ಕ್ರಿಕೆಟ್ ಆಟ ನಮ್ಮ ಜೀವನ ಧರ್ಮ ಎಂದೇ ಬಿಂಬಿತವಾದ, ಕ್ರಿಕೆಟ್ ಆಟಗಾರರೇ ನಮ್ಮ ದೇವರು ಎಂದೇ ಕರೆಯಲ್ಪಡುವ ಭಾರತದಲ್ಲಿ ಟೆನಿಸ್‌ಗೆ, ಅದರಲ್ಲೂ ಮಹಿಳಾ ಟೆನಿಸ್‌ಗೆ ಕೂಡಾ ಒಂದು ಸ್ಥಾನ ಇದೆ ಎಂದು ತೋರಿಸಿಕೊಟ್ಟವರು ಸಾನಿಯಾ ಮಿರ್ಜಾ! ಇದೀಗ 36 ವರ್ಷ ಪೂರ್ತಿಯಾದ ಸಾನಿಯಾ ಈ ಸಂದರ್ಭದಲ್ಲಿ ಟೆನಿಸ್ ಆಟಕ್ಕೆ ವಿದಾಯವನ್ನು ಘೋಷಣೆ ಮಾಡಿದ್ದಾರೆ. ಈ ಸಹಜ ಮುಗ್ಧ ಸೌಂದರ್ಯದ ʻಮೂಗುತಿ ಸುಂದರಿ’ ಈಗ ಟೆನಿಸ್ ಕೋರ್ಟಿನಲ್ಲಿ ಆಡುತ್ತಿಲ್ಲ!
ಆಕೆಯ ವಿರುದ್ಧ ಒಮ್ಮೆ ಫತ್ವಾ ಹೊರಟಿತ್ತು!
2004ರ ವರ್ಷದಲ್ಲಿ ಆಕೆ ವೃತ್ತಿಪರವಾದ ಟೆನಿಸ್ ಆಡಲು ಆರಂಭ ಮಾಡಿದಾಗ, ಶಾರ್ಟ್ಸ್ ಮತ್ತು ಟೀ ಶರ್ಟ್ ಹಾಕಿ ಕೋರ್ಟಿಗೆ ಇಳಿದಾಗ ಆಕೆಯ ಮೇಲೆ ಕಾಮಾಲೆ ಕಣ್ಣಿನ ಸಂಪ್ರದಾಯವಾದಿಗಳು ಫತ್ವಾ ಹೊರಡಿಸಿ ಮುಗಿಬಿದ್ದದ್ದು ನನಗೆ ಇನ್ನೂ ನೆನಪಿದೆ! ಆಕೆ ಪರ್ದಾ ಹಾಕಲು ನಿರಾಕರಣೆ ಮಾಡಿದಾಗ, ಪಾಕಿಸ್ತಾನದ ಕ್ರಿಕೆಟ್ ಆಟಗಾರ ಶೋಯಬ್ ಮಲಿಕ್ ಅವರನ್ನು ನಿಖಾಹ್ ಆದಾಗ ಹಲವರು ಆಕೆಯನ್ನು ʻಪಾಕಿಸ್ಥಾನದ ಸೊಸೆ’ ಎಂದು ಮೂಗು ಮುರಿದದ್ದೂ ಇದೆ!
ಆಗೆಲ್ಲ ಸಾನಿಯಾ ತೀವ್ರ ಪ್ರತಿರೋಧವನ್ನು ಎದುರಿಸಿದ್ದಾರೆ. ಅದಕ್ಕೆ ಅವರ ಉತ್ತರ ಮಾತ್ರ ತಣ್ಣಗಿನ ಮೌನವೇ ಆಗಿತ್ತು! ಅಂತಹ ನೂರಾರು ವಿವಾದಗಳನ್ನು ಅರಗಿಸುವ ಧೈರ್ಯ ಮತ್ತು ದಿಟ್ಟತನಗಳು ಆಕೆಗೆ ರಕ್ತಗತವಾಗಿ ಬಂದಿದ್ದವು! ಆ ಸಾಮರ್ಥ್ಯವೇ ಆಕೆಯ ಶಕ್ತಿ ಎನ್ನಬಹುದು. ಆರಂಭದಿಂದ ಒಂದಲ್ಲ ಒಂದು ವಿವಾದಗಳು ಆಕೆಯನ್ನು ಬೆಂಬಿಡದ ಬೇತಾಳನಂತೆ ಕಾಡಿವೆ. ಅದಕ್ಕೆ ಅನ್ವರ್ಥವಾಗಿ ಆಕೆಯ ಆತ್ಮಚರಿತ್ರೆಯ ಪುಸ್ತಕದ ಹೆಸರು – ACE against ODDS!
