ಬೆಳಗಾವಿ: ಕುಂದಾ ನಗರಿಯನ್ನೇ ಬೆಚ್ಚಿ ಬೀಳಿಸಿದ್ದ 9 ವರ್ಷದ ಬಾಲಕಿಯ (9 year old girl) ಅಪಹರಣ ಪ್ರಕರಣದಲ್ಲಿ (Kidnap Case) ತ್ವರಿತ ಕಾರ್ಯಾಚರಣೆ ನಡೆಸಿದ ಪೊಲೀಸರು ಕೇಸು ದಾಖಲಾದ ಕೇವಲ 12 ಗಂಟೆಯೊಳಗೆ ಆರೋಪಿಯನ್ನು (kidnapper arrested) ಬಂಧಿಸಿದ್ದಾರೆ. ಬೆಳಗಾವಿಯ (Belagavi news) ಮಾರುತಿ ನಗರದ ಗಜಾನನ ಪಾಟೀಲ (40) ಎಂಬಾತನೇ ಟ್ಯೂಷನ್‌ಗೆ ಹೋಗುತ್ತಿದ್ದ ಬಾಲಕಿಯನ್ನು ಎತ್ತಿಕೊಂಡು ಹೋಗಿ ಅಪಹರಿಸಲು ಯತ್ನಿಸಿದ ಧೂರ್ತ. ಈಗ ಆತನನ್ನು ಪೊಲೀಸರು ತೀವ್ರ ವಿಚಾರಣೆಗೆ ಗುರಿಪಡಿಸಿದ್ದಾರೆ.
ಮಂಗಳವಾರ ಸಂಜೆ 9 ವರ್ಷದ ಬಾಲಕಿ ಟ್ಯೂಷನ್‌ಗೆಂದು ಹೋಗುತ್ತಿದ್ದಾಗ ಚಾಕೊಲೇಟ್‌ ಆಮಿಷ ಒಡ್ಡುತ್ತಾ ಸಮೀಪಿಸಿದ್ದ. ಹತ್ತಿರ ಬಂದವನೇ ಎತ್ತಿಕೊಂಡು ಪರಾರಿಯಾಗಲು ಯತ್ನಿಸಿದ್ದ. ಈ ವೇಳೆ ಬಾಲಕಿ ಕಿರುಚಿದ್ದರಿಂದ ಜನ ಬರುವ ಸೂಚನೆ ಕಂಡು ಆರೋಪಿ ಓಡಿ ಹೋಗಿದ್ದ. ಈ ಘಟನೆಯ ಬಗ್ಗೆ ಆತಂಕಿತರಾದ ಹೆತ್ತವರು ಟಿಳಕವಾಡಿ ಪೊಲೀಸ್‌ ಠಾಣೆಗೆ ದೂರು ನೀಡಿದ್ದರು.
ವಿಷಯ ತಿಳಿಯುತ್ತಿದ್ದಂತೆಯೇ ಘಟನೆ ನಡೆದ ಸ್ಥಳದ ಸಮೀಪದ ಮನೆಗಳ ಸಿಸಿಟಿವಿ ಕ್ಯಾಮೆರಾಗಳನ್ನು ಪರಿಶೀಲಿಸಿದ ಪೊಲೀಸರಿಗೆ ಘಟನೆಯ ಸ್ಪಷ್ಟ ಚಿತ್ರಣ ಸಿಕ್ಕಿತ್ತು. ಜತೆಗೆ ಆರೋಪಿ ಯಾರೆಂಬ ಬಗ್ಗೆ ಸಣ್ಣ ಸುಳಿವೂ ತಿಳಿಯಿತು. ರಾತ್ರೋರಾತ್ರಿ ಕಾರ್ಯಾಚರಣೆಗೆ ಇಳಿದ ತನಿಖಾಧಿಕಾರಿ ಹಾಗೂ ಉದ್ಯಮಭಾಗ ಠಾಣೆಯ ಪಿಐ ರಾಮಣ್ಣ ಬೀರಾದಾರ್‌ ಮತ್ತು ಟೀಮ್‌ ಕೇವಲ 12 ಗಂಟೆಯಲ್ಲಿ ಆರೋಪಿಯನ್ನು ಗಜಾನನ ಪಾಟೀಲ್‌ (40) ಎಂದು ಗುರುತಿಸಿ ಆತನನ್ನುಬಂಧಿಸಿತು. ಬೆಳಗಾವಿ ಮಾರ್ಕೆಟ್ ಠಾಣೆ ವ್ಯಾಪ್ತಿಯ ಖಡೇಬಜಾರ್‌ನಲ್ಲಿ ಆರೋಪಿ ಪೊಲೀಸರ ವಶಕ್ಕೆ ಸಿಕ್ಕಿದ್ದಾನೆ.
