ಬೆಂಗಳೂರು: ಕರ್ನಾಟಕ ಏಕೀಕರಣಗೊಂಡು 66 ವರ್ಷ ಕಳೆದರೂ ರಾಷ್ಟ್ರಕವಿ ಕುವೆಂಪು ಅವರ ರಚನೆಗೆ “ಜಯ ಭಾರತ ಜನನಿಯ ತನುಜಾತೆ” ನಾಡಗೀತೆ (State Anthem) ಧಾಟಿ ನಿಗದಿಪಡಿಸದಿರುವುದು ವಿಷಾದದ ಸಂಗತಿ ಎಂದು ಕನ್ನಡ ಸಾಹಿತ್ಯ ಪರಿಷತ್ತು ಬೇಸರ ವ್ಯಕ್ತಪಡಿಸಿದೆ. ನಾಡಗೀತೆ ಎಂದು ಅಧಿಕೃತ ಆದೇಶ ಹೊರಡಿಸಿ 18 ವರ್ಷಗಳೇ ಕಳೆದರೂ ಅದಕ್ಕೊಂದು ಧಾಟಿ ನಿಗದಿಪಡಿಸದೆ ಸರ್ಕಾರ ಮೀನ ಮೇಷ ಎಣಿಸುತ್ತಿದ್ದು, ಹಾವೇರಿಯಲ್ಲಿ ನಡೆಯುವ ಅಖಿಲ ಭಾರತ ಸಾಹಿತ್ಯ ಸಮ್ಮೇಳನದ (Kannada Sahitya Sammelana) ಒಳಗಾಗಿ ಧಾಟಿಯನ್ನು ನಿಗದಿಪಡಿಸಿ ಎಂದು ಕಸಾಪ ಅಧ್ಯಕ್ಷ ಡಾ. ಮಹೇಶ್‌ ಜೋಶಿ ಪತ್ರ ಬರೆದು ಒತ್ತಾಯಿಸಿದ್ದಾರೆ.
ಮುಖ್ಯಮಂತ್ರಿ ಬಸವರಾಜ ಬೊಮ್ಮಾಯಿ ಅವರಿಗೆ ಪತ್ರ ಬರೆದಿರುವ ಮಹೇಶ್‌ ಜೋಶಿ, ಗೀತೆ 1924ರಲ್ಲಿ ರಚನೆಯಾಗಿ, ಇಂದಿಗೆ 98 ವರ್ಷವಾಯಿತು. ಎರಡು ಸಲ ಪರಿಷ್ಕರಣೆಗೊಂಡು ಮೈಸೂರಿನ ಸಂಪದಭ್ಯುದಯ ಪತ್ರಿಕೆಯಲ್ಲಿ ಪ್ರಕಟವಾಯಿತು. ಅನಂತರ ಮತ್ತೆ ಪರಿಷ್ಕರಣಗೊಂಡು ಕುವೆಂಪು ಅವರ ‘ಕೊಳಲು’ ಕವನ ಸಂಕಲನದಲ್ಲಿ ಪ್ರಕಟವಾಯಿತು. ಭಾರತದ ಅಖಂಡತೆಯನ್ನೂ, ಭಾವೈಕ್ಯವನ್ನೂ ಎತ್ತಿ ಹಿಡಿಯುವ ಗೀತೆ ಇದು. ಭಾರತಾಂತರ್ಗತ ಕರ್ನಾಟಕ, ಕರ್ನಾಟಕಾಂತರ್ಗತ ಭಾರತ ಎಂಬುದನ್ನು ಆವೇಶವಿಲ್ಲದೆ, ಘೋಷಣೆಗಳಿಲ್ಲದೆ ಸಾರುವ ಗೀತೆಯಿದು. ಇಂತಹ ಅಪರೂಪದ ಗೀತೆಯನ್ನು ಪರಿಷತ್ತು ನಾಡಗೀತೆಯಾಗಿ ಆರಿಸಿತು. ಅದರ ಅನಂತರ ಸರ್ಕಾರವೂ ಇದನ್ನೇ ನಾಡಗೀತೆ ಎಂದು ಅಂಗೀಕರಿಸಿ, ಪರಿಷತ್ತಿನ ಆಯ್ಕೆಯನ್ನು ದೃಢಗೊಳಿಸಿತು ಎಂದಿದ್ದಾರೆ.
