ಮುಂಬಯಿ: ಇಂಗ್ಲೆಂಡ್‌ನ ಪ್ರಸಿದ್ಧ ವೃತ್ತಿಪರ ಲಿವರ್‌ಪೂಲ್‌ ಫುಟ್ಬಾಲ್‌ ಕ್ಲಬ್ ಅನ್ನು ರಿಲಯನ್ಸ್‌ ಇಂಡಸ್ಟ್ರೀಸ್‌ ಅಧ್ಯಕ್ಷ ಮುಕೇಶ್‌ ಅಂಬಾನಿ ಖರೀದಿಸುವ ನಿರೀಕ್ಷೆ ಇದೆ. ( Mukesh Ambani) ಇದು 1892ರಲ್ಲಿ ಸ್ಥಾಪನೆಯಾಗಿರುವ 130 ವರ್ಷ ಹಳೆಯ ಫುಟ್ಬಾಲ್‌ ಕ್ಲಬ್ ಆಗಿದೆ. ದೇಶೀಯವಾಗಿ 19 ಲೀಗ್‌ ಟೈಟಲ್‌ಗಳನ್ನು ಈ ಕ್ಲಬ್ ಗೆದ್ದುಕೊಂಡಿದೆ. ಆರು ಐರೋಪ್ಯ ಕಪ್‌ ಹಾಗೂ ಮೂರು UEFA ಕಪ್‌ಗಳನ್ನು ತನ್ನದಾಗಿಸಿಕೊಂಡಿದೆ.
ಹೀಗಿದ್ದರೂ ಲಿವರ್‌ಪೂಲ್‌ ಖರೀದಿಯ ರೇಸ್‌ನಲ್ಲಿ ಕೊಲ್ಲಿ ಮತ್ತು ಅಮೆರಿಕದ ಹೂಡಿಕೆದಾರರ ಕಡೆಯಿಂದಲೂ ಯತ್ನ ನಡೆಯುತ್ತಿದೆ. ಮುಕೇಶ್‌ ಅಂಬಾನಿಯವರು ಐಪಿಎಲ್‌ ಕ್ರಿಕೆಟ್‌ ತಂಡ ಮುಂಬಯಿ ಇಂಡಿಯನ್ಸ್‌ ಮಾಲೀಕರೂ ಆಗಿದ್ದಾರೆ. ಫೆನ್‌ವೇ ಸ್ಪೋರ್ಟ್ಸ್‌ ಗ್ರೂಪ್‌ ಈ ಕ್ಲಬ್‌ನ ಮಾಲಿಕತ್ವ ಹೊಂದಿದೆ.
ರಿಲಯನ್ಸ್‌ ಈ ಬಗ್ಗೆ ಅಧಿಕೃತ ಹೇಳಿಕೆ ನೀಡಿಲ್ಲ. ಭಾರತದಲ್ಲಿ ಫುಟ್ಬಾಲ್‌ ಜನಪ್ರಿಯ ಕ್ರೀಡೆಯಾಗಿದ್ದರೂ, ಕ್ರಿಕೆಟ್‌ ಬಗ್ಗೆ ಇರುವಷ್ಟು ಕ್ರೇಜ್‌, ಫುಟ್ಬಾಲ್‌ಗೆ ಇಲ್ಲ.