ರಾಜ ಮಾರ್ಗ ಅಂಕಣ : ಅವಳ ಬಳಿ ಟ್ರ್ಯಾಕ್‌ ಶೂ ಕೊಳ್ಳಲೂ ದುಡ್ಡಿರಲಿಲ್ಲ, ಈಗ ಆಕೆ ಜಗತ್ತಿನ ದೊಡ್ಡ ಶೂ ಕಂಪನಿಯ ಬ್ರ್ಯಾಂಡ್ ಅಂಬಾಸಿಡರ್‌!

ಮೀಟ್ ದಿಸ್ ಗ್ರೇಟ್ ಅಥ್ಲೆಟ್: ಮೊದಲ ಬಾರಿ ರಾಷ್ಟ್ರೀಯ ಕ್ರೀಡಾಕೂಟದಲ್ಲಿ ಓಡುವಾಗ ಅವಳ ಬಳಿ ಟ್ರ್ಯಾಕ್ ಶೂಗಳು ಇರಲಿಲ್ಲ. ಅವಳ ಅಪ್ಪ ಪೇಟೆಗೆ ಹೋಗಿ 1200 ರೂ. ಬೆಲೆಯ ಸ್ಪೈಕ್ ಇರುವ ಸಾಮಾನ್ಯ ಶೂ ತಂದುಕೊಟ್ಟಿದ್ದರು ಮತ್ತು ನನ್ನ ಹತ್ತಿರ ಇರೋದು ಇಷ್ಟೇ ದುಡ್ಡು ಎಂದು ಮಗಳಿಗೆ ಹೇಳಿದ್ದರು.

ಆಗ ಅವಳು ತನ್ನ ಶೂಗಳ ಮೇಲೆ ಮಾರ್ಕರ್ ಪೆನ್ನನ್ನು ಬಳಸಿ ʻಅಡಿಡಾಸ್ʼ ಎಂದು ಬರೆದುಕೊಂಡು ಓಟಕ್ಕೆ ನಿಲ್ಲುತ್ತಿದ್ದಳು ಮತ್ತು ಧೈರ್ಯವಾಗಿ ಎಲ್ಲ ಆಟಗಳನ್ನು ಗೆಲ್ಲುತ್ತಿದ್ದಳು. ಆದರೆ ಈಗ ಮೂರೂವರೆ ವರ್ಷಗಳಲ್ಲಿ ಆಕೆಯ ಕ್ರೀಡಾ ಪ್ರತಿಭೆಯು ಜಗತ್ತಿಗೆ ಜಾಹೀರು ಆಗಿಬಿಟ್ಟಿದೆ. ಅವಳೀಗ ಭಾರತದ ಸೂಪರ್ ಸ್ಟಾರ್ ಕ್ರೀಡಾಪಟು! ಅದೇ ಅಡಿಡಾಸ್ ಶೂ ಕಂಪೆನಿಯು ಆಕೆಯನ್ನು ತನ್ನ ಬ್ರಾಂಡ್ ಅಂಬಾಸಿಡರ್ ಆಗಿ ಆರಿಸಿಕೊಂಡಿದೆ! ಅವಳ ಹೆಸರಿನಲ್ಲಿ ಆಧುನಿಕ ಶೂಗಳನ್ನು ಲಾಂಚ್ ಮಾಡಿದೆ. ಅದರಲ್ಲಿ ಒಂದು ಕಡೆ ಅವಳ ಹೆಸರಿದ್ದರೆ, ಮತ್ತೊಂದು ಕಡೆ Create History ಎಂದು ಪ್ರಿಂಟ್ ಮಾಡಲಾಗಿದೆ. ಇಂಥಹುದೊಂದು ಚಿನ್ನದ ಜಿಂಕೆಯ ಹೆಸರು ಹಿಮಾ ದಾಸ್!

ಆಕೆ ನಿಜವಾಗಿಯೂ ದೇಶದ ಹೆಮ್ಮೆಯ ಕ್ರೀಡಾಪಟು!

