ಮುಂಬೈ: ಟೈಗರ್‌ 3 ಸಿನಿಮಾ ಶೂಟಿಂಗ್‌ನಲ್ಲಿ ಬ್ಯುಸಿಯಾಗಿರುವ ಬಾಲಿವುಡ್‌ ನಟ ಸಲ್ಮಾನ್‌ ಖಾನ್‌ (Salman Khan) ಅವರಿಗೆ ಗಾಯವಾಗಿದೆ. ಸಲ್ಮಾನ್‌ ಖಾನ್‌ ಎಡ ಭುಜಕ್ಕೆ ಗಾಯವಾಗಿದ್ದು, ಈ ಕುರಿತ ಫೋಟೊವನ್ನು ಸಲ್ಮಾನ್‌ ಖಾನ್‌ ಅವರೇ ಸಾಮಾಜಿಕ ಜಾಲತಾಣಗಳಲ್ಲಿ ಹಂಚಿಕೊಂಡಿದ್ದಾರೆ. ಫೋಟೊ ಈಗ ವೈರಲ್ ಆಗಿದೆ.
ಫೋಟೊ ಹಂಚಿಕೊಳ್ಳುವ ಜತೆಗೆ ಸಲ್ಮಾನ್‌ ಖಾನ್‌ ಅವರು ಒಕ್ಕಣೆಯನ್ನೂ ಬರೆದಿದ್ದಾರೆ. “ಒಂದು ಕ್ಷಣಕ್ಕೆ ನೀವು ಜಗತ್ತನ್ನೇ ಹೊತ್ತುಕೊಂಡಂತೆ ಯೋಚನೆ ಮಾಡುತ್ತಿರುತ್ತೀರಿ. ಹಾಗೆಂದು ಎಲ್ಲರೂ ಭಾವಿಸಿರುತ್ತೇವೆ. ಆದರೆ, ಜಗತ್ತು ಬಿಡಿ, ಐದು ಕೆ.ಜಿಯ ಡಂಬೆಲ್‌ ಎತ್ತಿ ನೋಡಿ. ಟೈಗರ್‌ ಗಾಯಗೊಂಡಿದೆ” ಎಂದು ಸಲ್ಮಾನ್‌ ಖಾನ್‌ ಬರೆದುಕೊಂಡಿದ್ದಾರೆ. ಆ ಮೂಲಕ ಡಂಬೆಲ್‌ ಎತ್ತುವಾಗ ಗಾಯವಾಗಿದೆ ಎಂಬುದನ್ನು ತಿಳಿಸಿದ್ದಾರೆ.
ಸಲ್ಮಾನ್‌ ಖಾನ್‌ ಟ್ವೀಟ್
ಸಲ್ಮಾನ್‌ ಖಾನ್‌ ಅವರು ಇತ್ತೀಚೆಗೆ ನಟಿಸಿದ ರಾಧೆ, ಕಿಸಿ ಕಾ ಭಾಯ್‌, ಕಿಸಿ ಕಿ ಜಾನ್‌, ಅಂತಿಮ್‌-ದಿ ಫೈನಲ್‌ ಟ್ರುತ್‌ ಸೇರಿ ಹಲವು ಸಾಲು ಸಾಲು ಸಿನಿಮಾಗಳು ಫ್ಲಾಪ್‌ ಆಗಿವೆ. ಈಗ ಅವರು ಟೈಗರ್‌ 3 ಸಿನಿಮಾದಲ್ಲಿ ನಟಿಸುತ್ತಿದ್ದಾರೆ. ಇತ್ತೀಚೆಗಷ್ಟೇ ಅವರು ಕೋಲ್ಕೊತಾದಲ್ಲಿ ಸಿನಿಮಾ ಕಾರ್ಯಕ್ರಮದಲ್ಲಿ ಭಾಗವಹಿಸಿದ್ದರು. ಈಗ ಬಹುನಿರೀಕ್ಷಿತ ಸಿನಿಮಾ ಶೂಟಿಂಗ್‌ ವೇಳೆಯೇ ಅವರು ಗಾಯಗೊಂಡಿದ್ದಾರೆ.
ಇನ್ನು ಸಲ್ಮಾನ್‌ ಖಾನ್‌ ಅವರು ಗಾಯಗೊಂಡಿರುವ ಫೋಟೊ ಶೇರ್‌ ಮಾಡುತ್ತಲೇ ಅಭಿಮಾನಿಗಳು ಕಳವಳ ವ್ಯಕ್ತಪಡಿಸಿದ್ದಾರೆ. “ಲವ್‌ ಯು ಭಾಯ್‌, ಹುಷಾರಾಗಿರಿ. ಹೆಚ್ಚಿನ ಕಾಳಜಿ ತೆಗೆದುಕೊಳ್ಳಿ” ಎಂದು ಅಭಿಮಾನಿಯೊಬ್ಬರು ಪ್ರತಿಕ್ರಿಯಿಸಿದ್ದಾರೆ. “ಬೇಗ ಹುಷಾರಾಗಿ ಬನ್ನಿ, ನಿಮ್ಮ ಹೊಸ ಸಿನಿಮಾಗಾಗಿ ಕಾಯುತ್ತಿದ್ದೇವೆ” ಎಂದು ಮತ್ತೊಬ್ಬರು ಪ್ರತಿಕ್ರಿಯಿಸಿದ್ದಾರೆ. ಹೀಗೆ, ಹಲವು ಅಭಿಮಾನಿಗಳು ಕಾಳಜಿ ವ್ಯಕ್ತಪಡಿಸಿದ್ದಾರೆ.
ಇದನ್ನೂ ಓದಿ: Salman Khan: ಸಲ್ಮಾನ್‌ ಖಾನ್‌ ಸಹೋದರಿ ಅರ್ಪಿತಾ ಖಾನ್‌ ಡೈಮಂಡ್‌ ಕಿವಿಯೋಲೆ ಕಳವು, ಇವುಗಳ ಬೆಲೆ ಎಷ್ಟು?