ನವ ದೆಹಲಿ: ಅದಾನಿ ಸಮೂಹದ ಸ್ಥಾಪಕ ಗೌತಮ್‌ ಅದಾನಿ ಅಮೆಜಾನ್‌ನ ಜೆಫ್‌ ಬಿಜೋಸ್‌ ಅವರನ್ನು ಹಿಂದಿಕ್ಕಿ ವಿಶ್ವದ ಎರಡನೇ ಅತಿ ದೊಡ್ಡ ಶ್ರೀಮಂತ ಎನ್ನಿಸಿದ್ದರೆ, ಅವರ ಅಣ್ಣ ವಿನೋದ್‌ ಶಾಂತಿ ಲಾಲ್‌ ಈಗ ಸಿರಿವಂತ ಅನಿವಾಸಿ ಭಾರತೀಯ ಎಂಬ ಹೆಗ್ಗಳಿಕೆಗೆ (Adani) ಪಾತ್ರರಾಗಿದ್ದಾರೆ.
ಐಐಎಫ್‌ಎಲ್‌ ವೆಲ್ತ್‌ ಹುರಾನ್‌ ಇಂಡಿಯಾ-2022 ಸಿರಿವಂತರ ಪಟ್ಟಿಯ ಪ್ರಕಾರ, ಗೌತಮ್‌ ಅದಾನಿಯವರ ಅಣ್ಣ ವಿನೋದ್‌ ಶಾಂತಿಲಾಲ್‌ ಅದಾನಿ ಅವರು ದುಬೈನಲ್ಲಿ ಬಿಸಿನೆಸ್‌ ಮೂಲಕ 37,400 ಕೋಟಿ ರೂ. ಗಳಿಸಿದ್ದಾರೆ. ಅಂದರೆ ದಿನಕ್ಕೆ ಸರಾಸರಿ 102 ಕೋಟಿ ರೂ. ಗಳಿಸಿದ್ದಾರೆ. ಅವರು ಭಾರತದ ಟಾಪ್‌ 10 ಸಿರಿವಂತರ ಪೈಕಿ 6ನೇ ಸ್ಥಾನಕ್ಕೆ ಏರಿದ್ದಾರೆ. ಅವರ ನಿವ್ವಳ ಸಂಪತ್ತು 169,000 ಕೋಟಿ ರೂ.ಗಳಾಗಿದೆ.
ಹುರೇನ್‌ ಇಂಡಿಯಾ ಒಟ್ಟು 94 ಸಿರಿವಂತ ಎನ್ನಾರೈಗಳ ಪಟ್ಟಿ ಬಿಡುಗಡೆಗೊಳಿಸಿದೆ. ಪಟ್ಟಿಯಲ್ಲಿ ಮೊದಲ ಸ್ಥಾನವನ್ನು ಅದಾನಿ ಅಣ್ಣ ವಿನೋದ್‌ ಶಾಂತಿಲಾಲ್‌ ಗಳಿಸಿದ್ದರೆ, ಎರಡನೇ ಸ್ಥಾನವನ್ನು ಹಿಂದೂಜಾ ಸೋದರರು ಗಳಿಸಿದ್ದಾರೆ. (1.65 ಲಕ್ಷ ಕೋಟಿ ರೂ.) ಮೂರನೇ ಸ್ಥಾನವನ್ನು ಲಕ್ಷ್ಮೀ ಮಿತ್ತಲ್‌ ಗಳಿಸಿದ್ದಾರೆ.