ಸಣ್ಣ ಉಳಿತಾಯ ಯೋಜನೆಗಳಾದ ಪಿಪಿಎಫ್ (ಪಬ್ಲಿಕ್ ಪ್ರಾವಿಡೆಂಟ್ ಫಂಡ್ -ಸಾರ್ವಜನಿಕ ಭವಿಷ್ಯ ನಿಧಿ), ಸುಕನ್ಯಾ ಸಮೃದ್ಧಿ ಯೋಜನೆ (SSY), ಅಂಚೆ ಕಚೇರಿ ಉಳಿತಾಯ ಯೋಜನೆ, ಹಿರಿಯ ನಾಗರಿಕರ ಉಳಿತಾಯ ಯೋಜನೆ (SCSS) ಮತ್ತು ಇನ್ನಿತರ ಉಳಿತಾಯ ಯೋಜನೆಗಳಲ್ಲಿ ಹೂಡಿಕೆ ಮಾಡಲು ಇನ್ನು ಮುಂದೆ ಆಧಾರ್ ಮತ್ತು ಪ್ಯಾನ್ ನಂಬರ್ಗಳು (Aadhaar-PAN) ಕಡ್ಡಾಯ ಎಂದು ಕೇಂದ್ರ ಹಣಕಾಸು ಸಚಿವಾಲಯ ಮಾರ್ಚ್ 31ರಂದು ಅಧಿಸೂಚನೆ ಹೊರಡಿಸಿದೆ. ಸಣ್ಣ ಉಳಿತಾಯ ಯೋಜನೆಗಳಲ್ಲಿನ ಹೂಡಿಕೆಯ ಕೆವೈಸಿ ನಿಯಮಗಳಲ್ಲಿ ಬದಲಾವಣೆ ಮಾಡಲು ಕೇಂದ್ರ ಸರ್ಕಾರ ನಿರ್ಧರಿಸಿದ್ದು, ಅದರ ಒಂದು ಭಾಗವಾಗಿ ಈ ಕ್ರಮ ಜಾರಿಗೊಳಿಸಲಾಗಿದೆ.
ಈ ಹಿಂದೆಲ್ಲ ಸಣ್ಣ ಉಳಿತಾಯ ಯೋಜನೆಗಳಲ್ಲಿ ಹೂಡಿಕೆ ಮಾಡಲು ಆಧಾರ್ ನಂಬರ್ ಬೇಕಿತ್ತಾದರೂ ಕಡ್ಡಾಯವಾಗಿರಲಿಲ್ಲ. ಆದರೆ ಇನ್ನು ಮುಂದೆ ಹಾಗಾಗುವುದಿಲ್ಲ. ಕೇಂದ್ರ ಹಣಕಾಸು ಸಚಿವಾಲಯದ ಹೊಸ ಅಧಿಸೂಚನೆ ಅನ್ವಯ, ಸರ್ಕಾರಿ ಬೆಂಬಲಿತವಾದ ಎಲ್ಲ ಸಣ್ಣ ಉಳಿತಾಯ ಯೋಜನೆಗಳಲ್ಲಿ ಹಣ ಹೂಡಿಕೆ ಮಾಡಬೇಕು ಎಂದರೆ, ಅವರು ತಮ್ಮ ಆಧಾರ್ ನಂಬರ್ ಕೊಡಲೇಬೇಕಾಗುತ್ತದೆ. ಅದರಲ್ಲೂ ಈ ಯೋಜನೆಗಳಲ್ಲಿ ನಿಗದಿಪಡಿಸಲಾದ ನಿರ್ದಿಷ್ಟ ಮಿತಿಗಿಂತಲೂ ಹೆಚ್ಚಿನ ಹಣ ಹೂಡಿಕೆ ಮಾಡಲು ಇಚ್ಛಿಸುವವರು ಪ್ಯಾನ್ ಕಾರ್ಡ್ ನಂಬರ್ನ್ನೂ ಕೂಡ ಕಡ್ಡಾಯವಾಗಿ ನೀಡಬೇಕಾಗುತ್ತದೆ.
ಏನಿದು ಹೊಸ ನಿಯಮ?
1. ಪಿಪಿಎಫ್, ಸುಕನ್ಯಾ ಸಮೃದ್ಧಿ ಯೋಜನೆ, ಅಂಚೆ ಕಚೇರಿ ಉಳಿತಾಯ ಸೇರಿ ಇಂಥ ಯಾವುದಾದರೂ ಸಣ್ಣ ಉಳಿತಾಯ ಯೋಜನೆಗಳಲ್ಲಿ ಈಗಾಗಲೇ ಹಣ ಹೂಡಿಕೆ ಮಾಡಿರುವವರು, ನೀವು ಸಣ್ಣ ಉಳಿತಾಯ ಯೋಜನೆಯಲ್ಲಿ ಖಾತೆ ತೆರೆಯುವಾಗ ಆಧಾರ್ ಕಾರ್ಡ್ ನಂಬರ್ ಕೊಟ್ಟಿದ್ದೀರಾ? ಇಲ್ಲವಾ ಎಂಬುದನ್ನು ಚೆಕ್ ಮಾಡಿಕೊಳ್ಳಿ. ಹಾಗೊಮ್ಮೆ ನೀವು ಹೂಡಿಕೆ ಮಾಡುವಾಗ ಆಧಾರ್ ನಂಬರ್ ಕೊಟ್ಟಿಲ್ಲದೆ ಇದ್ದಲ್ಲಿ, 2023ರ ಸೆಪ್ಟೆಂಬರ್ 30ರೊಳಗೆ ನೀವು ಆಧಾರ್ ನಂಬರ್ ನೀಡಬೇಕು. ಅಂದರೆ ಯಾವ ಯೋಜನೆಯಲ್ಲಿ ಹೂಡಿಕೆ ಮಾಡಿದ್ದೀರೋ, ಅಲ್ಲಿಗೆ ಆಧಾರ್ ಒದಗಿಸಬೇಕು. ಅದಿಲ್ಲದೆ ಇದ್ದರೆ ನಿಮ್ಮ ಹೂಡಿಕೆಯ ಖಾತೆಯನ್ನು ಅಕ್ಟೋಬರ್ 1 ರಿಂದ ಸ್ಥಗಿತಗೊಳಿಸಲಾಗುತ್ತದೆ. ನೀವು ಆಧಾರ್ ನಂಬರ್ ಕೊಡುವವರೆಗೂ ಅದು ಮತ್ತೆ ಚಾಲ್ತಿ ರೂಪಕ್ಕೆ ಬರುವುದಿಲ್ಲ.
2. ಸಣ್ಣ ಉಳಿತಾಯ ಯೋಜನೆಗಳಲ್ಲಿ ಹೂಡಿಕೆಗೆ ಪ್ಯಾನ್ ಮತ್ತು ಆಧಾರ್ ಕಡ್ಡಾಯ ಎಂದು ಕೇಂದ್ರ ಸರ್ಕಾರ ಹೊರಡಿಸಿರುವ ಅಧಿಸೂಚನೆ ಇಂದಿನಿಂದಲೇ ಅಂದರೆ ಏಪ್ರಿಲ್ 1ರಿಂದ ಪ್ರಾರಂಭವಾಗುತ್ತದೆ. ಇಂದಿನ ನಂತರ ಯಾರಾದರೂ, ಯಾವುದೇ ಸಣ್ಣ ಉಳಿತಾಯ ಯೋಜನೆಯಲ್ಲಿ ಹೂಡಿಕೆ ಮಾಡಲು ಅಕೌಂಟ್ ತೆರೆಯುತ್ತೀರಿ ಎಂದಾದರೆ ಕಡ್ಡಾಯವಾಗಿ ಆಧಾರ್ ನಂಬರ್ ಕೊಡಲೇಬೇಕು. ಹಾಗೊಮ್ಮೆ, ಈಗ ನನ್ನ ಬಳಿ ಆಧಾರ್ ನಂಬರ್ ಇಲ್ಲ. ಅದನ್ನು ಕೊಡದೆ ಅಕೌಂಟ್ ತೆರೆಯುತ್ತೇನೆ ಎಂದರೆ ನಿಮಗೆ ಆ ಅವಕಾಶವೂ ಇದೆ. ಆದರೆ ನೀವು ಆರು ತಿಂಗಳ ಒಳೆಗೆ ಆಧಾರ್ ನಂಬರ್ ಕೊಡಲೇಬೇಕು. ಯಾವ ದಿನಾಂಕದಂದು ನೀವು ಹೂಡಿಕೆ ಖಾತೆ ತೆರೆಯುತ್ತೀರೋ, ಆ ದಿನದಿಂದ ಪ್ರಾರಂಭವಾಗಿ 6 ತಿಂಗಳ ಒಳಗೆ ಆಧಾರ್ ನಂಬರ್ ಕೊಡದೆ ಇದ್ದರೆ, ಖಾತೆ ತಡೆ ಹಿಡಿಯಲ್ಪಡುತ್ತದೆ.