ಇದೀಗ ಉದ್ಯಮಭಾಗ ಠಾಣೆಯಲ್ಲಿ ಆರೋಪಿ ಗಜಾನನ ಪಾಟೀಲ ತೀವ್ರ ವಿಚಾರಣೆ ನಡೆಯುತ್ತಿದೆ. ಖಡೇಬಜಾರ್ ವಿಭಾಗದ ಎಸಿಪಿ ಅರುಣ್‌ಕುಮಾರ ಕೋಳೂರ ಅವರಿಂದ ಆರೋಪಿ ವಿಚಾರಣೆ ನಡೆಯುತ್ತಿದ್ದು, ಆತನ ಹಿನ್ನೆಲೆಯನ್ನೂ ಗಮನಿಸಲಾಗುತ್ತಿದೆ. ಉದ್ಯಮಭಾಗ ಠಾಣೆಗೆ ಡಿಸಿಪಿ ಎಸ್‌.ಟಿ ಶೇಖರ್ ಕೂಡಾ ಆಗಮಿಸಿದ್ದು ವಿಚಾರಣೆಯಲ್ಲಿ ಪಾಲ್ಗೊಂಡಿದ್ದಾರೆ.
ಮಂಗಳವಾರ ಸಂಜೆ ನಡೆದಿದ್ದೇನು?
ಆ 9 ವರ್ಷದ ಬಾಲಕಿ ಎಂದಿನಂತೆ ಮನೆಯಿಂದ ಟ್ಯೂಷನ್‌ಗೆ ಹೊರಟಿದ್ದಳು. ಬೆಳಗಾವಿಯ ಹಿಂದವಾಡಿ ಪೋಸ್ಟ್ ಆಫೀಸ್ ಬಳಿ ಆಕೆ ಸಾಗುತ್ತಿದ್ದಾಗ ಒಬ್ಬ ವ್ಯಕ್ತಿ ಆಕೆಯ ಬಳಿ ಬರುತ್ತಾನೆ. ಆಕೆಗೆ ಚಾಕಲೇಟ್‌ ಕೊಡುವ ನೆಪದಲ್ಲಿ ಹತ್ತಿರ ಹೋಗುತ್ತಾನೆ. ಹತ್ತಿರ ಹೋದವನೇ ಆ ಬಾಲಕಿಯನ್ನು ಎತ್ತಿಕೊಂಡು ಹೆಗಲ ಮೇಲೆ ಹಾಕಿಕೊಳ್ಳುತ್ತಾನೆ. ಆ ರಸ್ತೆ ಆ ಹೊತ್ತಿನಲ್ಲಿ ನಿರ್ಜನವಾಗಿರುವುದನ್ನು ಗಮನಿಸಿಯೇ ಈ ಕೃತ್ಯವನ್ನು ನಡೆಸಿದ್ದಾನೆ.
ಅಪಹರಣಕಾರ ಬಾಲಕಿಯನ್ನು ಹೆಗಲ ಮೇಲೆ ಹಾಕಿಕೊಂಡು ಓಡಿಹೋಗುತ್ತಾನೆ. ಈ ಬಾಲಕಿ ಆತನ ಕೈಯಲ್ಲಿ ಕೊಸರಿಕೊಳ್ಳುತ್ತಾಳೆ. ಕೀಚಕನಿಂದ ಬಿಡಿಸಿಕೊಳ್ಳಲು ಬಾಲಕಿ ಹರಸಾಹಸ ಮಾಡುತ್ತಾಳೆ. ಹೆಗಲ ಮೇಲಿನಿಂದಲೇ ಆತನಿಗೆ ಹೊಡೆಯುತ್ತಾ ಕಚ್ಚುತ್ತಾ ರಕ್ಷಿಸಿಕೊಳ್ಳಲು ಯತ್ನಿಸುತ್ತಾಳೆ. ಅದರ ಜತೆಗೆ ಜೋರಾಗಿ ಚೀರುತ್ತಾಳೆ.
ಬಾಲಕಿಯ ಚೀರಾಟವನ್ನು ಕೇಳಿದ ಜನರು ಎಲ್ಲ ಕಡೆಯಿಂದ ಓಡಿ ಬರುತ್ತಾರೆ. ಮತ್ತು ಬಾಲಕಿಯನ್ನು ಹೊತ್ತುಕೊಂಡು ಹೋಗುತ್ತಿದ್ದ ಅಪಹರಣಕಾರನನ್ನು ಬೆನ್ನಟ್ಟುತ್ತಾರೆ. ಸ್ವಲ್ಪ ದೂರ ಓಡುವ ಆತ ಬಳಿಕ ಬಾಲಕಿಯನ್ನು ಕೆಳಗಿಳಿಸಿ ಓಡಿ ಹೋಗಿ ಸ್ಥಳೀಯರಿಂದ ತಪ್ಪಿಸಿಕೊಳ್ಳುತ್ತಾನೆ. ಘಟನೆಯ ಬಗ್ಗೆ ಅಕ್ಕಪಕ್ಕದ ಮನೆಯ ಸಿಸಿ ಟಿವಿ ಫೂಟೇಜ್‌ಗಳನ್ನು ಪರಿಶೀಲಿಸಿದ ಪೊಲೀಸರು ಗಜಾನನ ಪಾಟೀಲ್‌ ಎಂಬಾತನನ್ನು ಬಂಧಿಸಿದ್ದಾರೆ.
ಹಿಂದಿನ ಸುದ್ದಿ: Kidnap Case : ಹಾಡಹಗಲೇ ಟ್ಯೂಷನ್‌ಗೆ ಹೊರಟಿದ್ದ 9 ವರ್ಷದ ಬಾಲಕಿಯ ಅಪಹರಣ ಯತ್ನ