ಬೆಂಗಳೂರು: ರಾಜಧಾನಿಯ ನೀರಿನ ಬಿಕ್ಕಟ್ಟು (Bangalore Water Crisis) ದೇಶಾದ್ಯಂತ ಸುದ್ದಿಯಾಗುತ್ತಿದೆ. ಇದರ ನಡುವೆಯೇ, ಬಳಸಿದ ನೀರಿನ ನಿರ್ವಹಣೆಯ (used water management) ನಗರವು ಎರಡನೇ ಅತ್ಯುತ್ತಮ ರ್ಯಾಂಕ್ (Second Rank) ಗಳಿಸಿದೆ.
ಕೌನ್ಸಿಲ್ ಆನ್ ಎನರ್ಜಿ, ಎನ್ವಿರಾನ್‌ಮೆಂಟ್ ಮತ್ತು ವಾಟರ್ (ಸಿಇಇಡಬ್ಲ್ಯು – CEEW)) ಎಂಬ ಥಿಂಕ್ ಟ್ಯಾಂಕ್ ಮಂಗಳವಾರ ಬಿಡುಗಡೆ ಮಾಡಿದ ವರದಿಯಲ್ಲಿ ಈ ಅಂಶ ಹೊರಗೆಡಹಿದೆ. ಬಳಸಿದ ನೀರಿನ ನಿರ್ವಹಣೆಯ ಮೌಲ್ಯಮಾಪನದಲ್ಲಿ ಬೆಂಗಳೂರು ಎರಡನೇ ಸ್ಥಾನದಲ್ಲಿದೆ. ಬೆಂಗಳೂರಿಗಿಂತ ಉತ್ತಮವಾಗಿ ಕಾರ್ಯನಿರ್ವಹಿಸಿದ ಸೂರತ್ ಮೊದಲ ಸ್ಥಾನದಲ್ಲಿದೆ. ಇದು 10 ರಾಜ್ಯಗಳ ಸುಮಾರು 500 ನಗರಗಳ ಸಮೀಕ್ಷೆ.
ಅಧ್ಯಯನದ ಸಂಶೋಧನೆಗಳ ಆಧಾರದ ಮೇಲೆ ಸಂಯೋಜಿತ ಸೂಚ್ಯಂಕದಲ್ಲಿ ಸೂರತ್ ಮತ್ತು ಬೆಂಗಳೂರು ಕ್ರಮವಾಗಿ 5ರಲ್ಲಿ 3.32 ಮತ್ತು 3.23 ಅಂಕಗಳನ್ನು ಗಳಿಸಿವೆ. ಬೇರೆ ಯಾವುದೇ ನಗರ 3ಕ್ಕಿಂತ ಹೆಚ್ಚು ಸ್ಕೋರ್ ಮಾಡಲಿಲ್ಲ. 2.25ಕ್ಕಿಂತ ಹೆಚ್ಚು ಸ್ಕೋರ್‌ಗಳನ್ನು 47 ನಗರಗಳು ಹಾಗೂ 1.5 ಮತ್ತು 2.25 ನಡುವೆ 151 ನಗರಗಳು ಸ್ಕೋರ್ ಮಾಡಿವೆ.
ಸಿಇಇಡಬ್ಲ್ಯು ಮೂಲಕ ನಡೆಸಿದ ʼಭಾರತದಲ್ಲಿ ಬಳಸಿದ ನೀರಿನ ನಿರ್ವಹಣೆಯ ಮೂಲಕ ಆರ್ಥಿಕತೆಯನ್ನು ಸಕ್ರಿಯಗೊಳಿಸುವುದು: ನಗರ ಸ್ಥಳೀಯ ಸಂಸ್ಥೆಗಳ ಕಾರ್ಯಕ್ಷಮತೆ ನಿರ್ಣಯಿಸಲು ಪುರಸಭೆಯ ಸೂಚ್ಯಂಕ’ ಎಂಬ ಅಧ್ಯಯನವು ಐದು ವಿಷಯಗಳಲ್ಲಿ 25 ನಿಯತಾಂಕಗಳ ಅಡಿಯಲ್ಲಿ 27 ಸೂಚಕಗಳನ್ನು ಆಧರಿಸಿದೆ- ಹಣಕಾಸು, ಮೂಲಸೌಕರ್ಯ, ದಕ್ಷತೆ, ಆಡಳಿತ ಮತ್ತು ಡೇಟಾ ಮತ್ತು ಮಾಹಿತಿ ಇತ್ಯಾದಿ ಸೇರಿವೆ. ಸಂಶೋಧನೆಯು ಕರ್ನಾಟಕ, ಆಂಧ್ರಪ್ರದೇಶ, ಛತ್ತೀಸ್‌ಗಢ, ಗುಜರಾತ್, ಹರಿಯಾಣ, ಜಾರ್ಖಂಡ್, ಮಧ್ಯಪ್ರದೇಶ, ಪಂಜಾಬ್, ರಾಜಸ್ಥಾನ ಮತ್ತು ಪಶ್ಚಿಮ ಬಂಗಾಳಕ್ಕೆ ಸೀಮಿತವಾಗಿವೆ. ಒಳಚರಂಡಿ ನೀರನ್ನು ಸಂಸ್ಕರಿಸಿ ಮರುಬಳಕೆ ಮಾಡುವ ನೀತಿಯನ್ನು ಅಳವಡಿಸಿಕೊಂಡಿರುವ 10 ರಾಜ್ಯಗಳು ಇಲ್ಲಿವೆ.
