ಭಾರತೀಯ ಕ್ರಿಕೆಟ್ ಇಂದು ವೈಭವದ ದಿನಗಳನ್ನು ಕಾಣುತ್ತಿದೆ. ಸಚಿನ್ ತೆಂಡೂಲ್ಕರ್, ವಿರಾಟ್ ಕೊಹ್ಲಿ, ವೀರೇಂದ್ರ ಸೆಹವಾಗ್, ರಾಹುಲ್ ದ್ರಾವಿಡ್, ಮಹೇಂದ್ರ ಸಿಂಗ್ ಧೋನಿ, ಸೌರವ್ ಗಂಗೂಲಿ, ಅನಿಲ್ ಕುಂಬ್ಳೆ, ಕಪಿಲ್ ದೇವ್ ಮೊದಲಾದ ಆಟಗಾರರು ಭಾರತದ ಕ್ರಿಕೆಟ್ ವೈಭವಕ್ಕೆ ಖಂಡಿತ ಕಾರಣ ಆಗಿದ್ದಾರೆ. ಆದರೆ, ಭಾರತೀಯ ಟೆಸ್ಟ್ ಕ್ರಿಕೆಟ್‌ನಲ್ಲಿ ಎಂದಿಗೂ ಅಳಿಸಲು ಆಗದ ಛಾಪು ಮೂಡಿಸಿ ಹತ್ತಾರು ದಾಖಲೆಗಳನ್ನು ಬರೆದ ಭಾರತೀಯ ಟೆಸ್ಟ್ ಕ್ರಿಕೆಟಿನ ಅನಭಿಷಿಕ್ತ ದೊರೆ (ರಾಜ ಮಾರ್ಗ ಅಂಕಣ) ಸುನೀಲ್ ಮನೋಹರ್ ಗವಾಸ್ಕರ್ (Sunil Gavaskar) ಕೊಡುಗೆ ಖಂಡಿತವಾಗಿ ಸಣ್ಣದಲ್ಲ. ಇಂದು ಅವರಿಗೆ 74ನೇ ಜನ್ಮ ದಿನ. (Happy Birthday)
ಮುಂಬೈ ಮೂಲಕ ಉದಿಸಿದ ಕ್ರಿಕೆಟ್ ತಾರೆ
ಸುನೀಲ್ ಗವಾಸ್ಕರ್ ಹುಟ್ಟಿದ್ದು ಮುಂಬೈಯಲ್ಲಿ (10 ಜುಲೈ, 1949). ಆಗಲೂ ಒಂದು ಸ್ವಾರಸ್ಯ ಘಟನೆ ನಡೆಯಿತು. ಹುಟ್ಟಿದ ಮಗುವನ್ನು ನೋಡಲು ಅವರ ಅಜ್ಜಿ ಎರಡನೇ ಬಾರಿಗೆ ಆಸ್ಪತ್ರೆಗೆ ಬಂದಿದ್ದರಂತೆ. ಅವರು ತೊಟ್ಟಿಲಲ್ಲಿ ಮಲಗಿದ್ದ ಮಗುವನ್ನು ನೋಡಿ ‘ಇದು ನಮ್ಮ ಮಗು ಅಲ್ಲವೇ ಅಲ್ಲ! ನಮ್ಮ ಮಗುವಿನ ಕಿವಿಯ ಹಾಲೆಯಲ್ಲಿ ಒಂದು ರಂದ್ರ ಇತ್ತು’ ಎಂದು ಹಟಕ್ಕೆ ಕೂತರು. ಮತ್ತೆ ಆಸ್ಪತ್ರೆಯ ಸಿಬ್ಬಂದಿ ಹುಡುಕಿದಾಗ ಇದೇ ಮಗು ಒಂದು ಮೀನುಗಾರ ತಾಯಿಯ ಮಡಿಲಲ್ಲಿ ಬೆಚ್ಚಗೆ ಮಲಗಿತ್ತು.
