ಡಾ. ಸಂತೋಷ ಹಾನಗಲ್ಲ
”ಸಂಸ್ಕೃತ ಭಾಷಾ ಬಹುಭಾಷಾಣಾಂ ಜನನೀ” ಎಂಬಂತೆ ಸಂಸ್ಕೃತವು ಅನೇಕ ಭಾಷೆಗಳ ಮಾತೃಭಾಷೆ. ಅಧ್ಯಾತ್ಮದಿಂದ ಆಧುನಿಕ ವಿಜ್ಞಾನದವರೆಗೆ ಅನೇಕ ವಿಷಯಗಳ ಖಜಾನೆ. ಜ್ಞಾನದ ತವರು.
ಗಣಕಯಂತ್ರಕ್ಕೂ ಸರಿಹೊಂದಬಲ್ಲ ಅತ್ಯಂತ ವೈಜ್ಞಾನಿಕವಾದ ಭಾಷೆ ಸಂಸ್ಕೃತ. ಇದರಿಂದ ಪ್ರಪಂಚದ ಅನೇಕ ಭಾಷೆಗಳು ಹುಟ್ಟಿಕೊಂಡಿವೆ ಮತ್ತು ಸಮೃದ್ಧವಾಗಿವೆ. ಜಗತ್ತಿನ ಅತ್ಯಂತ ಹಳೆಯ ಸಾಹಿತ್ಯವೆಂದರೆ ಸಂಸ್ಕೃತದಲ್ಲಿ ಇರುವ ಋಗ್ವೇದ ಎಂದು ಚಿಂತಕರಲ್ಲಿ ಯಾವುದೇ ಭಿನ್ನಾಭಿಪ್ರಾಯವಿಲ್ಲ. ಆದರೂ ಪಾಶ್ಚಿಮಾತ್ಯ ಮತ್ತು ಅದಕ್ಕೆ ಅನುಗುಣವಾದ ಪ್ರವಚನಕಾರರು ವಿಶ್ವದ ಅತ್ಯಂತ ಹಳೆಯ ಭಾಷೆ ಸಂಸ್ಕೃತ ಎಂದು ಒಪ್ಪಿಕೊಳ್ಳಲು ಏಕೆ ಹಿಂಜರಿಯುತ್ತಾರೆ! ಪಾಶ್ಚಿಮಾತ್ಯ ಭಾಷಾಶಾಸ್ತ್ರಜ್ಞರು ಸಂಸ್ಕೃತವು ಇಂಡೋ-ಯುರೋಪಿಯನ್ ಭಾಷಾ ಕುಟುಂಬದ ಅಡಿಯಲ್ಲಿ ಬರುತ್ತದೆ ಎಂದು ಊಹಿಸುತ್ತಾರೆ. ಇದು ಅತ್ಯಂತ ಆಧಾರರಹಿತ ಕಲ್ಪನೆಯಾಗಿದೆ, ಏಕೆಂದರೆ ಯಾವಾಗ ವಿಶ್ವದ ಅತ್ಯಂತ ಹಳೆಯ ಸಾಹಿತ್ಯವು ಋಗ್ವೇದವಾಗಿದೆ, ಆಗ ಅತ್ಯಂತ ಹಳೆಯ ಭಾಷೆಯೂ ಸಂಸ್ಕೃತವೇ ಆಗಬೇಕು.
