ರಾಜ ಮಾರ್ಗ ಅಂಕಣ : ಮಗನಿಗಾಗಿ ಭತ್ತದ ಗದ್ದೆಯಲ್ಲೇ ಕ್ರಿಕೆಟ್‌ ಪಿಚ್‌ ಮಾಡಿಕೊಟ್ಟಿದ್ದರು ಶುಭಮನ್‌ ಗಿಲ್‌ ತಂದೆ!

ಭಾರತ ಮತ್ತು ನ್ಯೂಜಿಲ್ಯಾಂಡ್‌ ತಂಡಗಳ ನಡುವೆ ಅಹಮದಾಬಾದ್‌ನಲ್ಲಿ ಬುಧವಾರ (ಫೆ.೧, ೨೦೦೩) ನಡೆದ ಟಿ೨೦ ಸರಣಿಯ ಮೂರನೇ ಪಂದ್ಯವನ್ನು ನೋಡಿದ ಭಾರತೀಯರಿಗೆ ಶುಭಮನ್‌ ಗಿಲ್‌ ಕೊಟ್ಟ ರೋಮಾಂಚನ ಬಹುಕಾಲ ನೆನಪಿನಲ್ಲಿ ಉಳಿಯುವುದು ಖಂಡಿತ! ಶುಭಮನ್ ಗಿಲ್ ಮುಂದಿನ ಹತ್ತಾರು ವರ್ಷ ಭಾರತೀಯ ಕ್ರಿಕೆಟನ್ನು ಆಳುವ ಸಾಧ್ಯತೆಯು ಕ್ರಿಕೆಟ್ ಪ್ರಿಯರಿಗೆ ಕಂಡಿದೆ! ಈಗಾಗಲೇ ಆತನನ್ನು ಸಚಿನ್ ತೆಂಡೂಲ್ಕರ್ ಮತ್ತು ವಿರಾಟ್ ಕೋಹ್ಲಿ ಜೊತೆಗೆ ಹೋಲಿಕೆ ಮಾಡಲು ಆರಂಭ ಆಗಿದೆ. ಗಿಲ್ ಆ ಹೋಲಿಕೆಗೆ ಖಂಡಿತವಾಗಿ ವರ್ಥ್ ಆಗಿದ್ದಾರೆ!

ಮೂರೂ ಫಾರ್ಮ್ಯಾಟ್‌ಗಳಲ್ಲಿ ಗಿಲ್ ಚಾಂಪಿಯನ್ ಆಟಗಾರ!

ಕ್ರಿಕೆಟ್‌ನ ಮೂರೂ ಫಾರ್ಮ್ಯಾಟ್‌ಗಳಲ್ಲಿ (ಟೆಸ್ಟ್‌, ಏಕದಿನ, ಟಿ೨೦) ಏಕರೂಪದಲ್ಲಿ ಮಿಂಚುವುದು ಸುಲಭವೇನಲ್ಲ. ಆದರೆ, ಶುಭಮನ್‌ ಗಿಲ್‌ ಅನಾಯಾಸವಾಗಿ ಮೂರೂ ಮಾದರಿಗಳಿಗೆ ಹೊಂದಿಕೊಳ್ಳುತ್ತಾರೆ. ಅವರ ದಾಖಲೆಗಳೇ ಇದನ್ನು ಹೇಳುತ್ತವೆ.

