ಬೆಂಗಳೂರು: ಒಮಿಕ್ರಾನ್‌ ರೂಪಾಂತರಿ ವೈರಸ್‌ BF.7ನ (Coronavirus) ತೀವ್ರತೆ ಹೇಗಿರಬಹುದು? ಭಾರತಕ್ಕೆ ಕಾಲಿಟ್ಟರೆ ಯಾವ ರೀತಿ ಪರಿಣಾಮ ಬೀರಬಹುದು ಎಂಬುದರ ಕುರಿತು ಸಂಶೋಧನೆ ನಡೆಸಲು ವಿಜ್ಞಾನಿಗಳು ಸಜ್ಜಾಗುತ್ತಿದ್ದಾರೆ. ನೆರೆ ರಾಷ್ಟ್ರಗಳಲ್ಲಿ ರೂಪಾಂತರಿ ಅತಿವೇಗವಾಗಿ ಹರಡುತ್ತಿದ್ದು, ಸಾವು ನೋವಿಗೆ ಕಾರಣವಾಗುತ್ತಿದೆ. ಇದೇ ರೂಪಾಂತರಿ ವೈರಸ್‌ ಭಾರತದಲ್ಲಿ ಯಾವ ರೀತಿ ವರ್ತಿಸುತ್ತದೆ ಎಂಬುದನ್ನು ತಿಳಿಯಲು ತಜ್ಞರು ಮುಂದಾಗಿದ್ದಾರೆ.
ರಾಜ್ಯದಲ್ಲಿ ಸಕ್ರಿಯ ಪ್ರಕರಣಗಳು ಕಡಿಮೆ ಇದ್ದರೂ ಹೊಸ ರೂಪಾಂತರಿ ಯಾವ ಸ್ವರೂಪದಲ್ಲಿ ಎಷ್ಟು ಪರಿಣಾಮ ಬೀರಬಹುದು ಎಂಬುದರ ಕುರಿತು ಅಂದಾಜಿಲ್ಲ. ಈ ಬಗ್ಗೆ ಆತಂಕ ಇದ್ದು, ಬೆಂಗಳೂರಿನ ಬಯೋ ಇನ್ನೋವೇಷನ್‌ ಸೆಂಟರ್‌ನಲ್ಲಿ BF.7 ತಳಿಯ ಸಂಶೋಧನೆ ನಡೆಸಲು ಚಿಂತನೆ ನಡೆದಿದೆ.
ಇದಕ್ಕಾಗಿ ಚೀನಾದಿಂದ ಬೆಂಗಳೂರಿಗೆ BF.7ನ ಪ್ರೋಟಿನ್ ತರಿಸಿಕೊಳ್ಳಲು ಬಯೋ ಇನ್ನೋವೇಷನ್‌ನ ವಿಜ್ಞಾನಿಗಳು ಮುಂದಾಗಿದ್ದಾರೆ. ಡಾ. ಹೃಷಿಕೇಶ್ ದಾಮ್ಲೆ ಹಾಗೂ ಡಾ. ಶಿವ ಬಾಲಸುಬ್ರಮಣ್ಯರಿಂದ ಸಂಶೋಧನೆ ನಡೆಯಲಿದೆ. ಎರಡು ವಾರಗಳಲ್ಲಿ ರೂಪಾಂತರಿ ವೈರಸ್‌ನ ಪ್ರೋಟಿನ್ ತರಿಸುವ ಚಿಂತನೆ ಇದ್ದು, ಸರ್ಕಾರದ ಅನುಮತಿ ಪಡೆದು ಸಂಶೋಧನೆ ಆರಂಭವಾಗಲಿದೆ.
ದೇಹದಲ್ಲಿನ T cell ಇಮ್ಯುನಿಟಿಯ ಬಗ್ಗೆ ಸಂಶೋಧನೆ ನಡೆಸಲಾಗುತ್ತದೆ. ಇದರಲ್ಲಿ BF.7 ನಲ್ಲಿ ರೆಸ್ಪಾನ್ಸ್ ಇಲ್ಲ ಎಂದಾದರೆ ವ್ಯಾಕ್ಸಿನ್ ಪಡೆಯಬೇಕಾಗುತ್ತದೆ. ಇದರಿಂದಾಗಿ ವೈರಸ್‌ನಿಂದ ಏನೆಲ್ಲಾ ಪರಿಣಾಮ ಆಗಲಿದೆ ಎಂದು ತಿಳಿಯಲಿದೆ. ಈ ಹಿಂದೆ ಮೂರನೇ ಅಲೆಯ ಸಮಯದಲ್ಲಿ BA.5 ಪ್ರೋಟಿನ್ ತರಿಸಿ ಸಂಶೋಧನೆ ನಡೆಸಲಾಗಿತ್ತು. ಈ ವೇಳೆ ಭಾರತೀಯರಿಗೆ ಹೆಚ್ಚು ಪರಿಣಾಮ ಬೀರುವುದಿಲ್ಲ ಎಂಬ ವರದಿ ಬಂದಿತ್ತು. ಬಹುಬೇಗವಾಗಿ ವೈರಸ್‌ ಹರುಡುವಿಕೆ ಇದ್ದರೂ ಸಾವು-ನೋವಿಗೆ ಕಾರಣವಾಗಲಿಲ್ಲ. ಹೀಗಾಗಿ ಹೊಸ ರೂಪಾಂತರಿ ಕುರಿತು ತಿಳಿಯಲು ವಿಜ್ಞಾನಿಗಳು ಮುಂದಾಗಿದ್ದಾರೆ.
ಭಾರತದಲ್ಲಿ ಯಾವೆಲ್ಲ ರೂಪಾಂತರಿ ಕಾಲಿಟ್ಟಿವೆ?
1.ಆಲ್ಫಾ
2.ಬೀಟಾ
೩.ಡೆಲ್ಟಾ ಮತ್ತು ಸಬ್ ಲೈನ್‌ಗಳು
4. ಈಟಾ, ಕಪ್ಪಾ, ಪ್ಯಾಂಗೋ
5. ಒಮಿಕ್ರಾನ್‌
6. ಒಮಿಕ್ರಾನ್‌ನ ರೂಪಾಂತರಿಗಳಾದ BA1.1.529, BA1, BA2, BA3 ಮತ್ತು BA4, BA5
ಇದನ್ನೂ ಓದಿ | Coronavirus | ಕೋವಿಡ್‌ ಎದುರಿಸಲು ಇಂದು ಸಿಎಂ ಸಭೆ; ಹೊಸ ವರ್ಷದ ಸಂಭ್ರಮಾಚರಣೆಗೆ ಬ್ರೇಕ್‌?