ವಾಷಿಂಗ್ಟನ್: ಅಮೆರಿಕದ ಆಕಾಶದಲ್ಲಿ ಅನುಮಾನಾಸ್ಪದವಾಗಿ ಹಾರಾಡುತ್ತಿದ್ದ ಚೀನಾ ಮೂಲದ ಬಲೂನನ್ನು ನಾಶಪಡಿಸಲಾಗಿದೆ. ಚೀನಾ ಅಮೆರಿಕ ವಿರುದ್ಧ ಪತ್ತೆದಾರಿಕೆ ನಡೆಸಲು (Chinese balloon) ಈ ಬಲೂನನ್ನು ಬಿಟ್ಟಿತ್ತು ಎನ್ನಲಾಗಿದೆ. ಅಮೆರಿಕ ಮತ್ತು ಚೀನಾ ನಡುವಣ ಸಂಬಂಧ ದಿನೇದಿನೆ ಬಿಗಡಾಯಿಸುತ್ತಿರುವ ಸಂದರ್ಭದಲ್ಲಿ ಈ ಬೆಳವಣಿಗೆ ನಡೆದಿದೆ. ಪೆಂಟಗನ್ ಈ ಬಗ್ಗೆ ತಕ್ಷಣಕ್ಕೆ ಪ್ರತಿಕ್ರಿಯಿಸಿಲ್ಲ.
ಅಮೆರಿಕದ ಮೊಂಟಾನಾದಲ್ಲಿರುವ ಮಾಲ್ಮ್ಸ್ಟ್ರೋಮ್ ಏರ್ಫೋರ್ಸ್ನಲ್ಲಿರುವ ಅಣ್ವಸ್ತ್ರ ಕ್ಷಿಪಣಿ ಉಡಾವಣಾ ನೆಲೆಯ ಮೇಲ್ಭಾಗದಲ್ಲಿ ಚೀನಾದ ಪತ್ತೆದಾರಿ ಬಲೂನ್ವೊಂದು ಹಾರಾಡುತ್ತಿರುವ ಬಗ್ಗೆ ಅಮೆರಿಕದ ರಕ್ಷಣಾ ವಿಭಾಗ ಪೆಂಟಗನ್ ಫೆ.2ರಂದು ಹೇಳಿತ್ತು. ಅದರ ಬೆನ್ನಲ್ಲೇ ಈಗ ಲ್ಯಾಟಿನ್ ಅಮೆರಿಕ ಪ್ರಾಂತ್ಯದ ಆಕಾಶದಲ್ಲೂ ಚೀನಾದ ಪತ್ತೇದಾರಿ ಬಲೂನ್ ಹಾರಾಡುತ್ತಿರುವುದು ವರದಿಯಾಗಿತ್ತು.
ಅಮೆರಿಕದ ದಕ್ಷಿಣ ಕರಾವಳಿಯಲ್ಲಿ ಬಲೂನನ್ನು ಸ್ಫೋಟಿಸಲಾಗಿದೆ ಎಂದು ರಾಯ್ಟರ್ಸ್‌ ವರದಿ ಮಾಡಿದೆ. ದಕ್ಷಿಣ ಕರಾವಳಿಯಲ್ಲಿ ತಾತ್ಕಾಲಿಕವಾಗಿ ವೈಮಾನಿಕ ಹಾರಾಟವನ್ನು ನಿರ್ಬಂಧಿಸಲಾಗಿತ್ತು. ಅಮೆರಿಕ ಸೇನಾ ಪಡೆ ಜೆಟ್‌ ಮೂಲಕ ಬಲೂನನ್ನು ಹೊಡೆದುರುಳಿಸಿದೆ.