-ಶುಭಮನ್‌ ಗಿಲ್ 13 ಟೆಸ್ಟ್ ಮ್ಯಾಚ್‌ಗಳಲ್ಲಿ ಆತನು ಓಪನರ್ ಆಗಿ 32 ಸರಾಸರಿಯಲ್ಲಿ 736 ರನ್ ಹೊಡೆದಿದ್ದಾರೆ. ಒಂದು ಶತಕ ಕೂಡ ಇದೆ.
-‌ ಏಕದಿನದ ಪಂದ್ಯಗಳಲ್ಲಿ ಆತನ ರೆಕಾರ್ಡ್ ಅತ್ಯಂತ ಆಕರ್ಷಕ ಆಗಿದೆ. 21 ಏಕದಿನದ ಪಂದ್ಯಗಳಲ್ಲಿ 1254 ರನ್! 73.76 ಸರಾಸರಿ! ನಾಲ್ಕು ಶತಕ! ಅದರಲ್ಲಿಯೂ ಒಂದು ಡಬಲ್ ಸೆಂಚುರಿ! ದ್ವಿಶತಕ ಹೊಡೆದ ಜಗತ್ತಿನ ಅತ್ಯಂತ ಕಿರಿಯ ಆಟಗಾರ ಎಂಬ ಕೀರ್ತಿಯು ಅವರಿಗೆ ದೊರೆತಿದೆ!
– 2003ರ ಜನವರಿ ೩ರಂದು ಶ್ರೀಲಂಕಾ ವಿರುದ್ಧದ ಪಂದ್ಯದಲ್ಲಿ ಟಿ ೨೦ ಲೋಕ ಪ್ರವೇಶ ಮಾಡಿದ ಗಿಲ್‌ ಒಂದೇ ತಿಂಗಳಲ್ಲಿ ಚುಟುಕು ಮಾದರಿಯಲ್ಲಿ ಮಿಂಚಿನಂತೆ ಕೋರೈಸಿದ್ದಾರೆ, ಗುಡುಗಿನಂತೆ ಅಬ್ಬರಿಸಿದ್ದಾರೆ. ಒಂದೇ ತಿಂಗಳಲ್ಲಿ ಆರು ಟಿ೨೦ ಪಂದ್ಯಗಳನ್ನು ಆಡಿರುವ (ಶ್ರೀಲಂಕಾ ವಿರುದ್ಧ ಮೂರು, ನ್ಯೂಜಿಲ್ಯಾಂಡ್‌ ವಿರುದ್ಧ ಮೂರು) ಗಿಲ್‌ ೧೬೬.೫೭ರ ಸರಾಸರಿಯಲ್ಲಿ ೨೦೨ ರನ್‌ ಗಳಿಸಿದ್ದಾರೆ. ಇದೀಗ ಆರನೇ ಟಿ20 ಪಂದ್ಯದಲ್ಲಿ ಸ್ಫೋಟಕ ಶತಕವು ಆತನ ದಾಖಲೆಗೆ ಸೇರ್ಪಡೆಯಾಗಿದೆ! ರೋಹಿತ್ ಶರ್ಮಾ, ವಿರಾಟ್ ಕೋಹ್ಲಿ ಇಲ್ಲದೆ ಕೂಡ ಪಂದ್ಯವನ್ನು ದೊಡ್ಡ ಮಟ್ಟದಲ್ಲಿ ಗೆಲ್ಲಲು ಸಾಧ್ಯ ಎಂದು ಭಾರತೀಯ ಕ್ರಿಕೆಟ್ ತಂಡ ಸಾಬೀತು ಮಾಡಿ ತೋರಿಸಿದೆ! ಅದಕ್ಕೆ ಕಾರಣ ಶುಭಮನ್ ಗಿಲ್ ಅವರಂತಹ ಯುವ ಆಟಗಾರರು! ಇದೇ ವರ್ಷ ಭಾರತದಲ್ಲಿಯೇ ನಡೆಯುವ ವಿಶ್ವಕಪ್ ಕ್ರಿಕೆಟ್ ಕೂಟಕ್ಕೆ ಶುಭಮನ್ ಭಾರೀ ದೊಡ್ಡ ಕೊಡುಗೆ ಆಗಲಿದ್ದಾರೆ ಅನ್ನುವುದು ಖಚಿತ ಭರವಸೆ!

