Rohit Sharma : ಕ್ರಿಸ್​​ ಗೇಲ್​ ದಾಖಲೆ ಮುರಿದ ರೋಹಿತ್​ ಶರ್ಮಾ; ಏನದು ದಾಖಲೆ?

ಬೆಂಗಳೂರು: ಇಂಗ್ಲೆಂಡ್ ವಿರುದ್ಧ ನಡೆಯುತ್ತಿರುವ ಐದು ಪಂದ್ಯಗಳ ಟೆಸ್ಟ್ ಸರಣಿಯಲ್ಲಿ ಟೀಮ್ ಇಂಡಿಯಾ ನಾಯಕ ರೋಹಿತ್ ಶರ್ಮಾ (Rohit Sharma) ಬ್ಯಾಟಿಂಗ್​ನಲ್ಲಿ ತಮ್ಮ ಪ್ರಾಬಲ್ಯವನ್ನು ಮುಂದುವರಿಸಿದ್ದಾರೆ. ಅಮೋಘ ಬ್ಯಾಟಿಂಗ್ ಪ್ರದರ್ಶನ ನೀಡಿದ ಅವರು ಟೆಸ್ಟ್ ಕ್ರಿಕೆಟ್​​ನಲ್ಲಿ 12ನೇ ಶತಕ ಬಾರಿಸಿದ್ದಾರೆ. ಇದು ಅಂತಾರಾಷ್ಟ್ರೀಯ ಕ್ರಿಕೆಟ್​ನಲ್ಲಿ ಅವರಿಗೆ 48ನೇ ಶತಕವೂ ಹೌದು.

See more

48th International Hundred for Rohit Sharma. ⭐

– Captain, Leader, Legend, Hitman. pic.twitter.com/5Y6lzlW2B6

— Johns. (@CricCrazyJohns) March 8, 2024

ಹಿಮಾಚಲ ಪ್ರದೇಶ ಕ್ರಿಕೆಟ್ ಅಸೋಸಿಯೇಷನ್ ಕ್ರೀಡಾಂಗಣದಲ್ಲಿ ನಡೆಯುತ್ತಿರುವ ಹಣಾಹಣಿಯ ಎರಡನೇ ದಿನದ ಆರಂಭಿಕ ಸೆಷನ್​ನಲ್ಲಿ ಇಂಗ್ಲೆಂಡ್ ಬೌಲರ್​ಗಳು ರೋಹಿತ್ ಶರ್ಮಾ ಮತ್ತು ಶುಭ್ಮನ್ ಗಿಲ್ ಬಹುತೇಕ ಮಂಕಾಗಿದ್ದರು. ಅಂತೆಯೇ ಭೋಜನ ವಿರಾಮದ ಮೊದಲು ಇವರಿಬ್ಬರು ತಮ್ಮ ಶತಕಗಳನ್ನು ಗಳಿಸಿದರು.

ಪ್ರವಾಸಿ ತಂಡದ ವಿರುದ್ಧ ಸ್ಪಿನ್ನರ್​ಗಳ ಪ್ರದರ್ಶನದಿಂದ ಕುಸಿತ ಕಂಡಿದ್ದ ಇಂಗ್ಲೆಂಡ್ ವಿರುದ್ಧ ರೋಹಿತ್ ಶರ್ಮಾ ಉತ್ತಮ ಪ್ರದರ್ಶನ ನೀಡಿದರು. ಮೊದಲ ಸೆಷನ್ ನ ಅಂತ್ಯದ ವೇಳೆಗೆ ಅವರು ತಮ್ಮ ಶತಕ ತಲುಪಿದ್ದರು. ಬಲಗೈ ಬ್ಯಾಟರ್​ ಈ ಮೂಲಕ ರಾಷ್ಟ್ರೀಯ ಕ್ರಿಕೆಟ್ ತಂಡದ ಪರ ರೆಡ್-ಬಾಲ್ ಕ್ರಿಕೆಟ್​ನಲ್ಲಿ ತಮ್ಮ 12 ನೇ ಶತಕವನ್ನು ತಲುಪಿದರು.

ಶುಬ್ಮನ್ ಗಿಲ್ ಆಕ್ರಮಣಕಾರಿ ಆಟವನ್ನು ಪ್ರದರ್ಶಿಸಿದರು. ರೋಹಿತ್ ಶರ್ಮಾ ಅವರ ಜವಾಬ್ದಾರಿಯುತ ಇನಿಂಗ್ಸ್​​ಗೆ ಪೂರಕವಾಗಿ ಅವರು ಎರಡನೇ ವಿಕೆಟ್​ಗೆ 171 ರನ್​​ಗಳ ಜೊತೆಯಾಟವನ್ನು ನೀಡಿದರು. ರೋಹಿತ್ 162 ಎಸೆತಗಳಲ್ಲಿ 103 ರನ್ ಗಳಿಸಿದರು. ಅವರು ಬೆನ್ ಸ್ಟೋಕ್ಸ್ ಎಸೆತಕ್ಕೆ ಔಟಾದರು.

