ದಕ್ಷಿಣ ಭಾರತದ ಡ್ಯಾನ್ಸಿಂಗ್‌ ಕ್ವೀನ್‌ ಸಾಯಿ ಪಲ್ಲವಿ ಅವರ ಒಂದು ಮಾತು ಈಗ ವಿವಾದದಲ್ಲಿ ಸಿಕ್ಕಿಹಾಕಿಕೊಂಡಿದೆ. ಹಿಂದೊಮ್ಮೆ ಚರ್ಮದ ಬಣ್ಣದಲ್ಲಿ ತಾರತಮ್ಯ ಮಾಡುತ್ತಿದೆ ಎಂಬ ಕಾರಣದಿಂದ ಫೇರ್‌ನೆಸ್‌ ಕ್ರೀಮ್‌ ಜಾಹೀರಾತಿನಲ್ಲಿ ತಾನು ನಟಿಸುವುದಿಲ್ಲ ಎಂದು ಹೇಳಿದ ಸಾಯಿ ಪಲ್ಲವಿ ಎಲ್ಲರ ಗೌರವ ಗಳಿಸಿದ್ದರು. ಈಗ ಕಾಶ್ಮೀರಿ ಪಂಡಿತರ ಹತ್ಯಾಕಾಂಡ ಮತ್ತು ದನ ಸಾಗಿಸುವವರ ಮೇಲೆ ನಡೆದ ಹಲ್ಲೆಯನ್ನು ಸಮೀಕರಿಸುವ ಮಾತುಗಳನ್ನಾಡಿ ಸೋಶಿಯಲ್‌ ತಾಣಗಳಲ್ಲಿ ಟ್ರೋಲಿಂಗ್‌ಗೆ ತುತ್ತಾಗಿದ್ದಾರೆ.
ಖಾಸಗಿ ವಾಹಿನಿಯೊಂದಕ್ಕೆ ನೀಡಿದ ಸಂದರ್ಶನದಲ್ಲಿ ʼನಿಮ್ಮ ರಾಜಕೀಯ ಸಿದ್ಧಾಂತ ಏನು?ʼ ಎಂದು ಕೇಳಿದಾಗ ಸಾಯಿ ಪಲ್ಲವಿ ಹೇಳಿದ್ದು ಹೀಗೆ: ʼʼನಾನು ಸೈದ್ಧಾಂತಿಕವಾಗಿ ತಟಸ್ಥೆ. ಹಾಗೇ ಬೆಳೆದಿದ್ದೇನೆ. ಎಡ ಸಿದ್ಧಾಂತ ಹಾಗೂ ಬಲ ಸಿದ್ಧಾಂತಗಳ ಬಗ್ಗೆ ಮಾತಾಡುವುದು ಕೇಳಿದ್ದೇನೆ. ಆದರೆ ಅವುಗಳಲ್ಲಿ ಯಾವುದು ಸರಿ ಎಂಬುದು ನನಗೆ ಗೊತ್ತಿಲ್ಲ. ಈ ಹಿಂದೆ ಬಂದ ಕಾಶ್ಮೀರಿ ಫೈಲ್ಸ್‌ ಸಿನಿಮಾ, ಕಾಶ್ಮೀರಿ ಪಂಡಿತರ ಹತ್ಯೆಗಳ ಬಗ್ಗೆ ತೋರಿಸಿತು. ನಾವು ಅದನ್ನು ಮತೀಯವಾಗಿ ನೋಡುವುದಾದರೆ, ಇತ್ತೀಚೆಗೆ, ದನ ಸಾಗಿಸುತ್ತಿದ್ದ ಒಬ್ಬ ಮುಸ್ಲಿಂ ವ್ಯಕ್ತಿಯನ್ನು ಥಳಿಸಿ, ಅವನಿಂದ ʼಜೈ ಶ್ರೀ ರಾಂʼ ಎಂದು ಹೇಳಿಸಲಾಯಿತು. ಹಾಗಿದ್ದರೆ ಈ ಹತ್ಯೆಗೂ ಕಾಶ್ಮೀರದಲ್ಲಿ ನಡೆದ ಘಟನೆಗಳಿಗೂ ವ್ಯತ್ಯಾಸ ಏನಿದೆ?ʼʼ