ಆಕೆ ಹುಟ್ಟಿದ ಸಣ್ಣ ಊರಲ್ಲಿ ಬೇರೆ ಯಾವ ಕ್ರೀಡಾಪಟು ಇರಲಿಲ್ಲ! ಆಟದ ಮೈದಾನ, ಜಿಮ್ ಮೊದಲಾದವುಗಳು ಇರಲೇ ಇಲ್ಲ! ಆಕೆ ಹುಟ್ಟಿದ್ದು ಅಸ್ಸಾಂ ರಾಜ್ಯದ ಧಿಂಗ್ ಎಂಬ ಪುಟ್ಟ ಪಟ್ಟಣದ ಸಮೀಪದ ಒಂದು ಹಳ್ಳಿಯಲ್ಲಿ. ಆ ಹಳ್ಳಿಯಲ್ಲಿ ಇರುವುದು ಒಟ್ಟು 100 ಮನೆ ಮಾತ್ರ! ಅವರ ತಂದೆ ಒಬ್ಬ ಸಾಮಾನ್ಯ ಕೃಷಿಕ. ಅವರ ಐದು ಮಕ್ಕಳಲ್ಲಿ ಹಿಮಾ ದಾಸ್ ಚಿಕ್ಕವರು. ಮನೆಯಲ್ಲಿ ಒಟ್ಟಿಗೆ 17 ಜನ. ಕಿತ್ತು ತಿನ್ನುವ ಬಡತನ. ಇಂತಹ ಕುಟುಂಬದ ಒಬ್ಬ ಹುಡುಗಿ ಮುಂದೆ ವಿಶ್ವಮಟ್ಟದ ಕ್ರೀಡಾಪಟು ಆದದ್ದು ನಿಜವಾಗಿ ಅದ್ಭುತವೇ ಸರಿ!

ಪ್ರೌಢಶಾಲೆ ಕಲಿಯುವಾಗ ಆಕೆಗೆ ಫುಟ್ಬಾಲಿನಲ್ಲಿ ಮಾತ್ರ ಆಸಕ್ತಿ ಇತ್ತು. ಆದರೆ ಫುಟ್ಬಾಲ್ ಆಡುತಿದ್ದದ್ದು ಕೇವಲ ಹುಡುಗರೊಂದಿಗೆ! ಮುಂದೆ ಶಿಮಾಶುಲ್ ಎಂಬ ಒಬ್ಬ ಪಿ. ಟಿ. ಮೇಷ್ಟ್ರು ಆಕೆಗೆ ಅಥ್ಲೆಟಿಕ್ಸ್ ಮೇಲೆ ಮಾತ್ರ ಗಮನ ಕೊಡಲು ಹೇಳಿದರು. ಇದರಿಂದ ಹದಿನಾರು ವರ್ಷದ ಹಿಮಾದಾಸ್ ಟ್ರ್ಯಾಕ್ ಮೇಲೆ ಓಡಲು ಆರಂಭ ಮಾಡಿದಳು. ನಿಪುನದಾಸ್ ಎಂಬ ಕೋಚ್ ಅವರಿಗೆ ದೊರಕಿದ್ದು, ಪ್ರತಿದಿನ 10-12 ಗಂಟೆ ಬೆವರು ಹರಿಸಿ ದುಡಿದದ್ದು, ಸ್ಪಷ್ಟ ಗುರಿ ಇರಿಸಿ ಯೋಜನೆ ಹಾಕಿದ್ದು ಎಲ್ಲವೂ ಸೇರಿ ಆಕೆಯ ಮೂಲಕ ಬಹು ದೊಡ್ಡ ಫಲಿತಾಂಶವನ್ನು ತಂದುಕೊಟ್ಟವು. ಆಕೆಯ ಸಾಧನೆ ನಿಜಕ್ಕೂ ಅದ್ಭುತ!

ಮನೆಯ ಮಂದಿಯೇ ಆಕೆಗೆ ಕ್ರೀಡೆ ಬೇಡಾ ಅಂದರು!