ಆಕೆ ಕೇವಲ ದಂತದ ಗೊಂಬೆ ಅಲ್ಲ!
ವಿಶ್ವ ಮಟ್ಟದ ಆರು ಗ್ರ್ಯಾನ್‌ಸ್ಲಾಂ ಟ್ರೋಫಿಗಳನ್ನು ಎತ್ತಿದ ಕೀರ್ತಿ ಆಕೆಯದ್ದು. ಅದರಲ್ಲಿ ಮೂರು ಸಿಂಗಲ್ಸ್ ಮತ್ತು ಮೂರು ಡಬಲ್ಸ್. ಮಾರ್ಟಿನಾ ಹಿಂಗಿಸ್ ಮತ್ತು ಮಹೇಶ್ ಭೂಪತಿ ಆಕೆಯ ಫೇವರಿಟ್ ಡಬಲ್ಸ್ ಆಟಗಾರರು. ಡಬಲ್ಸ್‌ನಲ್ಲಿ ಒಮ್ಮೆ ವಿಶ್ವದ ಅಗ್ರ ಶ್ರೇಯಾಂಕದ ಆಟಗಾರ್ತಿ ಆಗಿ ಕೂಡ ರ‍್ಯಾಂಕ್ ಪಡೆದಿದ್ದರು.
ಸಾನಿಯಾ ಮಿರ್ಜಾ ಟೆನಿಸ್ ಶ್ರೇಯಾಂಕದಲ್ಲಿ ಹಲವು ವರ್ಷಗಳಲ್ಲಿ ಮೊದಲ ರ‍್ಯಾಂಕ್‌ನಲ್ಲಿಯೇ ಮೆರೆದು ಮಿಂಚಿದವರು. ಭಾರತದಲ್ಲಿ ಆಕೆ ಏರಿದ ಎತ್ತರವನ್ನು ಬೇರೆ ಯಾವ ಮಹಿಳಾ ಟೆನಿಸ್ ಆಟಗಾರ್ತಿ ಕೂಡ ಈವರೆಗೆ ತಲುಪಿದ ಉದಾಹರಣೆ ಇಲ್ಲ!
ಮದುವೆ ಆದ ನಂತರವೂ ಆಕೆಯ ಖದರು ಹಾಗೆಯೇ ಇತ್ತು
18 ವರ್ಷಗಳ ಸುದೀರ್ಘ ಟೆನಿಸ್ ಬದುಕಿನಲ್ಲಿ ಏಕಮೇವ ಅದ್ವಿತೀಯ ಪ್ರತಿಭೆ ಆಗಿ ದೀರ್ಘ ಕಾಲ ಮೆರೆಯುವುದು ಅಷ್ಟು ಸುಲಭ ಅಲ್ಲ. ಅದು ಕೂಡ ಮದುವೆ ಆಗಿ ಮಗು ಆದ ನಂತರ ಕೂಡ ವೃತ್ತಿಪರ ಟೆನಿಸ್ ಆಡುವುದು ಖಂಡಿತವಾಗಿ ಸವಾಲಿನ ಕೆಲಸ! ಆದರೆ ಸಾನಿಯಾ ಅವರ ಇಚ್ಛಾ ಶಕ್ತಿಗೆ ಇದು ಸಾಧ್ಯ ಆಗಿದೆ.
ಟೆನ್ನಿಸ್ ಲೆಜೆಂಡ್‌ಗಳ ಸಾಲಿನಲ್ಲಿ ಸಾನಿಯಾ
ಟೆನ್ನಿಸ್ ಜಗತ್ತಿನ ಅತ್ಯಂತ ಸ್ಫುರದ್ರೂಪಿ ತಾರೆಯರಾದ ಮಾರಿಯಾ ಶರಪೋವಾ, ಅನ್ನಾ ಕೊರ್ನಿಕೋವ, ಲಾರಾ ರಾಬ್ಸನ್, ಮಾರ್ಟಿನಾ ಹಿಂಗಿಸ್ ಮೊದಲಾದವರ ಸಾಲಿನಲ್ಲಿ ಸಾನಿಯಾ ಹೆಸರು ದೀರ್ಘ ಕಾಲ ಸ್ಥಾಪನೆ ಆಗಿತ್ತು.