ಏಕೆಂದರೆ ಋಗ್ವೇದದ ಭಾಷೆ ಸಂಸ್ಕೃತ. ಈ ತರ್ಕದಿಂದ ನಾವು ನಿಸ್ಸಂದೇಹವಾಗಿ ಸಂಸ್ಕೃತವು ಪ್ರಪಂಚದ ಎಲ್ಲಾ ಭಾಷೆಗಳಿಗಿಂತಲೂ ಪ್ರಾಚೀನ, ಅನೇಕ ಭಾಷೆಗಳ ತಾಯಿ ಎಂದು ಹೇಳಬಹುದು. ಸಂಸ್ಕೃತವನ್ನು ಹಲವಾರು ವಿದೇಶಿ ಭಾಷೆಗಳ ಪದಗಳೊಂದಿಗೆ ಹೋಲಿಸುವ ಮೂಲಕ ಇದನ್ನು ದೃಢೀಕರಿಸಬಹುದು. ನಮ್ಮ ಪ್ರಾಚೀನ ಸಂಪ್ರದಾಯದ ಪ್ರಕಾರ, ಸಂಸ್ಕೃತ ಎಂದಿಗೂ ಹುಟ್ಟಿಲ್ಲ ಎಂದು ನಂಬಲಾಗಿದೆ, ಅಂದರೆ ಅದು ಶಾಶ್ವತವಾಗಿದೆ. ಇದು ಭಾರತದ ಪ್ರತಿಷ್ಠೆ. ಆದ್ದರಿಂದಲೇ ‘ಭಾರತಸ್ಯ ಪ್ರತಿಷ್ಠೇ ದ್ವೇ ಸಂಸ್ಕೃತ ಸಂಸ್ಕೃತಿಸ್ತಥಾʼಎಂಬಂತೆ ಭಾರತೀಯ ಸಂಸ್ಕೃತಿಗೂ ಸಹ ಇದು ಮೂಲನೆಲೆ.
ಇಂತಹ ಶ್ರೇಷ್ಠ ಭಾಷೆಯ ಪ್ರಸಾರ, ಪ್ರಚಾರ ಮತ್ತು ಪುನರುಜ್ಜೀವನದ ದೃಷ್ಟಿಯಿಂದ ಭಾರತ ಸರ್ಕಾರವು ಸಂಸ್ಕೃತ ದಿನದ ಆಚರಣೆಗೆ (World Sanskrit Day 2022) ನಿರ್ಧರಿಸಿತು. 1969 ರಲ್ಲಿ ಭಾರತ ಸರ್ಕಾರದ ಶಿಕ್ಷಣ ಸಚಿವಾಲಯದ ಆದೇಶದ ಮೇರೆಗೆ ಸಂಸ್ಕೃತ ದಿನವನ್ನು ಕೇಂದ್ರ ಮತ್ತು ರಾಜ್ಯ ಮಟ್ಟದಲ್ಲಿ ಆಚರಿಸಲು ಸೂಚನೆಗಳನ್ನು ನೀಡಲಾಯಿತು. ಅಂದಿನಿಂದ ಭಾರತದಾದ್ಯಂತ ಶ್ರಾವಣ ಪೂರ್ಣಿಮಾ ದಿನದಂದು ಸಂಸ್ಕೃತ ದಿನವನ್ನು ಆಚರಿಸಲಾಗುತ್ತದೆ.
ಶ್ರಾವಣ ಪೂರ್ಣಿಮೆಯಂದೇ ದಿನಾಚರಣೆ ಏಕೆ?
ಶ್ರಾವಣ ಪೂರ್ಣಿಮಾ ದಿನದಂದೇ ಸಂಸ್ಕೃತ ದಿನವನ್ನಾಗಿ ಏಕೆ ಆಚರಿಸಲಾಗುತ್ತದೆ? ಪ್ರಾಚೀನ ಭಾರತದಲ್ಲಿ ಬೋಧನಾ ಅಧಿವೇಶನವು ಈ ದಿನ ಆರಂಭವಾದ ಕಾರಣ ಈ ದಿನವನ್ನು ಆಯ್ಕೆ ಮಾಡಲಾಗಿದೆ. ಪ್ರಾಚೀನ ಕಾಲದಲ್ಲಿ ಅಧ್ಯಯನವನ್ನು ತಪಸ್ಸಿನಂತೆ ಮಾಡುತ್ತಿದ್ದರು, ಅಧ್ಯಯನವೂ ಒಂದು ಯಜ್ಞವಾಗಿತ್ತು. ಇದನ್ನು ಬ್ರಹ್ಮಯಜ್ಞ ಎಂದು, ಋಷಿಋಣ ವಿಮೋಚಕವೆಂದು ಕರೆದಿದ್ದಾರೆ.
‘ಸ್ವಾಧ್ಯಾಯಪ್ರವಚನಾಭ್ಯಾಂ ನ ಪ್ರಮದಿತವ್ಯಂ’ಎಂದು ತೈತ್ತರೀಯದಲ್ಲಿ ಅಧ್ಯಯನ ಮತ್ತು ಬೋಧನೆಯನ್ನು ನಿರಂತರವಾಗಿ ನಡೆಸಬೇಕು, ಯಾವಾಗಲೂ ಬಿಡಬಾರದು ಎಂದು ತಿಳಿಸಿದ್ದಾರೆ. ಆದ್ದರಿಂದಲೇ ಅಧ್ಯಯನ ಸತ್ರವೆಂದು ಕರೆಯುತ್ತಿದ್ದರು. ಇಂದಿನ ಶೈಕ್ಷಣಿಕ ವರ್ಷವಿದ್ದಂತೆ. ಅದು ಈ ಶ್ರಾವಣ ಪೂರ್ಣಿಮೆಯ ದಿನ ಆರಂಭವಾಗುತ್ತಿತ್ತು. ಅದು ಪುಷ್ಯಮಾಸದ ಅಷ್ಟಮೀ ಅಥವಾ ಪೂರ್ಣಿಮೆಯವರೆಗೆ ನಾಲ್ಕೂವರೆ, ಆರು ತಿಂಗಳವರೆಗೆ ನಡೆಯುತ್ತಿತ್ತು.
ಪೌಷಮಾಸಸ್ಯ ರೋಹಿಣ್ಯಾಮಷ್ಟಕಾಯಾಮಥಾಪಿ ವಾ|
ಜಲಾಂತೇ ಛಂದಸಾಂ ಕುರ್ಯಾದುತ್ಸರ್ಗಂ ವ್ವಿಧಿವದ್ಬಹಿಃ||
ಎಂಬಂತೆ ನಂತರ ಪುಷ್ಯಮಾಸದಲ್ಲಿ ಉತ್ಸರ್ಜನವನ್ನು ಮಾಡುತ್ತಿದ್ದರು. ಅಂದರೆ ವೇದಾಧ್ಯಯನದ ತಾತ್ಕಾಲಿಕ ವಿರಾಮ. ಉಳಿದ ಆರು ತಿಂಗಳು ಪಠನ-ಪಾಠನವಿಲ್ಲ ಎಂದಲ್ಲ. ಆ ಅವಧಿಯಲ್ಲಿ ವೇದಾರ್ಥದ ಚಿಂತನೆ ನಡೆಯುತ್ತಿತ್ತು. ಪುನಃ ಶ್ರಾವಣ ಪೂರ್ಣಿಮೆಯಂದು ಮತ್ತೆ ವೇದಗಳ ಅಧ್ಯಯನ ಪ್ರಾರಂಭವಾಗುತ್ತಿತ್ತು. ಇದು ಉತ್ಸರ್ಜನ-ಉಪಾಕರ್ಮ. ಆದ್ದರಿಂದ ಶ್ರಾವಣ ಪೂರ್ಣಿಮೆಯು ಅಧ್ಯಯನದ ಆರಂಭದ ದಿನ, ಅಧೀತ ವೇದಗಳ ಪುನಃ ಉಪಾಕರಣ ಮಾಡುವ ದಿನ. ಅದಕ್ಕಾಗಿಯೇ ಈ ದಿನವನ್ನು ಸಂಸ್ಕೃತ ದಿನವನ್ನಾಗಿ ಆಚರಿಸಲಾಗುತ್ತದೆ.
