ಬೆಂಗಳೂರು: ಪ್ರಶಾಂತ್‌ ನೀಲ್‌ (Prashanth Neel) ನಿರ್ದೇಶನದ ಕೆಜಿಎಫ್‌ (KGF) ಸರಣಿ ಚಿತ್ರಗಳ ಬಳಿಕ ಸ್ಯಾಂಡಲ್‌ವುಡ್‌ ಸ್ಟಾರ್‌ ರಾಕಿಂಗ್‌ ಸ್ಟಾರ್‌ ಯಶ್‌ (Actor Yash) ಖದರೇ ಬದಲಾಗಿದೆ. ಪ್ಯಾನ್‌ ಇಂಡಿಯಾ ಮಟ್ಟದಲ್ಲಿ ಹವಾ ಎಬ್ಬಿಸಿದ್ದಾರೆ. ‘ಕೆಜಿಎಫ್‌ 2’ (KGF 2) ತೆರೆಕಂಡು ಎರಡೂವರೆ ವರ್ಷ ಕಳೆದರೂ ಯಶ್‌ ಅಭಿನಯದ ಯಾವ ಚಿತ್ರವೂ ಬಿಡುಗಡೆಯಾಗಿಲ್ಲ ಎಂದು ಬೇಸರಗೊಂಡಿರುವ ಅಭಿಮಾನಿಗಳಿಗೆ ಇಲ್ಲಿದೆ ಗುಡ್‌ನ್ಯೂಸ್‌. ಹೌದು, ಯಶ್‌ ಅಬಿನಯದ ಸೂಪರ್‌ ಹಿಟ್‌ ಚಿತ್ರವೊಂದು ಶೀಘ್ರದಲ್ಲೇ ಥಿಯೇಟರ್‌ಗಳಲ್ಲಿ ಮರು ಬಿಡುಗಡೆಯಾಗಲಿದೆ. ಈ ಮೂಲಕ ಅಭಿಮಾನಿಗಳು ಎರಡೂವರೆ ವರ್ಷಗಳ ಕಾಯುವಿಕೆ ಅಂತ್ಯವಾಗಲಿದೆ. ಹಾಗಾದರೆ ಯಾವ ಸಿನಿಮಾ? ಯಾವಾಗ ರಿ-ರಿಲೀಸ್‌? ಇಲ್ಲಿದೆ ಉತ್ತರ.
ಜುಲೈ 26 ಯಶ್‌ ಅಭಿಮಾನಿಗಳಿಗೆ ಹಬ್ಬ
ಜುಲೈ 26ರಂದು ಯಶ್‌ ಅಭಿನಯದ ಸೂಪರ್‌ ಹಿಟ್‌ ಚಿತ್ರ ʼರಾಜಾಹುಲಿʼ ಥಿಯೇಟರ್‌ಗಳಲ್ಲಿ ರಿ-ರಿಲೀಸ್‌ ಆಗಲಿದೆ. ಭೂಮಿ ಫಿಲಂಸ್‌ ಸಂಸ್ಥೆ ಚಿತ್ರವನ್ನು ವಿತರಣೆ ಮಾಡಲಿದೆ. ಯಶ್‌ ವೃತ್ತಿ ಜೀವನದ ಮತ್ತು ಸ್ಯಾಂಡಲ್‌ವುಡ್‌ನಲ್ಲಿ ಅತೀ ಹೆಚ್ಚು ಕಲೆಕ್ಷನ್‌ ಮಾಡಿದ ʼಕೆಜಿಎಫ್‌ 2ʼ 2022ರ ಏಪ್ರಿಲ್‌ 14ರಂದು ರಿಲೀಸ್‌ ಆಗಿ ಕೋಟಿ ಕೋಟಿ ರೂ. ಬಾಚಿಕೊಂಡಿತ್ತು. ಅದಾದ ಬಳಿಕ ಅವರ ಯಾವ ಚಿತ್ರವೂ ಬಿಡುಗಡೆಯಾಗಿಲ್ಲ. ಹೀಗಾಗಿ ಈಗ ʼರಾಜಾಹುಲಿʼಯ ರಿ-ರಿಲೀಸ್‌ ಸುದ್ದಿ ಕೇಳಿ ರಾಕಿಂಗ್‌ ಸ್ಟಾರ್‌ ಅಭಿಮಾನಿಗಳು ಥ್ರಿಲ್‌ ಆಗಿದ್ದಾರೆ.
ಮೇಘನಾ ರಾಜ್‌ ನಾಯಕಿ
ʼರಾಜಾಹುಲಿʼ ಚಿತ್ರದಲ್ಲಿ ಮೇಘನಾ ರಾಜ್‌ ನಾಯಕಿಯಾಗಿ ಕಾಣಿಸಿಕೊಂಡಿದ್ದಾರೆ. ಯಶ್‌ ಮತ್ತು ಮೇಘನಾ ಕಾಂಬಿನೇಷನ್‌ನ ಮೊದಲ ಚಿತ್ರ ಇದು ಎನ್ನುವುದೂ ವಿಶೇಷ. ಹಳ್ಳಿ ಸೊಗಡಿನ ಕಥೆಯನ್ನು ಒಳಗೊಂಡ ಈ ಸಿನಿಮಾದಲ್ಲಿ ಯಶ್‌ ರಾಜಾಹುಲಿಯಾಗಿ ಮತ್ತು ಮೇಘನಾ ಕಾವೇರಿ ಪಾತ್ರದಲ್ಲಿ ಮೋಡಿ ಮಾಡಿದ್ದಾರೆ. ಇವರಿಬ್ಬರ ಜೋಡಿಯನ್ನು ಪ್ರೇಕ್ಷಕರು ಮೆಚ್ಚಿಕೊಂಡಿದ್ದಾರೆ. ಬಾಕ್ಸ್‌ ಆಫೀಸ್‌ನಲ್ಲಿಯೂ ಈ ಚಿತ್ರ ಸದ್ದು ಮಾಡಿದೆ.