ಇದನ್ನೂ ಓದಿ : Ind vs Eng : ಗಿಲ್, ರೋಹಿತ್​ ಶತಕ, ಭಾರತಕ್ಕೆ 255 ರನ್​ ಮುನ್ನಡೆ

ಕ್ರಿಸ್​ಗೇಲ್​ ದಾಖಲೆಯೇನು?

ಅಂತಾರಾಷ್ಟ್ರೀಯ ಕ್ರಿಕೆಟ್​ನಲ್ಲಿ ಅತಿ ಹೆಚ್ಚು ಶತಕಗಳನ್ನು ಬಾರಿಸಿದ ಓಪನಿಂಗ್​ ಬ್ಯಾಟರ್​ಗಳ ರ್ಯಾಂಕಿಂಗ್​ನಲ್ಲಿ ವೆಸ್ಟ್ ಇಂಡೀಸ್​ನ ಮಾಜಿ ಆರಂಭಿಕ ಬ್ಯಾಟರ್​​ ಕ್ರಿಸ್ ಗೇಲ್ ಅವರನ್ನು ರೋಹಿತ್ ಶರ್ಮಾ ಇದೇ ವೇಳೆ ಹಿಂದಿಕ್ಕಿದ್ದಾರೆ. ಆಸ್ಟ್ರೇಲಿಯಾದ ಡೇವಿಡ್ ವಾರ್ನರ್ ಮತ್ತು ಭಾರತದ ಸಚಿನ್ ತೆಂಡೂಲ್ಕರ್ ನಂತರದ ಸ್ಥಾನದಲ್ಲಿ ಅವರಿದ್ದಾರೆ.

ಓಪನರ್ ಆಗಿ ಅತಿ ಹೆಚ್ಚು ಅಂತಾರಾಷ್ಟ್ರೀಯ ಶತಕಗಳು

• ಡೇವಿಡ್ ವಾರ್ನರ್: 49
• ಸಚಿನ್ ತೆಂಡೂಲ್ಕರ್: 45
• ರೋಹಿತ್ ಶರ್ಮಾ: 43
• ಕ್ರಿಸ್ ಗೇಲ್: 42
• ಸನತ್ ಜಯಸೂರ್ಯ: 41

ಸುನಿಲ್ ಗವಾಸ್ಕರ್ ದಾಖಲೆ ಸರಿಗಟ್ಟಿ ರೋಹಿತ್

ಟೆಸ್ಟ್ ಕ್ರಿಕೆಟ್​​ನಲ್ಲಿ ಇಂಗ್ಲೆಂಡ್ ವಿರುದ್ಧ ಅತಿ ಹೆಚ್ಚು ಶತಕಗಳನ್ನು ಗಳಿಸಿದ ಭಾರತೀಯ ಆರಂಭಿಕ ಆಟಗಾರರಲ್ಲಿ ರೋಹಿತ್ ದಂತಕತೆ ಸುನಿಲ್ ಗವಾಸ್ಕರ್ ಅವರ ಸಾಲಿಗೆ ಸೇರಿಕೊಂಡರು. ಟೆಸ್ಟ್ ಕ್ರಿಕೆಟ್​ನಲ್ಲಿ ಇಂಗ್ಲೆಂಡ್ ವಿರುದ್ಧ ನಾಲ್ಕನೇ ಶತಕವನ್ನು ಗಳಿಸುವ ಮೂಲಕ ರೋಹಿತ್ ಗವಾಸ್ಕರ್ ಅವರ ದಾಖಲೆಯನ್ನು ಸರಿಗಟ್ಟಿದರು.

ಇಂಗ್ಲೆಂಡ್ ವಿರುದ್ಧ ಅತಿ ಹೆಚ್ಚು ಟೆಸ್ಟ್ ಶತಕ ಸಿಡಿಸಿದ ಭಾರತೀಯ ಆರಂಭಿಕರು

• ರೋಹಿತ್ ಶರ್ಮಾ/ ಸುನಿಲ್ ಗವಾಸ್ಕರ್: 4
• ವಿಜಯ್ ಮರ್ಚೆಂಟ್/ ಮುರಳಿ ವಿಜಯ್/ ಕೆಎಲ್ ರಾಹುಲ್: 3

2ನೇ ದಿನದ ಆಟ ಮುಗಿಯುವಾಗ ಭಾರತ 120 ಓವರ್​ಗಳಲ್ಲಿ 8 ವಿಕೆಟ್ ನಷ್ಟಕ್ಕೆ 473 ರನ್ ಗಳಿಸಿದ್ದು, ಕುಲ್ದೀಪ್ ಯಾದವ್ (27) ಮತ್ತು ಜಸ್ಪ್ರೀತ್ ಬುಮ್ರಾ (19) ಕ್ರೀಸ್​​ನಲ್ಲಿದ್ದಾರೆ. ಧರ್ಮಶಾಲಾದಲ್ಲಿ ಗೆಲುವಿನ ಅವಕಾಶಗಳನ್ನು ಹೆಚ್ಚಿಸಲು ತವರು ತಂಡವು ತಮ್ಮ ಮುನ್ನಡೆಯನ್ನು ಗಮನಾರ್ಹವಾಗಿ ವಿಸ್ತರಿಸುವ ಗುರಿಯನ್ನು ಹೊಂದಿದೆ.