ಶ್ರಾವಣಿ ಪೂರ್ಣಿಮಾ ಅಂದರೆ ರಕ್ಷಾ ಬಂಧನ, ಋಷಿಗಳ ಸ್ಮರಣೆ ಮತ್ತು ಪೂಜೆ ಹಾಗೂ ಸಮರ್ಪಣೆಯ ಹಬ್ಬ. ವೈದಿಕ ಸಾಹಿತ್ಯದಲ್ಲಿ ಇದನ್ನು ಶ್ರಾವಣಿ ಎಂದು ಕರೆಯಲಾಗಿದೆ. ಅಧ್ಯಯನದ ಆರಂಭಕ್ಕೂ ಮೊದಲು ಅಧ್ಯಯನದ ದೃಢತೆಗಾಗಿ ಉತ್ಸರ್ಜನ-ಉಪಾಕರ್ಮವನ್ನು ಆಚರಿಸಬೇಕು. ಏಕೆಂದರೆ
ಉತ್ಸರ್ಜನಂ ಚ ವೇದಾನಾಮುಪಾಕರಣ ಕರ್ಮ ಚ|
ಅಕೃತ್ವಾ ವೇದಜಪ್ಯೇನ ಫಲಂ ನಾಪ್ನೋತಿ ಮಾನವಃ||
ಎಂಬಂತೆ ಅಧ್ಯಯನದ ಫಲ ಸಿದ್ಧಿಸುವುದಿಲ್ಲ. ಆದ್ದರಿಂದಲೇ “ಮಮ ಅಧೀತಾನಾಂ ಛಂದಸಾಂ ಸುವೀರ್ಯತ್ವಾಯ, ಅಧ್ಯೇಷ್ಯಮಾಣಾನಾಂ ಛಂದಸಾಂ ಯಾತಯಾಮತಾನಿರಸನದ್ವಾರಾ ಆಪ್ಯಾಯನಾರ್ಥಂʼʼ ಎಂದು ಸಂಕಲ್ಪಿಸಿ ಉಪಾಕರಣವನ್ನು ಮಾಡಿ, ನೂತನ ಯಜ್ಞೋಪವೀತವನ್ನು ಧರಿಸಲಾಗುತ್ತದೆ. ಇದನ್ನು ಉಪಾಕರ್ಮ ಸಂಸ್ಕಾರ ಎಂದು ಕರೆಯಲಾಗುತ್ತದೆ. ಆದ್ದರಿಂದ ಈ ದಿನ ಬ್ರಹ್ಮಯಜ್ಞದ ಸಂಕಲ್ಪದ ಸಿದ್ಧಿಯ ದಿನ. ಇದು ರಕ್ಷಾಬಂಧನದ ಪರ್ವಕಾಲವೂ ಹೌದು. ಇದಕ್ಕೆ ಅನೇಕ ಹಿನ್ನೆಲೆಯಿದೆ. ಹೇಮಾದ್ರಿಯಲ್ಲಿ
ತತೋಪರಾಹ್ಣಸಮಯೇ ರಕ್ಷಾಪೋಟಲಿಕಾಂ ಶುಭಾಂ|
ಕಾರಂಯೇದಕ್ಷತೈಃ ಶಸ್ತೈಃ ಸಿದ್ಧಾರ್ಥೈರ್ಹೇಮಭೂಷಿತೈಃ|| ಎಂದು ಇದರ ವಿಧಿಯನ್ನು ತಿಳಿಸಿದೆ.
