ಮುಂಬಯಿ: ಬಿಲಿಯನೇರ್‌ ಉದ್ಯಮಿ ಮುಕೇಶ್ ಅಂಬಾನಿ ಅವರು ಸತತ ಎರಡನೇ ವರ್ಷ ವೇತನ ಪಡೆಯಲು ನಿರಾಕರಿಸಿದ್ದಾರೆ.
ದೇಶ ಹಾಗೂ ಆರ್ಥಿಕತೆಯನ್ನು ಕೋವಿಡ್‌ ಸಂಕಷ್ಟ ಕಾಡುತ್ತಿರುವ ಹಿನ್ನೆಲೆಯಲ್ಲಿ ಈ ವರ್ಷ ಕೂಡ ವೇತನ ಪಡೆಯದಿರಲು ಮುಕೇಶ್ ಅಂಬಾನಿ ನಿರ್ಧರಿಸಿದ್ದಾರೆ. ೨೦೨೦-೨೧ ಮತ್ತು ೨೦೨೧-೨೨ರಲ್ಲಿ ಅಂಬಾನಿ ಸಂಬಳ ನಿರಾಕರಿಸಿದ್ದಾರೆ.
ಈ ಎರಡೂ ವರ್ಷಗಳಲ್ಲಿ ಅಂಬಾನಿ ಅವರು ರಿಲಯನ್ಸ್‌ ಅಧ್ಯಕ್ಷ ಮತ್ತು ವ್ಯವಸ್ಥಾಪಕ ನಿರ್ದೇಶಕರಾಗಿ ಕಂಪನಿಯೀಂದ ಯಾವುದೇ ಭತ್ಯೆ, ನಿವೃತ್ತಿ ನಿಧಿ, ಷೇರುಗಳ ಆಯ್ಕೆಯನ್ನು ಸ್ವೀಕರಿಸಿಲ್ಲ. ೨೦೦೮-೦೯ರಿಂದ ಅಂಬಾನಿ ಅವರು ವಾರ್ಷಿಕ ವೇತನಕ್ಕೆ ೧೫ ಕೋಟಿ ರೂ.ಗಳ ಮಿತಿಯನ್ನು ವಿಧಿಸಿದ್ದರು. ೨೦೧೯-೨೦ರಲ್ಲಿ ಕಳೆದ ೧೧ ವರ್ಷಗಳಂತೆ ೧೫ ಕೋಟಿ ರೂ. ವೇತನ ಪಡೆದಿದ್ದರು. ಕೋವಿಡ್‌ ಬಿಕ್ಕಟ್ಟಿನ ಬಳಿಕ ೨೦೨೦-೨೧ರಲ್ಲಿ ಹಾಗೂ ಇದೀಗ ೨೦೨೧-೨೨ರಲ್ಲಿ ಸಂಬಳ ಪಡೆದಿಲ್ಲ.
ಮುಕೇಶ್ ಅಂಬಾನಿಯವರ ಸೋದರ ಸಂಬಂಧಿಗಳಾದ ನಿಖಿಲ್‌ ಮತ್ತು ಹಿತೇಲ್‌ ಮೇಸ್ವಾನಿ ಅವರ ವೇತನ ೨೪ ಕೋಟಿ ರೂ.ಗಳಾಗಿದೆ. ಕಾರ್ಯಕಾರಿ ನಿರ್ದೇಶಕರಾದ ಪಿಎಂಎಸ್‌ ಪ್ರಸಾದ್‌ ೧೧.೮೯ ಕೋಟಿ ರೂ, ಕಪಿಲ್‌ ೪.೨೨ ಕೋಟಿ ರೂ. ವೇತನ ಗಳಿಸಿದ್ದಾರೆ.