ನವ ದೆಹಲಿ: ಪ್ರೀತಿಸುತ್ತೇನೆ ಎಂದು ಜತೆಗಿದ್ದ ಲಿವ್ ಇನ್ ಪಾರ್ಟ್ನರ್ ಕೈಯಲ್ಲಿ ಹತ್ಯೆಗೀಡಾಗಿ, 35 ತುಂಡುಗಳಾಗಿ ಹೋದ ಶ್ರದ್ಧಾ ವಾಳ್ಕರ್ ಕೇಸ್ ಇಡೀ ದೇಶಕ್ಕೆ ಶಾಕ್ ನೀಡಿದೆ. ಅದರ ತನಿಖೆಯಿನ್ನೂ ನಡೆಯುತ್ತಿದೆ. ಹೀಗಿರುವಾಗ ಇಂಥದ್ದೇ ಮಾದರಿಯಲ್ಲಿ ನಡೆದ ಇನ್ನೊಂದು ಕೊಲೆ ಕೇಸ್ ಬೆಳಕಿಗೆ ಬಂದಿದೆ. ಅದೂ ಕೂಡ ರಾಷ್ಟ್ರರಾಜಧಾನಿ ದೆಹಲಿಯಲ್ಲೇ ನಡೆದ ಹತ್ಯೆ. ಇಲ್ಲಿ ಮಹಿಳೆ ತನ್ನ ಪತಿಯನ್ನು ಕೊಲೆ ಮಾಡಿ, 22 ತುಂಡುಗಳಾಗಿ ಕತ್ತರಿಸಿ ಬಿಸಾಕಿದ್ದಾಳೆ.
ನವದೆಹಲಿಯ ಪಾಂಡವಪುರದಲ್ಲಿ ಮಹಿಳೆ ತನ್ನ ಮಗನೊಂದಿಗೆ ಸೇರಿ ಪತಿಯನ್ನು ಹತ್ಯೆಗೈದು ಪೀಸ್ಪೀಸ್ ಮಾಡಿದ್ದಾಳೆ. ನಂತರ ಆಕೆಯೂ ಕೂಡ ಆ ದೇಹದ ತುಂಡುಗಳನ್ನು ಫ್ರಿಜ್ನಲ್ಲಿ ಇಟ್ಟಿದ್ದಳು. ಬಳಿಕ ಇಬ್ಬರೂ ಸೇರಿ ಪಾಂಡವಪುರದ ರಾಮಲೀಲಾ ಮೈದಾನದ ಸಮೀಪದ ಮತ್ತು ಪೂರ್ವ ದೆಹಲಿಯ ವಿವಿಧ ಭಾಗಗಳಲ್ಲಿ ಶವದ ತುಂಡುಗಳನ್ನು ಹೂತುಹಾಕಿದ್ದಾರೆ.
ಹತ್ಯೆಯಾದವನ ಹೆಸರು ಅಂಜನ್ದಾಸ್. ಕೊಲೆ ಮಾಡಿದ ಮಹಿಳೆ ಹೆಸರು ಪೂನಂ ಮತ್ತು ಸಹಾಯ ಮಾಡಿದ ಮಗನ ಹೆಸರು ದೀಪಕ್ ದಾಸ್. ಇದೀಗ ಅಮ್ಮ-ಮಗ ಇಬ್ಬರೂ ಅರೆಸ್ಟ್ ಆಗಿದ್ದಾರೆ. ತಾನು ಪತಿಯ ಹತ್ಯೆಯನ್ನು ಏಕೆ ಮತ್ತು ಹೇಗೆ ಮಾಡಿದೆ ಎಂಬುದನ್ನು ಪೂನಂ ಪೊಲೀಸರ ಎದುರು ಹೇಳಿಕೊಂಡಿದ್ದಾಳೆ. ‘ನನ್ನ ಪತಿ ಅಂಜನ್ದಾಸ್ಗೆ ಅನೈತಿಕ ಸಂಬಂಧ ಇತ್ತು. ಆತ ಕುಡಿದು ಬಂದು ಇಲ್ಲಿ ನಮಗೆ ಹಿಂಸೆ ಮಾಡುತ್ತಿದ್ದ, ಹಾಗಾಗಿಯೇ ಕೊಂದೆವು’ ಎಂದು ಪೂನಂ ತಿಳಿಸಿದ್ದಾಳೆ. ‘ಮೊದಲು ನಾನು ಮತ್ತು ನನ್ನ ಮಗ ದೀಪಕ್ ಸೇರಿ ಅಂಜನ್ ದಾಸ್ಗೆ ನಿದ್ದೆ ಮಾತ್ರೆ ಕೊಟ್ಟೆವು. ಆತ ನಿದ್ದೆ ಮಾಡಿದಾಗ ಕೊಂದು, ದೇಹವನ್ನು ತುಂಡರಿಸಿದ್ದೇವೆ. ಬಳಿಕ ಅದನ್ನು ಫ್ರಿಜ್ನಲ್ಲಿ ಶೇಖರಿಸಿಟ್ಟಿದ್ದೆವು. ದಿನವೂ ಒಂದೊಂದೇ ತುಂಡುಗಳನ್ನು ತೆಗೆದುಕೊಂಡು ಹೋಗಿ ವಿವಿಧ ಕಡೆಗಳಲ್ಲಿ ಹೂಳುತ್ತಿದ್ದೆವು’ ಎಂದು ಪೂನಂ ಹೇಳಿಕೆ ನೀಡಿದ್ದಾರೆ.
