ಬೆಂಗಳೂರು: ಶೋಕಿ ಮೋಜು ಮಸ್ತಿಗಾಗಿ ಬೈಕ್ ಕಳ್ಳತನ ಮಾಡುತ್ತಿದ್ದ, ಖತರ್ನಾಕ್ ಕಳ್ಳ ಮತ್ತು ಇಬ್ಬರು ಅಪ್ರಾಪ್ತ ಬಾಲಕರನ್ನು ಕೆ.ಆರ್. ಪುರಂ ಪೊಲೀಸರು ಬಂಧಿಸಿದ್ದಾರೆ.
ಬಂಧಿತ ಆರೋಪಿಯನ್ನು ಶಶಾಂಕ್‌ ಎಂದು ಗುರುತಿಸಲಾಗಿದೆ. 19ವರ್ಷದ ಈತ ಕೆ.ಆರ್. ಪುರಂನ ಮಸೀದಿ ರಸ್ತೆಯಲ್ಲಿ ವಾಸವಾಗಿದ್ದ. ಯಮಹಾ, ಆರ್‌ಎಕ್ಸ್‌ ಮತ್ತು ಹೋಂಡ ಡಿಯೋ ವಾಹನಗಳನ್ನೇ ಆರೋಪಿಗಳು ಹೆಚ್ಚು ಟಾರ್ಗೇಟ್ ಮಾಡುತ್ತಿದ್ದರು. ಬಂಧಿತರಿಂದ ₹9 ಲಕ್ಷ ಮೌಲ್ಯದ 17 ಬೈಕ್‌ಗಳನ್ನು ಪೋಲಿಸರು ವಶಕ್ಕೆ ಪಡೆದುಕೊಂಡಿದ್ದಾರೆ.
ಕದ್ದ ಬೈಕ್ ಅನ್ನು ಮಾರಿ ಶೋಕಿ ಮಾಡುತ್ತಿದ್ದ ಆರೋಪಿಗಳು, ರೇಸ್ ಹುಚ್ಚಿರುವವರಿಗೆ ಆರ್‌ಎಕ್ಸ್‌ ಬೈಕನ್ನು ಮಾರಾಟ ಮಾಡಿದ್ದರು. ತನ್ನ ಕಾರ್ಯಕ್ಕೆ ಶಶಾಂಕ್‌, ಇಬ್ಬರು ಆಪ್ರಾಪ್ತರನ್ನೂ ಬಳಸಿಕೊಳ್ಳುತ್ತಿದ್ದ. ಹೀಗೆಯೇ ಕದ್ದ ಬೈಕ್ ಮಾರಾಟ ಮಾಡಿ ಐಷಾರಾಮಿ ಜೀವನ ನಡೆಸುತ್ತಿದ್ದರು ಎಂದು ಕೆ.ಆರ್. ಪುರಂ ಪೊಲೀಸರು ತಿಳಿಸಿದ್ದಾರೆ