ಬೆಂಗಳೂರು: ನಮಸ್ಕಾರ… ನಮಸ್ಕಾರ… ನಮಸ್ಕಾರ ಎನ್ನುತ್ತಲೇ ಕನ್ನಡ ಚಿತ್ರರಸಿಕರನ್ನು ಪ್ರೀತಿಯ ʻಮುಂಗಾರು ಮಳೆʼಯಲ್ಲಿ ತೋಯಿಸಿ ಸ್ಯಾಂಡಲ್‌ ವುಡ್ ನಲ್ಲಿ ಯಶಸ್ಸಿನ ʻಗಾಳಿಪಟʼ ಹಾರಿಸಿದ, ಕನ್ನಡಿಗರ ಹೃದಯದ ʻಅರಮನೆʼಯಲ್ಲಿ ʻಚೆಲುವಿನ ಚಿತ್ತಾರʼ ಬರೆದ ʻಹುಡುಗಾಟʼದ ಹುಡುಗನಿಗೆ ಇಂದು (ಜು. ೨) ಜನುಮದಿನದ ಸಂಭ್ರಮ.
ಕಾಮಿಡಿ ಟೈಮ್‌ನ ಪಂಚ್‌, ಮುಗ್ಧವಾದ ಮುಗುಳ್ನಗು, ಪಕ್ಕದ ಮನೆಯ ಹುಡುಗನೆಂಬಷ್ಟು ಆಪ್ತತೆ, ಪ್ರೀತಿಯ ಆರ್ದ್ರತೆಗಳೆಲ್ಲವನ್ನು ಕಡೆದು ಮಾಡಿದಂತೆ ಇರುವ ಬೆಳ್ಳಿ ತೆರೆಯ ಬಂಗಾರದ ಹುಡುಗ ಗೋಲ್ಡನ್ ಸ್ಟಾರ್ ಗಣೇಶ್ (Golden Star Ganesh)ಗೆ ಈಗ ಗಾಳಿಪಟ-೨ ಸಂಭ್ರಮ.
ಗಣೇಶ್ ಅವರ ಸಿನಿ ಪಯಣ ತುಂಬ ಇಂಟರೆಸ್ಟಿಂಗ್‌. ಕಾಮಿಡಿ ಟೈಮ್‌ನಿಂದ ಎದ್ದು ಬಂದು ಚೆಲ್ಲಾಟ ಆಡಿದರು. ಮುಂದೆ ಯೋಗರಾಜ ಭಟ್ಟರ ಕೈಯಲ್ಲಿ ಮೂಡಿದ ಮುಂಗಾರು ಮಳೆ ಮತ್ತು ಗಾಳಿಪಟ ಸಿನಿಮಾದ ಮೂಲಕ ಮನೆ ಮನಗಳನ್ನು ತಲುಪಿದರು. ಹುಡುಗಾಟ, ಬೊಂಬಾಟ್, ಚೆಲುವಿನ ಚಿತ್ತಾರ, ರೋಮಿಯೋ, ಆಟೋ ರಾಜ, ಕೂಲ್, ಶೈಲೂ, ಮಳೆಯಲಿ ಜೊತೆಯಲಿ, ಚಮಕ್, ಶ್ರಾವಣಿ ಸುಬ್ರಮಣ್ಯ, ಸಕ್ಕರೆ ಹೀಗೆ ಹಿಟ್‌ ಸಿನಿಮಾಗಳು ಗಣೇಶ್ ಬ್ರಾಂಡನ್ನು ಕ್ರಿಯೇಟ್‌ ಮಾಡಿದವು.
ನಟನೆ ಮಾತ್ರವಲ್ಲದೇ ಸಿನಿಮಾ ನಿರ್ಮಾಣ ಹಾಗೂ ಕಿರುತೆರೆಯಲ್ಲಿ ಸೂಪರ್‌ಮಿನಿಟ್‌, ಗೋಲ್ಡನ್ ಗ್ಯಾಂಗ್‌ ಹೀಗೆ ಸೂಪರ್‌ ಹಿಟ್‌ ರಿಯಾಲಿಟಿ ಶೋಗಳಿಗೆ ನಿರೂಪಣೆ ಮಾಡುವ ಮೂಲಕ ಮಿಂಚಿದ್ದಾರೆ. ಗಣೇಶ್ ಈಗ ಸಾಲು ಸಾಲು ಸಿನಿಮಾಗಳಲ್ಲಿ ಅಭಿನಯಿಸುತ್ತಿದ್ದಾರೆ. ಅದರಲ್ಲಿಯೂ ಅವರ ಅಭಿನಯದ ಬಹು ನಿರೀಕ್ಷಿತ ಚಿತ್ರವಾದ ಯೋಗರಾಜ್ ಭಟ್ ನಿರ್ದೇಶನದಲ್ಲಿ ಮೂಡಿಬರುತ್ತಿರುವ ‘ಗಾಳಿಪಟ 2‘ ಚಿತ್ರ ಬಿಡುಗಡೆಗೆ ಸಿದ್ಧವಾಗಿದೆ. ಆಗಸ್ಟ್ 12ರಂದು ಅದ್ಧೂರಿಯಾಗಿ ತೆರೆಗೆ ಬರಲಿದೆ.
