ನವದೆಹಲಿ: ದೇಶದ ಹಲವೆಡೆ ಲಿವ್‌ ಇನ್‌ ರಿಲೇಷನ್‌ಶಿಪ್‌ನಲ್ಲಿರುವ ಯುವತಿಯರನ್ನು ಕೊಲ್ಲುವ ಪ್ರಕರಣಗಳು ದಿನೇದಿನೆ ಹೆಚ್ಚಾಗುತ್ತಿವೆ. ದೆಹಲಿಯಲ್ಲಿ ಶ್ರದ್ಧಾ ವಾಳ್ಕರ್‌ ಕೊಲೆ, ಬೆಂಗಳೂರಿನಲ್ಲೂ ಪ್ರೇಯಸಿಯ ಹತ್ಯೆ (Live In Partner Murder) ಪ್ರಕರಣಗಳ ಬೆನ್ನಲ್ಲೇ ದೆಹಲಿಯಲ್ಲಿಯೇ ಮತ್ತೊಬ್ಬ ವ್ಯಕ್ತಿಯು ಲಿವ್‌ ಇನ್‌ನಲ್ಲಿದ್ದ ಮಹಿಳೆಯನ್ನು ಕೊಂದುಹಾಕಿದ್ದಾನೆ. ಹಾಗಾಗಿ, ಯುವತಿಯರು ಲಿವ್‌ ಇನ್‌ ರಿಲೇಷನ್‌ಶಿಪ್‌ಗೆ ಹೂಂ ಎನ್ನುವ ಮುಂಚೆ ೧೦ ಸಲ ಯೋಚನೆ ಮಾಡಬೇಕಾದ ಅನಿವಾರ್ಯತೆ ಸೃಷ್ಟಿಯಾಗಿದೆ.
ದೆಹಲಿಯ ಗಣೇಶ್‌ ನಗರದಲ್ಲಿ ರೇಖಾ ರಾಣಿ (35) ಎಂಬುವರ ಶವ ಪತ್ತೆಯಾಗಿದ್ದು, ಇವರ ಜತೆ ಲಿವ್‌ ಇನ್‌ನಲ್ಲಿದ್ದ ಮನ್‌ಪ್ರೀತ್‌ ಎಂಬಾತನನ್ನು ಪೊಲೀಸರು ಪಂಜಾಬ್‌ನ ಪಟಿಯಾಲದಲ್ಲಿ ಬಂಧಿಸಿದ್ದಾರೆ. ಡಿಸೆಂಬರ್‌ ೧ರಂದು ಮಹಿಳೆಗೆ ಚಾಕುವಿನಿಂದ ಇರಿದು ಹತ್ಯೆ ಮಾಡಿದ್ದಾನೆ ಎಂದು ಪೊಲೀಸರು ತಿಳಿಸಿದ್ದಾರೆ.
ಕತ್ತರಿಸಲೆಂದೇ ಚಾಕು ತಂದಿದ್ದ
“ರೇಖಾ ರಾಣಿ ಹಾಗೂ ಮನ್‌ಪ್ರೀತ್‌ ೨೦೧೫ರಿಂದಲೇ ಲಿವ್‌ ಇನ್‌ ರಿಲೇಷನ್‌ಶಿಪ್‌ನಲ್ಲಿದ್ದು, ರೇಖಾ ರಾಣಿಗೆ ೧೬ ವರ್ಷದ ಮಗಳಿದ್ದಾಳೆ. ರೇಖಾ ರಾಣಿ, ಆಕೆಯ ಮಗಳು ಹಾಗೂ ಮನ್‌ಪ್ರೀತ್‌ ಗಣೇಶ್‌ ನಗರದಲ್ಲಿ ವಾಸಿಸುತ್ತಿದ್ದರು. ಆದರೆ, ಈಗಾಗಲೇ ಮನ್‌ಪ್ರೀತ್‌ಗೆ ಬೇರೆ ಮದುವೆಯಾಗಿದ್ದು, ಇಬ್ಬರು ಮಕ್ಕಳು ಕೂಡ ಇದ್ದಾರೆ. ಆದರೆ, ರೇಖಾ ರಾಣಿಯ ಸಂಬಂಧದಿಂದ ಎಲ್ಲಿ ಪತ್ನಿ ಎದುರು ತನ್ನ ಬಣ್ಣ ಬಯಲಾಗುತ್ತದೆಯೋ ಎಂಬ ಕಾರಣಕ್ಕಾಗಿ ರೇಖಾ ರಾಣಿಯನ್ನು ಹತ್ಯೆಗೈದಿದ್ದಾನೆ. ಈಕೆಯ ದೇಹವನ್ನು ತುಂಡು ತುಂಡಾಗಿ ಕತ್ತರಿಸಲು ಚಾಕುವನ್ನೂ ಖರೀದಿಸಿದ್ದ. ಆದರೆ, ಮಗಳ ಕೈಗೆ ಸಿಕ್ಕಿಹಾಕುತ್ತೇನೆ ಎಂಬ ಭಯದಿಂದ ಕೊಲೆ ಮಾಡಿ ಪರಾರಿಯಾಗಿದ್ದ” ಎಂದು ಪೊಲೀಸರು ತಿಳಿಸಿದ್ದಾರೆ.
ಇದನ್ನೂ ಓದಿ | love murder | ಪ್ರೇಮಿಗಳ ಜಗಳ ಕೊಲೆಯಲ್ಲಿ ಅಂತ್ಯ: ಲಿವ್‌ ಇನ್‌ ರಿಲೇಷನ್‌ಷಿಪ್‌ನಲ್ಲಿದ್ದ ಸುಂದರಿಯನ್ನು ಕೊಂದೇ ಹಾಕಿದ!