ಶವದ ತುಂಡುಗಳನ್ನು ದಿನವೂ ಒಂದೊಂದು ಪ್ರದೇಶಗಳಲ್ಲಿ ಹೂಳುತ್ತಿದ್ದ ಅಮ್ಮ-ಮಗ ಒಂದು ದಿನ ಪಾಂಡವನಗರದ ಸೈಬರ್ ಪೊಲೀಸ್ ಠಾಣೆಯ ಹಿಂಭಾಗದಲ್ಲಿರುವ ದೊಡ್ಡ ಮೈದಾನಕ್ಕೆ ಹೋಗಿದ್ದಾರೆ. ಅಲ್ಲಿಯೇ ಇದ್ದ ಸಿಸಿಟಿವಿ ಕ್ಯಾಮರಾದಲ್ಲಿ ಈ ದೃಶ್ಯ ಸೆರೆಯಾಗಿದೆ. ಮೃತದೇಹದ ಒಂದು ಭಾಗ ಇದ್ದ ದೊಡ್ಡದಾದ ಚೀಲವನ್ನು ಹೊತ್ತು ಮಗ ಮುನ್ನಡೆಯುತ್ತಿದ್ದರೆ, ತಾಯಿ ಅವನ ಹಿಂದೆ ಹೋಗುತ್ತಿರುವುದನ್ನು ವಿಡಿಯೊದಲ್ಲಿ ನೋಡಬಹುದು. ಈ ಸಿಸಿಟಿವಿ ದೃಶ್ಯದ ಆಧಾರದ ಮೇಲೆ ಪೊಲೀಸರು ತನಿಖೆ ನಡೆಸಿದಾಗ ಹತ್ಯೆ ವಿಷಯ ಬೆಳಕಿಗೆ ಬಂದಿದೆ.
ಶ್ರದ್ಧಾ ಕೂಡ ಹೀಗೆ ಹತ್ಯೆಯಾಗಿದ್ದಳು. ಆಕೆಯ ಲಿವ್ ಇನ್ ಪಾರ್ಟ್ನರ್ ಅಫ್ತಾಬ್ ಪೂನಾವಾಲಾ ಸದ್ಯ ಪೊಲೀಸರ ವಶದಲ್ಲಿದ್ದಾನೆ. ಈತನ ಕೈಯಲ್ಲಿ ತುಂಡಾದ ಶ್ರದ್ಧಾಳ ದೇಹದ ಭಾಗಗಳಿಗಾಗಿ ದೆಹಲಿಯ ಮೆಹ್ರೌಲಿ ಅರಣ್ಯದಲ್ಲಿ ಪೊಲೀಸರು ಸಿಕ್ಕಾಪಟೆ ಹುಡುಕಾಟ ನಡೆಸಿದ್ದರು. ಅಲ್ಲಿ ಸಿಕ್ಕಿರುವ ಭಾಗಗಳನ್ನೆಲ್ಲ ಪರಿಶೀಲನೆಗೆ ಕಳಿಸಲಾಗಿದೆ.
ಇದನ್ನೂ ಓದಿ: Shraddha Murder Case | ಶ್ರದ್ಧಾ ವಾಳ್ಕರ್ ಹತ್ಯೆ ಕೇಸ್ ಸಿಬಿಐಗೆ ವರ್ಗಾಯಿಸಲು ಸಾಧ್ಯವಿಲ್ಲ ಎಂದ ದೆಹಲಿ ಹೈಕೋರ್ಟ್