ವರದಿಯ ಸಂಶೋಧನೆಗಳು 2021ರಲ್ಲಿ ಕೇಂದ್ರ ಮಾಲಿನ್ಯ ನಿಯಂತ್ರಣ ಮಂಡಳಿ (CPCB) ಮತ್ತು ಇತರ ಸರ್ಕಾರಿ ಮತ್ತು ಸರ್ಕಾರೇತರ ಮೂಲಗಳು ಪ್ರಕಟಿಸಿದ ಇತ್ತೀಚಿನ ರಾಷ್ಟ್ರೀಯ ಮಟ್ಟದ ಒಳಚರಂಡಿ ದಾಸ್ತಾನು ಡೇಟಾವನ್ನು ಆಧರಿಸಿವೆ. ಹೆಚ್ಚುತ್ತಿರುವ ನಗರ ನೀರಿನ ಬೇಡಿಕೆ ಮತ್ತು ಕ್ಷೀಣಿಸುತ್ತಿರುವ ಅಂತರ್ಜಲದ ಪರಿಣಾಮ, ತೋಟಗಾರಿಕೆ ಮತ್ತು ಕೈಗಾರಿಕೆಗಳಿಗಾಗಿ ನೀರನ್ನು ಸಂಸ್ಕರಿಸಲು ಮತ್ತು ಮರುಬಳಕೆ ಮಾಡಲು CEEW ಅಧ್ಯಯನವು ಒತ್ತಾಯಿಸಿದೆ.
ಅಧ್ಯಯನದಲ್ಲಿ, 10 ರಾಜ್ಯಗಳ 503 ನಗರಗಳಲ್ಲಿ ಅರ್ಧಕ್ಕಿಂತ ಹೆಚ್ಚು 5ರಲ್ಲಿ 0.75 ಮತ್ತು 1.5ರ ನಡುವಿನ ಸ್ಕೋರ್ ಗಳಿಸಿವೆ. ಈ ನಗರಗಳು ನೀರಿನ ನಿರ್ವಹಣೆಯಲ್ಲಿ ವಿಫಲಗೊಂಡಿವೆ. ಇಲ್ಲಿ ಹೆಚ್ಚು ಸಮಗ್ರ ವಿಧಾನದ ಅಗತ್ಯವಿದೆ ಎಂದು ಅಧ್ಯಯನವು ಗಮನಿಸಿದೆ.
ಮೊದಲ ಎರಡು ರಾಜ್ಯಗಳಾದ ಹರಿಯಾಣ ಮತ್ತು ಕರ್ನಾಟಕ ಕ್ರಮವಾಗಿ 1.94 ಮತ್ತು 1.74 ಅಂಕ ಗಳಿಸಿವೆ. ಕೇವಲ ಎರಡು ನಗರಗಳು- ಸೂರತ್ ಮತ್ತು ಬೆಂಗಳೂರು- ಅತ್ಯುತ್ತಮ (3ರ ಮೇಲಿನ) ವಿಭಾಗದಲ್ಲಿವೆ. 20 ಹೆಚ್ಚು ರ್ಯಾಂಕ್‌ನ ನಗರಗಳಲ್ಲಿ ಒಂಬತ್ತು ಹರಿಯಾಣದಿಂದ ಬಂದವು. ಗುಜರಾತ್ ಮತ್ತು ಕರ್ನಾಟಕ ಇತರ ಉನ್ನತ-ಕಾರ್ಯನಿರ್ವಹಣೆಯ ರಾಜ್ಯಗಳಾಗಿವೆ. ಕ್ರಮವಾಗಿ ನಾಲ್ಕು ಮತ್ತು ಮೂರು ನಗರಗಳು ಅಗ್ರ 20 ನಗರಗಳಲ್ಲಿ ಕಾಣಿಸಿಕೊಂಡಿವೆ.
