ಧಾರವಾಡ: 20 ವರ್ಷದ ಯುವತಿಯೊಬ್ಬಳನ್ನು ಅಜ್ಞಾತ ಸ್ಥಳಕ್ಕೆ ಎಳೆದೊಯ್ದು ಮಾರಣಾಂತಿಕ ಹಲ್ಲೆ (Attack on Young lady) ಮಾಡಿದ ಭಯಾನಕ ಘಟನೆಯೊಂದು ಧಾರವಾಡ ತಾಲೂಕಿನ ಸಲಕಿನಕೊಪ್ಪ ಗ್ರಾಮದ ಬಳಿ ನಡೆದಿದೆ. ಯುವತಿಗೆ ಚೂರಿಯಿಂದ ಎಷ್ಟು ಬಲವಾಗಿ ಇರಿಯಲಾಗಿದೆ ಎಂದರೆ ಆಕೆಯ ಕತ್ತು, ಕೈ, ಮುಖ ಎಲ್ಲವೂ ರಕ್ತಮಯವಾಗಿದೆ. ಕಣ್ಣಿನಿಂದ ರಕ್ತ ಒಸರುತ್ತಿದೆಯೋ ಏನೋ ಎನ್ನುವಂತಿದೆ. ಆಕೆಯನ್ನು ನೋಡುವಾಗಲೇ ಭಯಪಡುವ ಸ್ಥಿತಿಯಲ್ಲಿದ್ದಾಳೆ. ಆದರೆ, ಪ್ರಾಣಾಪಾಯದಿಂದ ಪಾರಾಗಿದ್ದಾಳೆ.
ಭಾನುವಾರ ರಾತ್ರಿ ಧಾರವಾಡ ತಾಲೂಕಿನ ಸಲಕಿನಕೊಪ್ಪ ಗ್ರಾಮದ ಬಳಿ ಯುವತಿಯೊಬ್ಬಳು ರಕ್ತಸಿಕ್ತವಾಗಿ ಬಿದ್ದಿರುವುದನ್ನು ನೋಡಿ ಸ್ಥಳೀಯರು ಆಕೆಯನ್ನು ಆಸ್ಪತ್ರೆಗೆ ದಾಖಲಿಸಿದ್ದರು. ವಿಚಾರಿಸಿದಾಗ ಆಕೆಯ ಹೆಸರು ಬಿಬಿ ನಿಸ್ಬಾ ಡಂಬಳ (20) ಎಂದು ತಿಳಿದುಬಂತು. ಆಕೆ ಧಾರವಾಡದ ಕುರುಬರ ಓಣಿಯವಳು.
ಯುವಕ ಬೈಕ್‌ನಲ್ಲಿ ಕರೆದುಕೊಂಡು ಹೋಗಿದ್ದ
ಈಕೆಯನ್ನು ಮಹಮ್ಮದ್‌ ಸಾದಿಕ್‌ ಎಂಬ ಯುವಕ ಬೈಕ್‌ನಲ್ಲಿ ಕರೆದುಕೊಂಡು ಹೋಗಿ ಈ ರೀತಿ ಮಾರಣಾಂತಿಕ ಹಲ್ಲೆ ಮಾಡಿರುವುದಾಗಿ ಮೇಲ್ನೋಟಕ್ಕೆ ತಿಳಿದುಬಂದಿದೆ. ಆಕೆ ಕೂಡಾ ಅವನ ಹೆಸರನ್ನು ಹೇಳಿದ್ದಾಳೆ. ಸಾದಿಕ್‌ ತನ್ನನ್ನು ಬೈಕ್‌ನಲ್ಲಿ ಕರೆದುಕೊಂಡು ಹೋಗಿದ್ದಾಗಿ ಒಮ್ಮೆ ಹೇಳಿದರೆ ಇನ್ನೊಮ್ಮೆ ಆತ ತನ್ನನ್ನು ಅಪಹರಿಸಿಕೊಂಡು ಹೋಗಿದ್ದಾನೆ ಎಂದು ಹೇಳಿದ್ದಾಳೆ. ಚಾಕುವಿನಿಂದ ಇರಿದಿದ್ದ ಯುವಕ ಸ್ಥಳದಿಂದ ಪರಾರಿಯಾಗಿದ್ದಾನೆ.
ಈ ನಡುವೆ ಯುವತಿ ಪದೇಪದೆ ಹೇಳಿಕೆ ಬದಲಿಸುತ್ತಿರುವುದು ಸಂಶಯಕ್ಕೆ ಕಾರಣವಾಗಿದೆ.
ಒಮ್ಮೆ ಮಹಮ್ಮದ್‌ ಸಾದಿಕ್‌ ಕರೆದುಕೊಂಡು ಬಂದ ಎಂದು ಹೇಳಿದರೆ ಇನ್ನೊಮ್ಮೆ ಅಜ್ಞಾತ ಸ್ಥಳಕ್ಕೆ ಹೇಗೆ ಬಂದೆ ಅಂತಾ ಗೊತ್ತೇ ಇಲ್ಲೆ ಎಂದು ಹೇಳುತ್ತಾಳೆ.
ಯಾರೋ ಹಿಂದಿನಿಂದ ಹಿಡಿದಂತೆ ಆಗಿತ್ತು, ನಂತರ ಕಣ್ಣು ತೆಗೆದು ನೋಡಿದಾಗ ಅಜ್ಞಾತ ಸ್ಥಳದಲ್ಲಿ ಇದ್ದೆ ಎನ್ನುತ್ತಾಳೆ. ಆಕೆ ಭಯದಿಂದ ಹೀಗೆ ಹೇಳುತ್ತಿರುವ ಸಾಧ್ಯತೆಯೂ ಇದೆ.
ಇದನ್ನೂ ಓದಿ: Love Case : ಪ್ರೀತ್ಸೆ ಎಂದು ಹಿಂದೆ ಬಿದ್ದ; ಒಲ್ಲೆ ಎಂದಿದ್ದಕ್ಕೆ ಮಾನಭಂಗ ಮಾಡಿ ಕೊಂದ!
ಸದ್ಯ ಯುವತಿ ಹೇಳಿಕೆ ಆಧಾರದ ಮೇಲೆ ದೂರು ದಾಖಲಿಸಿಕೊಂಡಿರುವ ಪೊಲೀಸರು ಚಾಕುವಿನಿಂದ ಇರಿದ ಯುವಕನ ಹುಡುಕಾಟ ನಡೆಸುತ್ತಿದ್ದಾರೆ.
ಧಾರವಾಡ ಗ್ರಾಮೀಣ ಠಾಣೆ ಪೊಲೀಸರು ಆಕೆಯನ್ನು ಆಸ್ಪತ್ರೆಗೆ ದಾಖಲು ಮಾಡಿದ್ದಾರೆ. ಆಕೆ ಈಗ ಧಾರವಾಡ ಜಿಲ್ಲಾ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾಳೆ. ಯುವತಿ ಕೊಟ್ಟ ಮಾಹಿತಿ ಆಧಾರದ ಮೇಲೆ ಧಾರವಾಡ ಶಹರ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.