ನವದೆಹಲಿ: ತೆರಿಗೆ ವಂಚನೆ ಪ್ರಕರಣದಲ್ಲಿ(Spain tax fraud) ಜೈಲಿಗೆ ಹೋಗುವುದನ್ನು (Jail Term) ತಪ್ಪಿಸಿಕೊಳ್ಳುವಲ್ಲಿ ಖ್ಯಾತ ಕೊಲಂಬಿಯನ್ ಪಾಪ್ ಸಿಂಗರ್ ಶಕೀರಾ (Pop Singer Shakira) ಯಶಸ್ವಿಯಾಗಿದ್ದಾರೆ. 2012ರಿಂದ 2014ರ ಅವಧಿಯಲ್ಲಿ ಸ್ಪೇನ್ ತೆರಿಗೆ ಆದಾಯ (Spain Income Tax Department) ಇಲಾಖೆಗೆ 14.5 ಮಿಲಿಯನ್ ಯುರೋ ಪಾವತಿಸಲು ವಿಫಲರಾಗಿದ್ದರು. ಈ ಹಿನ್ನೆಲೆಯಲ್ಲಿ ಅವರು ಜೈಲು ಪಾಲಾಗುವ ಪರಿಸ್ಥಿತಿ ನಿರ್ಮಾಣವಾಗಿತ್ತು. ಆದರೆ, ಶಕೀರಾ ಹಾಗೂ ಕೋರ್ಟ್ ಮಧ್ಯೆ ಒಪ್ಪಂದವಾಗಿದ್ದು, ಈ ಸಂಬಂಧ ಶಕೀರಾ ವಿರುದ್ಧ ವಿಚಾರಣೆಯನ್ನು ಕೈ ಬಿಟ್ಟು, ಜೈಲು ಬದಲಿಗೆ ದಂಡ ವಿಧಿಸಲು ಕೋರ್ಟ್ ಒಪ್ಪಿಕೊಂಡಿದೆ ಜಡ್ಜ್ ಹೇಳಿದ್ದಾರೆ. ಸ್ಪೇನ್ ಅಧಿಕಾರಿಗಳೊಂದಿಗೆ ಶಕೀರಾ ಎರಡನೇ ತೆರಿಗೆ ವಂಚನೆಯ ಪ್ರಕರಣ ಕೂಡ ಬಾಕಿ ಇದೆ.
ಜುಲೈ 2022ರಲ್ಲಿ ತನ್ನ ಪ್ರಕರಣವನ್ನು ಇತ್ಯರ್ಥಪಡಿಸಲು ಪ್ರಾಸಿಕ್ಯೂಟರ್‌ಗಳು ನೀಡಿದ ಒಪ್ಪಂದವನ್ನು ಶಕೀರಾ ತಿರಸ್ಕರಿಸಿದ್ದರು. ತಾನು ಮುಗ್ಧೆಯಾಗಿದ್ದು, ಕಾನೂನು ಮೇಲೆ ನಂಬಿಕೆ ಇದ್ದು, ಎಲ್ಲವನ್ನೂ ಕಾನೂನಿಗೆ ಬಿಟ್ಟು ಬಿಡುತ್ತೇನೆ ಎಂದು 46 ವರ್ಷ ಶಕೀರಾ ನಂತರ ಹೇಳಿದ್ದರು. ಆ ಸಮಯದಲ್ಲಿ ಒಪ್ಪಂದದ ವಿವರಗಳನ್ನು ಬಹಿರಂಗ ಮಾಡಿರಲಿಲ್ಲ. ಈ ನಡುವೆ ಮಡೋನಾ ಮತ್ತು ಯು2ನ ಬೋನೋ ಸೇರಿದಂತೆ ಶಕೀರಾ ಅವರ ಹೆಸರು ಪ್ಯಾರಡೈಸ್ ಪೇಪರ್ಸ್ ಲೀಕ್‌ನಲ್ಲಿ ಕಾಣಿಸಿಕೊಂಡಿತು. ತೆರಿಗೆ ವಂಚಿಸಿದ ಲಿಸ್ಟ್ ಅನ್ನು ಈ ಪ್ಯಾರಡೈಸ್ ಪೇಪರ್ಸ್ ಒಳಗೊಂಡಿತ್ತು.