‘ಅಜ್ಜಿ ನನ್ನನ್ನು ಸರಿಯಾಗಿ ಗಮನಿಸಿದ ಕಾರಣ ನಾನು ಅಮ್ಮನ ಜೊತೆಗೆ ಉಳಿದೆ. ಇಲ್ಲಾಂದ್ರೆ ಮೀನುಗಾರರ ಕುಟುಂಬದ ಪಾಲಾಗುತ್ತಿದ್ದೆ. ಯಾರಿಗೆ ಗೊತ್ತು ಮೀನು ಹಿಡಿಯುವುದರಲ್ಲಿ ದಾಖಲೆ ಮಾಡುತ್ತಿದ್ದನೋ ಏನೋ!’ ಎಂದು ಗವಾಸ್ಕರ್ ಮುಂದೆ ತಮಾಷೆಗೆ ಒಮ್ಮೆ ಹೇಳಿದ್ದರು. ಮುಂಬೈಯ ಸೈಂಟ್ ಕ್ಸೇವಿಯರ್ ಹೈಸ್ಕೂಲಿನಲ್ಲಿ ಓದುತ್ತಿರುವಾಗ ಅವರ ಕ್ರಿಕೆಟ್ ಪ್ರತಿಭೆ ಎಲ್ಲರಿಗೂ ತಿಳಿಯಿತು. 1966ರಲ್ಲಿ ಅವರು ಅದೇ ಶಾಲೆಯ ಪರವಾಗಿ ನಾಲ್ಕು ಶತಕ ಸಿಡಿಸಿದ್ದರು. ಅದರಲ್ಲಿ ಎರಡು ಡಬಲ್ ಸೆಂಚುರಿಗಳು!
ಟೆಸ್ಟ್ ಕ್ರಿಕೆಟ್ ಪ್ರವೇಶ ವಿಳಂಬ ಆಯಿತು
ಇಷ್ಟೆಲ್ಲ ಸಾಧನೆ ಮಾಡಿದ್ದರೂ ಟೆಸ್ಟ್ ಕ್ರಿಕೆಟ್ ಪ್ರವೇಶ ಅವರಿಗೆ ತುಂಬಾ ವಿಳಂಬ ಆಯಿತು ಎಂದೇ ಹೇಳಬಹುದು. ಅದಕ್ಕೆರಡು ಕಾರಣಗಳು. ಒಂದು ಆಗ ಭಾರತ ಟೆಸ್ಟ್ ಸ್ಕ್ವಾಡ್‌ನಲ್ಲಿ ಹಲವು ಆಟಗಾರರು ಹಲವು ವರ್ಷಗಳಿಂದ ಬೇರು ಬಿಟ್ಟಿದ್ದರು. ಇನ್ನೊಂದು ಕಾರಣ ಅವರ ಸೋದರ ಮಾವ ಮಾಧವ ಮಂತ್ರಿ (ಅವರು ಮಾಜಿ ಕ್ರಿಕೆಟರ್ ಕೂಡ) ಅವರು ಮಹಾರಾಷ್ಟ್ರದ ಕ್ರೀಡಾಮಂತ್ರಿ ಆಗಿದ್ದರು. ತಮ್ಮ ಅಳಿಯನಿಗೆ ಅವಕಾಶ ಕೊಟ್ಟರೆ ಜನ ಏನು ಹೇಳುತ್ತಾರೋ ಎಂಬ ಆತಂಕ ಅವರಲ್ಲಿ ಇತ್ತು! ಇದರಿಂದಾಗಿ ಭಾರತೀಯ ಟೆಸ್ಟ್ ಸ್ಕ್ವಾಡ್‌ಗೆ ಕರೆ ಪಡೆದಾಗ ಗವಾಸ್ಕರ್ ಅವರಿಗೆ 22 ದಾಟಿತ್ತು.
ಮೊದಲ ಸರಣಿಯಲ್ಲಿ ವಿಶ್ವ ದಾಖಲೆಯ ಇನ್ನಿಂಗ್ಸ್
ಸುನೀಲ್ ಗವಾಸ್ಕರ್ ಅವರು ಆಡಿದ ಮೊದಲ ಸರಣಿ ವೆಸ್ಟ್ ಇಂಡೀಸ್ ವಿರುದ್ಧ. ಆಗ ವಿಂಡೀಸ್ ಅಂದರೆ ನಾಲ್ಕು ಭಯಾನಕ ವೇಗದ ಬೌಲರ್‌ಗಳ ಬ್ಯಾಟರಿ ಎಂದೇ ಕರೆಯಲ್ಪಡುತ್ತಿತ್ತು. ಆದರೆ ತನ್ನ ಚೊಚ್ಚಲ ಸರಣಿಯಲ್ಲಿ ಗವಾಸ್ಕರ್ ನಾಲ್ಕು ಶತಕ ಸಿಡಿಸಿದರು! 154.80 ಸರಾಸರಿಯಲ್ಲಿ 774 ರನ್ ಗುಡ್ಡೆ ಹಾಕಿ ವಿಶ್ವದಾಖಲೆ ಬರೆದರು! ಆ ದಾಖಲೆಯು ಇಂದಿಗೂ ಅಬಾಧಿತ ಆಗಿದೆ ಎನ್ನುವುದು ಗವಾಸ್ಕರ್ ಹೆಗ್ಗಳಿಕೆ.
