-ಶೀಲಾ ಸಿ. ಶೆಟ್ಟಿ, ಬೆಂಗಳೂರು
ಸೆಲೆಬ್ರೆಟಿ ಲುಕ್‌ ನೀಡುವ (Sequins lehenga trend) ಸಿಕ್ವಿನ್ಸ್ ಲೆಹೆಂಗಾಗಳು ಇದೀಗ ಭಾರಿ ಸದ್ದು ಮಾಡಿವೆ. ಹೌದು, ಅಂಬಾನಿ ಫ್ಯಾಮಿಲಿಯ ರಾಧಿಕಾ ಮರ್ಚೆಂಟ್‌-ಅನಂತ್‌ ಅಂಬಾನಿಯ ಪ್ರಿ-ವೆಡ್ಡಿಂಗ್‌ ಸಂಗೀತ್‌ ಸಮಾರಂಭಗಳಲ್ಲಿ ಸೆಲೆಬ್ರೆಟಿಗಳು ಮಿರಮಿರ ಮಿನುಗುವ ಸಿಕ್ವಿನ್ಸ್ ಲೆಹೆಂಗಾಗಳಲ್ಲಿ ಕಾಣಿಸಿಕೊಂಡು ಎಲ್ಲೆಡೆ ಸುದ್ದಿಯಾಗಿದ್ದೇ ತಡ, ಫ್ಯಾಷನ್‌ ಲೋಕದಲ್ಲಿ ಕಣ್ಣು ಕುಕ್ಕುವ ಮಿರ ಮಿರ ಮಿನುಗುವ ಸಿಕ್ವಿನ್ಸ್ ಲೆಹೆಂಗಾಗಳಿಗೆ ಭಾರಿ ಬೇಡಿಕೆ ಹೆಚ್ಚಾಗಿದೆ. ಎಲ್ಲದಕ್ಕಿಂತ ಅಚ್ಚರಿಯ ವಿಚಾರ ಎಂದರೇ, ದೊಡ್ಡ ದೊಡ್ಡ ಬ್ರಾಂಡ್‌ಗಳಿಗೆ ಪೈಪೋಟಿ ಎಂಬಂತೆ, ಲೋಕಲ್‌ ಬ್ರಾಂಡ್‌ಗಳು ಮಧ್ಯಮ ವರ್ಗದ ಮಹಿಳೆಯರಿಗೂ ಕೈಗೆಟಕುವ ದರದಲ್ಲಿ ಸೆಲೆಬ್ರೆಟಿಗಳ ರಿಪ್ಲಿಕಾ ಲೆಹೆಂಗಾಗಳನ್ನು ಈಗಾಗಲೇ ಮಾರುಕಟ್ಟೆಯಲ್ಲಿ ಬಿಡುಗಡೆಗೊಳಿಸಲಾರಂಭಿಸಿದ್ದಾರೆ. ಈ ಕುರಿತಂತೆ ಇಲ್ಲಿದೆ ವರದಿ.
ಲೋಕಲ್‌ ಬ್ರಾಂಡ್‌ನಲ್ಲೂ ಬಂತು ಸಿಕ್ವಿನ್ಸ್ ಲೆಹೆಂಗಾಗಳು
“ಅಂಬಾನಿ ಫ್ಯಾಮಿಲಿಯಲ್ಲಿ ಪ್ರಿ-ವೆಡ್ಡಿಂಗ್‌ ಸಮಾರಂಭವು ಸೆಲೆಬ್ರೆಟಿಗಳಿಗೆ ತಂತಮ್ಮ ಡಿಸೈನರ್‌ವೇರ್‌ ಪ್ರದರ್ಶಿಸಲು ವೇದಿಕೆ ಕಲ್ಪಿಸಿಕೊಟ್ಟಿತ್ತು ಎಂದರೂ ಅತಿಶಯೋಕ್ತಿಯಾಗದು. ಯಾಕೆಂದರೇ, ತಾರೆಯರು ಕೂಡ ಸ್ಪರ್ಧೆಗೆ ಇಳಿದವರಂತೆ, ಲಕ್ಷಗಟ್ಟಲೇ ಬೆಲೆ ಬಾಳುವ ದೊಡ್ಡ ದೊಡ್ಡ ಬ್ರಾಂಡ್‌ನ ಡಿಸೈನರ್‌ವೇರ್‌ಗಳನ್ನು ಧರಿಸಿ, ಕಣ್ಮನ ಸೆಳೆದರು. ಇಷ್ಟಾದರೇ ಪರವಾಗಿಲ್ಲ! ರಾತ್ರಿಯಿಂದ ಬೆಳಗಾಗುವುದರೊಳಗೆ, ಚಿಕ್ಕ ಪುಟ್ಟ ಲೋಕಲ್‌ ಡಿಸೈನರ್‌ಗಳು ಹಾಗೂ ಲೋಕಲ್‌ ಬ್ರಾಂಡ್‌ಗಳು ಥೇಟ್‌ ಸೆಲೆಬ್ರೆಟಿಗಳು ಧರಿಸಿದಂತಹ ಅತ್ಯಾಕರ್ಷಕ ಸಿಕ್ವಿನ್‌ ಲೆಹೆಂಗಾಗಳನ್ನು ತಮ್ಮದೇ ಆದ ಡಿಸೈನ್‌ನಲ್ಲಿ ಸೃಷ್ಟಿಸಿ ಬಿಡುಗಡೆಗೊಳಿಸಿ, ಪ್ರಿ-ಆರ್ಡರ್‌ ತೆಗೆದುಕೊಳ್ಳಲಾರಂಭಿಸಿದ್ದಾರೆ. ಇದು ಸದ್ಯದ ಲೆಹೆಂಗಾ ಕ್ರೇಝ್‌ಗೆ ನಾಂದಿ ಹಾಡಿದೆ ” ಎನ್ನುತ್ತಾರೆ ಫ್ಯಾಷನ್‌ ವಿಶ್ಲೇಷಕರು.