ತೆರಿಗೆ ಅಧಿಕಾರಿ ಮೊಕದ್ದಮೆ ಹೂಡುವ ಮೊದಲು ಸೂಚಿಸಿದಷ್ಟು ನಾನು ತೆರಿಗೆಯನ್ನು ಪಾವತಿಸಿದ್ದೇನೆ. ಎಲ್ಲಕ್ಕಿಂತ ಹೆಚ್ಚಾಗಿ ಅಲೆಮಾರಿ ಜೀವನವನ್ನು ಆಯ್ಕೆ ಮಾಡಿಕೊಂಡಿರುವ ತಾನು ಆ ಅವಧಿಯಲ್ಲಿ ಸ್ಪೇನ್‌ನಲ್ಲಿ ಇರಲಿಲ್ಲ ಎಂದೂ ಹೇಳಿದ್ದರು. ಬಾರ್ಸಿಲೋನಾ ಹಾಗೂ ಸ್ಪೇನ್‌ನ ಮಾಜಿ ಫುಟ್ಬಾಲ್ ಆಟಗಾರ ಗೆರಾರ್ಡ್ ಪಿಕ್ವೆ ಜತೆಗೆ 11 ವರ್ಷಗಳ ಕಾಲ ಜತೆಗಿದ್ದರು ಮತ್ತು ಈ ದಂಪತಿಗೆ ಇಬ್ಬರು ಮಕ್ಕಳಿದ್ದಾರೆ. ಆದರೆ, ಗಂಡನಿಂದ ಬೇರ್ಪಟ್ಟ ಬಳಿಕ ಶಕೀರಾ ಅವರು ಮಕ್ಕಳೊಂದಿಗೆ ಮಿಯಾಮಿಗೆ ವಲಸೆ ಹೋಗಿದ್ದರು. ಶಕೀರಾ ಅವರ ಪೂರ್ತಿ ಹೆಸರು ಶಕೀರಾ ಇಸಾಬೆಲ್ ಮೆರಾಬಾರಕ್ ರಿಪೋಲ್.
ಪ್ರಾಸಿಕ್ಯೂಟರ್ ಕಚೇರಿಯು ಶಕೀರಾ ಹೇಳಿಕೆಗೆ ವಿರುದ್ಧವಾದ ಅಭಿಪ್ರಾಯವನ್ನು ಹೊಂದಿದೆ. ಶಕೀರಾ ಅವರು ಸ್ಪೇನ್‌ನಲ್ಲಿ ತಾವಿದ್ದ ಅಷ್ಟೂ ವರ್ಷಗಳಲ್ಲಿ ಪ್ರತಿ ವರ್ಷದಲ್ಲಿ ಅರ್ಧಕ್ಕಿಂತ ಹೆಚ್ಚು ಅವಧಿಯನ್ನು ಕಳೆದಿದ್ದಾರೆ ಎಂದು ಆರೋಪಿಸಿದೆ. ಇದರರ್ಥ ಅವರು ಸಾಮಾನ್ಯವಾಗಿ ದೇಶದಲ್ಲಿ ವಾಸಿಸುತ್ತಿದ್ದರು ಮತ್ತು ಮೇ 2012ರಲ್ಲಿ ಅವರು ಖರೀದಿಸಿದ ಬಾರ್ಸಿಲೋನಾ ಆಸ್ತಿಯು ಕುಟುಂಬದ ಸ್ವತ್ತಾಗಿ ಕಾರ್ಯನಿರ್ವಹಿಸಿತ್ತು ಎಂದು ಕಚೇರಿ ಹೇಳಿದೆ. ಅಂತಿಮವಾಗಿ ಸ್ಪೇನ್ ತೆರಿಗೆ ಅಧಿಕಾರಿಗಳು ಮತ್ತು ಶಕೀರಾ ನಡುವೆ ಒಪ್ಪಂದ ಮಾಡಿಸುವಲ್ಲಿ ಕೋರ್ಟ್ ಯಶಸ್ವಿಯಾಗಿದೆ. ಶಕೀರಾ ಅವರು ಬಾಕಿ ಇರುವ ಮೊತ್ತವನ್ನು ಪಾವತಿಸಲು ಒಪ್ಪಿದ್ದಾರೆ. ಆ ಮೂಲಕ ಜೈಲು ವಾಸವನ್ನು ತಪ್ಪಿಸಿಕೊಂಡಿದ್ದಾರೆ.
ಈ ಸುದ್ದಿಯನ್ನೂ ಓದಿ: ಪಾಪ್ ಸಂಗೀತದ ಐಕಾನ್ ಶಕೀರಾ ಬದುಕಲ್ಲಿ ಹೊಸ ಲವ್ ಸ್ಟೋರಿ?; 60ವರ್ಷದ ನಟನಿಗೆ ಆಕೆ ಮೇಲೆ ವಿಪರೀತ ಆಸಕ್ತಿ !