ಹಿಜಾಬ್ ಬರೀ ಭಾರತದಲ್ಲಷ್ಟೇ ಅಲ್ಲ, ಇಡೀ ಜಗತ್ತಿನಾದ್ಯಂತ ಚರ್ಚೆಯಲ್ಲಿರುವ ವಿಷಯ. ಇದೀಗ ಇರಾನ್ ಅಧ್ಯಕ್ಷ ಇಬ್ರಾಹಿಂ ರೈಸಿ ಹಿಜಾಬ್ಗಾಗಿ ತಮ್ಮ ಸಂದರ್ಶನವನ್ನೇ ರದ್ದುಗೊಳಿಸಿದ್ದಾರೆ !..ಇಬ್ರಾಹಿಂ ರೈಸಿ ಅವರನ್ನು ಸಿಎನ್ಎನ್ ವಾಹಿನಿಯ ಹಿರಿಯ ಸುದ್ದಿ ನಿರೂಪಕಿ ಕ್ರಿಸ್ಟಿಯಾನೆ ಅಮನ್ಪೋರ್ ಸಂದರ್ಶನ ಮಾಡಬೇಕಿತ್ತು. ನ್ಯೂಯಾರ್ಕ್ನಲ್ಲಿರುವ ವಿಶ್ವಸಂಸ್ಥೆ ಜನರಲ್ ಅಸೆಂಬ್ಲಿಯಲ್ಲೇ ಸಂದರ್ಶನ ನಡೆಸಲು ಎಲ್ಲ ಸಿದ್ಧತೆಗಳನ್ನೂ ಮಾಡಿಕೊಳ್ಳಲಾಗಿತ್ತು. ಅಂದಹಾಗೇ, ಇರಾನಿಯನ್ ಅಧ್ಯಕ್ಷ ಇಬ್ರಾಹಿಂ ರೈಸಿ, ಯುಎಸ್ ನೆಲದಲ್ಲಿ ನೀಡುತ್ತಿರುವ ಮೊದಲ ಸಂದರ್ಶನವೂ ಇದಾಗಿತ್ತು. ಆದರೆ, ಅವರು ಕೊನೇ ಕ್ಷಣದಲ್ಲಿ ತಾವು ಯಾವ ಕಾರಣಕ್ಕೂ ಕ್ರಿಸ್ಟಿಯಾನೆ ಅಮನ್ಪೋರ್ಗೆ ಸಂದರ್ಶನ ಕೊಡುವುದಿಲ್ಲ ಎಂದು ರೈಸಿ ಹೇಳಿದ್ದಾರೆ. ಕೊನೆಗೂ ಆ ಇಂಟರ್ವ್ಯೂ ನಡೆಯಲಿಲ್ಲ.
ಅಮನ್ಪೋರ್ ಮೂಲತಃ ಇರಾನ್ನವರು. ಸಿಎನ್ಎನ್ನಲ್ಲಿ ಪತ್ರಕರ್ತೆಯಾಗಿ, ಸುದ್ದಿ ನಿರೂಪಕಿಯಾಗಿ ಕೆಲಸ ಮಾಡುತ್ತಿದ್ದಾರೆ. ಅವರು ಇರಾನ್ ಅಧ್ಯಕ್ಷರನ್ನು ಇಂಟರ್ವ್ಯೂ ಮಾಡುತ್ತಾರೆ ಎಂದು ಹೇಳಿದಾಗಲೇ, ಅವರಿಗೆ ಹಿಜಾಬ್ ಧರಿಸಿಯೇ ಸಂದರ್ಶಿಸಬೇಕು ಎಂಬ ಷರತ್ತು ವಿಧಿಸಲಾಗಿತ್ತು. ಆದರೆ ಹಿರಿಯ ನಿರೂಪಕಿ ಇದಕ್ಕೆ ಸುತಾರಾಂ ಒಪ್ಪಿರಲಿಲ್ಲ. ‘ನಾನು ಇಷ್ಟು ದಿನ, ಉಳಿದವರನ್ನೆಲ್ಲ ಹೇಗೆ ಸಂದರ್ಶನ ಮಾಡಿದ್ದೇನೋ, ಇದನ್ನೂ ಹಾಗೇ ಮಾಡುತ್ತೇನೆ. ನಾನು ಮೂಲತಃ ಇರಾನ್ನವಳೇ ಆದರೂ, ನಾನಿರುವುದು ಯುಸ್ನಲ್ಲಿ. ಇಲ್ಲಿ ಹಿಜಾಬ್ ಕಡ್ಡಾಯವಲ್ಲ, ಹಿಜಾಬ್ ಧರಿಸಬೇಕು ಎಂಬ ಕಾನೂನೂ ಇಲ್ಲ. ಹಾಗಾಗಿ ನಾನೂ ಅದನ್ನು ಧರಿಸುವುದಿಲ್ಲ’ ಎಂದು ಖಡಾಖಂಡಿತವಾಗಿ ಹೇಳಿದ್ದರು. ಹಾಗೇ, ಹಿಜಾಬ್ ಧರಿಸದೆಯೇ ಸಂದರ್ಶನಕ್ಕೂ ಬಂದಿದ್ದರು. ಆದರೆ ಇರಾನ್ ಅಧ್ಯಕ್ಷ ಒಪ್ಪಲಿಲ್ಲ. ಹಿಜಾಬ್ ಧರಿಸದ ನಿರೂಪಕಿ ಜತೆ ಮಾತಾಡುವುದಿಲ್ಲ ಎಂದು ಹೇಳಿ, ಹೊರಟುಹೋಗಿದ್ದಾರೆ.