ಏನಿದು ಸಿಕ್ವಿನ್ಸ್ ಲೆಹೆಂಗಾ
ಮಿರ ಮಿರ ಮಿನುಗುವಂತಹ ಚಿಕ್ಕ ಚಿಕ್ಕ ಶೈನಿಂಗ್‌ ಮೆಟಿರಿಯಲ್‌ನಲ್ಲಿ ಸಿದ್ಧಗೊಂಡ ಫ್ಯಾಬ್ರಿಕ್‌ನಿಂದ ತಯಾರಾದ ಡಿಸೈನರ್‌ ಲೆಹೆಂಗಾಗಳಿವು.
ಸಿಕ್ವಿನ್ಸ್ ಲೆಹೆಂಗಾಗೆ ಡಿಮ್ಯಾಂಡ್‌
ಸಾರಾ ಅಲಿ ಖಾನ್‌, ಅನನ್ಯಾ ಪಾಂಡೇ , ಶನಾಯಾ ಕಪೂರ್, ದಿಶಾ ಪಟಾನಿ ಹಾಗೂ ಖುಷಿ ಕಪೂರ್ ಸೇರಿದಂತೆ ಸಾಕಷ್ಟು ಸೆಲೆಬ್ರೆಟಿಗಳು ಸಿಕ್ವಿನ್ಸ್ ಲೆಹೆಂಗಾಗಳಲ್ಲಿ ಕಾಣಿಸಿಕೊಂಡ ನಂತರ ಫ್ಯಾಷೆನಬಲ್‌ ಯುವತಿಯರು ಇಂಥದ್ದೇ ರಿಪ್ಲಿಕಾ ಲೆಹೆಂಗಾಗಳಿಗಾಗಿ ಆನ್‌ಲೈನ್‌ನಲ್ಲೂ ಹುಡುಕಾಟ ನಡೆಸಿರುವುದು ಹೆಚ್ಚಾಗಿದೆಯಂತೆ. ಇದಕ್ಕೆ ತಕ್ಕಂತೆ ಡಿಸೈನರ್‌ಗಳು ಕೂಡ ಆರ್ಡರ್‌ ಮೇರೆಗೆ ಸಿಕ್ವಿನ್ಸ್ ಡಿಸೈನರ್‌ವೇರ್‌ಗಳನ್ನು ಪೂರೈಸಲು ಮುಂದಾಗುತ್ತಿದ್ದಾರೆ ಎನ್ನುತ್ತಾರೆ ಫ್ಯಾಷನ್‌ ವಿಮರ್ಶಕರು.
- ಸೆಲೆಬ್ರೆಟಿ ಲುಕ್‌ಗೆ ಸಿಕ್ವಿನ್ಸ್ ಲೆಹೆಂಗಾಗಳು ಬೆಸ್ಟ್.
- ಎಂತಹವರನ್ನು ಈ ಲೆಹೆಂಗಾಗಳು ಹೈಲೈಟ್‌ಗೊಳಿಸುತ್ತವೆ.
- ಇಂಡೋ-ವೆಸ್ಟರ್ನ್‌ ಲುಕ್‌ಗೆ ಸಾಥ್‌ ನೀಡುತ್ತವೆ.
( ಲೇಖಕಿ ಫ್ಯಾಷನ್‌ ಪತ್ರಕರ್ತೆ)