ಹೆಚ್ಚಿನ ಓದಗಾಗಿ: ಶಾಸ್ತ್ರೀಯ ಸ್ವಾಯತ್ತತೆಗೆ ಕೇಂದ್ರದ ಕದ ತಟ್ಟಿದ ಕರ್ನಾಟಕ: ನವದೆಹಲಿಯಲ್ಲಿ ಸಚಿವರ ಭೇಟಿ
ಸರ್ಕಾರ ಮೀನಮೇಷ ಎಣಿಸುತ್ತಿರುವುದರ ಕುರಿತು ಆಕ್ಷೇಪ ವ್ಯಕ್ತಪಡಿಸಿರುವ ಜೋಶಿ, ಕರ್ನಾಟಕ ರಾಜ್ಯ ಸರ್ಕಾರವು 2004ರ ಜನವರಿ 6ರಂದು ಈ ಗೀತೆಯನ್ನು ಕರ್ನಾಟಕದ ನಾಡಗೀತೆಯನ್ನಾಗಿ ನಿಗದಿಪಡಿಸಿ ಆದೇಶ ಹೊರಡಿಸಿತು. ಇದು ಆಗಿ 18 ವರ್ಷಗಳು ಕಳೆಯಿತು. ಆದರೆ ಸರ್ಕಾರವು ಇದನ್ನು ಯಾವ ಧಾಟಿಯಲ್ಲಿ ಹಾಡಬೇಕು, ಇದರ ಅವಧಿ ಎಷ್ಟಿರಬೇಕು ಎಂಬುದನ್ನು ನಿರ್ಧರಿಸದೆ ಮೀನ-ಮೇಷ ಎಣಿಸುತ್ತಿದೆ. ಕರ್ನಾಟಕದ ಸಮಸ್ತ ಕನ್ನಡಿಗರು, ಸಾಂಸ್ಕೃತಿಕ ಲೋಕವೂ ಸರ್ಕಾರದ ಈ ವಿಳಂಬಗತಿಯ ಬಗೆಗೆ ವಿಷಾದ ವ್ಯಕ್ತಪಡಿಸುತ್ತಿದೆ ಎಂದು ತಿಳಿಸಿದ್ದಾರೆ.
ಈವರೆಗೆ ಸರ್ಕಾರಗಳು ನಾಲ್ಕು ಸಮಿತಿಗಳನ್ನು ಇದೇ ವಿಚಾರಕ್ಕೆ ನೇಮಿಸಿರುವ ಕುರಿತು ಜೋಶಿ ಬೇಸರ ವ್ಯಕ್ತಪಡಿಸಿದ್ದಾರೆ. “ನಾಡಗೀತೆಯ 44 ಸಾಲುಗಳನ್ನೂ ಪುನರಾವರ್ತನೆ ಇಲ್ಲದೆ ಹಾಡುವ ಬಗೆಗೆ ಯಾವ ವ್ಯಕ್ತಿಯ ಅಥವಾ ಸಂಘಟನೆಯ ತಕರಾರಿಲ್ಲ. ಆದರೆ ಅದನ್ನು ಯಾವ ರಾಗದಲ್ಲಿ, ಯಾವ ಧಾಟಿಯಲ್ಲಿ ಹಾಡಬೇಕೆಂಬ ಬಗೆಗೆ ಮೊದಲಿನಿಂದಲೂ ವಿವಾದವಿದೆ. ಇದರ ನಿಷ್ಕರ್ಷೆಗಾಗಿ ಸರ್ಕಾರ ಇದುವರೆಗೆ ನಾಲ್ಕು ಸಮಿತಿಗಳನ್ನು ನೇಮಿಸಿ ವರದಿ ಪಡೆದುಕೊಂಡಿದೆ. ಈ ಸಮಿತಿಗಳ ಅಧ್ಯಕ್ಷರಾಗಿದ್ದವರು ಕ್ರಮವಾಗಿ ರಾಷ್ಟ್ರಕವಿ ಜಿ.ಎಸ್. ಶಿವರುದ್ರಪ್ಪ, ವಸಂತ ಕನಕಾಪುರೆ, ನಾಡೋಜ ಚೆನ್ನವೀರ ಕಣವಿ ಮತ್ತು ಡಾ. ಎಚ್.ಆರ್. ಲೀಲಾವತಿ ಅವರು” ಎಂದಿದ್ದಾರೆ.
