ಗಾಂಧಿನಗರ: ಕೆಲವೊಮ್ಮೆ ನಿಜ ಜೀವನವನ್ನು ಆಧರಿಸಿ ಸಿನಿಮಾ ಮಾಡಲಾಗುತ್ತದೆ. ಇನ್ನೂ ಕೆಲವೊಮ್ಮೆ ಸಿನಿಮಾಗಳು ನಿಜ ಜೀವನಕ್ಕೆ ಸಮೀಪವಾಗಿರುತ್ತವೆ. ಹಾಗಾಗಿ, ನಮ್ಮ ಮೇಲೆ ಸಿನಿಮಾಗಳು ಹೆಚ್ಚು ಪ್ರಭಾವ ಬೀರುತ್ತವೆ. ಆದರೆ, ಗುಜರಾತ್‌ನ ಸೂರತ್‌ ಜಿಲ್ಲೆಯಲ್ಲಿ ಮಹಿಳೆಯು ಪ್ರಿಯಕರನಿಗಾಗಿ ತನ್ನ ಎರಡೂವರೆ ವರ್ಷದ ಮಗನನ್ನೇ ಕೊಂದು (Crime News) ಹಾಕಿದ್ದಾಳೆ. ಹಾಗೆಯೇ, ಪೊಲೀಸರಿಂದ ತಪ್ಪಿಸಿಕೊಳ್ಳಲು ದೃಶ್ಯಂ ಸಿನಿಮಾ ನೋಡಿ, ಅದರಂತೆ ಮಗನ ಶವ ಹೂತು ಹಾಕಿದ್ದಾಳೆ. ಕೊನೆಗೆ ಪೊಲೀಸರ ಕೈಗೆ ಸಿಕ್ಕಿಬಿದ್ದಿದ್ದಾಳೆ.
ಹೌದು, ಸೂರತ್‌ ಜಿಲ್ಲೆಯ ದಿಂಡೋಲಿ ಪ್ರದೇಶದ ಕಟ್ಟಡ ನಿರ್ಮಾಣ ಕೆಲಸದಲ್ಲಿ ತೊಡಗಿರುವ ನಯನಾ ಮಂಡಾವಿ ಎಂಬ ಮಹಿಳೆಯು ಸಿನಿಮೀಯ ರೀತಿಯಲ್ಲಿ ಅಪರಾಧ ಎಸಗಿದ್ದಾಳೆ. ತನ್ನ ಪ್ರಿಯಕರನ ಜತೆ ಓಡಿಹೋಗುವ ಕಾರಣದಿಂದಾಗಿ ಆಕೆ ತನ್ನ ಎರಡೂವರೆ ವರ್ಷದ ಮಗ ವೀರ್‌ ಮಂಡಾವಿಯನ್ನು ಕೊಂದಿದ್ದಾಳೆ. ಅಪರಾಧದಿಂದ ತಪ್ಪಿಸಿಕೊಳ್ಳಲು ತಾನೇ ಪೊಲೀಸ್‌ ಠಾಣೆಗೆ ಹೋಗಿ ಮಗ ಕಾಣೆಯಾಗಿದ್ದಾನೆ ಎಂದು ದೂರು ನೀಡಿದ್ದಾಳೆ. ಆದರೆ, ದೃಶ್ಯಂ ಸಿನಿಮಾದಂತೆ ತಪ್ಪಿಸಿಕೊಳ್ಳಲು ಆಗದೆ ಕಂಬಿ ಎಣಿಸುತ್ತಿದ್ದಾಳೆ.
ಪೊಲೀಸರು ಪ್ರಕರಣ ಭೇದಿಸಿದ್ದು ಹೇಗೆ?
