ಹಾಲಿವುಡ್ ಅಂಗಳದಲ್ಲಿ ಹೊಸದೊಂದು ಪ್ರೀತಿ ಅರಳಿದ ಸುದ್ದಿ ವರದಿಯಾಗುತ್ತಿದೆ. ಸುಪ್ರಸಿದ್ಧ ಪಾಪ್ ಗಾಯಕಿ ಶಕೀರಾ (Pop star shakira) ಮತ್ತು ನಟ ಟಾಮ್ ಕ್ರೂಸ್ (Tom Cruise) ಅವರು ಡೇಟಿಂಗ್ ಮಾಡುತ್ತಿದ್ದಾರೆ ಎಂಬುದೊಂದು ಸುದ್ದಿ ಹರಿದಾಡುತ್ತಿದೆ. ಇತ್ತೀಚೆಗೆ ದಕ್ಷಿಣ ಫ್ಲೋರಿಡಾದ ಮೈಮಿಯಲ್ಲಿ ನಡೆದ 2023ನೇ ವರ್ಷದ ಫಾರ್ಮುಲಾ ಒನ್ ಗ್ರ್ಯಾಂಡ್ ಪ್ರಿಕ್ಸ್ನಲ್ಲಿ ಇಬ್ಬರೂ ಜತೆಯಾಗಿ ಕಾಣಿಸಿಕೊಂಡಿದ್ದರು. ಶಕೀರಾ ಮತ್ತು ಟಾಮ್ ಕ್ರೂಸ್ ಒಟ್ಟಾಗಿರುವ ಫೋಟೋ ಇಂಟರ್ನೆಟ್ನಲ್ಲಿ ಸಿಕ್ಕಾಪಟೆ ವೈರಲ್ ಆಗುತ್ತಿದೆ. ಫಾರ್ಮುಲಾ ಒನ್ ಕಾರ್ ರೇಸ್ನಲ್ಲಿ ಶಕೀರಾ ಮತ್ತು ಟಾಮ್ ಕ್ರೂಸ್ ಅವರು ಜತೆಗೇ ಇದ್ದು ಮಾತಾಡಿಕೊಂಡಿದ್ದರು. ಅದಾದ ಮೇಲೆ ಟಾಮ್ ಕ್ರೂಸ್ ಅವರು ಶಕೀರಾರಿಗೆ ಹೂವು ಕಳಿಸಿದ್ದಾರೆ ಎಂಬುದೊಂದು ವದಂತಿಯೂ ಜೋರಾಗಿಯೇ ಹರಡುತ್ತಿದೆ.
Page Six ಎಂಬ ವೆಬ್ಸೈಟ್ವೊಂದು ಈ ಬಗ್ಗೆ ವರದಿ ಮಾಡಿದೆ. ‘ಶಕೀರಾ ಮತ್ತು ಟಾಮ್ ಕ್ರೂಸ್ ಒಟ್ಟಾಗಿಯೇ ಕಾರ್ ರೇಸ್ನಲ್ಲಿ ಪಾಲ್ಗೊಂಡಿದ್ದರು. ಟಾಮ್ ಕ್ರೂಸ್ ಅವರು ಶಕೀರಾರನ್ನು ಅತ್ಯಂತ ಆಸಕ್ತಿಯಿಂದ ಹಿಂಬಾಲಿಸುತ್ತಿದ್ದರು. ಅವರಿಬ್ಬರ ಮಧ್ಯೆ ಕೆಮೆಸ್ಟ್ರಿ ಇರುವುದು ಸ್ಪಷ್ಟವಾಗಿ ಕಾಣುತ್ತಿತ್ತು’ ಎಂದು ಅವರನ್ನು ಹತ್ತಿರದಿಂದ ನೋಡಿದವರೊಬ್ಬರು ತಿಳಿಸಿದ್ದಾಗಿ ಪೇಜ್ ಸಿಕ್ಸ್ ವರದಿಯಲ್ಲಿ ಉಲ್ಲೇಖಿಸಿದೆ. ‘ಶಕೀರಾರಿಗೆ ಕೆಳಗೆ ಬೀಳಲು ಒಂದು ಮೆತ್ತನೆಯ ತಲೆದಿಂಬು ಬೇಕು. ಅದು ಟಾಮ್ ಆಗಿರಬಹುದು. ಟಾಮ್ ಅವರು ನೋಡಲು ಸುಂದರವಾಗಿದ್ದಾರೆ, ಪ್ರತಿಭಾನ್ವಿತ’ ಅದರಾಚೆ ಜೋಕ್ ಮಾಡಬೇಕು ಎಂದರೆ, ಶಕೀರಾ ಅವರು ಟಾಮ್ಗಿಂತಲೂ ಎತ್ತರವಾಗೇನೂ ಇಲ್ಲ’ ಎಂದು ಮಾಧ್ಯಮದಲ್ಲಿ ಬರೆಯಲಾಗಿದೆ.