ನಾಡಗೀತೆ ಎಂಬುದು ಸರ್ಕಾರವಷ್ಟೇ ಅಲ್ಲ; ಸಮಸ್ತ ಜನಸ್ತೋಮಕ್ಕೂ ಸಂಬಂಧಿಸಿದ್ದು. ಆದರೆ ಸಂಗೀತಗಾರರಲ್ಲಿ ಈ ಕುರಿತು ಎರಡು ಬಣಗಳಾಗಿ ಅವರ ಪ್ರತಿಪಾದನೆ ಬೇರೆ ಬೇರೆ ಆಗಿದೆ. ಈ ಒಂದು ಸಣ್ಣ ಕಾರಣಕ್ಕೆ `ಕರ್ನಾಟಕ ನಾಡಗೀತೆಯ ಧಾಟಿ ನಿರ್ಧಾರವಾಗಿಲ್ಲ. ಹಾಡುವ ಕ್ರಮದಲ್ಲಿ ಏಕರೂಪತೆ ಇಲ್ಲ. ಒಬ್ಬೊಬ್ಬರೂ ಒಂದೊಂದು ರೀತಿ ಹಾಡುತ್ತಿದ್ದಾರೆ. ಇದು ಕರ್ನಾಟಕಕ್ಕೆ ಶೋಭೆ ತರುವ ಸಂಗತಿಯಲ್ಲ.
ತಾವು ದಯವಿಟ್ಟು ಯಾವುದೇ ಕಾರಣಕ್ಕೂ ವಿಳಂಬ ಮಾಡದೆ, ಅದರ ಧಾಟಿ ಕುರಿತು ಸೂಕ್ತ ತೀರ್ಮಾನ ಕೈಗೊಳ್ಳಬೇಕೆಂದು ವಿನಂತಿಸುತ್ತೇನೆ. ಕರ್ನಾಟಕದ ಆರೂ ನೆರೆಯ ರಾಜ್ಯಗಳು ಅವು ಆವಿರ್ಭವಿಸಿದ ದಿನದಿಂದಲೇ ತಮ್ಮ ತಮ್ಮ ನಾಡಗೀತೆಗಳನ್ನು ನಿಗದಿಪಡಿಸಿ, ಏಕರೂಪದಲ್ಲಿ ಹಾಡಿಸುತ್ತಿವೆ. ಕರ್ನಾಟಕದ ಏಕೀಕರಣವಾಗಿ 66 ವರ್ಷಗಳಾದರೂ ಇದನ್ನು ಇನ್ನೂ ನೆನೆಗುದಿಗೆ ಇರಿಸಲಾಗಿದೆ. ಹಾವೇರಿಯಲ್ಲಿ ನಡೆಯುವ ಅಖಿಲ ಭಾರತ 86ನೆಯ ಕನ್ನಡ ಸಾಹಿತ್ಯ ಸಮ್ಮೇಳನಕ್ಕಿಂತ ಮುಂಚೆಯೇ ದಿಟ್ಟ ನಿರ್ಧಾರ ಕೈಗೊಳ್ಳಿ. ಹಾವೇರಿ ತಮ್ಮ ತವರು ಜಿಲ್ಲೆ. ಅಂತೆಯೇ ಅದು ನನ್ನ ಜಿಲ್ಲೆಯೂ ಹೌದು. ಹಾಗಾಗಿ ಸಮ್ಮೇಳನದ ಒಳಗೆ ಈ ತೀರ್ಮಾನ ಕೈಗೊಂಡು ವಿವಾದಕ್ಕೆ ಅಂತಿಮ ತೆರೆ ಎಳೆಯಬೇಕೆಂದು ಆಗ್ರಹಿಸುತ್ತೇನೆ. ಕನ್ನಡ ಸಾಹಿತ್ಯ ಪರಿಷತ್ತು ಅರ್ಧಶತಮಾನದ ಮೊದಲೇ ನಾಡಗೀತೆಯೆಂಬ ಪರಿಕಲ್ಪನೆಯನ್ನು ಸಾಕಾರಗೊಳಿಸಿದ್ದು. ಹಾಗಾಗಿ ತಾವು ಕೋರಿದರೆ ಪರಿಷತ್ತು ಸಹಕರಿಸಿ, ಸಮಸ್ಯೆಯನ್ನು ತಿಳಿಗೊಳಿಸಲು ಪ್ರಯತ್ನಿಸುತ್ತದೆ ಎಂದು ಮಹೇಶ್‌ ಜೋಶಿ ಹೇಳಿದ್ದಾರೆ.
ಹೆಚ್ಚಿನ ಓದಿಗಾಗಿ: ಪುಸ್ತಕ ವಿಮರ್ಶೆ: ಪದಗಳಿಗೆ ನಿಲುಕದ ಭಾವವೇ ಪ್ರೀತಿ