ಸುದ್ದಿ ನಿರೂಪಕಿ ಅಮನ್ಪೋರ್ ಈ ವಿಚಾರವನ್ನು ಸೋಷಿಯಲ್ ಮೀಡಿಯಾದಲ್ಲಿ ಹಂಚಿಕೊಂಡಿದ್ದಾರೆ. ಹಾಗೇ, ತಾವು ಸಂದರ್ಶನಕ್ಕೆಂದು ಒಂದು ಕುರ್ಚಿಯಲ್ಲಿ ಕುಳಿತಿದ್ದು, ತಮ್ಮ ಎದುರಿನ ಕುರ್ಚಿ ಖಾಲಿ ಇರುವ ಫೋಟೋವೊಂದನ್ನೂ ಪೋಸ್ಟ್ ಮಾಡಿದ್ದಾರೆ. ಕಳೆದ ವಾರ ಇರಾನ್ನಲ್ಲಿ ಮಾಹ್ಸಾ ಅಮಿನಿ ಎಂಬ ಯುವತಿ ಸರಿಯಾಗಿ ಹಿಜಾಬ್ ಧರಿಸದೆ ಇದ್ದಿದ್ದಕ್ಕೆ ಆಕೆಯನ್ನು ಪೊಲೀಸರು ಬಂಧಿಸಿದ್ದರು. ಪೊಲೀಸ್ ಕಸ್ಟಡಿಯಲ್ಲಿದ್ದಾಗಲೇ ಆಕೆ ಮೃತಪಟ್ಟಿದ್ದಳು. ಈ ಘಟನೆ ಬೆನ್ನಲ್ಲೇ ಇರಾನ್ನಲ್ಲಿ ಹಿಜಾಬ್ ಮತ್ತು ನೈತಿಕ ಪೊಲೀಸ್ಗಿರಿ ವಿರುದ್ಧ ಪ್ರತಿಭಟನೆ ಭುಗಿಲೆದ್ದಿದೆ. ಮಹಿಳೆಯರಂದೂ ಹಿಜಾಬ್ ವಿರೋಧಿಸಿ ತಮ್ಮ ಕೂದಲನ್ನೆಲ್ಲ ಕತ್ತರಿಸಿಕೊಂಡು ಹೋರಾಟ ಮಾಡುತ್ತಿದ್ದಾರೆ. ಹಿಂಸಾತ್ಮಕ ಪ್ರತಿಭಟನೆಯಲ್ಲಿ 8ಕ್ಕೂ ಹೆಚ್ಚು ಮಂದಿ ಮೃತಪಟ್ಟಿದ್ದಾರೆ.
ಇರಾನ್ ಅಧ್ಯಕ್ಷ ಇಬ್ರಾಹಿಂ ರೈಸಿ ಬಳಿ ಇದೇ ಹಿಜಾಬ್ ವಿಚಾರವಾಗಿ ಮಾತುಕತೆ ನಡೆಸಲು ಸಿಎನ್ಎನ್ ನಿರೂಪಕಿ ಅಮನ್ಪೋರ್ ನಿರ್ಧರಿಸಿದ್ದರು. ‘ಸಂದರ್ಶನಕ್ಕೆ ಇನ್ನೂ 40 ನಿಮಿಷ ಬಾಕಿ ಇತ್ತು. ಆಗ ಅಧ್ಯಕ್ಷರ ಸಹಾಯಕರೊಬ್ಬರು ಬಂದು, ಇದು ಪವಿತ್ರ ಮೊಹರಂ ಮಾಸವಾಗಿದ್ದರಿಂದ ನಾನು ಹಿಜಾಬ್ ಧರಿಸಿಯೇ ಇಂಟರ್ ವ್ಯೂ ಮಾಡಬೇಕು ಎಂದು ಇಬ್ರಾಹಿಂ ರೈಸಿ ಹೇಳುತ್ತಿದ್ದಾರೆ ಎಂದು ಹೇಳಿದರು. ಆದರೆ ನಾನು ಒಪ್ಪದೆ ಇದ್ದಾಗ, ಅಧ್ಯಕ್ಷರು ಸಂದರ್ಶನಕ್ಕೆ ಬರಲು ನಿರಾಕರಿಸಿದರು’ ಎಂದು ಅಮನ್ಪೋರ್ ತಿಳಿಸಿದ್ದಾರೆ.
ಇದನ್ನೂ ಓದಿ: NIA Raid | ಹಿಜಾಬ್ ಗಲಾಟೆಯಿಂದ ಹಿಡಿದು ಆರ್‌ಎಸ್‌ಎಸ್‌ ಪ್ರಮುಖರ ಹತ್ಯೆವರೆಗೆ ಪಿಎಫ್‌ಐ ವಿರುದ್ಧ ಹಲವು ಆರೋಪ