ಪಾಪ್ ಸಂಗೀತದ ಐಕಾನ್ ಎಂದೇ ಬಿಂಬಿತರಾದ 46ವರ್ಷದ ಶಕೀರಾ ಅವರು ಕಳೆದ ವರ್ಷ ಜೂನ್ನಲ್ಲಿ ತಮ್ಮ 12 ವರ್ಷಗಳ ಸಂಗಾತಿ, ಖ್ಯಾತ ಫೂಟ್ಬಾಲ್ ಆಟಗಾರ ಗೆರಾರ್ಡ್ ಪಿಕ್ವೆ ಅವರೊಂದಿಗೆ ಬ್ರೇಕಪ್ ಮಾಡಿಕೊಂಡಿದ್ದರು. ಇವರಿಗೆ ಮಿಲನ್ ಮತ್ತು ಸಶಾ ಎಂಬ ಮಕ್ಕಳು ಇದ್ದಾರೆ. ಅಂದಹಾಗೇ ಈ ಗೆರಾರ್ಡ್ ಮತ್ತು ಶಕೀರಾ ನಡುವಿನ ಸಂಬಂಧ ಮುರಿಯಲು ಕ್ಲಾರಾ ಚಿಯಾ ಮಾರ್ಟಿ ಎಂಬ 24ವರ್ಷದ ಯುವತಿ ಕಾರಣ. ಶಕೀರಾ ಅವರ ಫ್ಯಾನ್ ಆಗಿದ್ದ ಈಕೆ ಬರುಬರುತ್ತ ಗೆರಾರ್ಡ್ ಪಿಕ್ವೆ ಗರ್ಲ್ಫ್ರೆಂಡ್ ಆಗಿ ಬದಲಾಗಿದ್ದಳು. ಗೆರಾರ್ಡ್ ಜತೆಗಿನ ಸಂಬಂಧ ಮುರಿದ ಮೇಲೆ ಶಕೀರಾ ಒಬ್ಬಂಟಿಯಾಗಿಯೆ ಇದ್ದರು.
ಇದನ್ನೂ ಓದಿ: Fifa World Cup | ಕತಾರ್‌ನಲ್ಲಿ ಫುಟ್ಬಾಲ್‌ ಮಹಾ ಸಮರಕ್ಕೆ ಕ್ಷಣಗಣನೆ: ಪಂದ್ಯಗಳನ್ನು ಎಲ್ಲಿ ವೀಕ್ಷಿಸಬಹುದು?
ಟಾಮ್ ಕ್ರೂಸ್ ಅವರು ಅಮೆರಿಕನ್ ನಟ ಮತ್ತು ನಿರ್ಮಾಪಕ ಇವರು ಮೂರು ಮದುವೆಯಾಗಿದ್ದರೂ ಸದ್ಯ ಯಾರೂ ಜತೆಯಲ್ಲಿ ಇಲ್ಲ. ಅವರಿಗೆ ಈಗ 60ವರ್ಷವಾಗಿದ್ದು ಇದೇ ಹೊತ್ತಲ್ಲಿ ಶಕೀರಾ ಜತೆ ಹೊಸ ಜೀವನ ಶುರು ಮಾಡುತ್ತಿದ್ದಾರಾ ಎಂಬ ಚರ್ಚೆ ಶುರುವಾಗಿದೆ. ಇಂಟರ್ನೆಟ್ನಲ್ಲಿ ಇವರ ಫೋಟೋ-ವಿಡಿಯೊ ವೈರಲ್ ಆಗುತ್ತಿದ್ದಂತೆ ನೆಟ್ಟಿಗರಿಂದ ಮಿಶ್ರ ಭಾವ ವ್ಯಕ್ತವಾಗಿದೆ. ಕೆಲವರು ಈ ಜೋಡಿಯನ್ನು ಇಷ್ಟಪಟ್ಟಿದ್ದಾರೆ. ಆದರೆ ಇನ್ನೂ ಕೆಲವರು ಇಷ್ಟವಿಲ್ಲ ಎನ್ನುತ್ತಿದ್ದಾರೆ. ‘ಶಕೀರಾರಿಂದ ದೂರ ಇರಿ’ ಎಂದು ಅನೇಕರು ಟಾಮ್ ಕ್ರೂಸ್ಗೆ ಸಲಹೆ ನೀಡುತ್ತಿದ್ದಾರೆ.