ಅದೇ ವಿಂಡೀಸ್ ವಿರುದ್ಧ ಗವಾಸ್ಕರ್ ಮುಂದೆ 65.45 ಸರಾಸರಿಯಲ್ಲಿ 2749 ರನ್ ಚಚ್ಚಿದರು. ಅದರಲ್ಲಿ 13 ಶತಕಗಳು ಕೂಡ ಇವೆ! ಈ ದಾಖಲೆ ಕೂಡ ಇಂದಿಗೂ ರಾಷ್ಟ್ರೀಯ ದಾಖಲೆ ಆಗಿಯೇ ಉಳಿದಿದೆ.
ಆಗಿನ ಕಾಲಕ್ಕೆ ಟೆಸ್ಟ್ ಆಡುತ್ತಿದ್ದ ಎಲ್ಲ ರಾಷ್ಟ್ರಗಳ ವಿರುದ್ಧ ಅವರು ಶತಕಗಳನ್ನು ಹೊಡೆದರು. ವಿದೇಶದ ನೆಲದಲ್ಲಿ ಕೂಡ ಚೆನ್ನಾಗಿ ಆಡಿದರು. ಕ್ರಿಕೆಟಿನ ಡಾನ್ ಆದ ಡಾನ್ ಬ್ರಾಡ್ಮನ್ ಅವರ ಶತಕಗಳ( 29) ದಾಖಲೆಯನ್ನು ಮುರಿದರು.
ಸ್ಮರಣೀಯ ಟೆಸ್ಟ್ ದಾಖಲೆಗಳು
ಕೇವಲ ಐದು ಅಡಿ ನಾಲ್ಕು ಇಂಚು ಎತ್ತರದ ಈ ಲಿಟಲ್ ಮಾಸ್ಟರ್ (ಮುಂದೆ ಸಚಿನ್ ಕೂಡ ಇದೇ ಹೆಸರು ಪಡೆದರು) ಟೆಸ್ಟ್ ಕ್ರಿಕೆಟಿಗೆ ಹೇಳಿ ಮಾಡಿಸಿದ ಆಟಗಾರ. ಆಕ್ರಮಣ ಅವರಿಗೆ ಗೊತ್ತೇ ಇಲ್ಲ. ಆದರೆ ಸಿಂಗಲ್, ಡಬಲ್ ರನ್ನುಗಳ ಮೂಲಕ ಜೊತೆಯಾಟ ಕಟ್ಟುವುದು ಗವಾಸ್ಕರ್ ಅವರಿಗೆ ಸಲೀಸು. ಹದಿನೆಂಟು ಬೇರೆ ಬೇರೆ ಆಟಗಾರರ ಜೊತೆಗೆ ಶತಕದ ಜೊತೆಯಾಟದ ದಾಖಲೆ ಕೂಡ ಅವರ ಹೆಸರಿನಲ್ಲಿ ಇದೆ. ಚೇತನ್ ಚೌಹಾಣ್ ಮತ್ತು ಸುನೀಲ್ ಗವಾಸ್ಕರ್ ಅವರ ಆರಂಭಿಕ ಜೊತೆಯಾಟ ಯಾವಾಗಲೂ ಭಾರತವನ್ನು ಆಧರಿಸುತ್ತಿತ್ತು. ಫ್ಲಿಕ್ ಮತ್ತು ಕವರ್ ಡ್ರೈವ್ ಅವರಿಗೆ ಇಷ್ಟವಾದ ಹೊಡೆತಗಳು. ಸುನೀಲ್ ಗವಾಸ್ಕರ್ ಭಾರತ ಕಂಡ ಅತ್ಯುತ್ತಮ ರಿಸ್ಟ್ ಆಟಗಾರ. ಅವರ ಟೆಸ್ಟ್ ದಾಖಲೆಗಳು ಅವರ ಹೆಸರಿನಷ್ಟೆ ಮನೋಹರ ಆಗಿವೆ.
125 ಟೆಸ್ಟ್ ಪಂದ್ಯಗಳಲ್ಲಿ 10,122ರನ್ ಸೂರೆ. ಅದರಲ್ಲಿ 34 ಶತಕಗಳು. 45 ಅರ್ಧ ಶತಕಗಳು. ಸರಾಸರಿ 51.12! ಅಜೇಯ 231 ಅವರ ಬೆಸ್ಟ್ ಇನ್ನಿಂಗ್ಸ್. ಪ್ರಥಮ ದರ್ಜೆ ಪಂದ್ಯಗಳಲ್ಲಿ 81 ಶತಕಗಳ ಜೊತೆ 25,834 ರನ್ ಅವರ ಖಾತೆಯಲ್ಲಿ ಇವೆ.
