ರಾಯಪುರ: ದೆಹಲಿಯಲ್ಲಿ ಪ್ರೀತಿ ಅರಸಿ ಹಿಂದೆ ಬಂದವಳ ದೇಹವನ್ನೇ 35 ಭಾಗಗಳಾಗಿ ತುಂಡರಿಸಿ ಕೊಂದ ಪ್ರಕರಣವು ದೇಶಾದ್ಯಂತ ಸುದ್ದಿಯಾದ ಬೆನ್ನಲ್ಲೇ ಛತ್ತೀಸ್‌ಗಢದ ಬಿಲಾಸ್‌ಪುರದಲ್ಲಿ ವ್ಯಕ್ತಿಯು ಹಣದ ಮೇಲಿನ ಮೋಹಕ್ಕಾಗಿ (Chhattisgarh Murder) ಪ್ರೀತಿಸಿದವಳನ್ನೇ ಕೊಂದಿದ್ದಾನೆ. ಪ್ರಿಯತಮೆಯನ್ನು ಕೊಂದು, ಆಕೆಯ ದೇಹವನ್ನು ಮೆಡಿಕಲ್‌ ಶಾಪ್‌ನಲ್ಲಿ ಇಟ್ಟು ದುಷ್ಕೃತ್ಯ ಮೆರೆದ ಆತನೀಗ ಕಂಬಿ ಎಣಿಸುತ್ತಿದ್ದಾನೆ.
“ಆಶಿಶ್‌ ಸಾಹು ಹಾಗೂ ಪ್ರಿಯಾಂಕಾ ಪ್ರೀತಿಸುತ್ತಿದ್ದರು. ಆದರೆ, ಹಣಕಾಸು ವಿಚಾರಕ್ಕೆ ಇಬ್ಬರ ಮಧ್ಯೆ ಮನಸ್ತಾಪ ಉಂಟಾಗಿದೆ. ಇದೇ ಕಾರಣಕ್ಕೆ ಆಕೆಯನ್ನು ಕೊಂದ ಸಾಹು, ಶವವನ್ನು ನಾಲ್ಕು ದಿನ ಮೆಡಿಕಲ್‌ನಲ್ಲಿ ಇಟ್ಟಿದ್ದಾನೆ. ಕೊನೆಗೆ, ಶವವನ್ನು ಬೇರೆ ಸಾಗಿಸುವಾಗ ಸಿಕ್ಕಿಬಿದ್ದಿದ್ದಾನೆ. ಪ್ರಕರಣದ ಕುರಿತು ಹೆಚ್ಚಿನ ತನಿಖೆ ನಡೆಸಲಾಗುತ್ತಿದೆ” ಎಂದು ಪೊಲೀಸರು ತಿಳಿಸಿದ್ದಾರೆ.
ಆಶಿಶ್‌ ಹಾಗೂ ಸಾಹು ಸ್ಟಾಕ್‌ ಮಾರ್ಕೆಟ್‌ನಲ್ಲಿ ಹೂಡಿಕೆ ಮಾಡುತ್ತಿದ್ದರು. ಇದೇ ವೇಳೆ ಇಬ್ಬರ ಮಧ್ಯೆ ಹಣಕಾಸು ಒಪ್ಪಂದವಾಗಿದೆ. ಆದರೆ, ಷೇರು ಮಾರುಕಟ್ಟೆಯಲ್ಲಿ ಹಣ ಕಳೆದುಕೊಂಡು ನಷ್ಟ ಅನುಭವಿಸಿದ ಕಾರಣ, ಪ್ರಿಯಾಂಕಾ 11 ಲಕ್ಷ ರೂ. ವಾಪಸ್‌ ಕೇಳಿದ್ದಾರೆ. ಇದರಿಂದ ಕುಪಿತಗೊಂಡ ಆಶಿಶ್‌ ಆಕೆಯನ್ನು ಕೊಂದಿದ್ದಾನೆ ಎಂದು ತಿಳಿದುಬಂದಿದೆ.
ಇದನ್ನೂ ಓದಿ | Shraddha Murder Case | ಬ್ಯಾಗ್‌ ಹಿಡಿದು ಅಫ್ತಾಬ್‌ ಓಡಾಡುತ್ತಿರುವ ವಿಡಿಯೊ ಲಭ್ಯ, ಬ್ಯಾಗಲ್ಲಿತ್ತಾ ಶ್ರದ್ಧಾ ಬಾಡಿ?