ಅದೆಂಥ ತಾಕತ್ತು, ಅದೆಂಥ ಸ್ಟೈಲ್
ಮುಂದಿನ ಹಲವಾರು ವರ್ಷಗಳ ಭಾರತೀಯ ಕ್ರಿಕೆಟ್ ತಂಡದ ಮೂರೂ ಫಾರ್ಮ್ಯಾಟ್‌ಗಳಲ್ಲಿ ಆರಂಭಿಕ ಆಟಗಾರನಾಗಿ ಕಾಣಿಸಿಕೊಳ್ಳುವ ತಾಕತ್ತು ಇರುವ ಶುಭಮನ್ ಭಾರತದ ಮುಂದಿನ ಸೂಪರ್ ಸ್ಟಾರ್ ಆಗುವ ಎಲ್ಲ ಸಾಧ್ಯತೆ ಇದೆ! ಆತನ ಬ್ಯಾಟಿಂಗನಲ್ಲಿ ಸಚಿನ್ ಅವರ ಟೈಮಿಂಗ್, ರೋಹಿತ್ ಶರ್ಮಾ ಅವರ ಆಕ್ರಮಣ, ವಿರಾಟ್ ಕೊಹ್ಲಿ ಅವರ ಗ್ರೌಂಡ್ ಸ್ಟ್ರೋಕ್ ಎಲ್ಲವೂ ಇದೆ ಎಂಬಲ್ಲಿಗೆ ಶುಭಮನ್ ಭಾರತ ಕ್ರಿಕೆಟ್ ಪ್ರಪಂಚದ ನಿಡುಗಾಲದ ಭವಿಷ್ಯ ಅನ್ನುವುದರಲ್ಲಿ ಯಾವುದೇ ಸಂಶಯ ಇಲ್ಲ.

ಶುಭಮನ್‌ ಗಿಲ್‌ ವಿಶೇಷತೆ ಏನೆಂದರೆ ಅವನು ಅಬ್ಬರಿಸಿ ಬೊಬ್ಬಿರಿಯುವುದು ನಿಜವೆ. ಆದರೆ, ಎಲ್ಲರೂ ಲಯ ಕಳೆದುಕೊಳ್ಳುವುದಿಲ್ಲ. ಅವನದು ಬೇಕಾಬಿಟ್ಟಿ ಹೊಡೆತಗಳೇನೂ ಅಲ್ಲ. ನಿಜವೆಂದರೆ, ಏಕದಿನ ಕ್ರಿಕೆಟ್‌ನಲ್ಲಿ ಈಗ ಅವನ ಸರಾಸರಿ ೧೦೦ಕ್ಕಿಂತಲೂ ಮೇಲೆ ಇದೆ. ಆಡಿದ ೨೧ ಪಂದ್ಯಗಳಲ್ಲಿ ಗಳಿಸಿದದು ೧೨೫೪ ರನ್‌. ಅದರಲ್ಲಿ ೧೪೨ ಬೌಂಡರಿ, ೨೭ ಸಿಕ್ಸರ್‌ ಇದೆ. ಅಂದರೆ ಅರ್ಧಕ್ಕಿಂತಲೂ ಹೆಚ್ಚು ರನ್‌ ಬೌಂಡರಿ, ಸಿಕ್ಸರ್‌ಗಳ ಮೂಲಕವೇ ಬಂದಿದೆ. ಇದೇ ಆಟವನ್ನು ಟಿ ೨೦, ಟೆಸ್ಟ್‌ನಲ್ಲೂ ತೋರಿಸಿದ್ದಾರೆ. ಆಕ್ರಮಣಕಾರಿ ಆಟದ ಜತೆಗೆ ಕಲಾತ್ಮಕತೆಯನ್ನೂ ಬೆರೆಸುವ ಶೈಲಿಯಿಂದ ಆತ ಎಲ್ಲರ ಗಮನ ಸೆಳೆಯುತ್ತಾರೆ.

ಪಂಜಾಬ್‌ನ ಸಾಮಾನ್ಯ ರೈತನ ಮಗ ಶುಭಮನ್!

