ಭೋಪಾಲ್: ಮೂರು ವರ್ಷದ ಬಾಲಕಿಯ ಮೇಲೆ ಬಸ್ನಲ್ಲಿಯೇ ಅತ್ಯಾಚಾರ ನಡೆದಿದೆ. ಆಕೆಯನ್ನು ಪ್ರತಿದಿನ ನರ್ಸರಿಗೆ ಕರೆದೊಯ್ದು, ಅಲ್ಲಿಂದ ಮನೆಗೆ ಕರೆದುಕೊಂಡು ಬಂದು ಬಿಡುವ ಚಾಲಕನೇ ಈ ದುಷ್ಕೃತ್ಯ ನಡೆಸಿದ್ದು, ಸದ್ಯ ಆತ ಬಂಧಿತನಾಗಿದ್ದಾನೆ. ಅವನೊಂದಿಗೆ ಬಸ್ ಅಟೆಂಡೆಂಟ್ ಕೂಡ ಅರೆಸ್ಟ್ ಆಗಿದ್ದಾಳೆ. ಸೆಪ್ಟೆಂಬರ್ 8ರಂದು ಮಧ್ಯಪ್ರದೇಶದ ಭೋಪಾಲ್ನಲ್ಲಿ ಘಟನೆ ನಡೆದಿದೆ. ಆ ಕ್ರೂರ ಚಾಲಕ ಬಸ್ನಲ್ಲಿದ್ದ ಮಹಿಳಾ ಅಟೆಂಡೆಂಟ್ ಎದುರೇ ಮೂರು ವರ್ಷದ ಹುಡುಗಿಯ ಮೇಲೇ ರೇಪ್ ಮಾಡಿದ್ದಾನೆ ಎಂದು ಪೊಲೀಸರು ತಿಳಿಸಿದ್ದಾರೆ.
ಸೆ.8ರಂದು ಎಂದಿನಂತೆ ನರ್ಸರಿಯಿಂದ ಎಲ್ಲರೊಂದಿಗೆ ಈ ಪುಟ್ಟ ಬಾಲಕಿಯೂ ಬಸ್ನಲ್ಲಿ ಮನೆಗೆ ಹೊರಟಿದ್ದಳು. ಎಲ್ಲ ಮಕ್ಕಳನ್ನೂ ಬಿಟ್ಟ ನಂತರ ಕೊನೇದಾಗಿ ಡ್ರೈವರ್ ಈಕೆಯನ್ನು ಮನೆಗೆ ಬಿಡಲಿದ್ದ. ಆದರೆ ಮಾರ್ಗಮಧ್ಯೆ ಹುಡುಗಿಯ ಮೇಲೆ ದೌರ್ಜನ್ಯ ಎಸಗಿದ್ದಾನೆ. ಅಷ್ಟಲ್ಲದೆ, ಆಕೆಯ ನರ್ಸರಿ ಯೂನಿಫಾರ್ಮ್ ಬಿಚ್ಚಿ, ಅವಳ ಬ್ಯಾಗ್ನಲ್ಲಿದ್ದ ಮತ್ತೊಂದು ಡ್ರೆಸ್ ಹಾಕಿದ್ದಾನೆ. ನರ್ಸರಿ ಮಕ್ಕಳಿಗೆ ಮನೆಯಿಂದ ಶಾಲೆಗೆ ಹೊರಡುವಾಗ ಯೂನಿಫಾರ್ಮ್ ಹಾಕುವ ಜತೆಗೆ, ಪಾಲಕರು ಅವರ ಬ್ಯಾಗ್ನಲ್ಲಿ ಇನ್ನೊಂದು ಉಡುಪನ್ನು ಇಟ್ಟು ಕಳಿಸುವುದು ಕಡ್ಡಾಯವಾಗಿದೆ. ಹೀಗೆ ಹುಡುಗಿಯ ಅಮ್ಮ ಇಟ್ಟು ಕಳಿಸಿದ್ದ ಇನ್ನೊಂದು ಡ್ರೆಸ್ ಹಾಕಿಸಿ, ಮನೆಗೆ ಬಿಟ್ಟಿದ್ದಾನೆ.
