ಬೆಂಗಳೂರು: ಬಿಗ್‌ ಬಾಸ್‌ ಸೀಸನ್‌ 10 (BBK Season 10) ಕದನ ನಾಲ್ಕನೇ ವಾರದಲ್ಲಿ ಮುನ್ನಡೆಯುತ್ತಿದೆ. ಸದಾ ಕಾಲ ದ್ವೇಷ, ವೈಷಮ್ಯಗಳೇ ಹೊಗೆಯಾಡುವ ಈ ಮನೆಯಲ್ಲಿ ಬೆಂಕಿ ಹಚ್ಚಲು ಹಳ್ಳಿ ಮನೆ ಟಾಸ್ಕ್‌ (Halli mane Task) ಕೂಡಾ ನೀಡಲಾಗಿದೆ. ಈ ನಡುವೆ ಈ ವಾರ ಮನೆಯಿಂದ ಯಾರು ಹೊರಬೀಳಲಿದ್ದಾರೆ ಎಂಬ ಕುತೂಹಲ ಹುಟ್ಟಿಕೊಂಡಿದೆ.
ಮನೆಯಿಂದ ಈ ವಾರ ಯಾರು ಎಲಿಮಿನೇಟ್‌ ಆಗಬೇಕು ಎಂಬ ನಿಟ್ಟಿನಲ್ಲಿ ಮಂಗಳವಾರ ನಾಮಿನೇಷನ್‌ ಪ್ರಕ್ರಿಯೆ (Nomination Process) ನಡೆಯಿತು. ಇದರಲ್ಲಿ ಅತಿ ಹೆಚ್ಚು ನಾಮಿನೇಷನ್‌ ಪಡೆದಿರುವ ವಿನಯ್ ಗೌಡ (Vinay Gowda) ಮನೆಯಿಂದ ಹೊರಹೋಗುವ ಟಾಪ್‌ ಕಂಟೆಂಡರ್‌ ಆಗಿ ಗಮನ ಸೆಳೆದಿದ್ದಾರೆ. ನಾಮಿನೇಷನ್‌ಗೆ ಅಧಿಕಾರ ಪಡೆದ ಎಂಟು ಮಂದಿಯಲ್ಲಿ ಆರು ಮಂದಿ ವಿನಯ್ ಗೌಡ ಅವರಿಗೆ ಮತ ಹಾಕಿದ್ದು ವಿಶೇಷವಾಗಿತ್ತು.
ಈ ವಾರ ಡೇಂಜರ್‌ ಝೋನ್‌ನಲ್ಲಿ ಇರುವವರು ಯಾರು?
ವಿನಯ್ ಗೌಡ, ಮೈಕಲ್ ಅಜಯ್, ಸಿರಿ, ತುಕಾಲಿ ಸಂತು, ರಕ್ಷಕ್, ತನಿಷಾ ಕುಪ್ಪಂಡ, ಸ್ನೇಹಿತ್ ಗೌಡ, ಕಾರ್ತಿಕ್ ಮಹೇಶ್ ಹಾಗೂ ವರ್ತೂರು ಸಂತೋಷ್ ಅವರು ನಾಮಿನೇಟ್ ಆಗಿದ್ದಾರೆ.
ಯಾರು ಯಾರನ್ನು ನಾಮಿನೇಟ್ ಮಾಡಿದರು?
ಬಿಗ್‌ ಬಾಸ್‌ ನೀಡಿದ ಬಲೂನ್‌ ಟಾಸ್ಕ್‌ನಲ್ಲಿ ಡ್ರೋನ್ ಪ್ರತಾಪ್ ಮತ್ತು ಕಾರ್ತಿಕ್ ಮಹೇಶ್ ತಲಾ ಮೂರು ಮತ್ತು ಒಂದು ಚೀಟಿ ಪಡೆದಿತ್ತು ಎಲ್ಲರಿಗೂ ಗೊತ್ತಿದೆ. ಗೆದ್ದ ಡ್ರೋನ್ ಪ್ರತಾಪ್ ಅವರು ಐದು ಮಂದಿಗೆ ನಾಮಿನೇಟ್ ಅಧಿಕಾರ ನೀಡಿದರೆ ಕಾರ್ತಿಕ್ ಒಬ್ಬರಿಗೆ ಅಧಿಕಾರ ನೀಡಿದರು. ಹೀಗೆ ಒಟ್ಟು ಎಂಟು ಮಂದಿಗೆ ಮಾತ್ರ ಈ ಬಾರಿ ವೋಟಿಂಗ್‌ ಪವರ್‌ ಇತ್ತು. ಕಾರ್ತಿಕ್, ಮೈಕಲ್, ಡ್ರೋನ್ ಪ್ರತಾಪ್, ನಮ್ರತಾ, ಸಂಗೀತಾ, ತನಿಷಾ, ಭಾಗ್ಯಶ್ರೀ ಹಾಗೂ ಸಿರಿ ನಾಮಿನೇಷನ್‌ ಅಧಿಕಾರ ಪಡೆದಿದ್ದರು.
ವಿನಯ್‌ಗೆ ಯಾರದೆಲ್ಲ ಮತ? ಕೊಟ್ಟ ಕಾರಣವೇನು?
