ಬೆಂಗಳೂರು: ರಾಜಧಾನಿ ಬೆಂಗಳೂರಿನಲ್ಲಿ ಹದಗೆಟ್ಟ ರಸ್ತೆಗಳಿಂದ ಜನರು ಹೈರಾಣಾಗಿರುವುದು ಹೊಸತೇನಲ್ಲ. ಹಿಂದೊಮ್ಮೆ ಹೆರೋಹಳ್ಳಿ ರಸ್ತೆಯಲ್ಲಿ ಕಲಾವಿದ ಬಾದಲ್ ನಂಜುಂಡಸ್ವಾಮಿ ರಸ್ತೆಗುಂಡಿಯಲ್ಲಿ (Bangalore Pothole) ಚಂದ್ರಗ್ರಹ ಸೃಷ್ಟಿ ಮಾಡಿದ್ದರು. ಇನ್ನೊಂದೆಡೆ ಮೈಸೂರು ರಸ್ತೆಯಲ್ಲಿ “ಮಂಗಳ ಗ್ರಹದಂತಹ ವಾತಾವರಣ ಕಾಣುತ್ತಿದೆ ನೋಡಿ” ಎಂದು ರಸ್ತೆ ಗುಂಡಿ ಮುಚ್ಚದ ಅಧಿಕಾರಿಗಳಿಗೆ ಸಾಮಾಜಿಕ ಜಾಲತಾಣದಲ್ಲಿ ಫೋಟೋ ಹಾಕಿ ಬಿಸಿ ಮುಟ್ಟಿಸಲಾಗಿತ್ತು. ಈಗ ಗೂಗಲ್ ಮ್ಯಾಪ್‌ನಲ್ಲಿ ರಸ್ತೆಗುಂಡಿಗಳ ಅಡ್ರೆಸ್‌ ಸಿಗುತ್ತಿದೆ!
ಗೂಗಲ್ ಮ್ಯಾಪ್‌ನಲ್ಲಿ ರಸ್ತೆಗುಂಡಿ ಎಲ್ಲಿದೆ ಎಂದು ಸರ್ಚ್‌ ಕೊಟ್ಟರೆ ಅಡ್ರೆಸ್‌ ಅನ್ನು ತೋರಿಸುತ್ತಿದೆ. ಇದೇ ಫೋಟೋವನ್ನು ಜನರು ಪೋಸ್ಟ್‌ ಮಾಡುತ್ತಾ ಅಧಿಕಾರಿಗಳ ಕಾರ್ಯವೈಖರಿಗೆ ಕಾಲೆಳೆಯುತ್ತಿದ್ದಾರೆ. ರಾಜಧಾನಿ ಬೆಂಗಳೂರಿನ ರಸ್ತೆಗುಂಡಿ ವಿಚಾರ ಮತ್ತೆ ವೈರಲ್ ಆಗುತ್ತಿದ್ದು, ರಸ್ತೆಗುಂಡಿಗೆ ಪ್ರತ್ಯೇಕ ವಿಳಾಸ ನೀಡಿರುವ ಕುರಿತು ದೊಡ್ಡ ಚರ್ಚೆಯೇ ನಡೆಯುತ್ತಿದೆ.
ಗೂಗಲ್ ಮ್ಯಾಪ್‌ನಲ್ಲಿ ಸ್ಥಾನ ಪಡೆದ ಬೆಂಗಳೂರಿನ ರಸ್ತೆಗುಂಡಿ
ಗೂಗಲ್ ಮ್ಯಾಪ್‌ನಲ್ಲಿ Abizer’s pothole ಎಂದು ಬೆಳ್ಳಂದೂರು ರಸ್ತೆಗುಂಡಿಯ ಲೊಕೇಷನ್‌ ಕಾಣುತ್ತಿದೆ. nimo tai ಎಂಬ ಟ್ವಿಟರ್ ಅಕೌಂಟ್‌ನಿಂದ ರಸ್ತೆಗುಂಡಿಯ ಸ್ಕ್ರೀನ್ಶಾಟ್ ವೈರಲ್ ಆಗುತ್ತಿದೆ. ಇದು ನಾನು ಕಂಡ ಅದ್ಭುತ ರಸ್ತೆಗುಂಡಿ, ದಯವಿಟ್ಟು ಇಲ್ಲಿಗೆ ಭೇಟಿ ಕೊಡಿ ಎಂದು ಟ್ಯಾಗ್‌ಲೈನ್‌ ಹಾಕಿದ್ದಾರೆ.
ವೈರಲ್ ಆಗುತ್ತಿದ್ದಂತೆ ವಿಳಾಸ ತೆಗೆದು ಹಾಕಿದ ಗೂಗಲ್
ಬೆಳ್ಳಂದೂರು ಹೋಗಲು ರಸ್ತೆಗುಂಡಿಯನ್ನು ಲ್ಯಾಂಡ್‌ ಮಾರ್ಕ್‌ ಆಗಿ ನೀಡಲಾಗಿತ್ತು. ಈ ರಸ್ತೆಗುಂಡಿ ವಿಳಾಸದ ಪೋಸ್ಟ್‌ ವೈರಲ್ ಆಗುತ್ತಿದ್ದಂತೆ ಲ್ಯಾಂಡ್‌ ಮಾರ್ಕ್‌ ಅನ್ನು ಗೂಗಲ್‌ನಿಂದ ತೆಗೆದುಹಾಕಲಾಗಿದೆ. ಆದರೆ, ಈ ಪೋಸ್ಟ್‌ನ ಸ್ಕ್ರೀನ್ಶಾಟ್ ಸೋಷಿಯಲ್‌ ಮೀಡಿಯಾದಲ್ಲಿ ಹಾಕಿ ನೆಟ್ಟಿಗರು ಕಮೆಂಟ್‌ಗಳನ್ನು ಮಾಡುತ್ತಿದ್ದಾರೆ.
ಇದನ್ನೂ ಓದಿ | Bangalore pot holes | ರಸ್ತೆ ಗುಂಡಿ, ಅವೈಜ್ಞಾನಿಕ ಕಾಮಗಾರಿಗೆ ಮತ್ತಿಬ್ಬರು ಬಲಿ