ಋಷಿಗಳ ಋಣವನ್ನು ತೀರಿಸುವ ದಿನ
ಋಷಿಗಳೇ ಸಂಸ್ಕೃತ ಸಾಹಿತ್ಯದ ಮೂಲಸ್ರೋತ. ಆದ್ದರಿಂದ ಶ್ರಾವಣಿ ಪೂರ್ಣಿಮಾವನ್ನು ಋಷಿಪರ್ವ ಮತ್ತು ಸಂಸ್ಕೃತ ದಿನವಾಗಿ ಆಚರಿಸಲಾಗುತ್ತದೆ. ಈ ದಿನವು ಆ ಋಷಿಗಳ ಋಣಗಳನ್ನು ತೀರಿಸುವ ದಿನವಾಗಿದೆ, ಅವರು ನಮಗೆ ವೇದಗಳೆಂಬ ಜ್ಞಾನದ ಭಂಡಾರವನ್ನು ನೀಡಿದರು. ಋಷಿಯು ಕೇವಲ ವೇದ ಮಂತ್ರಗಳ ದ್ರಷ್ಟಾರ, ಸೃಷ್ಟಿಕರ್ತನಲ್ಲ ಎಂಬುದು ನಮ್ಮ ನಂಬಿಕೆ. ‘ಜಾಯಮಾನೋ ವೈ ತ್ರಿಭೀ ಋಣವಾನ್ ಜಾಯತೇ’ ಎಂಬಂತೆ ಪ್ರತಿಯೊಬ್ಬ ಮನುಷ್ಯನು ತನ್ನ ಜೀವನದಲ್ಲಿ ಮೂರು ಸಾಲಗಳನ್ನು ತೀರಿಸಬೇಕು ದೇವಋಣ, ಋಷಿಋಣ, ಪಿತೃಋಣ.
ದೇವನ ಋಣವನ್ನು ಯಜ್ಞದಿಂದ, ಋಷಿಯ ಋಣವನ್ನು ಅಧ್ಯಯನದಿಂದ, ಪಿತೃ ಋಣವನ್ನು ತರ್ಪಣ ಮತ್ತು ಶ್ರದ್ಧೆಯ ಮೂಲಕ ತೀರಿಸಬೇಕು. ಆದ್ದರಿಂದ ‘ಉಪಾಕರ್ಮಣಿ ಚ ಕರ್ತವ್ಯಂ ಋಷೀಣಾಂ ಚೈವ ಪೂಜನಂ’ ಎಂದು ಇಂದು ಋಷಿಪೂಜೆ ಮತ್ತು ತರ್ಪಣವನ್ನು ಮಾಡಬೇಕೆಂದು ಶಾಸ್ತ್ರವು ವಿಧಾನ ಮಾಡಿದೆ. ಈ ದಿನ, ನಾವು ಸಂಸ್ಕೃತ ಮತ್ತು ಸಂಸ್ಕೃತಿಯನ್ನು ಖಂಡಿತವಾಗಿ ಅಧ್ಯಯನ ಮಾಡುತ್ತೇವೆ ಮತ್ತು ರಕ್ಷಿಸುತ್ತೇವೆ ಎಂದು ಪ್ರತಿಜ್ಞೆ ತೆಗೆದುಕೊಳ್ಳಬೇಕು, ತನ್ಮೂಲಕ ಋಷಿಋಣವನ್ನು ತೀರಿಸಲು ಬದ್ಧರಾಗಬೇಕು. ಈ ಎಲ್ಲಾ ಹಿನ್ನೆಲೆಯಲ್ಲಿ ಶ್ರಾವಣ ಪೂರ್ಣಿಮೆಯನ್ನು ಸಂಸ್ಕೃತ ದಿನವಾಗಿ ಘೋಷಿಸಲಾಗಿದೆ.
ದಿನಾಚರಣೆಯಂದು ಹಲವು ಕಾರ್ಯಕ್ರಮ
ಈ ಸಂಸ್ಕೃತ ದಿನದ ಸಂದರ್ಭದಲ್ಲಿ ರಾಜ್ಯ ಮತ್ತು ಜಿಲ್ಲಾ ಮಟ್ಟದಲ್ಲಿ ಸಂಸ್ಕೃತ ದಿನಗಳನ್ನು ಆಯೋಜಿಸಲಾಗುತ್ತದೆ, ಸಂಸ್ಕೃತ ಕವಿ ಸಮ್ಮೇಳನ, ಬರಹಗಾರರ ಗೋಷ್ಠಿ, ವಿದ್ಯಾರ್ಥಿಗಳ ಭಾಷಣ ಮತ್ತು ಪದ್ಯ ಪಠಣ ಸ್ಪರ್ಧೆ ಇತ್ಯಾದಿಗಳನ್ನು ಆಯೋಜಿಸಲಾಗುತ್ತದೆ. ಇದರ ಮೂಲಕ ಸಂಸ್ಕೃತ ವಿದ್ಯಾರ್ಥಿಗಳು, ಕವಿಗಳು ಮತ್ತು ಬರಹಗಾರರು ಸರಿಯಾದ ವೇದಿಕೆಯನ್ನು ಪಡೆಯುತ್ತಾರೆ.
