ಇಸ್ತಾಂಬುಲ್: ಸೋಮವಾರ ಬೆಳಗಿನ ಜಾವ ಟರ್ಕಿ ಮತ್ತು ಸಿರಿಯಾದಲ್ಲಿ ಸಂಭವಿಸಿದ ಭೀಕರ ಭೂಕಂಪದಲ್ಲಿ ಮೃತಪಟ್ಟವರ ಸಂಖ್ಯೆ 530ಕ್ಕೆ ಏರಿಕೆಯಾಗಿದೆ. ರಿಕ್ಟರ್‌ಮಾಪಕದಲ್ಲಿ 7.8 ಕಂಪನ ದಾಖಲಾಗಿದೆ. ದೇಶದ ಬಹುತೇಕ ನಗರಗಳಲ್ಲಿ ಸಾಕಷ್ಟು ಕಟ್ಟಡಗಳು ಕುಸಿದಿದ್ದರಿಂದ ಜನರ ಸಾವಿನ ಸಂಖ್ಯೆ ಇನ್ನೂ ಹೆಚ್ಚಾಗುವ ಸಾಧ್ಯತೆ ಇದೆ. ಕಂಪನದ ಅನುಭವ ಸೈಪ್ರಸ್ ಮತ್ತು ಈಜಿಪ್ಟ್‌ನಲ್ಲೂ ಆಗಿದೆ(Turkey Earthquake).
ಇತ್ತೀಚಿನ ನೂರು ವರ್ಷಗಳಲ್ಲಿ ಟರ್ಕಿ ಕಂಡ ಅತಿ ದೊಡ್ಡ ಭೂಕಂಪ ಇದಾಗಿದೆ. ದೇಶದ ಪ್ರಮುಖ ನಗರಗಳಲ್ಲಿ ಸಂಪೂರ್ಣವಾಗಿ ನೆಲಸಮವಾಗಿವೆ. ಭೂಕಂಪಕ್ಕೆ ನಲುಗಿದ ಬಹುತೇಕ ನಗರಗಳಲ್ಲಿ, ಯುದ್ಧಪೀಡಿತ ಸಿರಿಯಾ ಹಾಗೂ ಇತರ ಸಂಘರ್ಷಪೀಡಿತ ಪ್ರದೇಶಗಳಿಂದ ಬಂದು ನೆಲೆಸಿದ ಜನರೇ ಬಲಿಯಾಗಿದ್ದಾರೆ. ಸಿರಿಯಾದ ರಾಷ್ಟ್ರೀಯ ಭೂಕಂಪ ಕೇಂದ್ರದ ಮುಖ್ಯಸ್ಥ ರೇದ್ ಅಹ್ಮದ್ ಅವರು, ಇತ್ತೀಚಿನ ಇತಿಹಾಸದಲ್ಲಿ ದಾಖಲಾದ ಅತಿದೊಡ್ಡ ಭೂಕಂಪ ಎಂದು ಸರ್ಕಾರಿ ರೆಡಿಯೋಗೆ ತಿಳಿಸಿದ್ದಾರೆ.
ಸಿರಿಯಾದಲ್ಲಿ 245 ಮಂದಿ ಮೃತ್ಯು
ಸರ್ಕಾರಿ ನಿಯಂತ್ರಣದಲ್ಲಿರುವ ಸಿರಿಯಾದಲ್ಲಿ ಭೂಕಂಪಕ್ಕೆ ಕನಿಷ್ಠ 245 ಜನರು ಬಲಿಯಾಗಿದ್ದಾರೆ. ಪ್ರೋ-ತುರ್ಕಿಸ್ ನಿಯಂತ್ರದಲ್ಲಿ ಸಿರಿಯಾದ ಉತ್ತರ ಭಾಗದಲ್ಲೂ ಜನರು ಸಾವಿಗೀಡಾಗಿದ್ದಾರೆ ಎಂದು ಸ್ಥಳೀಯ ಆಸ್ಪತ್ರೆ ಹಾಗೂ ಆರೋಗ್ಯ ಇಲಾಖೆ ತಿಳಿಸಿದೆ.
ಇದನ್ನೂ ಓದಿ: Nepal earthquake | ನೇಪಾಳದಲ್ಲಿ ಭೂಕಂಪ, 6 ಸಾವು, ದೆಹಲಿಯಲ್ಲೂ ನಡುಗಿದ ಭೂಮಿ
ಟರ್ಕಿಯಲ್ಲಿ ಕನಿಷ್ಠ 284 ಜನ ಸಾವು
ತೀವ್ರ ಬಾಧಿತವಾಗಿರುವ ಟರ್ಕಿಯಲ್ಲಿ ಸಾವು ನೋವಿನ ಪ್ರಮಾಣ ಹೆಚ್ಚಿದೆ. ಈವರೆಗಿನ ವರದಿಗಳ ಪ್ರಕಾರ, ಟರ್ಕಿಯಲ್ಲಿ ಕನಿಷ್ಠ 284 ಜನರು ಮೃತಪಟ್ಟಿದ್ದಾರೆ. ಈ ವಿಷಯವನ್ನು ಉಪಾಧ್ಯಕ್ಷ ಫುಟ್ ಒಕ್ಟೇ ಅವರು ಖಚಿತಪಡಿಸಿದ್ದಾರೆ. ದೇಶದ ಪ್ರಮುಖ ನಗರಗಳಲ್ಲಿ ಶೋಧ ಮತ್ತು ಪರಿಹಾರ ಕಾರ್ಯಾಚರಣೆ ನಡೆದಿದೆ. ಚಳಿಗಾಲವಾದ್ದರಿಂದ ಬಹುತೇಕ ನಗರಗಳು, ರಸ್ತೆಗಳು ಹಿಮದಿಂದ ಆವರಿಸಿದೆ. ಇದರಿಂದಾಗಿ ಪರಿಹಾರ ಕಾರ್ಯಾಚರಣೆಗೂ ಭಾರೀ ಅಡಚಣೆಯಾಗುತ್ತಿದೆ ಎಂದು ತಿಳಿದು ಬಂದಿದೆ.