿ ಆಟಗಾರ ಹಾಗೂ ವಿರಾಟ್ ಕೊಹ್ಲಿ ಆರ್ಸಿಬಿ ಸಹ ಆಟಗಾರ ಎಬಿ ಡಿವಿಲಿಯರ್ಸ್ ತಮ್ಮ ಯೂಟ್ಯೂಬ್ ಚಾನೆಲ್ನಲ್ಲಿ ಅನುಷ್ಕಾ ಶರ್ಮಾ ಅವರ ಗರ್ಭಧಾರಣೆಯ ವರದಿಗಳನ್ನು ದೃಢಪಡಿಸಿದ್ದರು. “ಹೌದು, ಅವರ ಎರಡನೇ ಮಗುವಿನ ನಿರೀಕ್ಷೆಯಲ್ಲಿದ್ದಾರೆ. ಹೌದು, ಇದು ಕುಟುಂಬದ ಸಮಯ ಮತ್ತು ವಿಷಯ. ಅವರಿಗೆ ಅದು ಮುಖ್ಯ. ಹೆಚ್ಚಿನ ಜನರ ಆದ್ಯತೆ ಕುಟುಂಬ ಎಂದು ನಾನು ಭಾವಿಸುತ್ತೇನೆ. ಭಾರತ ತಂಡದಲ್ಲಿ ನಾವು ವಿರಾಟ್ ಅವರನ್ನು ಮಿಸ್ ಮಾಡಿಕೊಳ್ಳುತ್ತೇವೆ. ಆದರೆ ಅವರು ರಜೆ ತೆಗೆದುಕೊಂಡಿರುವುದು ಸರಿಯಾದ ನಿರ್ಧಾರ ಎಂದು ಹೇಳಿದ್ದರು.
ಅನುಷ್ಕಾ ಶರ್ಮಾ 2017 ರ ಡಿಸೆಂಬರ್ನಲ್ಲಿ ವಿರಾಟ್ ಕೊಹ್ಲಿಯನ್ನು ವಿವಾಹವಾಗಿದ್ದರು. ನಟಿ ಝೀರೋ ಚಿತ್ರದ ಬಿಡುಗಡೆಯ ನಂತರ 2018 ರಲ್ಲಿ ನಟನೆಯಿಂದ ವಿರಾಮ ತೆಗೆದುಕೊಂಡಿದ್ದರು. ನಂತರ ದಂಪತಿ ತಮ್ಮ ಮಗಳು ವಾಮಿಕಾಳನ್ನು ಜನವರಿ 2021 ರಲ್ಲಿ ಸ್ವಾಗತಿಸಿದ್ದರು. ಅಂದಿನಿಂದ ಅನುಷ್ಕಾ ಯಾವುದೇ ಚಿತ್ರಗಳಲ್ಲಿ ನಟಿಸಿಲ್ಲ. ಆದಾಗ್ಯೂ ಅನುಷ್ಕಾ ಚಕ್ದಾ ಎಕ್ಸ್ಪ್ರೆಸ್ ಮೂಲಕ ಮತ್ತೆ ತೆರೆಗೆ ಬರಲಿದ್ದಾರೆ. ಇದು ಭಾರತ ಮಹಿಳೆಯರ ತಂಡದ ಮಾಜಿ ವೇಗದ ಬೌಲರ್ ಜೂಲನ್ ಗೋಸ್ವಾಮಿ ಅವರ ಜೀವನ ಚರಿತ್ರೆಯಾಗಿದೆ. ನಟಿ ಈಗಾಗಲೇ ಚಿತ್ರೀಕರಣವನ್ನು ಮುಗಿಸಿದ್ದಾರೆ.