ನವ ದೆಹಲಿ: ಅದೊಂದು ಸಂಜೆ ದಕ್ಷಿಣ ದೆಹಲಿಯ ಛತ್ತರ್ಪುರ ಪಹಾಡಿಯಲ್ಲಿರುವ 93/1 ಎಂಬ ಮನೆಯ ಕಾಲಿಂಗ್ ಬೆಲ್ ರಿಂಗ್ ಆಯಿತು. ಆ ಮನೆ ಮಾಲೀಕ ಬಂದು ಬಾಗಿಲು ತೆರೆದ, ಹುಡುಗಿಯೊಬ್ಬಳು ಮೌನವಾಗಿ ಮನೆಯೊಳಗೆ ನಡೆದಳು. ಬಾಗಿಲು ತೆರೆದವನು ಕೊಲೆಗೆಡುಕ ಅಫ್ತಾಬ್ ಅಮೀನ್ ಪೂನಾವಾಲಾ. ಶ್ರದ್ಧಾಳನ್ನು ಹತ್ಯೆ ಮಾಡಿ, ತನಗೇನೂ ಗೊತ್ತಿಲ್ಲ ಎಂಬಂತೆ ಇದ್ದ ಅಮೀನ್ ಮನೆಗೆ ಇನ್ನೊಬ್ಬಳು ಹುಡುಗಿ ಬಂದಿದ್ದಳು. ಅಮೀನ್ ಕೋಣೆಯಲ್ಲಿ ಅವರ ಸರಸ-ಸಲ್ಲಾಪ ನಡೆದಿತ್ತು. ಅದೇ ಮನೆಯ ಬಾಗಿಲ ಬಲಭಾಗದಲ್ಲಿ, ಸರಿಯಾಗಿ ಬೆಳಕು ಇಲ್ಲದ ಜಾಗದಲ್ಲಿ ಇದ್ದ ಫ್ರಿಜ್ನಲ್ಲಿ ಶ್ರದ್ಧಾ ದೇಹದ ತುಂಡುಗಳು ತಣ್ಣನೆ ಅಡಗಿದ್ದವು. ಅಲ್ಲಿ ಕೋಣೆಯಲ್ಲಿ ಅಫ್ತಾಬ್ ಜತೆ ಇದ್ದ ಹುಡುಗಿಗೆ ಇದ್ಯಾವುದೂ ಗೊತ್ತಿಲ್ಲ, ತಾನೆಂಥಾ ವಿಕೃತ ಕೊಲೆಗೆಡುಕನ ತೆಕ್ಕೆಯಲ್ಲಿದ್ದೇನೆ ಎಂಬುದರ ಅರಿವೂ ಆಕೆಗಿಲ್ಲ!
ಪೊಲೀಸರ ತನಿಖೆ ಪ್ರಕಾರ ಶ್ರದ್ಧಾಳನ್ನು ಅಫ್ತಾಬ್ ಅಮೀನ್ ಹತ್ಯೆ ಮಾಡಿದ್ದು ಮೇ ತಿಂಗಳಲ್ಲಿ. ಮೂಲತಃ ಮಹಾರಾಷ್ಟ್ರದವಳಾದ ಶ್ರದ್ಧಾ, ಡೇಟಿಂಗ್ ಆ್ಯಪ್ನಲ್ಲಿ ಭೇಟಿಯಾದ ಅಫ್ತಾಬ್ಗಾಗಿ ಏಪ್ರಿಲ್ ತಿಂಗಳಲ್ಲಿ ತನ್ನ ಮನೆ-ಹೆತ್ತವರನ್ನು ಬಿಟ್ಟು ದೆಹಲಿಗೆ ಬಂದಿದ್ದಳು. ಶ್ರದ್ಧಾ ಇಲ್ಲಿಗೆ ಬಂದು ನೆಲೆಸಿದರೂ ಅಫ್ತಾಬ್ ಡೇಟಿಂಗ್ ಆ್ಯಪ್ನಲ್ಲಿ ಮತ್ತೂ ಹಲವು ಯುವತಿಯರ ಜತೆ ಚಾಟ್ ಮಾಡುತ್ತಿದ್ದ. ಎಲ್ಲ ಹಿಂದೂ ಯುವತಿಯರೊಂದಿಗೇ ಆತನ ಸ್ನೇಹ ಇತ್ತು. ತಾನಿದ್ದೂ, ಅಫ್ತಾಬ್ ಬೇರೆ ಮಹಿಳೆಯರೊಂದಿಗೆ ಚಾಟ್ ಮಾಡುವುದು, ಅವರನ್ನು ಭೇಟಿಯಾಗುವುದು ಮುಂದುವರಿಸಿದಾಗ ಶ್ರದ್ಧಾ ಗಲಾಟೆ ಮಾಡಿದ್ದಳು. ಇದೇ ವಿಚಾರಕ್ಕೆ ಅವರ ಮಧ್ಯೆ ಪದೇಪದೆ ಜಗಳ ಆಗುತ್ತಿತ್ತು. ‘ಶ್ರದ್ಧಾ ನನ್ನ ಬಗ್ಗೆ ತುಂಬ ಪೊಸೆಸ್ಸಿವ್ ಆಗಿದ್ದಳು. ನನಗೆ ಉಸಿರುಗಟ್ಟುತ್ತಿತ್ತು. ಅವಳೇನೂ ಸಾಚಾ ಆಗಿರಲಿಲ್ಲ. ಡೇಟಿಂಗ್ ಆ್ಯಪ್ ಮೂಲಕ ಬೇರೆ ಪುರುಷರ ಜತೆ ಸಂಪರ್ಕ ಹೊಂದಿ, ಅವರನ್ನು ಮೀಟ್ ಮಾಡುತ್ತಿದ್ದಳು. ಪ್ರತಿದಿನ ಗಲಾಟೆ-ಜಗಳ ನಡೆಯುತ್ತಿತ್ತು. ಹಾಗಾಗಿಯೇ ಕೊಲೆ ಮಾಡಿದ್ದೇನೆ’ ಎಂದು ಅಫ್ತಾಬ್ ಹೇಳಿದ್ದಾಗಿ ಪ್ರಕರಣದ ತನಿಖೆ ನಡೆಸುತ್ತಿರುವ ಪೊಲೀಸ್ ಅಧಿಕಾರಿಯೊಬ್ಬರು ಹೇಳಿದ್ದಾರೆ.
ವಿವಿಧ ವೆಬ್ ಸೀರಿಸ್, ಅಮೆರಿಕಾದ ಕ್ರೈಂ ಶೋಗಳನ್ನು ನೋಡಿದ್ದ ಅಫ್ತಾಬ್ ಮೇ ತಿಂಗಳಲ್ಲಿ ಶ್ರದ್ಧಾಳನ್ನು ಹತ್ಯೆ ಮಾಡಿ, ಆಕೆಯ ದೇಹವನ್ನು ಒಮ್ಮೆಲೇ ವಿಲೇವಾರಿ ಮಾಡಲಿಲ್ಲ. ಮೊದಲು 35 ತುಂಡುಗಳನ್ನಾಗಿ ಮಾಡಿ, ಅದನ್ನು ಇಡಲೆಂದೇ ಹೊಸ ರೆಫ್ರಿಜರೇಟರ್ ಖರೀದಿ ಮಾಡಿದ್ದ. ಅದನ್ನು ಮನೆಯ ಮೂಲೆಯಲ್ಲಿ ಇಟ್ಟು, ಅದರಲ್ಲಿ ಶ್ರದ್ಧಾ ದೇಹದ ತುಂಡುಗಳನ್ನು ಇಟ್ಟಿದ್ದ. ವಾಸನೆ ಬಾರದಿರಲಿ ಎಂದು ಅಗರಬತ್ತಿ ಹಚ್ಚುತ್ತಿದ್ದ. ಆ ಭಾಗವನ್ನು ಸದಾ ಸ್ವಚ್ಛಗೊಳಿಸುತ್ತಿದ್ದ. ಹಲವು ದಿನಗಳು ಅದೇ ಫ್ರಿಜ್ನಲ್ಲಿ ಆಕೆಯ ದೇಹದ ತುಂಡುಗಳು ಇದ್ದವು. ಹಾಗೇ, ತುಂಡಾದ ಹೆಣ ಅಲ್ಲಿದ್ದಾಗಲೇ ಅಫ್ತಾಬ್ ಮನೆಗೆ ಹಲವು ಯುವತಿಯರು ಭೇಟಿ ಕೊಟ್ಟಿದ್ದಾರೆ. ಅವನ ಕೆಲವು ಸ್ನೇಹಿತರೂ ಬಂದಿದ್ದರು. ಫುಡ್ ಡೆಲಿವರಿ ಸಿಬ್ಬಂದಿಯೂ ಮನೆಗೆ ಆಗಮಿಸಿದ್ದರು. ಇಷ್ಟೆಲ್ಲ ಆದರೂ ಒಬ್ಬೇ ಒಬ್ಬ ವ್ಯಕ್ತಿಗೆ ಅನುಮಾನ ಬಂದಿರಲಿಲ್ಲ. ಅತ್ಯಂತ ನಾಜೂಕಾಗಿ ಎಲ್ಲವನ್ನೂ ನಿಭಾಯಿಸಿದ್ದ.
‘ಶ್ರದ್ಧಾಳನ್ನು ಕೊಂದ ಬಳಿಕ ರೆಫ್ರಿಜರೇಟರ್ನಲ್ಲಿ ಇಟ್ಟಾಗ ಆ ಭಾಗಗಳು ಕ್ರಮೇಣ ವಾಸನೆ ಹೊಡೆಯಲು ಶುರು ಮಾಡಿದ್ದವು. ಆಗ ಈತ ಆನ್ಲೈನ್ನಲ್ಲಿ ಬ್ಲೀಚಿಂಗ್ ವಸ್ತುಗಳನ್ನು ತರಿಸಿ, ಕುಳಿತು ದೇಹದ ಭಾಗಗಳನ್ನೆಲ್ಲ ತೊಳೆದಿದ್ದ. ಇದನ್ನು ವಿಚಾರಣೆ ವೇಳೆ ಬಾಯ್ಬಿಟ್ಟಿದ್ದಾನೆ ಎಂದೂ ಪೊಲೀಸರು ತಿಳಿಸಿದ್ದಾರೆ. ಹಾಗೇ, ‘ಸಮಗ್ರ ತನಿಖೆಯನ್ನು ನಡೆಸುತ್ತೇವೆ. ಆತನ ಫೋನ್, ಕಂಪ್ಯೂಟರ್ಗಳನ್ನೆಲ್ಲ ಸಂಪೂರ್ಣವಾಗಿ ಪರಿಶೀಲನೆ ನಡೆಸಲಾಗುವುದು’ ಎಂದೂ ಹೇಳಿದ್ದಾರೆ. ಶನಿವಾರ ಅಫ್ತಾಬ್ನನ್ನು ಪೊಲೀಸರು ಬಂಧಿಸಿದ್ದು, ಇಂದು ಆತನನ್ನು ಅಪರಾಧ ನಡೆದ ಸ್ಥಳಕ್ಕೆ ಕರೆದುಕೊಂಡು ಹೋಗಿ ಮಹಜರು ಮಾಡಲಿದ್ದಾರೆ.
ಇದನ್ನೂ ಓದಿ: Delhi Crime | ಡೇಟಿಂಗ್ ಆ್ಯಪ್‌ನಿಂದ ಅಫ್ತಾಬ್‌ನ ಪರಿಚಯ ಆಯ್ತು, ಜಾಲತಾಣ ಆ್ಯಪ್ ಶ್ರದ್ಧಾ ಕೊಲೆ ಪತ್ತೆಗೆ ಕಾರಣವಾಯ್ತು!