ಮಹಿಳೆಯು ಪೊಲೀಸ್‌ ಠಾಣೆಗೆ ತೆರಳಿ ದೂರು ದಾಖಲಿಸುತ್ತಲೇ ಪೊಲೀಸರು ತನಿಖೆ ಆರಂಭಿಸಿದ್ದಾರೆ. ಕಟ್ಟಡ ನಿರ್ಮಾಣ ಕಾಮಗಾರಿ ನಡೆಯುವ ಸ್ಥಳದಲ್ಲಿ ಪರಿಶೀಲನೆ ನಡೆಸಿದ್ದಾರೆ. ಮಹಿಳೆಯು ಒಂದೊಂದು ರೀತಿ ಹೇಳಿಕೆ ನೀಡಿದ ಕಾರಣ ಕೊನೆಗೆ ಸಿಸಿಟಿವಿ ದೃಶ್ಯಾವಳಿಗಳನ್ನು ಪರಿಶೀಲನೆ ಮಾಡಿದ್ದಾರೆ. ಆಗ, ಮಹಿಳೆಯು ಮಗನನ್ನು ಕಟ್ಟಡ ನಿರ್ಮಾಣ ಸ್ಥಳದಿಂದ ಬೇರೆಲ್ಲೂ ಕಳುಹಿಸಿಲ್ಲ ಎಂಬುದು ಗೊತ್ತಾಗಿದೆ. ಅನುಮಾನ ಬಲವಾದ ಕಾರಣ ಪೊಲೀಸರು ಗದರಿಸಿದಾಗ ಮಹಿಳೆಯು ಅಪರಾಧ ಒಪ್ಪಿಕೊಂಡಿದ್ದಾಳೆ.
ಇದನ್ನೂ ಓದಿ: Crime News: ಪತ್ನಿಯ ಶವ ಫ್ರೀಜರ್‌ನಲ್ಲಿ ಇಟ್ಟ, ಪೊಲೀಸರು ಕೇಳಿದರೆ ಜಾಂಡೀಸ್‌ನಿಂದ ಸಾವು ಎಂದ, ಮುಂದೇನಾಯ್ತು?
ದೃಶ್ಯಂ ಸಿನಿಮಾ ನೋಡಿದ ಮಹಿಳೆ
ಮಗನನ್ನು ಕೊಂದು, ಹೊಂಡದಲ್ಲಿ ಹೂತು ಹಾಕಿದ್ದೇನೆ ಎಂದು ಮಹಿಳೆ ಹೇಳಿದ್ದಾರೆ. ಪೊಲೀಸರು ಹೋಗಿ ಹೊಂಡ ತಪಾಸಣೆ ಮಾಡಿದಾಗ ಶವ ಸಿಕ್ಕಿಲ್ಲ. ಮತ್ತೊಮ್ಮೆ ಕೇಳಿದಾಗ, ಕೆರೆಯಲ್ಲಿ ಬಿಸಾಡಿದ್ದೇನೆ ಎಂದಿದ್ದಾಳೆ. ಪೊಲೀಸರು ಕೆರೆಯಲ್ಲಿ ಹುಡುಕಿದರೂ ಶವ ಸಿಕ್ಕಿಲ್ಲ. ಇದಾದ ಬಳಿಕ ಪೊಲೀಸರು ಹೆಚ್ಚಿನ ವಿಚಾರಣೆ ನಡೆಸಿದಾಗ, ಆಕೆ ಮಗನನ್ನು ಕೊಂದು, ಕಟ್ಟಡದಲ್ಲಿ ನಿರ್ಮಾಣ ಹಂತದಲ್ಲಿರುವ ಶೌಚಾಲಯದ ಹೊಂಡಕ್ಕೆ ಎಸೆದಿದ್ದೇನೆ ಎಂದು ತಿಳಿಸಿದ್ದಾಳೆ. ಪೊಲೀಸರು ಹುಡುಕಿದಾಗ ಶೌಚಾಲಯ ಹೊಂಡದಲ್ಲಿ ಮಗುವಿನ ಶವ ಸಿಕ್ಕಿದೆ. ಅಪರಾಧ ಮುಚ್ಚಿಹಾಕಲು ದೃಶ್ಯಂ ಸಿನಿಮಾ ನೋಡಿ ಮಗನನ್ನು ಹೂತು ಹಾಕಿದ್ದೇನೆ ಎಂಬುದನ್ನು ಮಹಿಳೆ ಒಪ್ಪಿಕೊಂಡಿದ್ದಾಳೆ ಎಂದು ಪೊಲೀಸ್‌ ಮೂಲಗಳು ತಿಳಿಸಿವೆ.