ಇತ್ತೀಚಿನ ದಿನಗಳಲ್ಲಿ ಸಂಸ್ಕೃತ ಉತ್ಸವವನ್ನು ದೇಶ ಮಾತ್ರವಲ್ಲದೆ ವಿದೇಶಗಳಲ್ಲೂ ಬಹಳ ಸಂಭ್ರಮದಿಂದ ಆಚರಿಸಲಾಗುತ್ತದೆ. ಕೇಂದ್ರ ಮತ್ತು ರಾಜ್ಯ ಸರ್ಕಾರಗಳ ಕೊಡುಗೆಯೂ ಇದರಲ್ಲಿ ಗಮನಾರ್ಹವಾಗಿದೆ.
ಸಂಸ್ಕೃತ ದಿನ ಬರುವ ವಾರವನ್ನು ಸಂಸ್ಕೃತ ವಾರವಾಗಿ ಆಚರಿಸಲಾಗುತ್ತದೆ. ಇದನ್ನು ಸಿಬಿಎಸ್‌ಇ ಶಾಲೆಗಳು ಮತ್ತು ದೇಶದ ಎಲ್ಲಾ ಶಾಲೆಗಳಲ್ಲಿ ವಿಜೃಂಭಣೆಯಿಂದ ಆಚರಿಸಲಾಗುತ್ತದೆ. ಉತ್ತರಾಖಂಡದಲ್ಲಿ ಸಂಸ್ಕೃತವನ್ನು ಅಧಿಕೃತ ಭಾಷೆಯಾಗಿ ಘೋಷಿಸಿದ ಕಾರಣ, ಸಂಸ್ಕೃತ ವಾರದಲ್ಲಿ ಪ್ರತಿದಿನ ಸಂಸ್ಕೃತ ಭಾಷೆಯಲ್ಲಿ ವಿವಿಧ ಕಾರ್ಯಕ್ರಮಗಳು ಮತ್ತು ಸ್ಪರ್ಧೆಗಳನ್ನು ನಡೆಸಲಾಗುತ್ತದೆ. ಸಂಸ್ಕೃತ ದಿನ ಮತ್ತು ಸಂಸ್ಕೃತ ವಾರವನ್ನು ಆಚರಿಸುವ ಮೂಲ ಉದ್ದೇಶವೆಂದರೆ ಸಂಸ್ಕೃತ ಭಾಷೆಯ ಕಂಪನ್ನು ಎಲ್ಲೆಡೆ ಹರಡುವುದು.
ಆಡು ಮಾತಿನ ಭಾಷೆಯಾಗಲಿ
ಇಂದು ಈ ಭಾಷೆ ಜನರ ಮಾತನಾಡುವ ಭಾಷೆಯಾಗಿಲ್ಲ, ಆದರೂ ಇಡೀ ಸಾರ್ವಜನಿಕ ಸಂಸ್ಕೃತದಲ್ಲಿ ಮಾತ್ರ ವರ್ತಿಸುವ ಯುಗವಿತ್ತು. ಇದಕ್ಕೆ ಹಲವು ಪುರಾವೆಗಳು ಲಭ್ಯವಿವೆ. ಮಹಾಭಾಷ್ಯದಲ್ಲಿ ಪತಂಜಲಿ ಇಂತಹ ಅನೇಕ ಪ್ರಸಂಗಗಳನ್ನು ಉಲ್ಲೇಖಿಸುತ್ತಾನೆ, ಇದು ಆ ದಿನಗಳಲ್ಲಿ ಸಂಸ್ಕೃತವು ಮಾತನಾಡುವ ಭಾಷೆಯೆಂದು ಸಾಬೀತುಪಡಿಸುತ್ತದೆ.
