ಆಸ್ಕರ್‌ ಪ್ರಶಸ್ತಿ ಪ್ರಧಾನ ಸಮಾರಂಭದಲ್ಲಿ ತನ್ನ ಪತ್ನಿಯ ಕೇಶ ವಿನ್ಯಾಸದ ಬಗ್ಗೆ ತಮಾಷೆ ಮಾಡಿದ್ದಕ್ಕೆ ಹಾಲಿವುಡ್‌ ನಟ ವಿಲ್‌ ಸ್ಮಿತ್ ನಿರೂಪಕನಿಗೆ ಕಪಾಳಮೋಕ್ಷ ಮಾಡಿದ ವಿಡಿಯೋ ಇದೀಗ ಸಾಮಾಜಿಕ ಜಾಲತಾಣದಲ್ಲಿ ಸಖತ್ ವೈರಲ್‌ ಆಗುತ್ತಿದೆ.
ಹಾಲಿವುಡ್‌ ಹಾಸ್ಯನಟ ಹಾಗೂ ನಿರೂಪಕ ಕ್ರಿಸ್‌ ರಾಕ್‌ ಆಸ್ಕರ್‌ ಪ್ರಶಸ್ತಿ ಸಮಾರಂಭದ ವೇದಿಕೆಯಲ್ಲಿ ನಟ ವಿಲ್‌ ಸ್ಮಿತ್ ಅವರ ಪತ್ನಿ ಹಾಗೂ ನಟಿ ಜಾಡ ಪಿಂಕೆಟ್ ಸ್ಮಿತ್ ಹೇರ್‌ ಸ್ಟೈಲ್‌ ಅನ್ನು ʻಜಿ.ಐ.ಜೇನ್ʼ ಚಿತ್ರದಲ್ಲಿ ಬರುವ ಪಾತ್ರಕ್ಕೆ ಹೋಲಿಸಿ ತಮಾಷೆ ಮಾಡಿದ್ದರು. ಅಲ್ಲಿಯವರೆಗೆ ನಗುತ್ತಾ ಕುಳಿತಿದ್ದ ನಟ ವಿಲ್‌ ಸ್ಮಿತ್ ನೇರವಾಗಿ ಸ್ಟೇಜ್‌ ಮೇಲೆ ಬಂದು ನಿರೂಪಕ ಕ್ರಿಸ್‌ ರಾಕ್‌ಗೆ ಏಕಾಏಕಿ ಅವಾಚ್ಯ ಶಬ್ದಗಳಿಂದ ನಿಂದಿಸಿ ಕಪಾಳಮೋಕ್ಷ ಮಾಡಿದ್ದಾರೆ.
ಅನಾರೋಗ್ಯದ ಹಿನ್ನೆಲೆಯಲ್ಲಿ ನಟ ವಿಲ್‌ ಸ್ಮಿತ್ ಪತ್ನಿ ಹಾಗೂ ನಟಿ ಜಾಡಾ ಪಿಂಕೆಟ್ ಸ್ಮಿತ್ ಕೇಶಮುಂಡನ ಮಾಡಿಸಿಕೊಂಡಿದ್ದಾರೆ.
ಘಟನೆ ಬಳಿಕ ಮಾತನಾಡಿದ ನಟ ವಿಲ್‌ ಸ್ಮಿತ್ ತಮ್ಮ ಪತ್ನಿಯ ಅನಾರೋಗ್ಯದ ಪರಿಸ್ಥಿತಿಯನ್ನು ನೆನೆದು ಭಾವುಕರಾದರು. ಹಾಗೂ ಸಹನೆ ಮೀರಿ ವರ್ತಿಸಿದಕ್ಕೆ ಕ್ರಿಸ್‌ ರಾಕ್‌ ಬಳಿ ಕ್ಷಮೆಯಾಚಿಸಿದರು. ನಟಿ ಜಾಡಾ ಪಿಂಕೆಟ್ ಸ್ಮಿತ್ ಹೇರ್‌ ಸ್ಟೈಲ್‌ ಬಗ್ಗೆ ತಮಾಷೆ ಮಾಡಿದಕ್ಕೆ ನಿರೂಪಕ ಕ್ರಿಸ್‌ ರಾಕ್‌ ಕೂಡ ಕ್ಷಮೆ ಕೇಳಿದರು.