ಇದನ್ನೂ ಓದಿ | Gaalipata 2 | ಗೋಲ್ಡನ್ ಸ್ಟಾರ್‌ಗೆ ಸಿಕ್ತು ಚಿತ್ರ ತಂಡದಿಂದ ಜನ್ಮದಿನ ಗಿಫ್ಟ್‌
ಜನುಮದಿನಕ್ಕೆ ಅಭಿಮಾನಿಗಳಲ್ಲಿ ಕ್ಷಮೆ ಕೋರಿದ ಗಣೇಶ್
ಇತ್ತೀಚಿನ ವರ್ಷಗಳಲ್ಲಿ ಕೊರೊನಾದಿಂದಾಗಿ ಗಣೇಶ್ ತಮ್ಮ ಜನ್ಮ ದಿನವನ್ನು ಆಚರಿಸಲು ಸಾಧ್ಯವಾಗಿಲ್ಲ. ಕೊರೊನಾ ಹಾವಳಿ ತಗ್ಗಿದರೂ ಕೂಡ ಅಭಿಮಾನಿಗಳ ಜತೆ ಹುಟ್ಟು ಹಬ್ಬದ ಸಂಭ್ರಮ ಆಚರಿಸಿಕೊಳ್ಳಲಾಗುತ್ತಿಲ್ಲ ಎಂದು ಅಭಿಮಾನಿಗಳಿಗೆ ಪತ್ರವನ್ನು ಬರೆದು ಮನವಿ ಮಾಡಿಕೊಂಡಿದ್ದಾರೆ.
ಗಾಳಿಪಟ -2 ಚಿತ್ರತಂಡದಿಂದ ಭರ್ಜರಿ ಗಿಫ್ಟ್‌
ಅಭಿಮಾನಿಗಳ ಜತೆ ಈ ಬಾರಿ ಗಣೇಶ್ ಹುಟ್ಟು ಹಬ್ಬವನ್ನು ಆಚರಿಸಿಕೊಳ್ಳದಿದ್ದರೂ, ಅಭಿಮಾನಿಗಳಿಗೆ ಸಿಹಿ ಸುದ್ದಿಯನ್ನು ನೀಡಿದ್ದಾರೆ. ಶನಿವಾರ (ಜು.೨) ರಂದು ಬೆಳಗ್ಗೆ 10.5೦ಕ್ಕೆ ಯೋಗರಾಜ್ ಭಟ್ ನಿರ್ದೇಶನದ ಗಾಳಿಪಟ-2 ಚಿತ್ರದ ʻನಾನಾಡದ ಮಾತೆಲ್ಲವʼ ಹಾಡು ಬಿಡುಗಡೆಗೊಂಡಿದೆ. ಸಾಹಿತ್ಯ ಜಯಂತ್‌ ಕಾಯ್ಕಿಣಿ ಅವರದು. ಹಾಡಿದ್ದು ಸೋನು ನಿಗಮ್‌. ಸಂಗೀತ ಅರ್ಜುನ್‌ ಜನ್ಯಾ. ಮುಂಗಾರು ಮಳೆ ಟೀಮ್‌ ಮತ್ತೊಂದು ಅಚ್ಚರಿ ಸೃಷ್ಟಿಸಲಿದೆ ಎಂಬ ನಿರೀಕ್ಷೆ ಎಲ್ಲೆಡೆ ಇದೆ.
ಜಯಂತ್‌ ಕಾಯ್ಕಿಣಿ ಅವರು ಹಾಡಿನ ಕುರಿತಾಗಿ ಮಾತನಾಡಿ ʻನಾನು ಹಾಗೂ ಯೋಗರಾಜ್ ಭಟ್, ಸೋನು ನಿಗಮ್‌ ಕಾಂಬಿನೇಷನ್‌ನಲ್ಲಿ ಈ ಹಾಡು ಮೂಡಿಬರುತ್ತಿರುವುದು ಸಂತಸದ ವಿಷಯ. ನನ್ನ ಮತ್ತು ಯೋಗರಾಜ್ ಭಟ್ ಅವರ ನಂಟು ತುಂಬ ಹಳೆಯದು. ಈ ಕಾಂಬಿನೇಷನ್‌ಗೆ ನಾನು ʻಜಂಟಿ ಅಭ್ಯಾಸಕ್ಕೆ ಸುಸ್ವಾಗತʼ ಎಂದು ಕರೆಯುತ್ತಲೇ ಇರುತ್ತೇನೆ. ʻನಾನಾಡದ ಮಾತೆಲ್ಲವʼ ಹಾಡು ಅಭಿಮಾನಿಗಳಿಗೆ ಖುಷಿ ಕೊಡುತ್ತದೆʼ ಎಂದು ಹೇಳಿದರು.
