ಬೆಂಗಳೂರು: ರಾಜ್ಯ ರಾಜಕೀಯದ ಅತ್ಯಂತ ಸಫಲ ಮುಖ್ಯಮಂತ್ರಿಗಳಲ್ಲೊಬ್ಬರಾದ ಬಿ.ಎಸ್. ಯಡಿಯೂರಪ್ಪ ಅವರ ಮುಂದಿನ ಜೀವನ ಮತ್ತಷ್ಟು ಸಫಲ ಹಾಗೂ ಅರ್ಥಪೂರ್ಣವಾಗಿರಲಿ ಎಂದು ರಾಷ್ಟ್ರೀಯ ಬಿಜೆಪಿ ಸಂಘಟನಾ ಕಾರ್ಯದರ್ಶಿ ಬಿ.ಎಲ್‌. ಸಂತೋಷ್‌ ಶುಭ ಹಾರೈಸಿಸಿದ್ದಾರೆ. ಪ್ರಧಾನಿ ನರೇಂದ್ರ ಮೋದಿ ಹಾಗೂ ಬಿ.ಎಸ್. ಯಡಿಯೂರಪ್ಪ ಜತೆಗಿರುವ ಫೋಟೊವನ್ನು ಪೋಸ್ಟ್‌ ಮಾಡಿ ಹುಟ್ಟುಹಬ್ಬದ ಶುಭಾಶಯ( B.S. Yediyurappa Birthday) ಕೋರಿದ್ದಾರೆ.
ಅನೇಕರಿಗೆ ಈ ಭಾವಚಿತ್ರ, ಈ ದಿನದ ಅತ್ಯುತ್ತಮ ಚಿತ್ರ. ಆದರೆ ನಮಗೆ ಇದು ಅದಕ್ಕಿಂತಲೂ ಹೆಚ್ಚಿನ ಮಹತ್ವ ಹೊಂದಿದೆ. ಅನೇಕ ರಾಜಕೀಯ ಪಕ್ಷಗಳಲ್ಲಿ ಇಂತಹ ಚಿತ್ರವನ್ನು ನೋಡಲು ಸಾಧ್ಯವಿಲ್ಲ, ಏಕೆಂದರೆ ಅವು ಕುಟುಂಬ ಕೇಂದ್ರಿತವಾಗಿವೆ.
ಈ ಇಬ್ಬರೂ ನಾಯಕರು 70 ವರ್ಷ ದಾಟಿದ್ದಾರೆ. ಇಬ್ಬರೂ ಅತ್ಯಂತ ಸಾಮಾನ್ಯ ಹಿನ್ನೆಲೆಯಿಂದ ಬಂದವರಾಗಿದ್ದಾರೆ. ಒಬ್ಬರು ತಮ್ಮ ಕುಟುಂಬದ ಸಹಾಯಕ್ಕಾಗಿ ರೈಲ್ವೆ ನಿಲ್ದಾಣದಲ್ಲಿ ಚಹಾ ಮಾರಿದರು. ಮತ್ತೊಬ್ಬರು ಅಕ್ಕಿ ಗಿರಣಿಯಲ್ಲಿ ಗುಮಾಸ್ತನಾಗಿದ್ದರು. ಇಬ್ಬರೂ ಆರ್‌ಎಸ್‌ಎಸ್‌ ಮೂಲಕ ಸಾಮಾಜಿಕ ಜೀವನ ಆರಂಭಿಸಿದರು. ಒಬ್ಬರು ಪ್ರಚಾರಕರಾಗಿದ್ದವರು, ಮತ್ತೊಬ್ಬರು ತಾಲೂಕು ಕಾರ್ಯವಾಹರಾಗಿದ್ದರು.
ಇಬ್ಬರೂ ಕೇವಲ ತಮ್ಮ ಪರಿಶ್ರಮದಿಂದಲೇ ಈ ಹಂತಕ್ಕೆ ಬೆಳೆದಿದ್ದಾರೆ. ಇಬ್ಬರೂ ದಣಿವರಿಯದವರು, ಛಲಬಿಡದವರು, ಗೊಂದಲವಿಲ್ಲದ ಬದ್ಧತೆ ಹೊಂದಿರುವವರು, ಅನುಕಂಪ ಹೊಂದಿರುವವರು ಹಾಗೂ ಸಂಘಟನೆಯೊಂದಿಗೆ ಬೆಸೆದುಕೊಂಡಿರುವವರು.
ಇದನ್ನೂ ಓದಿ: Shivamogga Airport: ಬಿ.ಎಸ್. ಯಡಿಯೂರಪ್ಪ ಜನ್ಮದಿನಕ್ಕೆ ಶುಭ ಕೋರಿದ ಪ್ರಧಾನಿ ಮೋದಿ: ಮೊಬೈಲ್‌ ಫ್ಲಾಷ್‌ ಲೈಟ್‌ ಮೂಲಕ ಗೌರವ
ಇಂದು ಒಬ್ಬರು ವಿಶ್ವ ನಾಯಕನಾದರೆ ಮತ್ತೊಬ್ಬರು ಸಫಲ ಮುಖ್ಯಮಂತ್ರಿ. ಮುಂದಿನ ಅನೇಕ ವರ್ಷಗಳಿಗಾಗುವಷ್ಟು ಛಾಪನ್ನು ಇಬ್ಬರೂ ಮೂಡಿಸಿದ್ದಾರೆ. ಇವರಿಬ್ಬರ ನಡುವೆ ಇಂದು ಇರುವ ಆತ್ಮೀಯತೆಯ ಭಾವವೇ ಬಿಜೆಪಿಯನ್ನು ಭಿನ್ನವಾಗಿಸುತ್ತದೆ. ಇಬ್ಬರ ನಡುವೆ ಇರುವುದು ಸೈದ್ಧಾಂತಿಕ, ಸಂಘಟನಾತ್ಮಕ ಹಾಗೂ ಸಾರ್ವಜನಿಕರ ಕಲ್ಯಾಣಕ್ಕಾಗಿರುವ ಆತ್ಮೀಯತೆ.
ಈ ಆತ್ಮೀಯತೆಗೆ ಕಲಷವಿಟ್ಟಂತೆ ಇಂದು ಬಿ.ಎಸ್. ಯಡಿಯೂರಪ್ಪ ಅವರ ಜನ್ಮದಿನ. ಮತ್ತಷ್ಟು ಸಫಲ ಹಾಗೂ ಅರ್ಥಪೂರ್ಣ ಜೀವನವು ನಿಮ್ಮದಾಗಲಿ ಎಂದು ಆಶಿಸುತ್ತೇನೆ ಎಂದು ಬಿ.ಎಲ್‌. ಸಂತೋಷ್‌ ಹೇಳಿದ್ದಾರೆ.
