ಹೈದರಾಬಾದ್: ಸಿನಿಮಾ ಇರಲಿ, ಕ್ರಿಕೆಟ್‌ ಇರಲಿ. ಯಾವುದೇ ಕ್ಷೇತ್ರದ ಸೆಲೆಬ್ರಿಟಿಗಳು ಇರುವುದೇ ಹಾಗೆ. ಅವರ ಬಳಿ ಐಷಾರಾಮಿ ಕಾರುಗಳು ಇರುತ್ತವೆ. ಲಕ್ಷಾಂತರ ರೂ. ಬೆಲೆ ಬಾಳುವ ಬೈಕ್‌ಗಳು ಮನೆ ಮುಂದೆ ನಿಂತಿರುತ್ತವೆ. ಅದರಲ್ಲೂ, ಹೊಸದಾಗಿ ಮಾರುಕಟ್ಟೆಗೆ ಬರುವ ಐಷಾರಾಮಿ ಕಾರುಗಳ ಮೇಲೆ ಸೆಲೆಬ್ರಿಟಿಗಳು ಯಾವಾಗಲೂ ಕಣ್ಣಿಟ್ಟಿರುತ್ತಾರೆ. ಇದಕ್ಕೆ ನಿದರ್ಶನ ಎಂಬಂತೆ, ಟಾಲಿವುಡ್‌ ನಟ ಮಹೇಶ್‌ ಬಾಬು (Mahesh Babu) ಅವರು 5.4 ಕೋಟಿ ರೂಪಾಯಿ ಕೊಟ್ಟು ರೇಂಜ್‌ ರೋವರ್‌ ಕಾರು ಖರೀದಿಸಿದ್ದಾರೆ.
ಹೌದು, ಅತ್ಯಾಧುನಿಕ ಫೀಚರ್‌ಗಳಿರುವ, ಹೊಸ ಬ್ರ್ಯಾಂಡ್‌ ರೇಂಜ್‌ ರೋವರ್‌ ಎಸ್‌ವಿ ಕಾರನ್ನು ಮಹೇಶ್‌ ಬಾಬು ಅವರು ಖರೀದಿಸಿದ್ದಾರೆ. ಗೋಲ್ಡ್‌ ಕಲರ್‌ ಕಾರು ಆಕರ್ಷಕವಾಗಿದ್ದು, ಸಾಮಾಜಿಕ ಜಾಲತಾಣಗಳಲ್ಲಿ ಕಾರುಗಳ ಫೋಟೊಗಳು ವೈರಲ್‌ ಆಗಿವೆ. ಹಾಗೆಯೇ, ಗೋಲ್ಡ್‌ ಕಲರ್‌ ಕಾರು ಹೊಂದಿರುವ ಹೈದರಾಬಾದ್‌ನ ಮೊದಲ ವ್ಯಕ್ತಿ ಎಂಬ ಖ್ಯಾತಿಗೂ ಮಹೇಶ್‌ ಬಾಬು ಪಾತ್ರರಾಗಿದ್ದಾರೆ.
ದಕ್ಷಿಣ ಭಾರತದ ಖ್ಯಾತ ನಟರಿಗೆಲ್ಲ ರೇಂಜ್‌ ರೋವರ್‌ ಕಾರು ಎಂದರೆ ಅಚ್ಚುಮೆಚ್ಚು. ಮಲಯಾಳಂ ಸಿನಿಮಾ ಕ್ಷೇತ್ರದ ದಿಗ್ಗಜ ಮೋಹನ್‌ಲಾಲ್‌, ತೆಲುಗಿನ ಜ್ಯೂನಿಯರ್‌ ಎನ್‌ಟಿಆರ್‌, ಚಿರಂಜೀವಿ ಸೇರಿ ಹಲವು ಖ್ಯಾತನಾಮರು ರೇಂಜ್‌ ರೋವರ್‌ ಕಾರುಗಳಲ್ಲೇ ಓಡಾಡುತ್ತಾರೆ.
ಮಹೇಶ್‌ ಬಾಬು ಬಳಿ ಇರುವ ಕಾರುಗಳು ಯಾವವು?
ಮಹೇಶ್‌ ಬಾಬು ಅವರು ಇದೇ ಮೊದಲ ಬಾರಿಗೆ ಐಷಾರಾಮಿ ಹಾಗೂ ದುಬಾರಿ ಕಾರುಗಳನ್ನು ಖರೀದಿಸುತ್ತಿಲ್ಲ. ಈಗಾಗಲೇ ಅವರ ಬಳಿ ರೋಲ್ಸ್‌ ರಾಯ್ಸ್‌ ಘೋಸ್ಟ್‌, ರೇಂಜ್‌ ರೋವರ್‌ ವೋಗ್‌, ಆಡಿ 7, ಬಿಎಂಡಬ್ಲ್ಯೂ 7 ಸಿರೀಸ್‌ ಹಾಗೂ ಮರ್ಸಿಡೀಸ್‌-ಬೆಂಜ್‌ ಎಸ್-ಕ್ಲಾಸ್‌ ಕಾರುಗಳಿವೆ. ಇವುಗಳ ಸಾಲಿಗೆ ಈಗ ರೇಂಜ್‌ ರೋವರ್‌ ಕೂಡ ಸೇರಿದೆ.
ಇದನ್ನೂ ಓದಿ: Maduri Dixit : 3 ಕೋಟಿ ರೂಪಾಯಿಯ ಪೋರ್ಶೆ ಕಾರು ಖರೀದಿಸಿದ ಮಾಧುರಿ ದಿಕ್ಷಿತ್
ಮಹೇಶ್‌ ಬಾಬು ಕೊನೆಯದಾಗಿ 2022ರಲ್ಲಿ ಬಿಡುಗಡೆಯಾದ ‘ಸರ್ಕಾರು ವಾರಿ ಪಾಟ’ ಸಿನಿಮಾದಲ್ಲಿ ಕಾಣಿಸಿಕೊಂಡಿದ್ದರು. ಸದ್ಯ ಅವರು ಗುಂಟೂರು ಖಾರಂ ಸಿನಿಮಾದಲ್ಲಿ ನಟಿಸುತ್ತಿದ್ದರು. ಸಿನಿಮಾಗೆ ತ್ರಿವಿಕ್ರಮ ಶ್ರೀನಿವಾಸ್‌ ಅವರು ಆಕ್ಷನ್‌ ಕಟ್‌ ಹೇಳಿದ್ದಾರೆ. ಗುಂಟೂರು ಖಾರಂ ಸಿನಿಮಾಗೆ ಪೂಜಾ ಹೆಗ್ಡೆ ಅವರು ನಾಯಕಿಯಾಗಿದ್ದಾರೆ ಎಂದು ವರದಿಗಳಿಂದ ತಿಳಿದುಬಂದಿದೆ.