ʼರಾಜಾಹುಲಿʼ 2013ರ ನವೆಂಬರ್‌ 1ರಂದು ತೆರೆಕಂಡು ಸುಮಾರು 12 ಕೋಟಿ ರೂ. ಕಲೆಕ್ಷನ್‌ ಮಾಡಿದೆ. ಇದು ತಮಿಳಿನ ʼಸುಂದರ ಪಾಂಡಿಯನ್‌ʼ ಚಿತ್ರದ ರಿಮೇಕ್‌. ನಿರ್ಧೇಶಕ ಗುರು ದೇಶಪಾಂಡೆ ಕನ್ನಡದ ನೇಟಿವಿಟಿಗೆ ತಕ್ಕಂತೆ ಬದಲಾವಣೆ ಮಾಡಿ ಇದನ್ನು ತೆರೆ ಮೇಲೆ ತಂದಿದ್ದಾರೆ. ಯಶ್‌-ಮೇಘನಾ ಜತೆಗೆ ವಶಿಷ್ಟ ಎನ್‌. ಸಿಂಹ, ಚಿಕ್ಕಣ್ಣ, ಚರಣ್‌ರಾಜ್‌, ಮಿತ್ರ, ಎಂ.ಎನ್‌.ಲಕ್ಷ್ಮೀದೇವಿ, ಅರುಣ್‌ ಬಾಲರಾಜ್‌ ಸೇರಿದಂತೆ ಹಲವು ಕಲಾವಿದರು ಅಭಿನಯಿಸಿದ್ದಾರೆ.
ಇದನ್ನೂ ಓದಿ: Actor Yash: ರಾಕಿಂಗ್‌ ಸ್ಟಾರ್‌ ಯಶ್‌ ʼಟಾಕ್ಸಿಕ್‌ʼ ಸಿನಿಮಾದಿಂದ ಹೊರ ಬಿತ್ತು ಬಿಗ್‌ ಅಪ್‌ಡೇಟ್‌!
Yash in Anant Ambani Radhika marriage #Yash #YashBossNewLook #Yash19pic.twitter.com/KyfH3kESJZ
— 𝐆𝐎𝐖𝐓𝐇𝐀𝐌 (@gowthamn070832) July 14, 2024
ಇದು ಮೊದಲ ಸಲವಲ್ಲ
ವಿಶೇಷ ಎಂದರೆ ಯಶ್‌ ಅಬಿನಯದ ಚಿತ್ರವೊಂದು ರಿ-ರಿಲೀಸ್‌ ಆಗುತ್ತಿರುವುದು ಇದು ಮೊದಲ ಸಲ್ಲ. ಈ ಹಿಂದೆ ಅವರ ʼಮಿ. & ಮಿ. ರಾಮಾಚಾರಿʼ ಮರು ಬಿಡುಗಡೆಯಾಗಿತ್ತು. ಸದ್ಯ ಯಶ್‌ ಬಹುನಿರೀಕ್ಷಿತ ʼಟಾಕ್ಸಿಕ್‌ʼ ಚಿತ್ರದಲ್ಲಿ ನಿರತರಾಗಿದ್ದಾರೆ. ಮಲಯಾಳಂನ ಗೀತು ಮೋಹನ್‌ದಾಸ್‌ ನಿರ್ದೇಶನದ ಈ ಪ್ಯಾನ್‌ ಇಂಡಿಯಾ ಸಿನಿಮಾ ಈಗಾಗಲೇ ಕುತೂಹಲ ಕೆರಳಿಸಿದೆ. ಸದ್ಯ ಚಿತ್ರತಂಡ ಟೀಸರ್‌ ರಿಲೀಸ್‌ ಮಾಡಿದ್ದು ಬಿಟ್ಟರೆ ಯಾವುದೇ ಗುಟ್ಟು ಬಿಟ್ಟುಕೊಟ್ಟಿಲ್ಲ. ಮುಂದಿನ ವರ್ಷ ತೆರೆ ಕಾಣಲಿರುವ ಈ ಸಿನಿಮಾದಲ್ಲಿ ಕಾಲಿವುಡ್‌ ಸೂಪರ್‌ ಸ್ಟಾರ್‌ ನಯನತಾರಾ ಅಭಿನಯಿಸುತ್ತಾರೆ ಎನ್ನಲಾಗಿದ್ದು, ಅಧಿಕೃತ ಮಾಹಿತಿ ಇನ್ನೂ ಹೊರ ಬಿದ್ದಿಲ್ಲ. ಈ ಮಧ್ಯೆ ಇತ್ತೀಚೆಗೆ ನಡೆದ ಅನಂತ್‌ ಅಂಬಾನಿ-ರಾದಿಕಾ ಮರ್ಚಂಟ್‌ ಮದುವೆಯಲ್ಲಿ ಯಶ್‌ ಭಾಗಿಯಾಗಿದ್ದು, ಫೋಟೊ, ವಿಡಿಯೊ ವೈರಲ್‌ ಆಗಿದೆ.