ಕೆಲವೇ ದಿನಗಳಲ್ಲಿ ದೇಶದ ಕಣ್ಮಣಿಯಾದ ಶುಭಮನ್ ಪಂಜಾಬಿನ ಜಲಾಲಾಬಾದ ಎಂಬ ಸಣ್ಣ ನಗರದಲ್ಲಿ ಒಬ್ಬ ಸಾಮಾನ್ಯ ರೈತನ ಕುಟುಂಬದಿಂದ ಬಂದವರು. ಆತನ ತಂದೆ ಸುಖವಿಂದರ್ ಮಗನ ಕ್ರಿಕೆಟ್ ಪ್ರತಿಭೆಗೆ ಆಧಾರವಾಗಿ ನಿಂತದ್ದು ನಿಜವಾಗಿಯೂ ಗ್ರೇಟ್! ತನ್ನ ಫಲವತ್ತಾದ ಗದ್ದೆಯನ್ನು ಲೆವೆಲ್ ಮಾಡಿ ಕ್ರಿಕೆಟ್ ಪಿಚ್ ಮಾಡಿ ತನ್ನ ಮಗನ ನೆರವಿಗೆ ನಿಂತವರು ತಂದೆ ಸುಖ್ವಿಂದರ್! ಇಡೀ ದಿನ ಅಪ್ಪನೇ ಬೌಲರ್ ಮತ್ತು ಮಗನೇ ಬ್ಯಾಟರ್!

ಅಪ್ಪ ಹೇಳುವ ಪ್ರಕಾರ ಶುಭಮನ್‌ಗೆ ಮೂರನೇ ವಯಸ್ಸಲ್ಲೇ ಕ್ರಿಕೆಟ್ ಆಸಕ್ತಿ ಮೂಡಿತ್ತು! ರಾತ್ರಿ ಮಲಗುವಾಗ ಕ್ರಿಕೆಟ್ ಬ್ಯಾಟ್ ಮತ್ತು ಬಾಲನ್ನು ತನ್ನ ಹಾಸಿಗೆಯ ಪಕ್ಕದಲ್ಲಿ ಇಟ್ಟು ಮಲಗುತ್ತಿದ್ದ. ಈ ಪ್ರತಿಭೆಯ ನೆರವಿಗೆ ಅಪ್ಪ ನಿಂತರು ಅನ್ನೋದು ಕ್ರಿಕೆಟಿನ ಭಾಗ್ಯ! ಮಗನ ಕ್ರಿಕೆಟ್ ಭವಿಷ್ಯ ರೂಪಿಸಲು ಊರಿನ ಕೃಷಿ ಭೂಮಿಯನ್ನು ಮಾರಿ ಮೊಹಾಲಿಗೆ ಬಂದವರು ಅಪ್ಪ. ಅಲ್ಲಿ ಬಾಡಿಗೆ ಮನೆ ಹಿಡಿದು ಮಗನ ಕ್ರಿಕೆಟ್ ಪ್ರತಿಭೆಗೆ ಆಧಾರವಾಗಿ ನಿಂತವರು ಅವರು! ಶುಭಮನ್ ತನ್ನ ತಂದೆಯ ಕನಸಿಗೆ ರೆಕ್ಕೆ ಮೂಡಿಸಿ ಬೆಳೆಯುತ್ತ ಹೋದರು.

ರಣಜಿ ಪಂದ್ಯದಲ್ಲಿ ಪಂಜಾಬ್ ಪರವಾಗಿ ಆಡುತ್ತ ಮೊದಲ ವರ್ಷವೇ ದಾಖಲೆಯ ರನ್ ಪರ್ವತ ಕಟ್ಟಿದವರು ಶುಭಮನ್ ! ಆಂಡರ್ 16 ಪಂದ್ಯಗಳಲ್ಲಿ ನಿರ್ಮಲ್ ಸಿಂಗ್ ಅವರ ಜೊತೆ 587 ರನ್ ಜೊತೆಯಾಟ ಪೂರ್ತಿ ಮಾಡುವಾಗ ಅತನ ವಯಸ್ಸು ಕೇವಲ 16 ವರ್ಷ! ಮುಂದೆ ಅಂಡರ್ 19 ವಿಶ್ವಕಪ್‌ನಲ್ಲಿ ಭಾರತದ ಪರವಾಗಿ
ಉಪನಾಯಕನಾಗಿ ಆಡುತ್ತ ಸರಣಿ ಶ್ರೇಷ್ಠ ಪ್ರಶಸ್ತಿ ಗೆದ್ದಿದ್ದರು! 124 ಸರಾಸರಿಯಲ್ಲಿ 372 ರನ್ ಅವರ ದಾಖಲೆ! ಪಾಕ್ ವಿರುದ್ಧ ಸೆಮಿ ಫೈನಲ್ ಪಂದ್ಯದಲ್ಲಿ ಶತಕ ಹೊಡೆದು ಏಕಾಂಗಿಯಾಗಿ ಭಾರತವನ್ನು ಗೆಲ್ಲಿಸಿದ್ದನ್ನು ಭಾರತ ಮರೆಯಲು ಸಾಧ್ಯವೇ ಇಲ್ಲ!