2018ರಲ್ಲಿ ಆಕೆ ಮೊದಲನೇ ಸಲ ಆಸ್ಟ್ರೇಲಿಯಾದಲ್ಲಿ ಕಾಮನ್ವೆಲ್ತ್ ಕ್ರೀಡಾಕೂಟದಲ್ಲಿ ಓಡಿದರು. ಯಾವ ಪದಕವೂ ದೊರೆಯದೆ ಹಿಂದೆ ಬಂದಾಗ ಅವಳ ಅಮ್ಮ ಗದರಿ ಹೇಳಿದ್ದು ಒಂದೇ ಮಾತು. ‘ಸಾಕು ಮಗಳೆ! ಹೀಗೆಲ್ಲ ಸ್ಪೋರ್ಟ್ಸ್ ಅಂತ ಕೂತರೆ ಮುಂದೆ ಮದುವೆ ಕಷ್ಟ ಆಗಬಹುದು!’

ಆದರೆ ದೊಡ್ಡ ಕನಸುಗಳನ್ನು ಹೊತ್ತ ಹುಡುಗಿಯು ಮಧ್ಯದಲ್ಲಿ ಕ್ವಿಟ್ ಮಾಡಲು ಸಾಧ್ಯವೇ ಇರಲಿಲ್ಲ! ಧಿಂಗ್ ಎಕ್ಸ್‌ಪ್ರೆಸ್ ಇನ್ನಷ್ಟು ವೇಗದಲ್ಲಿ ಓಡಲು ತೊಡಗಿತು.

ಹಿಮಾ ದಾಸ್ ಹೆಸರನ್ನು ಇಡೀ ಜಗತ್ತು ಮೊದಲನೆಯ ಸಲ ಸ್ಪಷ್ಟವಾಗಿ ಕೇಳಿದ್ದು 2018 ಜುಲೈ ತಿಂಗಳಲ್ಲಿ ನಡೆದ ಅಂಡರ್ 19 ವರ್ಲ್ಡ್ ಚಾಂಪಿಯನ್‌ಷಿಪ್ ಕೂಟದಲ್ಲಿ!‌ ಇವೆಂಟ್ ನಡೆದದ್ದು ದೂರದ ಫಿನ್‌ಲ್ಯಾಂಡಿನಲ್ಲಿ.

ಅದರಲ್ಲಿ ಮಿಂಚಿದ ಆಕೆ 400 ಮೀಟರ್ ರೇಸನ್ನು 51.46 ಸೆಕೆಂಡ್ಸ್ ಅವಧಿಯಲ್ಲಿ ಮುಗಿಸಿ ಗೆದ್ದದ್ದು ಚಿನ್ನದ ಪದಕವನ್ನು! ಯಾವುದೇ ವಿಶ್ವಮಟ್ಟದ ಕೂಟದಲ್ಲಿ ಚಿನ್ನದ ಪದಕವನ್ನು ಗೆದ್ದ ಮೊದಲನೆಯ ಭಾರತೀಯ ಮಹಿಳೆ ಹೀಮಾ ದಾಸ್ ಎನ್ನುವುದು ಆಕೆಯದೇ ದಾಖಲೆ!

ಈ ಸಾಧನೆಯನ್ನು ಮಾಡಿದಾಗ ಅವರ ವಯಸ್ಸು ಕೇವಲ 18!

ಮುಂದಿನ ತಿಂಗಳು ನಡೆದ (ಜಕಾರ್ತಾ) ಏಷಿಯನ್ ಕೂಟ! ಅದರಲ್ಲಿ 400 ಮೀ. ರೇಸಲ್ಲಿ ಆಕೆ ಬೆಳ್ಳಿಯ ಪದಕವನ್ನು ಗೆದ್ದಳು. ಎರಡು ವಿಭಾಗದ ರಿಲೇಯಲ್ಲೂ ಚಿನ್ನದ ಪದಕವನ್ನು ಬೇಟೆ ಆಡಿದರು! ಆಕೆಯ ದಾಖಲೆಗಳು ನಿಜವಾಗಿ ಅದ್ಭುತವಾಗಿವೆ!

2018 ಜುಲೈ ತಿಂಗಳ 19 ದಿನಗಳ ಅವಧಿಯಲ್ಲಿ ಐದು ಅಂತಾರಾಷ್ಟ್ರೀಯ ಚಿನ್ನದ ಪದಕಗಳನ್ನು ಆಕೆ ಗೆದ್ದಿದ್ದಾಳೆ!