ಸಂಸ್ಕೃತವನ್ನು ಮತ್ತೊಮ್ಮೆ ಆಡುಮಾತಿನ ಭಾಷೆಯನ್ನಾಗಿಸುವ ಮತ್ತು ಸಂಸ್ಕೃತದಲ್ಲಿರುವ ಜ್ಞಾನ ಸಂಪತ್ತನ್ನು ಹೊರತರುವ ಪ್ರಯತ್ನದಲ್ಲಿ, ಸರ್ಕಾರದ ಜವಾಬ್ದಾರಿ ನಮ್ಮಿಂದ ನಿರೀಕ್ಷಿಸುವುದಕ್ಕಿಂತ ಹೆಚ್ಚಾಗಿದೆ. ಸರ್ಕಾರವು ತನ್ನ ಮಟ್ಟದಲ್ಲಿ ಜನರ ಸಹಕಾರವಿಲ್ಲದೆ ಯಾವುದೇ ಕೆಲಸವನ್ನು ಮಾಡಲು ಸಾಧ್ಯವಿಲ್ಲ. ಯಾವಾಗ ಜನರು ಸರ್ಕಾರಕ್ಕೆ ಕೈ ಜೋಡಿಸುತ್ತಾರೆ, ಆಗ ಆ ಪ್ರಯತ್ನಗಳಿಗೆ ಶಕ್ತಿ ಸಿಗುತ್ತದೆ. ಈ ದಿಕ್ಕಿನಲ್ಲಿ ನಾವು ಏನು ಮಾಡಬಹುದು, ನಾವು ಅದರ ಬಗ್ಗೆ ಯೋಚಿಸಲು ಪ್ರಾರಂಭಿಸಿದಾಗ, ಖಂಡಿತವಾಗಿಯೂ ಮುಂದಿನ ದಿನಗಳಲ್ಲಿ ಸಂಸ್ಕೃತವು ಆಡು ಭಾಷೆಯಾಗಿಯೂ ಬೆಳೆಯಬಹುದು, ಬೆಳಗಬಹುದು.
ಈ ದಿಸೆಯಲ್ಲಿ ಭಾರತದ ಪ್ರತಿಷ್ಠೆಯಾದ ಸಂಸ್ಕೃತ ಭಾಷೆಯನ್ನು ಜಗತ್ತಿನಾದ್ಯಂತ ಪಸರಿಸಲು, ತನ್ಮೂಲಕ ಭಾರತವನ್ನು ವಿಶ್ವಗುರುವಾಗಿಸಲು ಈ ಶ್ರಾವಣ ಪೂರ್ಣಿಮೆಯ ಶುಭಸಂದರ್ಭದಲ್ಲಿ ಸಂಸ್ಕೃತದಿನದ ನಿಮಿತ್ತವಾಗಿ ಎಲ್ಲರೂ ದೃಢಸಂಕಲ್ಪವನ್ನು ಮಾಡಬೇಕು. ಇದು ಕೇವಲ ಒಂದು ದಿನ, ವಾರ ಅಥವಾ ತಿಂಗಳಿಗೆ ಸೀಮಿತವಾಗದೇ ನಿರಂತರವಾಗಿ ಎಲ್ಲರೂ ಸಂಸ್ಕೃತ ಸೇನಾನಿಗಳಾದರೆ ಸಂಸ್ಕೃತ ದೇಶವನ್ನು, ಜಗತ್ತನ್ನೇ ಬೆಳಗುತ್ತದೆ. ಆಗ ನಿಜವಾಗಿಯೂ ನಮ್ಮ ದೇಶ ಭಾರತವಾಗುತ್ತದೆ.
ಇದನ್ನೂ ಓದಿ| ಸಂಸ್ಕೃತ, ಕೊಂಕಣಿಯೂ ಆಗಲಿದೆ Google ಅನುವಾದ