ಇದನ್ನೂ ಓದಿ | Golden Star | ಜನುಮದಿನದ ಹಿನ್ನೆಲೆಯಲ್ಲಿ ಅಭಿಮಾನಿಗಳಲ್ಲಿ ಕ್ಷಮೆ ಕೇಳಿದ್ದೇಕೆ ಗಣೇಶ್?
Ismart ಜೋಡಿ ರಿಯಾಲಿಟಿ ಶೋಗೆ ಗಣೇಶ್ ಸಾರಥಿ
ಸ್ಟಾರ್ ಸುವರ್ಣ ವಾಹಿನಿಯಲ್ಲಿ ‘Ismart ಜೋಡಿ’ ಎಂಬ ಹೊಸ ಶೋ ಬರುತ್ತಿದ್ದು, ಅದರ ಸಾರಥಿಯಾಗಿ ‘ಗೋಲ್ಡನ್ ಸ್ಟಾರ್’ ಗಣೇಶ್ ಇರಲಿದ್ದಾರೆ. ಇದೊಂದು ರೊಮ್ಯಾಂಟಿಕ್ ಸೆಲೆಬ್ರಿಟಿ ಕಪಲ್ ಶೋ ಎಂದು ವಾಹಿನಿ ಹೇಳಿಕೊಂಡಿದೆ. ಸಿನಿಮಾ ಮತ್ತು ಕಿರುತೆರೆಯ 10 ಜನಪ್ರಿಯ ರೋಮ್ಯಾಂಟಿಕ್‌ ಜೋಡಿಗಳ ಜತೆ ಮನರಂಜನೆ ಮೋಡಿ ಮಾಡಲಿದ್ದಾರೆ ಗಣೇಶ್.
ಗೋಲ್ಡನ್ ದಾಂಪತ್ಯ ಜೀವನ
ನಟ ಗಣೇಶ್ ಅವರು 2008ರಲ್ಲಿ ಶಿಲ್ಪಾ ಅವರ ಜತೆ ದಾಂಪತ್ಯ ಜೀವನಕ್ಕೆ ಕಾಲಿಟ್ಟಿದ್ದರು. ಪತ್ನಿ ಶಿಲ್ಪಾ ಗಣೇಶ್ ಗೋಲ್ಡನ್ ಮೂವೀಸ್ ಅಡಿಯಲ್ಲಿ ಕೆಲ ಚಿತ್ರಗಳನ್ನು ನಿರ್ಮಿಸಿದ್ದಾರೆ.
ಪ್ರೀತಮ್ ಗುಬ್ಬಿ ನಿರ್ದೇಶನದ ‘ಬಾನದಾರಿಯಲ್ಲಿ’ ಸಿನಿಮಾದ ಶೂಟಿಂಗ್‌ನಲ್ಲಿ ಗಣೇಶ್ ಭಾಗಿಯಾಗಿದ್ದಾರೆ. ಇಲ್ಲಿ ಅವರೊಂದಿಗೆ ನಾಯಕಿರಾಗಿ ರುಕ್ಮಿಣಿ ವಸಂತ್ ಮತ್ತು ರೀಷ್ಮಾ ನಾಣಯ್ಯ ಕಾಣಿಸಿಕೊಳ್ಳಲಿದ್ದಾರೆ. ಜತೆಗೆ ʻತ್ರಿಬಲ್‌ ರೈಡಿಂಗ್‌ʼ ಸಿನಿಮಾ ಬಿಡುಗಡೆಗೆ ಸಜ್ಜಾಗಲಿದ್ದು, ದಿನಾಂಕ ಘೋಷಣೆ ಆಗಬೇಕಿದೆ.
ಇದನ್ನೂ ಓದಿ | ಆಗಸ್ಟ್ 15ಕ್ಕೆ 3 ದಿನ ಮೊದಲು ಹಾರಲಿದೆ ʼಗಾಳಿಪಟ -2ʼ: ಗೋಲ್ಡನ್ ಸ್ಟಾರ್ ಯೋಗರಾಜ ಭಟ್ ಜೋಡಿ