400 ಮೀಟರ್ ಓಟದಲ್ಲಿ ಭಾರತದ ದಾಖಲೆಯು ಇದುವರೆಗೆ ಅವಳ ಹೆಸರಲ್ಲಿಯೇ ಇದೆ (50.79 ಸೆಕೆಂಡ್)

ಕೇವಲ ಹದಿನೆಂಟು ವರ್ಷ ಪ್ರಾಯದಲ್ಲಿ ಭಾರತದ ರಾಷ್ಟ್ರಪತಿಯವರ ಕೈಗಳಿಂದ ಅರ್ಜುನ ಪ್ರಶಸ್ತಿಯನ್ನು ಕೂಡ ಹಿಮಾ ದಾಸ್ ಅವರು ಪಡೆದಿದ್ದಾಳೆ. 2019ರಲ್ಲಿ ಅಮಿತಾಬ್ ಬಚ್ಚನ್ ನಡೆಸಿಕೊಡುವ ‘ ಕೌನ್ ಬನೆಗಾ ಕರೋಡ್ ಪತಿ’ ಶೋದಲ್ಲಿ ಅವರು ಸೆಲೆಬ್ರಿಟಿ ಅತಿಥಿಯಾಗಿಯೂ ಭಾಗವಹಿಸಿದ್ದಾಳೆ. ಅಸ್ಸಾಂ ಸರಕಾರವು ಅವಳಿಗೆ DYSP ಹುದ್ದೆ ನೀಡಿದೆ. ಏಷಿಯನ್ ಗೇಮ್ಸ್ ಕೂಟದಲ್ಲಿ ಕೂಡ ಎರಡು ಚಿನ್ನದ ಪದಕ ಮತ್ತು ಒಂದು ಬೆಳ್ಳಿಯ ಪದಕಗಳನ್ನು ಆಕೆ ಈಗಾಗಲೇ ಗೆದ್ದಿದ್ದಾರೆ.

ಅವಳ ಆರಾಧ್ಯ ದೇವರಾದ ಸಚಿನ್ ತೆಂಡುಲ್ಕರ್ ಅವರು ಆಕೆಯನ್ನು ಮುಂಬಯಿಗೆ ಕರೆಸಿಕೊಂಡು ಜೊತೆಯಾಗಿ ಊಟ ಮಾಡಿಸಿ, ಸನ್ಮಾನ ಮಾಡಿ ತಮ್ಮ ಅಭಿನಂದನೆಯನ್ನು ಸಲ್ಲಿಸಿದ್ದರು!

ಹಿಮಾದಾಸ್‌ಗೆ ಈಗ ಕೇವಲ 21 ವರ್ಷ! ಅವರಲ್ಲಿ ಇನ್ನೂ ಸಾಕಷ್ಟು ಕ್ರೀಡಾವರ್ಷಗಳು ಬಾಕಿ ಇವೆ. ರೆಕ್ಕೆ ಬಿಚ್ಚಿದ ಕನಸುಗಳು ಕೂಡಾ! ಅವಳ ಬದ್ಧತೆ, ಕ್ಷಮತೆ, ಸಮರ್ಪಣಾ ಭಾವ ಮತ್ತು ರಾಷ್ಟ್ರಪ್ರೇಮ ಇವುಗಳು ಅತ್ಯಂತ ಶ್ಲಾಘನೀಯ. ಅವಳಿಗೆ ಶುಭವಾಗಲಿ.

ಇದನ್ನೂ ಓದಿ : ರಾಜ ಮಾರ್ಗ ಅಂಕಣ : ನಿಮ್ಮ ಹಾಗೆ ಜಗತ್ತಿನಲ್ಲಿ ಬೇರೆ ಯಾರೂ ಇರಲು ಸಾಧ್ಯವಿಲ್ಲ! ಅನನ್ಯತೆಯೇ ನಿಮ್ಮ ಬ್ರಾಂಡ್‌ ಆಗಲಿ