ವಾಷಿಂಗ್ಟನ್ : ವಿಶ್ವದ ಅತ್ಯಂತ ಬಲಿಷ್ಠ ಸೇನಾ ಒಕ್ಕೂಟವಾಗಿರುವ ನ್ಯಾಟೊ ಸದಸ್ಯತ್ವ ಪಡೆಯಲು ರಷ್ಯಾದೊಂದಿಗೆ ಗಡಿ ಹಂಚಿಕೊಂಡಿರುವ ಫಿನ್ಲೆಂಡ್ ಯಶಸ್ವಿಯಾಗಿದೆ. ಫಿನ್ಲೆಂಡ್ ನ್ಯಾಟೊ ಸದಸ್ಯತ್ವ ಪಡೆದ 31ನೇ ರಾಷ್ಟ್ರವಾಗಿದೆ. ಈ ಮೂಲಕ ಹಲವು ವರ್ಷಗಳ ಕಾಲ ಕಾಪಾಡಿಕೊಂಡಿದ್ದ ಅಲಿಪ್ತ ನೀತಿಗೆ ಅಂತ್ಯ ಹಾಡಿದ್ದು, ಇನ್ನು ಮುಂದೆ ಅಮೆರಿಕ ನೇತೃತ್ವದ ಮೈತ್ರಿ ಕೂಟದಲ್ಲಿ ಭಾಗಿಯಾಗಲಿದೆ. ಏತನ್ಮಧ್ಯೆ, ನ್ಯಾಟೊ ವಿಚಾರವಾಗಿ ಉಕ್ರೇನ್ ಮೇಲೆ ಯುದ್ಧ ಸಾರುತ್ತಿರುವ ನಡುವೆಯೇ ಫಿನ್ಲ್ಯಾಂಡ್ ನ್ಯಾಟೊ ಸೇರಿದ್ದು ರಷ್ಯಾ ಅಧ್ಯಕ್ಷ ಪುಟಿನ್ಗೆ ಹಿನ್ನಡೆ ಎನಿಸಿದೆ.
ಉಕ್ರೇನ್ ದೇಶ ನ್ಯಾಟೊ ಸದಸ್ಯತ್ವವನ್ನು ನಿರೀಕ್ಷಿಸಿದ ಕಾರಣಕ್ಕೆ ವ್ಲಾದಿಮಿರ್ ಪುಟಿನ್ ನೇತೃತ್ವದ ರಷ್ಯಾ ಉಕ್ರೇನ್ ಮೇಲೆ ಸೇನಾ ದಾಳಿ ನಡೆಸಿದ್ದು, ಸಮರಕ್ಕೆ ಒಂದು ವರ್ಷ ದಾಟಿದೆ. ಇದರ ನಡುವೆಯೇ ಫಿನ್ಲೆಂಡ್ ನ್ಯಾಟೊ ಸದಸ್ಯತ್ವ ಪಡೆದುಕೊಂಡಿದೆ. ಈ ಮೂಲಕ ರಷ್ಯಾ ದಾಳಿಯನ್ನು ಮೆಟ್ಟಿ ನಿಲ್ಲಲು ನ್ಯಾಟೊದ ಬೆಂಬಲ ಕೋರಿದೆ.
