ಬೆಂಗಳೂರು: ತಾನು ಸಂಚಾರ ನಿಯಮ ಉಲ್ಲಂಘಿಸಿ, ದಂಡ ವಿಧಿಸಿದ ಪೊಲೀಸರ ಬಳಿ ‘ಸಾಕ್ಷಿ’ ಕೇಳಿದ ಯುವಕನಿಗೆ ಬೆಂಗಳೂರು ಸಂಚಾರ ಪೊಲೀಸರು ಸರಿಯಾಗಿ ಬಿಸಿಮುಟ್ಟಿಸಿದ್ದಾರೆ. ಆತ ಸಾಕ್ಷಿ ಕೇಳಿದ ಕೆಲ ನಿಮಿಷಗಳ ಒಳಗೆ ಬೆಂಗಳೂರು ಟ್ರಾಫಿಕ್ ಪೊಲೀಸರು ಪ್ರತಿಕ್ರಿಯೆ ನೀಡಿದ್ದಾರೆ, ಸಾಕ್ಷಿಯನ್ನೂ ಕೊಟ್ಟಿದ್ದಾರೆ. ಯುವಕನ ಪಾಡು ನೋಡಿ ನೆಟ್ಟಿಗರು ನಗುತ್ತಿದ್ದಾರೆ..!
ಹೆಲ್ಮೆಟ್ ಇಲ್ಲದೆ ಗಾಡಿ ಓಡಿಸಿದ್ದ ಎಂಬ ಕಾರಣಕ್ಕೆ ಫೆಲಿಕ್ಸ್ ರಾಜ್ ಎಂಬುವರಿಗೆ ಪೊಲೀಸರು ಚಲನ್ ಕಳಿಸಿದ್ದರು. ಆ ದಂಡ ನೋಡಿ ಬೇಸರಗೊಂಡ ರಾಜ್ ಒಂದು ಟ್ವೀಟ್ ಮಾಡಿದ್ದರು. ಅದರಲ್ಲಿ ತನಗೆ ಕಳಿಸಲಾದ ಚಲನ್ ಫೋಟೋ ಹಾಕಿದ್ದರು. ಆ ಚಲನ್ನಲ್ಲಿ ರಾಜ್ ಸ್ಕೂಟರ್ನ ನಂಬರ್ ಪ್ಲೇಟ್ ಕಾಣುವಂಥ ಫೋಟೋ ಮಾತ್ರ ಇತ್ತು. ಅದನ್ನೇ ರಾಜ್ ಪ್ರಶ್ನಿಸಿದ್ದರು. ‘ಹೀಗೆ ಚಲನ್ನಲ್ಲಿ ನನ್ನ ಸ್ಕೂಟರ್ನ ಫೋಟೋ ಹಾಕಿದ್ದಿರಿ. ಇಲ್ಲಿ ನಾನು ಕಾಣಿಸುತ್ತಿಲ್ಲ. ಹೀಗಿರುವಾಗ ನಾನು ಹೆಲ್ಮೆಟ್ ಇಲ್ಲದೆ ಗಾಡಿ ಓಡಿಸಿದ್ದೇನೆ ಎಂಬುದಕ್ಕೆ ನಿಮ್ಮ ಬಳಿ ಏನು ಸಾಕ್ಷಿಯಿದೆ?’ ಎಂದು ಪ್ರಶ್ನಿಸಿದ್ದರು. ಹಾಗೇ, ಈ ಮೊದಲೂ ನನಗೆ ಇದೇ ಅನುಭವ ಆಗಿದೆ. ತಪ್ಪು ಮಾಡದೆ ಇದ್ದರೂ ದಂಡ ತುಂಬಿದ್ದೇನೆ. ಈಗ ಮತ್ತೊಮ್ಮೆ ಸುಮ್ಮನೆ ದಂಡ ಕೊಡಲಾರೆ ಎಂದಿದ್ದರು. ಬೆಂಗಳೂರು ಟ್ರಾಫಿಕ್ ಪೊಲೀಸ್ ಮತ್ತು ಬೆಂಗಳೂರು ಸಿಟಿ ಪೊಲೀಸ್ ಟ್ವಿಟರ್ ಖಾತೆಗಳನ್ನು ಟ್ಯಾಗ್ ಕೂಡ ಮಾಡಿದ್ದರು.
ರಾಜ್ ಟ್ವೀಟ್ ಮಾಡಿ ಕೆಲವು ನಿಮಿಷಗಳಲ್ಲಿ ಬೆಂಗಳೂರು ಟ್ರಾಫಿಕ್ ಪೊಲೀಸ್ ಇನ್ನೊಂದು ಫೋಟೋವನ್ನು ತಮ್ಮ ಟ್ವಿಟರ್ನಲ್ಲಿ ಪೋಸ್ಟ್ ಮಾಡಿದ್ದಾರೆ ಮತ್ತು ಸಾಕ್ಷಿ ಕೇಳಿದ್ದ ಫೆಲಿಕ್ಸ್ ರಾಜ್ನನ್ನು ಟ್ಯಾಗ್ ಮಾಡಿದ್ದಾರೆ. ಅದರಲ್ಲಿ ‘ಫೆಲಿಕ್ಸ್ ರಾಜ್ ಹೆಲ್ಮೆಟ್ ಇಲ್ಲದೆ ಟ್ರಾಫಿಕ್ನಲ್ಲಿ ಸ್ಕೂಟರ್ ಓಡಿಸುತ್ತಿದ್ದುದು ಕಂಡುಬಂದಿದೆ. ಅಂದರೆ ಫೆಲಿಕ್ಸ್ ರಾಜ್ ಯಾವುದೋ ಸಿಗ್ನಲ್ನಲ್ಲಿ ನಿಂತಿದ್ದಾಗ ಪೊಲೀಸ್ ಕ್ಯಾಮರಾ ಕಣ್ಣಿಗೆ ಸಿಕ್ಕಿಬಿದ್ದಿದ್ದಾರೆ’. ಟ್ರಾಫಿಕ್ ಪೊಲೀಸರು ಈ ಫೋಟೋ ಪೋಸ್ಟ್ ಮಾಡುತ್ತಿದ್ದಂತೆ ಫೆಲಿಕ್ಸ್ ರಾಜ್ ತಮ್ಮ ಟ್ವೀಟ್ ಡಿಲೀಟ್ ಮಾಡಿದ್ದಾರೆ. ಎಂಥಾ ಎಪಿಕ್ ರಿಪ್ಲೈ ಕೊಟ್ಟರು ಪೊಲೀಸರು ಎಂದು ಸೋಷಿಯಲ್ ಮೀಡಿಯಾ ಬಳಕೆದಾರರು ಕಮೆಂಟ್ ಮಾಡುತ್ತಿದ್ದಾರೆ.
ಇದನ್ನೂ ಓದಿ: Viral Video | ಜಕಾರ್ತದಲ್ಲಿ ಬೆಂಕಿಯಿಂದ ಹೊತ್ತಿ ಉರಿದ ಮಸೀದಿ; ಕುಸಿದು ಬಿದ್ದ ಬೃಹತ್ ಗುಮ್ಮಟ