ಬಿಗ್‌ ಬಾಸ್‌ ಮನೆಯಲ್ಲಿ ಆನೆ ಎಂದೇ ಕರೆಸಿಕೊಳ್ಳುವ ವಿನಯ್ ಗೌಡ ವಿರುದ್ಧ ಯಾರೂ ಧ್ವನಿ ಎತ್ತುತ್ತಿರಲಿಲ್ಲ. ಇದನ್ನು ಸ್ವತಃ ಸುದೀಪ್‌ ಕೂಡಾ ಪ್ರಶ್ನೆ ಮಾಡಿದ್ದರು. ಆದರೆ, ಇದೇ ಮೊದಲ ಬಾರಿಗೆ ನಾಮಿನೇಷನ್‌ ಪ್ರಕ್ರಿಯೆಯಲ್ಲಿ ವಿನಯ್ ಗೌಡ ಪರವಾಗಿ ದೊಡ್ಡದೊಂದು ಟೀಮ್‌ ವರ್ಕ್‌ ನಡೆಯಿತು. ಓಪನ್‌ ನಾಮಿನೇಷನ್‌ನಲ್ಲಿ ಡ್ರೋನ್ ಪ್ರತಾಪ್, ಕಾರ್ತಿಕ್, ಸಂಗೀತಾ, ಸಿರಿ, ತನಿಷಾ, ಭಾಗ್ಯಶ್ರೀ ವಿನಯ್ ವಿರುದ್ಧವಾಗಿ ಮತ ಹಾಕಿದರು.
ವಿನಯ್ ಆಗಾಗ ರೂಲ್ಸ್‌ ಬ್ರೇಕ್‌ ಮಾಡ್ತಾರೆ, ಇದರಿಂದ ಮನೆಗೆ ಶಿಕ್ಷೆ ಆಗುತ್ತಿದೆ ಎಂದು ಹೆಚ್ಚಿನವರು ಕೊಟ್ಟ ಕಾರಣವಾಗಿತ್ತು. ಇತರರನ್ನು ಕೆರಳಿಸುತ್ತಾರೆ, ಸೋಲನ್ನು ಒಪ್ಪಿಕೊಳ್ಳುವ ಮನೋಸ್ಥಿತಿ ಇಲ್ಲ, ಯಾವುದನ್ನೂ ಕ್ರೀಡಾ ಮನೋಭಾವದಿಂದ ತೆಗೆದುಕೊಳ್ಳುವುದಿಲ್ಲ ಎನ್ನುವುದು ವಿನಯ್ ನಾಮಿನೇಷನ್‌ಗೆ ಕೊಟ್ಟ ಕಾರಣಗಳು.
ಉಳಿದಂತೆ ಸಿರಿಗೆ ಎರಡು ನಾಮಿನೇಷನ್‌ (ಕಾರ್ತಿಕ್ ಮತ್ತು ಮೈಕಲ್), ರಕ್ಷಕ್ ಅವರನ್ನು ಇಬ್ಬರು (ಮೈಕಲ್, ತನಿಷಾ), ಮೈಕಲ್ ಅವರನ್ನು ಇಬ್ಬರು (ನಮ್ರತಾ ಮತ್ತು ಸಿರಿ), ತುಕಾಲಿ ಸಂತು ಅವರನ್ನು ಇಬ್ಬರು (ಸಂಗೀತಾ, ಡ್ರೋನ್ ಪ್ರತಾಪ್) ನಾಮಿನೇಟ್ ಮಾಡಿದರು. ತನಿಷಾ ಅವರನ್ನು ನಮ್ರತಾ, ಸ್ನೇಹಿತ್ ಅವರನ್ನು ಭಾಗ್ಯಶ್ರೀ ನಾಮಿನೇಟ್ ಮಾಡಿದರು.
ಇದನ್ನೂ ಓದಿ: BBK Season 10 : ಸಂಗೀತಾ-ನಮ್ರತಾ‌ರಲ್ಲಿ ಕಿತ್ತೋದೋಳು ಯಾರು? ವಿನಯ್-ಕಾರ್ತಿಕ್ ಮಧ್ಯೆ ಗಂಡ್ಸು ಯಾರು?
ಇದರ ಜತೆಗೆ ಕ್ಯಾಪ್ಟನ್‌ ನೀತು ಅವರು ತಮಗೆ ಸಿಕ್ಕಿದ ಡೈರೆಕ್ಟ್‌ ನಾಮಿನೇಷನ್‌ ಅಧಿಕಾರವನ್ನು ಕಾರ್ತಿಕ್ ಮೇಲೆ ಪ್ರಯೋಗ ಮಾಡಿದರು. ಹುಲಿ ಉಗುರು ಪೆಂಡೆಂಟ್‌ ಕೇಸಿಗೆ ಸಂಬಂಧಿಸಿ ಜೈಲು ಸೇರಿದ್ದ ವರ್ತೂರು ಸಂತೋಷ್ ಮನೆಗೆ ವಾಪಸಾಗಿದ್ದಾರೆ. ಅವರನ್ನು ನಾಮಿನೇಟ್ ಮಾಡಬೇಕೇ ಬೇಡವೇ ಎಂಬುದನ್ನು ಮನೆಯ ನಿರ್ಧಾರಕ್ಕೆ ಬಿಡಲಾಯಿತು. ಬಹುಮತದಂತೆ ವರ್ತೂರು ಸಂತೋಷ್ ಅವರನ್ನು ಮನೆಯಿಂದ ಹೊರಹೋಗಲು ನಾಮಿನೇಷನ್‌ ಮಾಡಲಾಯಿತು.