ಅವರನ್ನು ಬೇರೆ ಬೇರೆ ಕಾರಣಕ್ಕೆ ದೂಷಣೆ ಮಾಡುವವರು ಕೂಡ ಆಕೆಯ ಗ್ಲಾಮರ್ ಸೆಳೆತಕ್ಕೆ ಒಳಗಾದವರೆ! ಆಕೆಯ ಕಣ್ಣು ಕೋರೈಸುವ ಸೌಂದರ್ಯ ನಿಜಕ್ಕೂ ಚುಂಬಕ.
ಹಾಗೆಂದು ಆಕೆ ಕೇವಲ ದಂತದ ಗೊಂಬೆ ಅನ್ನುವ ಹಾಗೆ ಇಲ್ಲ. ವಿಶ್ವದ ಅಗ್ರಮಾನ್ಯ ಟೆನ್ನಿಸ್ ಆಟಗಾರರಾದ ಮರಿಯನ್ ಬಾರ್ತೋಲಿ, ಮಾರ್ಟಿನಾ ಹಿಂಗಿಸ್, ದಿನಾರಾ ಸಫಿನಾ, ಕಾರಾ ಬ್ಲ್ಯಾಕ್ ಇವರನ್ನು ಒಂದಲ್ಲ ಒಂದು ಪಂದ್ಯದಲ್ಲಿ ಸೋಲಿಸಿದ ಕೀರ್ತಿಯು ಕೂಡ ಆಕೆಗೆ ಇದೆ!
ಬಲಿಷ್ಠ ಬೇಸ್ ಲೈನ್ ಆಟಗಾರ್ತಿ
ಬಲಿಷ್ಠ ಬೇಸ್ ಲೈನ್ ಆಟಗಾರ್ತಿ ಆದ ಸಾನಿಯಾ ಬಲಿಷ್ಠ ಹಿಂಗೈ ಮತ್ತು ಮುಂಗೈ ಎರಡೂ ಹೊಡೆತಗಳಿಗೆ ಪ್ರಸಿದ್ಧರು. ಅತ್ಯಂತ ಚುರುಕಿನ ಪಾದದ ಚಲನೆಯಿಂದ ಇಡೀ ಕೋರ್ಟ್‌ ಆಕ್ರಮಿಸಿಕೊಳ್ಳುವ ರೀತಿಯಿದೆಯಲ್ಲ ಅದು ಸೂಪರ್ಬ್! ಅತ್ಯಂತ ದೀರ್ಘ ಕಾಲದ ಏಸ್ ಎಸೆದು ಗೆದ್ದ ದಾಖಲೆ ಕೂಡ ಆಕೆಯ ಹೆಸರಲ್ಲಿದೆ.
ಏನಿದ್ದರೂ ಟೆನ್ನಿಸ್ ಜಗತ್ತಿನ ಮಿಂಚು ಈಗ ಕೋರ್ಟ್‌ನಲ್ಲಿ ಕಾಣಿಸಿಕೊಳ್ಳುವುದಿಲ್ಲ ಅನ್ನುವುದು ಟೆನಿಸ್ ಪ್ರಿಯರಿಗೆ ಬೇಸರದ ಸಂಗತಿ. ಆಕೆಯ ದಿಟ್ಟತನ, ಧೈರ್ಯ ಮತ್ತು ಸವಾಲುಗಳನ್ನು ಎದುರಿಸುವ ಶಕ್ತಿಗೆ ಯಾರಾದರೂ ತಲೆ ಬಾಗಬೇಕು!
ಇದನ್ನೂ ಓದಿ | ರಾಜ ಮಾರ್ಗ ಅಂಕಣ : ಐಕಾನ್‌ಗಳು ಎರಡೆರಡು ಬಾರಿ ಹುಟ್ಟುತ್ತಾರೆ! ಆಶ್ಚರ್ಯ ಆಯ್ತಾ? ಈ ಉದಾಹರಣೆ ನೋಡಿ!