“ಕರ್ನಾಟಕ ಮತ್ತು ಹರಿಯಾಣ ಬಳಸಿದ ನೀರಿನ ಸಂಸ್ಕರಣೆ ಮತ್ತು ಮರುಬಳಕೆಗಾಗಿ ಸಮಗ್ರ ಶ್ರೇಣೀಕೃತ ಕ್ರಿಯಾ ಯೋಜನೆಗಳನ್ನು ಜಾರಿಗೆ ತಂದಿವೆ” ಎಂದು ಅಧ್ಯಯನವು ಗಮನಿಸಿದೆ. ಬೆಂಗಳೂರು ಮೂಲದ ಜಲ ತಜ್ಞ ಎಸ್ ವಿಶ್ವನಾಥ್ ಅವರ ಪ್ರಕಾರ, “ಬೆಂಗಳೂರು ಅತ್ಯುತ್ತಮ ನೀರು ಸಂಸ್ಕರಣಾ ಘಟಕಗಳನ್ನು ಹೊಂದಿದೆ ಮತ್ತು ದೇಶದ ದೊಡ್ಡ ನಗರಗಳ ಉತ್ತಮ ಸಂಸ್ಕರಣಾ ದರಗಳಲ್ಲಿ ಒಂದನ್ನು ಹೊಂದಿದೆ.”
ಪ್ರಸ್ತುತ ಬೆಂಗಳೂರಿನ ಸಂಸ್ಕರಿಸಿದ ಕೊಳಚೆ ನೀರನ್ನು ನಗರದೊಳಗಿನ ಕೆರೆಗಳನ್ನು ತುಂಬಲು ಮತ್ತು ನೆರೆಯ ಶುಷ್ಕ ಜಿಲ್ಲೆಗಳಲ್ಲಿ ನೀರಾವರಿ ಉದ್ದೇಶಗಳಿಗಾಗಿ ಬಳಸಲಾಗುತ್ತದೆ. ಬೆಂಗಳೂರಿನ ಈಗಿನ ನೀರಿನ ಬಿಕ್ಕಟ್ಟು ಇರುವುದು ಪೈಪ್‌ಲೈನ್‌ ಮೂಲಕ ನೀರು ಸರಬರಾಜು ಇಲ್ಲದ ಪ್ರದೇಶಗಳಲ್ಲಿ. ಇವರು ಬೋರ್‌ವೆಲ್‌ಗಳನ್ನು ಅವಲಂಬಿಸಿದ್ದಾರೆ. “ಈಗ ನಗರದೊಳಗಿನ ಮನೆಗಳಿಗೆ ಸಂಸ್ಕರಿಸಿದ ಒಳಚರಂಡಿ ನೀರನ್ನು ತಲುಪಿಸುವ ಕುರಿತು ಒಂದು ಶಿಫ್ಟ್ ಅನ್ನು ಯೋಜಿಸಲಾಗಿದೆ. ನಗರದಲ್ಲಿ ಮುಂಬರುವ ಲೇಔಟ್‌ಗಳನ್ನು ದ್ವಿ-ಪೈಪಿಂಗ್‌ನೊಂದಿಗೆ ನಿರ್ಮಿಸಲಾಗುತ್ತಿದೆ. ಅಲ್ಲಿ ಮರುಬಳಕೆಯ ನೀರನ್ನು ಮನೆಗಳಿಗೆ ಸರಬರಾಜು ಮಾಡಬಹುದು” ಎಂದು ವಿಶ್ವನಾಥ್ ಹೇಳುತ್ತಾರೆ.
ಮರುಬಳಕೆಯ ನೀರಿನ ಪರಿಣಿತರಾದ ನಿಮೇಶ್ ವಾಶಿ, ಸಂಸ್ಕರಿಸಿದ ಒಳಚರಂಡಿಯ ವಾಣಿಜ್ಯ ಮೌಲ್ಯವನ್ನು ಅರಿತುಕೊಂಡ ಮೊದಲ ಭಾರತೀಯ ನಗರ ಸೂರತ್ ಎನ್ನುತ್ತಾರೆ. “2014ರಿಂದ ಸೂರತ್ ನಗರ ಜವಳಿ ಉದ್ಯಮಕ್ಕೆ ನೀರನ್ನು ಒದಗಿಸುತ್ತಿದೆ. ಇದು ಕೈಗಾರಿಕೆಗಳು, ನಾಗರಿಕ ಸಂಸ್ಥೆ ಮತ್ತು ಪರಿಸರ ಎರಡಕ್ಕೂ ಗೆಲುವು. ಕುಡಿಯುವ ನೀರಿನ ಗುಣಮಟ್ಟದಷ್ಟು ಉತ್ತಮವಾದ ಕೆಲವು ತೃತೀಯ ಹಂತದ ಸಂಸ್ಕರಿಸಿದ ಒಳಚರಂಡಿ ನೀರನ್ನು ತಾಪಿ ನದಿಗೆ ಬಿಡಲಾಗುತ್ತಿದೆ” ಎಂದು ಅವರು ಹೇಳಿದರು.
ಇದನ್ನೂ ಓದಿ: IPL 2024: ಬೆಂಗಳೂರಿನ ಐಪಿಎಲ್‌ ಪಂದ್ಯಗಳಿಗೆ ನೀರಿನ ಅಭಾವ ಇಲ್ಲ; ಕೆಎಸ್ಸಿಎ