ಮಗಳು ಮನೆಗೆ ಬರುತ್ತಿದ್ದಂತೆ ತಾಯಿ ‘ಯೂನಿಫಾರ್ಮ್ ಎಲ್ಲಿ? ಯಾಕೆ ಈ ಅಂಗಿ ತೊಟ್ಟೆ?’ ಎಂದು ಪ್ರಶ್ನಿಸಿದ್ದಾರೆ. ಆಗ ಅವಳು ‘ಬಸ್ನಲ್ಲಿ ಡ್ರೈವರ್ ತೊಡಿಸಿದ್ದಾರೆ’ ಎಂದಿದ್ದಾಳೆ. ಅದಾದ ಬಳಿಕ ಹುಡುಗಿಯ ಪಾಲಕರು ಶಾಲೆಯ ಆಡಳಿತ ಮಂಡಳಿಗೆ ವಿಷಯ ತಿಳಿಸಿದ್ದಾರೆ. ‘ನನ್ನ ಮಗಳ ಮುಖ, ದೇಹವನ್ನೆಲ್ಲ ಆ ಚಾಲಕ ಮುಟ್ಟಿದ್ದಾನೆ. ನಮ್ಮ ಮಗಳು ತನ್ನ ಖಾಸಗಿ ಭಾಗದಲ್ಲಿ ನೋವು ಎಂದು ಹೇಳುತ್ತಿದ್ದಳು, ನಾವು ಅದನ್ನು ಗಂಭೀರವಾಗಿ ಪರಿಗಣಿಸದೆ ತಪ್ಪು ಮಾಡಿದೆವು’ ಎಂದೂ ಪಾಲಕರು ಹೇಳಿದ್ದಾರೆ. ಅದಾದ ಮೇಲೆ ಪೊಲೀಸರಿಗೂ ದೂರು ನೀಡಲಾಗಿದೆ.
ಆರೋಪಿಗಳಾದ ಹನುಮಂತ್ ಜಾತವ್ (31), ಬಸ್ ಅಟೆಂಡೆಂಟ್ ಊರ್ಮಿಳಾ ಸಾಹು (28) ಬಂಧಿತರಾಗಿದ್ದು, ಪೋಕ್ಸೋ ಕಾಯ್ದೆ ಮತ್ತು ಐಪಿಸಿ ಸೆಕ್ಷನ್ 376ರಡಿ ಕೇಸ್ ದಾಖಲಾಗಿದೆ. ಬಸ್ನಲ್ಲಿ ಸಿಸಿಟಿವಿ ಕ್ಯಾಮರಾಗಳು ಇವೆ. ಆದರೆ ಅದರ ಫೂಟೇಜ್ಗಳನ್ನು ಮೂರು ದಿನಕ್ಕೊಮ್ಮೆ ಡಿಲೀಟ್ ಮಾಡಲಾಗುತ್ತದೆ ಎಂದು ನಮಗೆ ಶಾಲಾ ಆಡಳಿತ ತಿಳಿಸಿದೆ ಎಂದು ಭೋಪಾಲ್ ಪೊಲೀಸ್ ಆಯುಕ್ತ ಮಕ್ರಂಡ್ ದಿಯೋಸ್ಕರ್ ತಿಳಿಸಿದ್ದಾರೆ. ಹಾಗೇ, ‘ಈ ಕೇಸ್ಗೆ ಸಂಬಂಧಪಟ್ಟು ತನಿಖೆ ನಡೆಸಲು ಎಲ್ಲ ರೀತಿಯ ಸಹಕಾರವನ್ನೂ ನಾವು ನೀಡುತ್ತೇವೆ ಎಂದು ಶಾಲೆಯ ಪ್ರಿನ್ಸಿಪಾಲ್ ಹೇಳಿದ್ದಾರೆ.
ಇದನ್ನೂ ಓದಿ: Verdict | 7 ವರ್ಷದ ಬಾಲಕಿ ಮೇಲೆ ಅತ್ಯಾಚಾರ ಮಾಡಿದ್ದವನಿಗೆ 7 ವರ್ಷ ಜೈಲು; ಸಂತ್ರಸ್ತೆಗೆ 1.15 ಲಕ್ಷ ಪರಿಹಾರ