ಫಿನ್ಲ್ಯಾಂಡ್ ರಷ್ಯಾದ ಜತೆ 1340 ಕಿಲೋ ಮೀಟರ್ ಗಡಿಯನ್ನು ಹಂಚಿಕೊಂಡಿದೆ. ಅಲ್ಲದೆ, ನ್ಯಾಟೊ ಸದಸ್ಯತ್ವ ಕೋರಿದರೆ ಫಿನ್ಲ್ಯಾಂಡ್ ಮೇಲೆಯೂ ಉಕ್ರೇನ್ ಮಾದರಿ ದಾಳಿ ಮಾಡುತ್ತೇವೆ ಎಂದು ರಷ್ಯಾ ಹೇಳಿತ್ತು. ಈ ಭಯಕ್ಕೆ ಫಿನ್ಲ್ಯಾಂಡ್ ನ್ಯಾಟೊದ ನೆರವು ಕೋರಿತ್ತು. ನ್ಯಾಟೊ ನಿಯಮದ ಪ್ರಕಾರ ಸದಸ್ಯರಲ್ಲಿ ಒಬ್ಬರ ಮೇಲೆ ದಾಳಿಯಾದರೆ ಎಲ್ಲರ ಮೇಲೆ ದಾಳಿಯೆಂದು ಪರಿಗಣಿಸಿ ಪ್ರತಿ ದಾಳಿ ನಡೆಸುವುದು. ಹೀಗಾಗಿ ರಷ್ಯ ಏನಾದರೂ ಫಿನ್ಲ್ಯಾಂಡ್ ಮೇಲೆ ದಾಳಿ ಮಾಡಿದರೆ 31 ರಾಷ್ಟ್ರಗಳು ಪ್ರತಿದಾಳಿ ಮಾಡುವುದು ಖಾತರಿ.
ನ್ಯಾಟೊ ಒಕ್ಕೂಟದ ಬಲವೇನು?
ನಾರ್ತ್‌ ಅಟ್ಲಾಂಟಿಕ್‌ ಟ್ರೀಟಿ ಆರ್ಗನೈಸೇಷನ್ 1949ರಲ್ಲಿ ಅಸ್ತಿತ್ವಕ್ಕೆ ಬಂದಿತ್ತು. ಎರಡನೇ ಮಹಾಯುದ್ಧ ಮುಗಿದ ಬಳಿಕವೂ ಸೋವಿಯತ್‌ ಒಕ್ಕೂಟ ಪೂರ್ವ ಯುರೋಪ್‌ನಿಂದ ತನ್ನ ಸೇನಾಪಡೆಗಳನ್ನು ಹಿಂತೆಗೆದುಕೊಳ್ಳಲು ನಿರಾಕರಿಸಿತು. ಅಲ್ಲದೆ, 1948ರಲ್ಲಿ ಬರ್ಲಿನ್‌ ನಗರವನ್ನು ಸುತ್ತುವರಿದಿತ್ತು ಈ ವೇಳೆ ನ್ಯಾಟೋ ಮೂಲಕ ಸೋವಿಯತನ್‌ ಆಕ್ರಮಣ ಎದುರಿಸಲು ಅಮೆರಿಕ ಸಜ್ಜಾಯಿತು. ಆರಂಭದಲ್ಲಿ ಈ ಒಕ್ಕೂಟಕ್ಕೆ 12 ದೇಶಗಳು ಸೇರಿಕೊಂಡವು. ಬ್ರಿಟನ್‌, ಫ್ರಾನ್ಸ್‌, ಕೆನಡಾ, ಇಟಲಿ, ನೆದರ್ಲೆಂಡ್‌, ಐಸ್ಲೆಂಡ್‌, ಬೆಲ್ಜಿಯಂ, ಲಕ್ಸಂಬರ್ಗ್‌, ನಾರ್ವೆ, ಪೋರ್ಚುಗಲ್‌ ಮತ್ತು ಡೆನ್ಮಾರ್ಕ್‌ ಸದಸ್ಯತ್ವ ಪಡೆದುಕೊಂಡಿತು.
ಯುರೋಪ್‌ ರಾಷ್ಟ್ರಗಳಿಗೆ ರಷ್ಯಾದಿಂದ ಪದೇಪದೆ ಆತಂಕ ಎದುರಾಗುತ್ತದೆ. ನ್ಯಾಟೊ ಬಲ ಹೆಚ್ಚುತ್ತಿರುವಂತೆ ರಷ್ಯಾ ಕೂಡ ಆ ದೇಶಗಳನ್ನು ಎದುರು ಹಾಕಿಕೊಳ್ಳುವುದಿಲ್ಲ. ನ್ಯಾಟೊದ ಸೇನಾ ಹೆಚ್ಚಿರುವ ಕಾರಣ ರಷ್ಯಾ ದೊಡ್ಡ ಮಟ್ಟದ ಹಾನಿ ಎದುರಿಸಬೇಕಾಗುತ್ತದೆ.