ಐಪಿಎಲ್ ಪಂದ್ಯಗಳಲ್ಲಿ ಕೂಡ ಆತನ ದಾಖಲೆಗಳು ಅತ್ಯುತ್ತಮ ಆಗಿವೆ. 2019ರಲ್ಲಿ ಶುಭಮನ್ ಗಿಲ್ ‘ಎಮರ್ಜಿಂಗ್ ಪ್ಲೇಯರ್’ ಅವಾರ್ಡ್ ಪಡೆದಿದ್ದರು. ಕಳೆದ ವರ್ಷ ಐಪಿಎಲ್ ಟ್ರೋಫಿಯನ್ನು ಗೆದ್ದ ಗುಜರಾತ್ ಟೈಟಾನ್ ಪರವಾಗಿ ಅವರು ಅತ್ಯುತ್ತಮವಾಗಿ ಆಡಿದ್ದರು.

ತನ್ನ ಎಲ್ಲ ಸಾಧನೆಗೆ ತಂದೆಯ ತ್ಯಾಗವೇ ಕಾರಣ ಅಂದರು ಗಿಲ್!

ತನ್ನ ಎಲ್ಲ ಕ್ರಿಕೆಟ್ ಸಾಧನೆಗಳಿಗೆ ತನ್ನ ತಂದೆ ಸುಖ್ವಿಂದರ್ ಅವರ ತ್ಯಾಗವೇ ಕಾರಣ ಎಂದು ಹೇಳುವಾಗ ಶುಭಮನ್ ಕಣ್ಣಲ್ಲಿ ರೋಮಾಂಚನ ಎದ್ದು ಕಾಣುತ್ತದೆ. ತಂದೆಯ ಬಗ್ಗೆ ಇರುವ ಉತ್ಕಟ ಪ್ರೀತಿ ಕೂಡ!

23ನೇ ವಯಸ್ಸಿನಲ್ಲಿರುವ ಶುಭಮನ್‌ ಗಿಲ್‌ ಆಗಲೇ ಪ್ರೀತಿಯ ಬಲೆಗೆ ಬಿದ್ದಿದ್ದಾರೆ. ಅವರು ಪ್ರೀತಿಸುತ್ತಿರುವುದು ಸೈಫ್‌ ಅಲಿ ಖಾನ್‌ ಮತ್ತು ಅಮೃತಾ ಸಿಂಗ್‌ ಮಗಳು ಸಾರಾ ಅಲಿ ಖಾನ್‌ಳನ್ನು. ಅವಳಿಗೆ ಈಗ ೨೭ ವರ್ಷ. ಅವರಿಬ್ಬರ ಪ್ರೀತಿ ಫಲಿಸಲಿ ಎಂದು ಹಾರೈಕೆ. ಆದರೆ, ಇದು ಗಿಲ್‌ನ ಗಿಲಕ್ಕು ಕ್ರಿಕೆಟ್‌ ಮೇಲೆ ಅಡ್ಡ ಪರಿಣಾಮ ಬೀರದಿರಲಿ ಎನ್ನುವುದು ಅವನ ಮೇಲಿನ ಪ್ರೀತಿಯ ಹಾರೈಕೆ.

ಇದನ್ನೂ ಓದಿ : ರಾಜ ಮಾರ್ಗ ಅಂಕಣ : ಅಮ್ಮನ ಶವವನ್ನು ಬಿಟ್ಟುಬಂದು ಯಾರಿಗೂ ಹೇಳದೆ ರವಿವರ್ಮನಾ ಕುಂಚದಾ.. ಹಾಡು ಹಾಡಿದ್ದರು ಪಿಬಿಎಸ್‌!