ಪಣಜಿ: ಈ ಕಳ್ಳರು ಕೂಡಾ ತುಂಬಾ ಕ್ರೇಜಿಯಾಗಿರುತ್ತಾರೆ ಅನ್ನುವುದಕ್ಕೆ ಆಗಾಗ ಕೆಲವು ನಿದರ್ಶನಗಳನ್ನು ಕಾಣುತ್ತೇವೆ. ಮನೆ ಮುರಿದು ಒಳಗೆ ಬಂದವರೇ ಅಡುಗೆ ಮಾಡಿ ಊಟ ಮಾಡಿ ಹೋಗುವುದು, ಕೋಲ್ಡ್‌ ಡ್ರಿಂಕ್ಸ್‌ ಎಲ್ಲ ಕುಡಿದು ಆರಾಮದಲ್ಲಿ ನಿದ್ದೆ ಮಾಡುವುದು.. ಹೀಗೆ ಕದಿಯಲು ಬಂದರೂ ಯಾವುದೇ ಟೆನ್ಶನ್‌ ಇಲ್ಲದೆ ತಮ್ಮ ಕೆಲಸ ಮುಗಿಸಿ ಹೋಗುವವರು ಸಾಕಷ್ಟು ಜನ. ಇಲ್ಲೊಬ್ಬ ಕಳ್ಳ ಇನ್ನೂ ಕ್ರೇಜಿ ಆಗಿರುವ ಹಾಗಿದೆ. ಅವನು ಮನೆಯ ಸಾಮಗ್ರಿಗಳನ್ನೆಲ್ಲ ಹೊತ್ತೊಯ್ದರೂ ಹೋಗುವಾಗ I LOVE YOU ಅಂತ ಬರೆದಿಟ್ಟು ಹೋಗಿದ್ದಾನೆ.
ಈ ಘಟನೆ ನಡೆದಿರುವುದು ದಕ್ಷಿಣ ಗೋವಾದ ಮಾರ್ಗೋವಾ ಪಟ್ಟಣದ ಒಂದು ಮನೆಯಲ್ಲಿ.
ಆಸಿಬ್‌ ಕ್ಸೆಕ್‌ ಎಂಬವರು ಎರಡು ದಿನಗಳ ಮಟ್ಟಿಗೆ ಬೇರೆ ಊರಿಗೆ ರಜಾ ಪ್ರವಾಸ ಹೋಗಿದ್ದರು. ಎರಡು ದಿನ ಬಿಟ್ಟು ಬಂದು ನೋಡಿದರೆ ಮನೆಯ ಬಾಗಿಲು ಮುರಿದಿತ್ತು. ವಸ್ತುಗಳೆಲ್ಲ ಕಳವಾದಂತೆ ಕಂಡಿತು. ಆದರೆ, ಹಾಲ್‌ನಲ್ಲಿ ಟಿವಿ ಮಾತ್ರ ಹಾಗೆಯೇ ಇತ್ತು. ಅದರ ಮೇಲೆ `I LOVE YOU’ ಎಂದು ಬರೆದಿತ್ತು!
ಇದನ್ನೂ ಓದಿ | ಸ್ನೇಹಿತನ ಫೇಸ್‌ಬುಕ್‌ ಪೋಸ್ಟ್‌ನಿಂದ ಸಿಕ್ಕಿಬಿದ್ದ ಕಳ್ಳರು
ಬಂಗಲೆಗೆ ನುಗ್ಗಿದ್ದ ಕಳ್ಳ ಅಥವಾ ಕಳ್ಳರ ತಂಡ ಅತ್ಯಂತ ಸಾವಕಾಶವಾಗಿ ತಮ್ಮ ಕೆಲಸ ಮಾಡಿದಂತಿದೆ. ಮನೆಯಲ್ಲಿದ್ದ ಎಲ್ಲ ಭಾಗಗಳನ್ನು ಶೋಧಿಸಿ ಸುಮಾರು 20 lಲಕ್ಷ ರೂ. ಮೌಲ್ಯದ ಚಿನ್ನಾಭರಣ ಮತ್ತು ಇತರ ಬೆಲೆ ಬಾಳುವ ವಸ್ತುಗಳನ್ನು ಕದ್ದುಕೊಂಡು ಹೋಗಿದ್ದಾನೆ. ಜತೆಗೆ 1.5 ಲಕ್ಷ ರೂ. ನಗದು ಕೂಡಾ.
ಮನೆಯನ್ನೆಲ್ಲ ದೋಚಿ ಮನೆ ಮಾಲೀಕನಿಗೆ ಐ ಲವ್‌ ಯೂ ಎಂದು ಪ್ರೇಮ ಸಂದೇಶ ಕಳುಹಿಸಿದ ಕಳ್ಳನ ಬಗ್ಗೆ ಎಲ್ಲರಿಗೂ ಕುತೂಹಲ ಮೂಡಿದೆ. ಮಾರ್ಗೋವಾ ಪೊಲೀಸ್‌ ಠಾಣೆಯಲ್ಲಿ ಈ ಬಗ್ಗೆ ಪ್ರಕರಣ ದಾಖಲಾಗಿದ್ದು, ಮನೆ ಮುರಿದು ಕಳ್ಳತನ ಮಾಡಿದವನ ಶೋಧ ನಡೆಯುತ್ತಿದೆ ಎಂದು ಇನ್ಸ್‌ಪೆಕ್ಟರ್‌ ಸಚಿನ್‌ ನರ್ವೇಕರ್‌ ಹೇಳಿದ್ದಾರೆ.
ಇದನ್ನೂ ಓದಿ | ಮನೆಯಿಂದಲೇ 4 ಲಕ್ಷ ಕದ್ದು ಮೋಜು ಮಾಡಿ ನಕಲಿ ನೋಟು ತಂದಿಟ್ಟ ಮಕ್ಕಳು!