ಲಾಸ್ ಏಂಜಲೀಸ್: ಖ್ಯಾತ ಪಾಪ್ ತಾರೆ ಬ್ರಿಟ್ನಿ ಸ್ಪಿಯರ್ಸ್ ಮತ್ತು ಸ್ಯಾಮ್ ಅಸ್ಘಾರಿ ಅವರ ಮದುವೆ ಕಳೆದ ಗುರುವಾರ (ಜೂ. 9) ಲಾಸ್ ಏಂಜಲೀಸ್‌ನಲ್ಲಿ ನಡೆಯಿತು. ಈ ವೇಳೆ, ಬ್ರಿಟ್ನಿ ಸ್ಪಿಯರ್ಸ್ ಮಾಜಿ ಗಂಡ ಜೇಸನ್‌ ಅಲೆಕ್ಸಾಂಡರ್‌ ಬಂದು ʻನಿಲ್ಲಿಸಿʼ ಎನ್ನುವ ಮಾದರಿಯಲ್ಲಿ ಕಿರಿಕಿರಿ ಮಾಡಿದ್ದ ಎಂದು ಅಮೆರಿಕದ ಮಾಧ್ಯಮಗಳು ವರದಿ ಮಾಡಿವೆ.
ಕಳೆದ ಕೆಲವು ಸಮಯದಿಂದ ಸಂಗಾತಿಗಳಾಗಿದ್ದ ಈ ಪಾಪ್ ತಾರಾ ಜೋಡಿ ಈಗ ವೈವಾಹಿಕ ಬದುಕನ್ನು ಪ್ರವೇಶಿಸಿದ್ದಾರೆ. ಅದರ ಬೆರಗುಗೊಳಿಸುವ ಫೋಟೊಗಳನ್ನು ಇನ್‌ಸ್ಟಾ ಗ್ರಾಮ್‌ನಲ್ಲಿ ಹಂಚಿಕೊಂಡಿದ್ದಾರೆ.
“ನಾವು ಅಂದಕೊಂಡಂತೆ ನಾವು ಮದುವೆಯಾಗಿದ್ದೇವೆ. ಇವತ್ತು ಅತ್ಯಂತ ಅದ್ಭುತವಾದ ದಿನವಾಗಿತ್ತು. ನಾನು ಬೆಳಿಗ್ಗೆಯೆಲ್ಲಾ ತುಂಬಾ ನರ್ವಸ್ ಆಗಿದ್ದೆ, ಆದರೆ ಮಧ್ಯಾಹ್ನ 2:00 ಗಂಟೆಯ ಹೊತ್ತಿಗೆ ತುಂಬಾ ಖುಷಿಯಾಯಿತು, ಎಲ್ಲವೂ ನಾವು ಎಣಿಸಿಕೊಂಡ ಹಾಗೇ ಅಗಿದೆ ನಾವು ಮದುವೆಯಾಗುತ್ತಿದ್ದೇವೆ. ನಮ್ಮ ಮನೆಯನ್ನು ಅಕ್ಷರಶಃ ಕನಸಿನ ಕೋಟೆಯಾಗಿ ಸೃಷ್ಟಿಸಿದ ಎಲ್ಲ ಸಿಬ್ಬಂದಿಗೆ ಧನ್ಯವಾದಗಳು. ಸಮಾರಂಭ ಮತ್ತು ಪಾರ್ಟಿ ಕನಸೇ ನನಸಾದಂತೆ ಕಾಣುತಿತ್ತು” ಎಂದು ಬರೆದುಕೊಂಡಿದ್ದಾರೆ. 44 ಸೆಕೆಂಡುಗಳ ವಿಡಿಯೊ ಸಹ ಪೋಸ್ಟ್ ಮಾಡಿದ್ದಾರೆ,
ಕುತೂಹಲಕಾರಿ ಸಂಗತಿ ಎಂದರೆ, ಗುರುವಾರ ನಡೆದ ಬ್ರಿಟ್ನಿ ಸ್ಪಿಯರ್ಸ್ ಅವರ ಮೂರನೇ ಮದುವೆಗೆ ಎರಡನೇ ಗಂಡ ಜೇಸನ್‌ ಅಲೆಕ್ಸಾಂಡರ್‌ ಬಂದಿದ್ದ. ಅತ್ತ ಬ್ರಿಟ್ನಿ ಮತ್ತು ಸ್ಯಾಮ್ ಅಸ್ಘಾರಿ ಮದುವೆಗೆ ಸಿದ್ಧವಾಗುತ್ತಿದ್ದರೆ ಇತ್ತ ಸಮಾರಂಭದ ಜಾಗಕ್ಕೆ ಜೇಸನ್‌ ಬಂದಿದ್ದ. ಬಂದವನೇ ʻಬ್ರಿಟ್ನಿ ಎಲ್ಲಿʼ ಎಂದು ಕೇಳಿದ್ದಾನೆ. ಬಳಿಕ ಹೂವಿನಿಂದ ಅಲಂಕರಿಸಿದ ಪಿಂಕ್‌ ಟೆಂಟ್‌ ಒಂದಕ್ಕೆ ಹೋದ ಆತ, ʻಛೇ ಇದೆಂತ ಬುಲ್ಶೀಟ್‌ ಮದುವೆ,ʼ ಅಂತ ರಂಪಾಟ ಮಾಡಿದ್ದಾನೆ. ʻನನಗೆ ಬ್ರಿಟ್ನಿಯೇ ಮದುವೆಗೆ ಬರಲು ಹೇಳಿದ್ದಾಳೆʼ ಎಂದು ಆತ ಹೇಳಿಕೊಂಡಿದ್ದಾನೆ. ಆದರೆ, ಭದ್ರತಾ ಸಿಬ್ಬಂದಿ ಆತನನ್ನು ತಡೆದು ಪೊಲೀಸರಿಗೆ ಮಾಹಿತಿ ನೀಡಿದ್ದಾರೆ. ಪೊಲೀಸರು ಬಂದು ಆತನನ್ನು ಹಿಡಿದುಕೊಂಡು ಹೋಗಿದ್ದಾರೆ. ಕೊನೆಗೆ ನೋಡಿದರೆ ಆತನ ವಿರುದ್ಧ ಇನ್ನೊಂದು ಫೋಲೀಸ್‌ ಠಾಣೆಯಲ್ಲಿ ಪ್ರಕರಣವೊಂದು ಬಾಕಿ ಇತ್ತು. ಅದಕ್ಕಾಗಿ ಆತನನ್ನು ಅಲ್ಲಿಗೆ ಹಸ್ತಾಂತರಿಸಲಾಗಿದೆ.
ಯಾರಿವನು ಜೇಸನ್‌ ಅಲೆಕ್ಸಾಂಡರ್‌?
ಬ್ರಿಟ್ನಿ ಸ್ಪಿಯರ್ಸ್ 24ನೇ ವಯಸ್ಸಿನಲ್ಲಿ ಕೆಲವು ತಿಂಗಳ ಮಟ್ಟಿಗೆ ಜೇಸನ್‌ ಅಲೆಕ್ಸಾಂಡರ್‌ನನ್ನು ಮದುವೆಯಾಗಿದ್ದರು. ಬಳಿಕ 2004ರಿಂದ 2007ರವರೆಗೆ ಕೆವಿನ್‌ ಫೆಡರ್ಲಿನ್‌ಗೆ ಪತ್ನಿಯಾಗಿದ್ದರು. ಮುಂದಿನ ಒಂಬತ್ತು ವರ್ಷ ಬ್ರಿಟ್ನಿ ಸ್ಪಿಯರ್ಸ್ ಒಂಟಿಯಾಗಿಯೇ ಇದ್ದರು. ಗುರುವಾರ ಮದುವೆಯಾದ ಸ್ಯಾಮ್ ಅಸ್ಘಾರಿ ಮೂರನೇ ಗಂಡ. ಆರು ವರ್ಷಗಳ ಡೇಟಿಂಗ್‌ ಬಳಿಕ ಅವರಿಬ್ಬರೂ ಒಂದಾಗಿದ್ದಾರೆ.
ಈ ನಡುವೆ ಕೆಲವು ತಿಂಗಳ ಹಿಂದೆ ಬ್ರಿಟ್ನಿ ತಾನು ಗರ್ಭಿಣಿ ಎಂದು ಘೋಷಿಸಿಕೊಂಡಿದ್ದರು. ಆದರೆ, ಕೆಲವು ವಾರಗಳ ಹಿಂದೆ ತಾನು ಗರ್ಭಪಾತ ಮಾಡಿಕೊಂಡಿದ್ದೇನೆ ಎಂದು ಸಾರಿದರು. ಇದಾಗಿ ಕೆಲವೇ ದಿನಗಳಲ್ಲಿ ಮದುವೆ ಅಂತ ಘೋಷಣೆ. ನಿಜವೆಂದರೆ ಬ್ರಿಟ್ನಿ-ಅಸ್ಘಾರ್‌ ಮದುವೆ ಈ ಕಾರ್ಯಕ್ರಮ ನಡೆಯುವ ಒಂದು ಗಂಟೆ ಮೊದಲಷ್ಟೇ ಹೊರ ಜಗತ್ತಿಗೆ ಗೊತ್ತಾಯಿತಂತೆ!
ಇದನ್ನೂ ಓದಿ:ತನ್ನನ್ನೇ ತಾನು ಮದುವೆ ಆಗಲಿರುವ ಯುವತಿ; ಹನಿಮೂನ್‌ಗೆ ಒಬ್ಬಳೇ ಗೋವಾಕ್ಕೆ ಹೋಗೋ ಪ್ಲ್ಯಾನ್‌ !