ಟೆಸ್ಟ್ ಕ್ರಿಕೆಟಿನಲ್ಲಿ 10,000 ರನ್ ಗಡಿಯನ್ನು ದಾಟಿದ ವಿಶ್ವದ ಮೊದಲ ಆಟಗಾರ ಗವಾಸ್ಕರ್. ಮುಂದೆ ಅದನ್ನು ಆಸ್ಟ್ರೇಲಿಯನ್ ಆಟಗಾರ ಅಲನ್ ಬಾರ್ಡರ್ ಮುರಿದರು. ಆಗ ಗ್ರೌಂಡಿನಲ್ಲಿ ಪಂದ್ಯ ವೀಕ್ಷಣೆ ಮಾಡುತ್ತಿದ್ದ ಗವಾಸ್ಕರ್ ಪಿಚ್ ತನಕ ಹೋಗಿ ಬಾರ್ಡರ್ ಅವರನ್ನು ಅಭಿನಂದಿಸಿದರು. ಆಗ ಅವರು ಹೇಳಿದ ಮಾತು – ದಾಖಲೆಗಳು ಇರುವುದೇ ಮುರಿಯುವುದಕ್ಕೆ!
ಮುಂದೆ ಅವರ ಗೆಳೆತನದ ಪ್ರತೀಕವಾಗಿ ಭಾರತ ಆಸ್ಟ್ರೇಲಿಯಾ ಟೆಸ್ಟ್ ಸರಣಿ ನಡೆಯುವಾಗ ನೀಡಲಾಗುವ ಟ್ರೋಫಿಗೆ ಬಾರ್ಡರ್ ಗವಾಸ್ಕರ್ ಟ್ರೋಫಿ ಎಂದೇ ಹೆಸರು ನೀಡಲಾಗಿದೆ.
ಅವರ ಕೆಲವು ಟೆಸ್ಟ್ ದಾಖಲೆಗಳು
1) ಹತ್ತು ಸಾವಿರ ಗಡಿ ದಾಟಿದ ವಿಶ್ವದ ಮೊದಲ ಆಟಗಾರ.
2) ಮೂರು ಬಾರಿ ಎರಡೂ ಇನ್ನಿಂಗ್ಸಗಳಲ್ಲಿ ಶತಕ ಸಿಡಿಸಿದ ಆಟಗಾರ.
3) ಚೊಚ್ಚಲ ಸರಣಿಯಲ್ಲಿ 774 ರನ್ ವಿಶ್ವ ದಾಖಲೆ.
4) ಒಂದು ಕ್ಯಾಲೆಂಡರ್ ವರ್ಷದಲ್ಲಿ ಶತಕ ಬಾರಿಸುವ ಸಾಧನೆಯನ್ನು ಅವರು ನಾಲ್ಕು ಬಾರಿ ಮಾಡಿದ್ದಾರೆ.
5) ಒಳ್ಳೆಯ ಫೀಲ್ಡರ್ ಆಗಿದ್ದ ಗವಾಸ್ಕರ್ ಸ್ಲಿಪ್ ಪೊಸಿಷನ್‌ನಲ್ಲಿ ನೂರಕ್ಕೂ ಅಧಿಕ ಕ್ಯಾಚ್ ಪಡೆದ ಭಾರತದ ಮೊದಲ ಆಟಗಾರ.
6) ಬ್ರಾಡ್ಮನ್ ದಾಖಲೆ ಮುರಿದು 34 ಶತಕ ಬಾರಿಸಿದ ಮೊದಲ ಆಟಗಾರ. (ಮುಂದೆ ಸಚಿನ್ ಆ ದಾಖಲೆಯನ್ನು ಮುರಿದರು)
ಏಕದಿನದ ಕ್ರಿಕೆಟಿನಲ್ಲಿ ಮಸುಕಾದ ಸಾಧನೆ
ಬದಲಾದ ಕಾಲಘಟ್ಟದಲ್ಲಿ ಏಕದಿನ ಪಂದ್ಯಗಳು ಆರಂಭವಾದಾಗ ಭಾರತೀಯ ಕ್ರಿಕೆಟ್ ತಂಡ ತನ್ನ ಟೆಸ್ಟ್ ಮನಸ್ಥಿತಿಯಿಂದ ಹೊರಬರಲೇ ಇಲ್ಲ! ಗವಾಸ್ಕರ್ ಕೂಡ ಕಷ್ಟ ಪಟ್ಟರು. ಮೊದಲ ಏಕದಿನ ವಿಶ್ವಕಪ್ ಪಂದ್ಯದಲ್ಲಿ ಇಂಗ್ಲೆಂಡ್ ವಿರುದ್ಧ ಇಡೀ ಆರುವತ್ತು ಓವರ್ ಆಡಿ ಅಜೇಯ 36 ರನ್ ಗಳಿಸಿದ ವಿಶ್ವದಾಖಲೆ ಕೂಡ ಗವಾಸ್ಕರ್ ಅವರ ಹೆಸರಲ್ಲಿ ಇದೆ! ಮುಂದೆ 1979, 1983 ವಿಶ್ವಕಪ್ ಪಂದ್ಯಗಳಲ್ಲಿ ಕೂಡ ಗವಾಸ್ಕರ್ ಆಡಿದರು.
