ಬೆಂಗಳೂರು : ರಿಯಲ್ ಸ್ಟಾರ್ ಉಪೇಂದ್ರ ಕುಟುಂಬದ ಕುಡಿ ನಿರಂಜನ್ ಸುಧೀಂದ್ರ ನಾಯಕನಾಗಿ ಗಾಂಧಿನಗರಕ್ಕೆ ಎಂಟ್ರಿ ಕೊಟ್ಟಿದ್ದಾರೆ. ನಮ್ಮ ಹುಡುಗರು ಚಿತ್ರದಲ್ಲಿ (Namma Hudugaru Movie ) ಪ್ರಮುಖ ಪಾತ್ರದಲ್ಲಿ ನಿರಂಜನ್ ಸುಧೀಂದ್ರ ಅಭಿನಯಿಸಿದ್ದಾರೆ.
ಈ ಹಿಂದೆ ʼಸೆಕೆಂಡ್‌ ಹಾಫ್‌ʼ ಚಿತ್ರದಲ್ಲಿ ಪ್ರಿಯಾಂಕಾ ಅವರೊಟ್ಟಿಗೆ ನಟಿಸಿದ್ದು ಇದೀಗ ನಾಯಕನಾಗಿ ನಮ್ಮ ಹುಡುಗರು ಸಿನಿಮಾ ಮೂಲಕ ಪದಾರ್ಪಣೆ ಮಾಡಿದ್ದಾರೆ. ಈಗಾಗಲೇ ಟೀಸರ್, ಟ್ರೈಲರ್ ಹಾಗೂ ಹಾಡೊಂದು ಬಿಡುಗಡೆಯಾಗಿದೆ. ಜುಲೈ 8ಕ್ಕೆ ರಾಜ್ಯಾದ್ಯಂತ ಅದ್ದೂರಿ ಪ್ರದರ್ಶನ ಕಾಣಲು ಚಿತ್ರ ಸಜ್ಜಾಗಿದೆ. ನಟಿ ಪ್ರಿಯಾಂಕಾ ಉಪೇಂದ್ರ ಮನೆತನದ ಕುಡಿಗೆ ಶುಭ ಹಾರೈಸಿದ್ದಾರೆ.
ಹೆಚ್. ಬಿ ಸಿದ್ದು ಕಥೆ, ಚಿತ್ರಕಥೆ, ಸಂಭಾಷಣೆ ಜತೆಗೆ ಆ್ಯಕ್ಷನ್ ಕಟ್ ಹೇಳಿದ್ದು, ಕೆ. ಕೆ. ಅಶ್ರಫ್ ನಿರ್ಮಾಣ ಮಾಡಿದ್ದಾರೆ. ನಿರಂಜನ್ ಸುಧೀಂದ್ರ, ಶರತ್ ಲೋಹಿತಾಶ್ವ, ವಸಿಷ್ಠ ಸಿಂಹ ಮುಂತಾದ ತಾರಾಬಳಗ ಚಿತ್ರದಲ್ಲಿದೆ. ಇದೊಂದು ರೋಮ್ಯಾಂಟಿಕ್ ಆ್ಯಕ್ಷನ್ ಎಂಟರ್ಟೈನ್ಮೆಂಟ್‌ ಚಿತ್ರ. ಅಭಿಯಾನ್ ರಾಯ್ ಸಂಗೀತ ಸಂಯೋಜನೆ ಮಾಡಿದ್ದು, ಚಿದಾನಂದ್ ಹೆಚ್. ಕೆ. ಛಾಯಾಗ್ರಹಣ ಮಾಡಿದ್ದಾರೆ. ವಿಷ್ಣುವರ್ಧನ್ ಅಭಿಮಾನಿಯಾಗಿ ಚಿತ್ರದಲ್ಲಿ ಕಾಣಿಸಿಕೊಳ್ಳಲಿರುವ ನಿರಂಜನ್ ಬೆಳ್ಳಿ ಪರದೆ ಮೇಲೆ ಹೇಗೆ ಮೋಡಿ ಮಾಡ್ತಾರೆ ಅನ್ನೋದನ್ನು ಕಾದು ನೋಡ್ಬೇಕಿದೆ.