ಪ್ಯಾನ್ ಕಾರ್ಡ್ ನಿಯಮವೇನು?
ಇನ್ನುಮುಂದೆ ಯಾವುದೇ ಸಣ್ಣ ಉಳಿತಾಯ ಯೋಜನೆಗಳಲ್ಲಿ ಹೂಡಿಕೆ ಮಾಡುವ ಸಂದರ್ಭದಲ್ಲಿ ನಿಗದಿತ ಹಣಕ್ಕಿಂತ ಹೆಚ್ಚಿನ ಹಣ ಹೂಡಿಕೆ ಮಾಡುವುದಿದ್ದರೆ ಪ್ಯಾನ್ ಕಾರ್ಡ್ ನಂಬರ್ ಕೂಡ ಕಡ್ಡಾಯವಾಗಲಿದೆ.
ಅದರಲ್ಲಿ ಈಗಾಗಲೇ ಯಾವುದಾದರೂ ಒಂದು ಹೂಡಿಕೆ ಖಾತೆಯನ್ನು ನೀವು ಹೊಂದಿದ್ದು, 1) ಆ ಖಾತೆಯಲ್ಲಿ 50 ಸಾವಿರ ರೂ. ಹೆಚ್ಚು ಹಣ ಇದ್ದರೆ 2) ಯಾವುದೇ ಹಣಕಾಸು ವರ್ಷದಲ್ಲಿ ನಿಮ್ಮ ಹೂಡಿಕೆ ಅಕೌಂಟ್ಗೆ 1 ಲಕ್ಷ ರೂ.ಗೂ ಹೆಚ್ಚು ಹಣ ಕ್ರೆಡಿಟ್ ಆಗಿದ್ದರೆ ಮತ್ತು 3) ನಿಮ್ಮ ಹೂಡಿಕೆ ಖಾತೆಯಿಂದ ಒಂದು ತಿಂಗಳಲ್ಲಿ 10 ಸಾವಿರ ರೂ.ಗೂ ಹೆಚ್ಚಿನ ಹಣ ವಹಿವಾಟು ಆಗುತ್ತಿದ್ದರೆ (ಹಣ ಹಿಂಪಡೆಯುವಿಕೆ ಮತ್ತು ವರ್ಗಾವಣೆ)- ಅಂಥವರು ಇನ್ನು 2 ತಿಂಗಳಲ್ಲಿ ನಿಮ್ಮ ಖಾತೆ ಇರುವಲ್ಲಿ ಪ್ಯಾನ್ ಕಾರ್ಡ್ ನಂಬರ್ ಒದಗಿಸಬೇಕು. ಹಾಗೊಮ್ಮೆ ಪ್ಯಾನ್ ನಂಬರ್ ಕೊಡದೆ ಇದ್ದಲ್ಲಿ, ಖಾತೆ ಸ್ಥಗಿತಗೊಳ್ಳುತ್ತದೆ. ಪುನಃ ನಂಬರ್ ನೀಡಿದ ಬಳಿಕವಷ್ಟೇ ಖಾತೆ ಚಾಲ್ತಿಗೆ ಬರುತ್ತದೆ.