1983ರ ಕಪಿಲ್ ನಾಯಕತ್ವದ ವಿಶ್ವ ಕಪ್ ವಿಜೇತ ಭಾರತೀಯ ತಂಡದಲ್ಲಿಯೂ ಅವರು ಆಡಿದರು. 108 ಏಕದಿನ ಪಂದ್ಯಗಳನ್ನು ಆಡಿರುವ ಗವಾಸ್ಕರ್ 35.13 ಸರಾಸರಿಯಲ್ಲಿ 3092 ರನ್ ಒಟ್ಟು ಮಾಡಿದ್ದಾರೆ. ಅದರಲ್ಲಿ ನ್ಯೂಜಿಲ್ಯಾಂಡ್ ವಿರುದ್ಧದ ಒಂದು ಶತಕ ಕೂಡ ಇದೆ.
ಇದನ್ನೂ ಓದಿ: ರಾಜ ಮಾರ್ಗ ಅಂಕಣ : ಚಿತ್ರರಂಗದ ಮಹಾಗುರು, ಹಿಟ್‌ ಚಿತ್ರಗಳ ಫ್ಯಾಕ್ಟರಿ ಕೆ. ಬಾಲಚಂದರ್
ದಾಖಲೆಗಳನ್ನು ಮೀರಿದ ಕ್ರಿಕೆಟರ್
ಅವರ ಹಲವು ದಾಖಲೆಗಳನ್ನು ಮುಂದೆ ಸಚಿನ್ ಮುರಿದರು. ಇನ್ನೂ ಕೆಲವು ದಾಖಲೆಗಳನ್ನು ಮುಂದೆ ವಿರಾಟ್ ಕೊಹ್ಲಿ ಮುರಿಯಬಹುದು. ವಿಶ್ವ ಕ್ರಿಕೆಟಿನಲ್ಲಿ ಹತ್ತಾರು ಆಟಗಾರರು ಅವರ ದಾಖಲೆಗಳನ್ನು ಮೀರಿ ನಿಂತಿದ್ದಾರೆ. ಆದರೆ ಒಬ್ಬ ಸಜ್ಜನ ಕ್ರಿಕೆಟರ್ ಆಗಿ, ಉದಯೋನ್ಮುಖ ಆಟಗಾರರಿಗೆ ಪ್ರೇರಣೆಯಾಗಿ, ಒಬ್ಬ ಅದ್ಭುತ ಕಾಮೆಂಟೇಟರ್ ಆಗಿ, ಭಾರತೀಯ ಕ್ರಿಕೆಟ್ ತಂಡದ ಮೆಂಟರ್ ಆಗಿ ಅವರ ಸೇವೆಯನ್ನು ನಾವು ಮರೆಯಲು ಸಾಧ್ಯವೇ ಇಲ್ಲ.
ಇಂದು ಹುಟ್ಟುಹಬ್ಬ ಆಚರಣೆ ಮಾಡುತ್ತಿರುವ ಸುನೀಲ್ ಗವಾಸ್ಕರ್ ಅವರಿಗೆ ಪದ್ಮಭೂಷಣ ಪ್ರಶಸ್ತಿ, ವಿಸ್ಡನ್ ಕ್ರಿಕೆಟರ್, ಶ್ರೇ‌ಷ್ಠವಾದ ಅರ್ಜುನ ಪ್ರಶಸ್ತಿ, ಸಿ.ಕೆ. ನಾಯ್ಡು ಜೀವಮಾನದ ಪ್ರಶಸ್ತಿ, ಐಸಿಸಿಸಿ ಹಾಲ್ ಆಫ್ ಫ್ರೇಮ್ ಗೌರವ ಎಲ್ಲವೂ ದೊರಕಿದೆ.