ಕೀವ್: ಕಳೆದ 10-11 ತಿಂಗಳುಗಳಿಂದ ನಡೆಯುತ್ತಿರುವ ರಷ್ಯಾ-ಉಕ್ರೇನ್ ಯುದ್ಧದಲ್ಲೀಗ ಉಕ್ರೇನ್ ತನ್ನ ಬಲ ಹೆಚ್ಚಿಸುತ್ತಿರುವಂತೆ ಗೋಚರಿಸುತ್ತಿದೆ. ರಷ್ಯಾದ ಬ್ರಿಯಾನ್ಸ್ಕ್ ಪ್ರದೇಶದ ಮೇಲೆ ಉಕ್ರೇನ್ ಡ್ರೋನ್ ದಾಳಿ ನಡೆಸಿದ ಬಗ್ಗೆ ನಿನ್ನೆಯಷ್ಟೇ ವರದಿಯಾಗಿತ್ತು. ಅದರ ಬೆನ್ನಲ್ಲೇ ಮಾಸ್ಕೋ ಆಕ್ರಮಿತ ಡೊನೆಟ್ಸ್ಕ್ ಪ್ರದೇಶದ ಮೇಲೆ ಉಕ್ರೇನ್ ರಾಕೆಟ್ ದಾಳಿ ನಡೆಸಿದ್ದಾಗಿ ರಷ್ಯಾ ಹೇಳಿಕೊಂಡಿದೆ.
ಡೊನೆಟ್ಸ್ಕ್ ಉಕ್ರೇನ್ನ ಭಾಗವೇ ಆಗಿತ್ತು. ಆದರೆ ಯುದ್ಧ ಸಾರಿದ್ದ ರಷ್ಯಾ, ಈ ಪ್ರದೇಶವನ್ನು ವಶಕ್ಕೆ ಪಡೆದಿತ್ತು. ಅಲ್ಲೆಲ್ಲ ರಷ್ಯಾ ಸೈನಿಕರೇ ಕಾವಲಿದ್ದರು. ಈಗ ಉಕ್ರೇನ್ ಅದೇ ಪ್ರದೇಶದ ಮೇಲೆ 6 ರಾಕೆಟ್ ದಾಳಿ ನಡೆಸಿದೆ. ಇದರಲ್ಲಿ ರಷ್ಯಾದ 63 ಸೈನಿಕರು ಮೃತಪಟ್ಟಿದ್ದಾರೆ ಎಂದು ಹೇಳಲಾಗಿದೆ. ‘ಡೊನೆಟ್ಸ್ಕ್ ಪ್ರದೇಶದಲ್ಲಿರುವ ಮಕಿವ್ಕಾ ಎಂಬ ನಗರದ ಮೇಲೆ ಉಕ್ರೇನ್ ಒಟ್ಟು ಆರು ರಾಕೆಟ್ಗಳನ್ನು ಹಾರಿಸಿತ್ತು. ಅದರಲ್ಲಿ ಎರಡನ್ನು ಹೊಡೆದುರುಳಿಸಿದ್ದೇವೆ. ಇವೆಲ್ಲ ಉಕ್ರೇನ್ಗೆ ಯುಎಸ್ನಿಂದ ಪೂರೈಕೆಯಾದ ರಾಕೆಟ್ಗಳು’ ಎಂದು ರಷ್ಯಾ ರಕ್ಷಣಾ ಸಚಿವಾಲಯ ಹೇಳಿದೆ. ಆದರೆ ಈ ರಾಕೆಟ್ ದಾಳಿ ಯಾವಾಗ ಆಯಿತು ಎಂಬ ಬಗ್ಗೆ ಮಾಹಿತಿ ನೀಡಿಲ್ಲ.
ಪ್ರಾರಂಭದಲ್ಲಿ ರಷ್ಯಾ ಪ್ರಾಬಲ್ಯ ಮೆರೆದಿತ್ತು. ಉಕ್ರೇನ್ನ ರಾಜಧಾನಿ ಕೀವ್, ಖಾರ್ಕಿವ್ನಂಥ ಪ್ರಮುಖ ನಗರಗಳನ್ನು ಗುರಿಯಾಗಿಸಿ ದಾಳಿ ನಡೆಸಿತ್ತು. ಇತ್ತೀಚೆಗೆ ಉಕ್ರೇನ್ ತೀಕ್ಷ್ಣವಾದ ಪ್ರತಿರೋಧ ಒಡ್ಡುತ್ತಿದೆ. ಉಕ್ರೇನ್ಗೆ ಯುಎಸ್ನಿಂದ ಶಸ್ತ್ರಾಸ್ತ್ರ ಸರಬರಾಜು ಆಗುತ್ತಿದ್ದು, ಅದನ್ನೆಲ್ಲ ಆ ಪುಟ್ಟ ದೇಶ ಸಮರ್ಥವಾಗಿ ಬಳಸಿಕೊಳ್ಳುತ್ತಿದೆ.
ಉಕ್ರೇನ್ ದಾಳಿಯ ಬಗ್ಗೆ ಮಾಹಿತಿ ನೀಡಿದ ರಷ್ಯಾದ ಸಮಾರಾ ಪ್ರದೇಶದ ಗವರ್ನರ್ ಡಿಮಿಟ್ರಿ ಅಜರೋವ್, ‘ಮಕಿವ್ಕಾ ಮೇಲೆ ಉಕ್ರೇನ್ ಮಾಡಿದ ರಾಕೆಟ್ ದಾಳಿಯಲ್ಲಿ ರಷ್ಯಾ ಸೈನಿಕರಷ್ಟೇ ಅಲ್ಲದೆ, ಸ್ಥಳೀಯ ನಿವಾಸಿಗಳೂ ಮೃತಪಟ್ಟಿದ್ದಾರೆ. ಅವರ ಗುರುತು ಇನ್ನೂ ಸಿಕ್ಕಿಲ್ಲ’ ಎಂದು ಹೇಳಿದ್ದಾರೆ.
ಇದನ್ನೂ ಓದಿ: Russia-Ukraine war | ಹೊಸ ವರ್ಷ ಉಕ್ರೇನ್ ವಿರುದ್ಧ ಸಂಘರ್ಷ ತೀವ್ರಗೊಳಿಸುವ ಸಂಕಲ್ಪ ಮಾಡಿದ ಪುಟಿನ್