ಸ್ಯಾಂಡಲ್‌ವುಡ್‌ನಲ್ಲಿ ಮುನ್ನುಗ್ಗುತ್ತಿರುವ ನಿರಂಜನ್
‘ಸೂಪರ್‌ ಸ್ಟಾರ್’ ಎಂಬ ಮಾಸ್‌ ಟೈಟಲ್‌ ಇರುವ ಎರಡನೇ ಸಿನಿಮಾ ಕೂಡ ಈ ಹಿಂದೆ ನಿರಂಜನ್ ಅನೌನ್ಸ್‌ ಮಾಡಿದ್ದರು. ಈ ಚಿತ್ರದ ಶೇ. 50ರಷ್ಟು ಚಿತ್ರೀಕರಣ ಪೂರ್ಣವಾಗಿದೆ. ಮತ್ತೆರಡು ಸಿನಿಮಾಗಳನ್ನು ಒಪ್ಪಿಕೊಂಡಿದ್ದು ಸಿನಿಮಾಗೆ ‘ಕ್ಯೂ’ ಎಂಬ ವಿಶಿಷ್ಟವಾದ ಟೈಟಲ್‌ ಇಟ್ಟಿದ್ದಾರೆ. ಇದರಲ್ಲಿ ‘ಮೈನೇ ಪ್ಯಾರ್‌ ಕಿಯಾ’ ಸಿನಿಮಾ ಬೆಡಗಿ ಭಾಗ್ಯಶ್ರೀ ಪುತ್ರಿ ಆವಂತಿಕಾ ನಾಯಕಿಯಾಗಿದ್ದಾರೆ.
ನಾಗಶೇಖರ್‌ ಸಿನಿಮಾದ ಜತೆಗೆ ‘ಹಂಟರ್‌’ ಎಂಬ ಸಿನಿಮಾವನ್ನು ಸಹ ನಿರಂಜನ್ ಒಪ್ಪಿಕೊಂಡಿದ್ದು, ಅದನ್ನು ‘ಸೀಜರ್‌’ ಸಿನಿಮಾ ನಿರ್ದೇಶನ ಮಾಡಿದ್ದ ವಿನಯ್‌ ಕೃಷ್ಣ ನಿರ್ದೇಶನ ಮಾಡುತ್ತಿದ್ದಾರೆ. ಆ ಸಿನಿಮಾ ನಿರ್ಮಾಣ ಮಾಡಿದ್ದ ತಂಡವೇ ‘ಹಂಟರ್‌ಗೂ ಬಂಡವಾಳ ಹೂಡುತ್ತಿದೆ. ಹಂಟರ್‌ ಸಿನಿಮಾ ಸೋಮವಾರದಿಂದ ಆರಂಭವಾಗಲಿದೆ. ಈ ಸಿನಿಮಾದಲ್ಲಿ ನಿರಂಜನ್‌ಗೆ ಜೋಡಿಯಾಗಿ ಮಲಯಾಳಂ ಬೆಡಗಿ ಸೌಮ್ಯ ಮೆನನ್‌ ಕಾಣಿಸಿಕೊಳ್ಳುತ್ತಿದ್ದಾರೆ. ‘ಹಂಟರ್‌ʼ ಕೂಡ ಆ್ಯಕ್ಷನ್ ಥ್ರಿಲ್ಲರ್‌ ಸಿನಿಮಾವಾಗಿದೆ.
‘ಸೂಪರ್‌ ಸ್ಟಾರ್’ ಸಿನಿಮಾಗಾಗಿ ಭರ್ಜರಿ ಡ್ಯಾನ್ಸ್‌ ಕಲಿತಿದ್ದಾರೆ. ‘ಹಂಟರ್‌’ ಮತ್ತು ‘ಕ್ಯೂ’ಗಾಗಿ ವರ್ಕೌಟ್‌, ಜಿಮ್ನಾಸ್ಟಿಕ್‌ ಮಾಡಿ ದೇಹವನ್ನು ಹುರಿಗೊಳಿಸುತ್ತಿದ್ದಾರೆ ನಿರಂಜನ್.