ದುಬೈ ಏರ್ಪೋರ್ಟ್ನಿಂದ ಟೇಕ್ ಆಫ್ ಆಗಿದ್ದ ಪ್ರಯಾಣಿಕರ ವಿಮಾನವೊಂದು ಸುಮಾರು 13 ತಾಸು ಹಾರಾಟ ನಡೆಸಿದ ಬಳಿಕ ಮತ್ತೆ ವಾಪಸ್ ದುಬೈಗೇ ಬಂದು ಲ್ಯಾಂಡ್ ಆಗಿದೆ. ಅಂದಹಾಗೇ ಈ ವಿಮಾನ ನ್ಯೂಜಿಲ್ಯಾಂಡ್ನ ಆಕ್ಲೆಂಡ್ಗೆ ಹೋಗಬೇಕಿತ್ತು. ಆದರೆ ದುಬೈನಿಂದ ಸುಮಾರು 9000 ಮೈಲಿಗಳಷ್ಟು ದೂರ ಸಂಚಾರ ಮಾಡಿಯಾದ ಮೇಲೆ ಮತ್ತೆ ದುಬೈ ಏರ್ ಪೋರ್ಟ್ ಗೇ ಬಂದು ನಿಂತಿದೆ.
ಎಮಿರೇಟ್ಸ್ ಏರ್ಲೈನ್ಸ್ಗೆ ಸೇರಿದ EK 448 ವಿಮಾನ ಬೆಳಗ್ಗೆ 10.30ರ ಹೊತ್ತಿಗೆ ದುಬೈ ಏರ್ಪೋರ್ಟ್ನಿಂದ ಟೇಕ್ಆಫ್ ಆಗಿತ್ತು. ಆದರೆ ಏಕಾಏಕಿ ನ್ಯೂಜಿಲ್ಯಾಂಡ್ನ ಆಕ್ಲೆಂಡ್ ಏರ್ಪೋರ್ಟ್ನಿಂದ ಬಂದ ಒಂದು ಸಂದೇಶದಿಂದ ಆ ವಿಮಾನದ ಪೈಲಟ್ ಮತ್ತೆ ಅದನ್ನು ಯೂಟರ್ನ್ ಮಾಡಿ, ದುಬೈಗೆ ತರಬೇಕಾಯಿತು.
‘ಆಕ್ಲೆಂಡ್ನಲ್ಲಿ ವಿಪರೀತ ಮಳೆ ಬಂದು ಪ್ರವಾಹ ಪರಿಸ್ಥಿತಿ ಉಂಟಾಗಿದೆ. ಏರ್ಪೋರ್ಟ್ಗೂ ನೀರು ನುಗ್ಗಿದೆ. ಇಲ್ಲಿನ ಪ್ರತಿಕೂಲ ಹವಾಮಾನ ಮತ್ತು ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದಲ್ಲಿ ನೀರು ನಿಂತ ಕಾರಣ ನಮ್ಮಲ್ಲಿಂದ ಹೊರಡಬೇಕಿದ್ದ ಮತ್ತು ಇಲ್ಲಿಗೆ ಆಗಮಿಸಬೇಕಿದ್ದ ಎಲ್ಲ ದೇಶೀಯ ಮತ್ತು ಅಂತಾರಾಷ್ಟ್ರೀಯ ವಿಮಾನಗಳನ್ನು ರದ್ದುಗೊಳಿಸುತ್ತಿದ್ದೇವೆ’ ಎಂದು ಆಕ್ಲೆಂಡ್ ಏರ್ಪೋರ್ಟ್ ಪ್ರಕಟಣೆ ಹೊರಡಿಸಿತ್ತು, ಮತ್ತು ಎಲ್ಲ ವಿಮಾನಯಾನ ಸಂಸ್ಥೆಗಳಿಗೂ ಸಂದೇಶ ರವಾನೆ ಮಾಡಿತ್ತು ಇದೇ ಕಾರಣಕ್ಕೆ EK 448 ವಿಮಾನದ ಪೈಲಟ್ ಅದನ್ನು ವಾಪಸ್ ದುಬೈಗೆ ತೆಗೆದುಕೊಂಡು ಹೋಗಿದ್ದ. ಇದರಿಂದ ಪ್ರಯಾಣಿಕರಿಗೆ ಅನನುಕೂಲವಾಗಿದೆ. ಅಷ್ಟೇ ಅಲ್ಲ, ಆಕ್ಲೆಂಡ್ ವಿಮಾನ ನಿಲ್ದಾಣದಲ್ಲಿ ಮಳೆ-ಪ್ರವಾಹದಿಂದ ಉಂಟಾದ ಪರಿಸ್ಥಿತಿಯ ಕಾರಣಕ್ಕೆ ಆ ನಿಲ್ದಾಣದಲ್ಲಿ ಸುಮಾರು 2000 ಪ್ರಯಾಣಿಕರು ಸಿಕ್ಕಿಬಿದ್ದಿದ್ದರು.
ಇದನ್ನೂ ಓದಿ: Air India Urination Case: ವಿಮಾನದಲ್ಲಿ ಮಹಿಳೆ ಮೇಲೆ ಮೂತ್ರ ವಿಸರ್ಜನೆ, ಆರೋಪಿ ಶಂಕರ್‌ ಮಿಶ್ರಾಗೆ ಜಾಮೀನು