ಮುಂದುವರಿದು ಆಕೆ ಹೇಳಿದ್ದು ಹೀಗೆ: ʼʼನನ್ನ ಕುಟುಂಬ ನನಗೆ ಕಲಿಸಿದ್ದು ಶೋಷಣೆಗೆ ಒಳಗಾದವರ ಪರ ನಿಲ್ಲಲು. ಅವರು ಯಾರೇ ಆಗಿರಲಿ ಅದು ಮುಖ್ಯವಲ್ಲ. ನೀವು ಒಳ್ಳೆಯ ಮನುಷ್ಯ ಜೀವಿ ಆಗಿರಬೇಕು. ಹಾಗಿದ್ದರೆ ನೀವು ಬೇರೊಬ್ಬರನ್ನು ಹರ್ಟ್‌ ಮಾಡುವುದಿಲ್ಲ. ನೀವು ನನಗಿಂತ ಪ್ರಬಲರಾಗಿದ್ದು, ನನ್ನ ಮೇಲೆ ಬಲಪ್ರಯೋಗ ಮಾಡುತ್ತಾ ಇದ್ದೀರಾದರೆ, ಅದು ದೌರ್ಜನ್ಯ. ದೊಡ್ಡ ಸಂಖ್ಯೆಯ ಜನತೆ ಕಡಿಮೆ ಸಂಖ್ಯೆಯವರ ಮೇಲೆ ಹಲ್ಲೆ ನಡೆಸಿದರೆ ಅದು ದೌರ್ಜನ್ಯ. ಅದನ್ನು ತಡೆಯಬೇಕು.ʼʼ
ಸಾಯಿ ಪಲ್ಲವಿಯ ಈ ಹೇಳಿಕೆಯ ಬಗ್ಗೆ ಟ್ವಿಟ್ಟರಿಗರು ಎರಡೂ ಕಡೆಯಿಂದಲೂ ಪ್ರತಿಕ್ರಿಯಿಸಿದ್ದಾರೆ. ಕೆಲವರು ಮೆಚ್ಚಿದ್ದರೆ, ಇನ್ನಷ್ಟು ಮಂದಿ ಕಟುವಾಗಿ ಟೀಕಿಸಿದ್ದಾರೆ.
ʼʼಕಾಶ್ಮೀರಿ ಪಂಡಿತರ ಹತ್ಯೆ ಹಾಗೂ ದನಗಳ್ಳರ ಮೇಲಿನ ಹಲ್ಲೆ ಎರಡೂ ಒಂದೇ ಅಲ್ಲ. ಅವೆರಡನ್ನೂ ಹೋಲಿಸುವುದೇ ತಪ್ಪುʼʼ ಎಂದು ಹಲವರು ಪ್ರತಿಕ್ರಿಯಿಸಿದ್ದಾರೆ. ʼʼಸೂಕ್ತ ಸಮಯದಲ್ಲಿ ಸಾಯಿ ಪಲ್ಲವಿ ಈ ಹೇಳಿಕೆ ನೀಡಿದ್ದಾರೆ. ಫೇರ್‌ನೆಸ್‌ ಕ್ರೀಮ್‌ ನಿರಾಕರಿಸಿದ ನಟಿಯ ಹೇಳಿಕೆ ಫೇರ್‌ ಆಗಿದೆʼʼ ಎಂದು ಇನ್ನು ಹಲವರು ಕೊಂಡಾಡಿದ್ದಾರೆ.
ʼʼಈ ಹೇಳಿಕೆಯ ಮೂಲಕ ಸಾಯಿ ಪಲ್ಲವಿ ದನಗಳ್ಳರನ್ನು ಸಮರ್ಥಿಸುತ್ತಿದ್ದಾರೆʼʼ ಎಂದು ಕೆಲವರು ಟ್ರೋಲ್‌ ಮಾಡಿದ್ದಾರೆ. ʼʼಇಂಥ ಹೇಳಿಕೆ ನೀಡಿ ಜನಪ್ರಿಯತೆ ಕಳೆದುಕೊಳ್ಳಲು ಒಬ್ಬ ತಾರೆಗೆ ಸಾಕಷ್ಟು ಧೈರ್ಯ ಬೇಕುʼʼ ಎಂದು ಇನ್ನು ಕೆಲವರು ಬೆನ್ನು ತಟ್ಟಿದ್ದಾರೆ. ಟ್ವಿಟರ್‌ನಲ್ಲಿ ಸಾಯಿ ಪಲ್ಲವಿ ಅವರ ಹೇಳಿಕೆ ಟ್ರೆಂಡಿಂಗ್‌ ಆಗುತ್ತಿದೆ.
ಸಾಯಿ ಪಲ್ಲವಿ ಅವರ ʼವಿರಾಟ ಪರ್ವಂʼ ಚಿತ್ರದ ಟ್ರೇಲರ್‌ ಇತ್ತೀಚೆಗೆ ಬಿಡುಗಡೆಯಾಗಿದೆ. ತೆಲುಗಿನಲ್ಲಿ ರಾಣಾ ದಗ್ಗುಬಾಟಿ ಅವರ ಜತೆ ಸಾಯಿ ಪಲ್ಲವಿ ನಟಿಸಿರುವ ಈ ಚಿತ್ರದ ಪ್ರಿ ರಿಲೀಸ್‌ ಇವೆಂಟ್‌ಗಳು ನಾನಾ ಕಡೆ ನಡೆಯುತ್ತಿದ್ದು, ಅದರಲ್ಲಿ ಸಾಯಿ ಪಲ್ಲವಿ ಪಾಲ್ಗೊಳ್ಳುತ್ತಿದ್ದಾರೆ.